මාධ්‍ය වාර් තාව

26.12.2018

බුදු පිළිමයට හානි කිරීම සමස්ත ලංකා මුස්ලිම් වියතුන්ගේ සම්මේලනය හෙළා දකියි

දින කිහිපයකට පෙර මාවනැල්ල ප්‍රදේශයේ සිදු වූ ආගම අපහාසයට ලක් කිරීමේ ක්‍රියාදාමය සමස්ත ලංකා මුස්ලිම් වියතුන්ගේ සම්මේලනය හෙළා දකියි.

මෙරටේ ජීවත් වන බහුතර බෞද්ධ ජනතාවගේ වන්දනාවට ලක්ව පවතින බුද්ධ ප්‍රතිමාවට හානි කිරීම ජාතීන් අතර පවතින සහජීවනය හා අවබෝධය පළුදු කරන ක්‍රියාදාමයක් ලෙස සමස්ත ලංකා මුස්ලිම් වියතුන්ගේ සම්මේලනය දකියි. මෙලෙස ප්‍රතිමා විනාශ කිරීම හෝ ඒවා අපහාසයට ලක් කිරීම ඉස්ලාමීය ඉගැන්වීම නොවන බව තරයේ පවසා සිටින්නට කැමත්තෙමු.

බෞද්ධ ජනතාව බහුතරයක් ලෙස ජීවත් වන මෙරටේ මුස්ලිම් හින්දු හා කිතුනු යන සියලු ජනයා භේදයකින් තොරව එකට එක්ව අන්‍යොන්‍ය අවබෝධයකින් යුතුව තමතමන්ගේ ආගමික ඉගැන්වීම් පිළිපදිමින් ජීවත්ව එන පසුබිමක මෙවැනි ක්‍රියාදාමයන් අනවශ්‍ය ගැටලු ඇති වීමට හේතුවක් වනු ඇත.

එහෙයින් මෙම කටයුත්ත කවර කෙනෙකු විසින් සිදු කර තිබුණද ඔවුන් නීතිය හමුවේ ගෙනැවිත් ඔවුනට නිසි තීන්දුවක් නිසිලෙස ලබා දී මෙවැනි ක්‍රියාදාමයන් ඉදිරියට සිදු නොවන්නට සුදුසු ක්‍රියාමාර් ග ගන්නා මෙන් ද මෙය හේතුවක් කර ගනිමින් ප්‍රචණ්ඩත්වය ඇවිළීම වළක්වන මෙන් ද ගරු ජනාධිපතිතුමාගෙන් ද, අගමැති තුමාගෙන්ද, පොලිස්පති තුමා ගෙන්ද සමස්ත ලංකා මුස්ලිම් වියතුන්ගේ සම්මේලනය ඉල්ලා සිටියි.

අෂ්-ෂෙයික් එම්.එම්. අහ්මද් මුබාරක්

ලේකම්

සමස්ත ලංකා මුස්ලිම් වියතුන්ගේ සම්මේලනය

2018.03.22

ප්‍රශ්නයන් ඇති වන සෑම විටකම මුස්ලිම්වරුන් වන අප ශුද්ධ වූ අල් කුර්ආනය, නබිතුමන්ගේ වැකි වලට අනුව හා එතුමන්ගේ සත්‍ය සහගාමීන්ගේ ආදර්ශයන් මගින් නිසි අවබෝධය ලබා ගෙන කටයුතු කිරීම ඔස්සේ එම ප්‍රශ්නවලට පිළියම් සොයා ගැනීමට හැකි වේ යනුවෙන් සෑම මුස්ලිම්වරයෙකුම තම සිත තුල පතිත කර ගත යුතු වේ.  

විවිධාකාර ජාතීන් හා ආගමිකයන් අතර ජීවත්වන ශ්‍රී ලාංකික මුස්ලිම්වරුන් සාමුහික සහජීවනය පවත්වාගෙන  සුහදත්වයෙන්  කටයුතු කර ඇති බව ඉතිහාසය සාක්‍ෂි දරයි. මෙම අකාරයට ඉදිරයේදී ද කටයුතු කළ යුතුයි යනුවෙන් සමස්ත ලංකා ජම්ඉයියතුල් උලමා සංගමය අවධාරණය කරයි.   

අන්තර්ජාලයේ සමාජ මාධ්‍යයන් පරිහරණය කරන විට අප ඉතා අවධානයෙන් කටයුතු කළ යුතුය. පසු ගිය දිනයන්හි නුවර ප්‍රදේශයේ සිදු වූ කෝලාහලකම්  නිසා සහ්රාන් මව්ලවි නැමැත්තා විසින් අනෙකුත් ආගමිකයන්ට අපහාස කර ශුද්ධ වු අල් කුර්ආන් වැකියන් හුවා දක්වා ඉතා ඉක්මනින්ම යුද්ධයකට ජනතාව සුදානම් වන්න යනුවෙන් පවසා ඇති වීඩියෝ පටය සමාජ මාධ්‍යයන් තුළ දැක ගැනීමට හැකිය. මෙම පුද්ගලයාගේ මෙම කලහකාරී ප්‍රකාශය සමස්ත ලංකා ජම්ඉයියතුල් උලමා සංගමය තරයේ හෙළා දකියි. මෙවන් ප්‍රශ්නසහගත අවස්ථාවන්වලදී සුළුතරයක් වූ මුස්ලිම්වරුන් ක්‍රියා කළ යුතු ආකාරය සම්බන්ධව ඉස්ලාමීය විද්වතුන් විසින් ඉස්ලාමීය නිවැරදි මග පෙන්වීම්  අපට ලබා දී ඇත. 

ප්‍රශ්න සහගත අවස්ථාවන් වලදි මෙවැනි විඩියෝ පට අපගේ සමාජය වැරදි මාර්ගයට යොමු කරාවි. එම නිසා ප්‍රශ්න සහගත අවස්ථාවන් වලදී රටේ නීතියට ගරු කරමින් තමන්ව හා තමාගේ දේපළ ආරක්‍ෂා කර ගැනීමට ආත්ම ආරක්‍ෂාව තහවුරු කර ගැනීම අප සියලු දෙනාගේම වගකීම වේ.

ප්‍රචන්ඩත්වය හා ප්‍රශ්නයන්ව දැඩිව හෙළා දකින ඉස්ලාමය අනෙකුත් ආගමිකයන් සමග කටයුතු කළ යුතු ආකාරය ද පෙන්වා දී ඇත. එලෙසම ජීහාද් පිළිබඳව සම්පූර්ණ විග්‍රහයක් සමස්ත ලංකා ජම්ඉයියතුල් උලමා සංගමය විසින් ප්‍රකාශයට පත් කර  ඇත. එම නිසා මෙවැනි වීඩියෝ පට හා ප්‍රචාරයන් අපව තව තවත් අනවශ්‍ය කෝලාහලකම් වලට මං පාදන නිසා එවැනි දේවල් වලින් සම්පූර්ණයෙන්ම ඉවත් වී ක්‍රියා කරන මෙන් සමස්ත ලංකා ජම්ඉයියතුල් උලමා සංගමය ඉල්ලා සිටියි.

අෂ්-ෂේක් එච්. උමර්දීන්

ලේකම් (ප්‍රචාරක කමිටුව)

සමස්ත ලංකා ජමිඉයියතුල් උලමා සංගමය         

06.03.2018 (17.06.1439)

පසුගිය 2018 මාර්තු 3 වන දින මහනුවර ආසන්නයේ දිගන හා තෙල්දෙණිය ප්‍රදේශවල ඇති වුනු කලහකාරී තත්ත්වය නිසා ජීවිත මෙන්ම මුස්ලිම්වරුන්ට අයත් රුපියල් කෝටි ගණන් වටිනා දේපළ ද විනාශ කරන ලද ආකාරය අප කවුරුත් දනිමු.

මෙම තත්ත්වය සමතයකට පත් කිරීමට මුස්ලිම් ආගමික ප්‍රධානීන් හැකි සෑම උත්සාහයක් ගනිමින් සිටිති. තත්ත්වය පාලනය කිරීමට පියවර ගන්නා මෙන්ම එය දිවයිනේ අන් තැන්වලටත් පැතිරීම වළක්වන්නට කටයුතු කරන මෙන් රජයෙන් ද අදාළ වගකිව යුතු බලධාරීන් හා දේශපාලන නායකයන්ගෙන් ද අප සංගමය ඉල්ලා සිටින අතර ඒ අනුව අදාළ විවිධ පාර්ශව මෙය සම්බන්ධ ප්‍රයත්න වල යෙදෙමින් සිටිති.

අප සංගමයේ සාමාජිකයින් පෙර දින ගරු අග්‍රාමාත්‍යවරයා හමු වී තත්ත්වය ගැන සාකච්ඡා කළ අතර ජම්ඉයියතුල් උලමා මහනුවර ශාඛාව හරහා එම ප්‍රදේශයේ හානියට ලක් වුවන් හමු වී අවශ්‍ය මග පෙන්වීම් හා සහාය ලබා දීමට ද කටයුතු කරන ලදී. මහනුවර දිස්ත්‍රික්කයේ ප්‍රමූඛ පුද්ගලයන් සමග එක්ව අප සංවිධානයේ සාමාජිකයන් ප්‍රචණ්ඩත්වයන් ඇති වුනු පෙදෙස්වලට ගොස් තත්ත්වය සියැසින් දැක බලා ගෙන අවශ්‍ය උදව් උපකාර ලබා දීමට පියවර ගනිමින් සිටිති. තත්ත්වය යහපත් අතට හරවන මෙන් ප්‍රාර්ථනා කරන මෙන් මුස්ලිම් ප්‍රජාව ඇතුළු පොදු ජනයාගෙන් අප සංගමය ඉල්ලා සිටියි.

තත්ත්වය තවත් අයහපත් අතට පෙරළිය හැකි හෝ රටේ අන් තැන්වලත් නොසන්සුන්කාරී තත්ත්වයන් උද්ගත විය හැකි ආකාරයේ ක්‍රියාවන්වල නොයෙදීමට අප කවුරුත් වගබලා ගත යුතුය. අප කවදත් යොමු විය යුත්තේ අල්ලාහ් දෙසට හා ඔහුගේ උදව් දෙසටය. එමෙන්ම ඇති වී තිබෙන හානිය නිසි පරිදි ලේඛන ගත කොට නීතිමය පියවර ගැනීමට හානියට පත් වූවන් ක්‍රියා කළ යුතුය. ඒ හැර නීතිය අතට ගැනීමට මුස්ලිම්වරුන් උත්සාහ නොකළ යුතුය. තමතමන්ගේ පෙදෙස්වල මෙන්ම පුද්ගලික ආත්මාරක්ෂාව ගැන ද විමසිල්ලෙන් සිටිය යුතුය. මෙම කාරණාවෙහි ඒ ඒ ගම්, නගරවල ප්‍රජාව ද මුස්ලිම් ප්‍රජා නායකයන් හා ආගමික ප්‍රධානීන් ද අදාළ පෙදෙස්වල ජම්ඉයියතුල් උලමා ශාඛාවේ ආගමික වියතුන් සමග එක්ව සහයෝගයෙන් කටයුතු කරන මෙන් අප සංගමය ඉල්ලා සිටියි.

මෙම නොසන්සුන්කාරී තත්ත්වය සමතයකට පත් කිරීමට විවිධ වෑයම්වල යෙදී සිටින ජන නායකයන් හා ආගමික ප්‍රධානීන් සම්බන්ධ විවේචනාත්මකව අදහස් දැක්වීමෙන් අප වැළකී සිටිම නැණවත් වනු ඇත. එමෙන්ම තත්ත්වය සංකීර්ණ කළ හැකි විවිධ කටකථා සහ තහවුරු නොවුනු දූෂමාන සෘණාත්මක ආරංචි පැතිරවීමෙන් වැළකී සිටින මෙන් ද අප සංගමය ඔබ සැමගෙන් කාරුණිකව ඉල්ලා සිටියි. සැමගේම හදවත්වල අප ගැන යහපත් ආකල්පයක් ඇති කරන ලෙසින් අප ක්‍රියා කළ යුතු අතර ඒ සඳහා දෙවියන්ගෙන් නිතර ඇයැද සිටීමද වැදගත්ය. මන්දයත් මිනිසුන්ගේ හදවත් ඇත්තේ දෙවියන් සතුය. එනිසා අතීතයේ අප මෙරටෙහි වාසය කළා සේ සුහදශීලීව හා අන්‍යෝන්‍ය ගරුත්වයෙන් වාසය කළ හැකි වාතාවරණයක් රටේ නැවතත් උදාකර දෙන මෙන් අල්ලාහ්ගෙන් ඇයැද සිටින මෙන් අප සංගමය ඉල්ලා සිටියි.

අෂ් ෂෙයික් එම්. එම්. අහ්මද් මුබාරක්

මහලේකම්,

සමස්ත ලංකා මුස්ලිම් ආගමික විද්වතුන්ගේ සංගමය.

04.02.2018

සමස්ත ලංකා ඉස්ලාමීය වියතුන්ගේ සංගමයේ ශෝක පණිවිඩය

බෙල්ලන්විල රජමහා විහාරාධිකාරී මහාචාර්ය අතිගෞරවනීය බෙල්ලන්විල විමලරතන අනුනාහිමිපාණන්ගේ අපවත්වීම පිළිබඳව ගෞරවනීය මහා සංඝ රත්නය හා සියලු බෞද්ධ සැදැහැවතුන් වෙතට ශ්‍රී ලංකා ජම්ඉයියතුල් උලමා (ශ්‍රී ලංකා ඉස්ලාමීය විද්වතුන්ගේ) සංගමයේ හා මුස්ලිම් ප්‍රජාවගේ බලවත් ශෝකය මෙම අවස්ථාවේ දන්වා සිටීමට කැමැත්තෙමු.

යුක්තිය හා සාධාරණය මෙන්ම විනය ගරුක සමාජයක් ගොඩනැගීමේ කාර්යයේ දී මහා කැපවීමකින් කටයුතු කළ උන්වහන්සේගේ අපවත්වීම අපගේ මාතෘ භූමියේ ඉදිරි ගමනට අති විශාල පාඩුවක් ලෙස අපි දකින්නෙමු. ආගමික හා වාර්ගික සංහිඳියාව වෙනුවෙන් නිරතුරුව පෙනී සිටිමින් කටයුතු කළ උන්වහන්සේගේ උදාර සේවය මෙම අවස්ථාවේදී ගෞර්ව පූර්වකව සිහිපත් කරන්නෙමු. උන්වහන්සේ විසින් පෙන්වා දුන් ආදර්ශමත් මඟ අනුගමනය කරමින් සාමකාමී හා සුහදත්වය පදනම් වූ මාතෘ භූමියක් ගොඩනැගීමට ලක් මවගේ සියලු දරුවන් කැප වී කටයුතු කිරීමට අධිෂ්ඨාන කර ගැනීම උන්වහන්සේට කළ හැකි උත්තරීතර උපහාරය ලෙස අපි දකින්නෙමු.

අෂ්-ෂේක් මුෆ්ති එම්. අයි. එම්. රිස්වි

සභාපති,

සමස්ත ලංකා ඉස්ලාමීය විද්තුන්ගේ සංගමය

අෂ්-ෂේක් එම්.එම්.ඒ.  මුබාරක්

මහ ලේකම්,

සමස්ත ලංකා ඉස්ලාමීය විද්තුන්ගේ සංගමය

 ACJU/GEN/01-18/001

2018.01.22/ 1439.05.04

පළාත් සභා මැතිවරණය : ඡන්ද දායකයින් හා ඡන්ද අපේක්‍ෂකයින් දැනගැනීම පිණිස

සමස්ත ලංකා ජම්ඉයියතුල් උලමා සභාවේ මග පෙන්වීම

පළාත් සභා මැතිවරණය ආසන්න වෙමින් පවතියි. මැතිවරණ පිටියද දිනෙන්  දින උණුසුම් වෙමින් තිබේ. මෙවන් තත්ත්වයක ඡන්ද දායකයින් මෙන්ම ඡන්ද අපේක්‍ෂකයින් විසින්ද අනුගමනය කළ යුතු ආචාර ධර්ම ගැන පැහැදිලි කිරීම අපගේ වගකීමක් යැයි අප විශ්වාස කරමු. සියල්ලට ප‍්‍රථම රටේ දියුණුව වෙනුවෙන් සිදු කරන දායකත්වයක් ලෙසින් මැතිවරණ සියල්ල අප බැලිය යුතුය යැයි සඳහන් කරන්නට කැමැත්තෙමු.

අපගේ මව්බිමේ සාරධර්ම මුල් කරගත් දේශපාලන සංස්කෘතියක් බිහි කිරීමට හා යහපාලනයක් සඳහා වන අස්තිවාරමක් යෙදීමට සහය දැක්වීම පිණිස ලැබී ඇති අගනා අවස්ථාවක් යැයි එළඹෙන පළාත් සභා ඡන්ද විමසීම විස්තර කළහොත් එය නිවැරදි යැයි අප සිතමු.

මැතිවරණයකදී ඡන්දය ප‍්‍රකාශ කිරීම යනු ‘නිර්දේශ කිරීම’ හෙවත් ‘ෂෆාඅත්’ යැයි ඉස්ලාමීය කෝණයෙන් නිර්වචනය කරනු ලබන කි‍්‍රයාවකි. එමෙන්ම ‘වකාලත්’ හෙවත් ‘වගකීම භාර දීම’ ලෙසින්ද මෙය හැඳින්විය හැකිය. මේ සියල්ලට වඩා මෙය ඉස්ලාමීය කෝණයෙන් ‘ෂහාදත්’ නම් වන සාක්‍ෂි දැරීමකි. නුසුදුසු පුද්ගලයෙකු හෙවත් අපේක්‍ෂකයෙකු වෙනුවෙන් ඡන්දය ප‍්‍රකාශ කිරීම අසත්‍ය සාක්‍ෂි කීමට සමාන වරදක් වනු ඇත. එය අසත්‍ය සාක්ෂියක් නොවී සත්‍යය සාක්ෂියක් වීමට පහත කරුණු වෙත ඡන්ද දායකයින් සිය අවධානය යොමු කළ යුතුය :

• වංචාව, දූෂණය හා සම්බන්ධ නොවුනු, පාපකාරී අන්දමින් හා වැරදි මාර්ගවලින් ධනය නොඉපයූ යහචර්යා ඇති යහපත් ඡන්ද අපේක්‍ෂකයින්ට පමණක් අපගේ ඡන්දය ලබා දිය යුතුය.
• ඡන්ද අපේක්‍ෂකයින් රටට ආදරය කරන, සමාජ යහපත ගැන සිතන හා රට ගොඩ නැගිය යුතුය යැයි අවංකව සිතන මෙන්ම එයට හැකියාව හා දැනුම ඇති ඡන්ද අපේක්‍ෂකයන් යන්න තහවුරු කර ගත යුතුය.
• දේශපාලනය හා තනතුරු යනු පුද්ගලික ආදායම දියුණු කිරීමේ මාර්ගයක් ලෙසින් නොබලා දේශපාලනය යනු උසස් සමාජ මෙහෙවරක් හා සත්කාරයක් ලෙස දකින සේවා මානසිකත්වයක් ඇති දැන උගත් යහපත් අපේක්‍ෂකයින්ට පමණක් අපගේ වටිනා ඡන්දය ලබා දිය යුතුය.
• රටේ නීතිය උල්ලංඝනය කරනවුන් හා නීති විරෝධි, එමෙන්ම මැර ක‍්‍රියාවල යෙදෙන්නන් අප එකහෙළා පිටු දැකිය යුතුය.
• ජාති හා ආගම් භේද උසිගන්වන ආකාරයෙන් සිය ඡන්ද ව්‍යාපාරය ගෙන යන අපේක්‍ෂකයින්ට ඡන්දය ලබා නොදිය යුතුය.
• තමන්ගේ දේශපාලන ප‍්‍රතිවාදීන් හා වෙනත් පක්‍ෂවලට පරුෂ බසින් බැන වදින නොමනා ආකාරයෙන් විවේචනය කරන ඡන්ද අපේක්‍ෂකයන් පිටු දැකිය යුතුය.

කෙටියෙන් කිවහොත් අපගේ ඡන්දය ලබා දිය යුත්තේ යහපත් චර්යා ඇති උගත් නැණවත් හා හැකියාව ඇති හා රටේ පොදු යහපත ගැන සිතන අපේක්‍ෂකයින්ටය.

පහත කරුණ වෙත ඡන්ද අපේක්‍ෂකයින් සිය අවධානය යොමු කළ යුතුය :

• අපගේ මාතෘ භූමිය වන ශ‍්‍රී ලංකාවේ යහපාලනයක් ඇති විය යුතුය, සියලුම ජන කොටස් එක්සත්ව සාමයෙන් සමගියෙන් වාසය කළ යුතුය, රට සෑම අංශයකින්ම සුඛිත මුදිත විය යුතුය, සංවර්ධන මාර්ගයේ ගමන් කළ යුතුය යන්න ඡන්ද අපේක්‍ෂකයින්ගේ ඒකායන අපේක්‍ෂාව විය යුතු අතර ඔවුන් යහපාලන ආකල්පය විෂයයෙහි රටට හොඳ ආදර්ශයක් විය යුතුය යැයි අප අපේක්ෂා කරන්නෙමු.
• දේශපාලන තනතුරක් යනු වාසනාවක් හෝ වාසියක් හෝ නොමනා ලෙසින් මුදල් ඉපැයීමට ලැබුනු බලපත‍්‍රයක් හෝ නොව. එය ජනතා සේවය සඳහා වන අගනා අවස්ථාවක් යැයි අපේක්‍ෂකයින් සිතිය යුතුය. පුද්ගලික ජීවිතයේ මෙන්ම පොදු දිවියෙහිද ආධ්‍යාත්මක සදාචාරාත්මක සිල්වත් බව, යහචර්යාව, අවංක බව ආදිය තමන් සතු වීම ගැන ඡන්ද අපේක්‍ෂකයින් සැලකිලිමත් විය යුතුය.
• චාම් බව, කැපවීම, ත්‍යාගශීලී වීම වැනි උසස් ගුණාංගවලින් හා ක‍්‍රියාවන්වලින් ඉස්ලාමයේ හා මුස්ලිම් සමාජයාගේ සාක්ෂිකරුවන් වශයෙන් ඡන්ද අපේක්‍ෂකයින් හා දායකයින් පත්විය යුතු යැයි අපි අපේක්ෂා කරන්නෙමු.
• වැරදි හා අපරාධ කි‍්‍රයාවල නොයෙදෙන නීතිගරුක පුද්ගලයන් වන අතරම සිය තනතුර හෝ බලය අපයෝජනය කරන්නන් නොවිය යුතුය. එමෙන්ම වෛරය, ද්වේෂය හෝ ප‍්‍රචණ්ඩත්වය උසි ගන්වන්නන් ඡන්ද ලබා ගැනීම හෝ අනෙකුත් පුද්ගලික වාසි තකා ජනකොටස් භේද කරන්නන් බවට ඡන්ද අපේක්‍ෂකයින් පත් නොවිය යුතුය.
• කිසි විටෙක සාමාන්‍යය පුද්ගලයින්ට හෝ ජනකොටස්වලට අසාධාරණයක් සිදුවන ආකාරයෙන් කටයුතු නොකරන්නේ යැයි වගකිව යුත්තෙකු විය යුතුයි.
• තමන්ගේ ජනකොටසේ අයිතිවාසිකම් ගැන කථාකරන විට වුවද එය අන් ජනකොටස්වල හැඟීම්වල හානි ඇති කරන ආකාරයෙන් සිදු නොකර විනීත බස් වහරෙන් හා ශ්‍රේෂ්ඨ සම්පන්න ලෙසින්ම සිදු කළ යුතුය.

අවසාන වශයෙන් සියලුම අවස්ථාවල හා තත්ත්වයන්හි අල්ලාහ්ට බියබැතිව කටයුතු කිරීමට අප සියල්ලන්වම අල්ලාහ් සෘජු මග ගමන් කරවා අපගේ යහකි‍්‍රයා සියල්ල පිළිගනිත්වා.

අෂ් ෂෙයික් ඒ. සී. අගාර් මුහම්මද්

නියෝජ්‍ය සභාපති / දේශපාලන අංශය භාර ප‍්‍රධානි

සමස්ත ලංකා ජම්ඉයියතුල් උලමා

මාධ්‍ය ප‍්‍රකාශය - 12.07.2017

2017 ජූලි 09 ඉරිදා දින මව්බිම පුවත්පතෙහි පල වූ ”ගුවන් විදුලි සංස්ථාවේ අයුතු වැඩ” සම්බන්ධවයි

2017 ජූලි 09 ඉරිදා දින මව්බිම පුවත්පතෙහි ජනමාධ්‍ය හා මුදල් අමාත්‍ය මංගල සමරවීර මහතා විසින් අනාවරණය කොට තිබෙන මෙගා හර්ට්ස් 102.1 නාළිකාව ඔස්සේ අන්තවාදි වැඩසටහන් පවත්වාගෙන යන්නේ යැයි සිදු කර ඇති ප‍්‍රකාශය සමස්ත ලංකා ජම්ඉයියතුල් උලමා සංගමය වන අප එය විශ්වාස නොකරන්නෙමු. එවැනි අසත්‍ය ප‍්‍රකාශයක් එතුමා සිදු කර ඇත්නම් එයද සමස්ත ලංකා ඉස්ලාමීය විද්වතුන්ගේ සංගමය වශයෙන් අප තරයේ ප‍්‍රතික්‍ෂ්ප කරන්නෙමු.

1956 සිට නොමිලේ විකාශය වු මෙම සේවාව මෑත කාලයේදී වාණිජ සේවාවක් ලෙසට පත් විය. නමුත් මුස්ලිම් ජනයා එම සේවාව ලබා ගැනීම සඳහා එයට දායක්වය ලබා දීම අප සියලු දෙනාටම නොරහසකි. එම වැඩසටහන පසු ගිය අවුරුදු 65 කට අධික කාලයකට වඩා පැවත ඒම ශී‍්‍ර ලංකා ගුවන් විදුලි සංස්ථාව මුස්ලිම් සමාජයට කළ මහගු සේවාවක් වේ. මෙම කාර්යභාරය නිසා මුස්ලිම් සමාජය සෑම දිනකම ශී‍්‍ර ලංකා ගුවන් විදුලි සංස්ථාවට හා රජයට තමන්ගේ තුතිය පුද කරයි. තවද මෙම සේවාව මගින් මුස්ලිම් සමාජයට පමණක් නොව අපගේ අන් ආගමික සහෝදරයින් හටද ප‍්‍රයෝජනය ගෙන දෙන වැඩසටහන සිදු කරන අතර ඔවුන් විසින් එය අගය කොට සැලකූ බව අපට අසන්නට ලැබුනි.

මෙකි වැඩසටහන් ඉතා සාර්ථකව පැවැත්වෙන කාලවකවාණුවක එය නවතා දැමීමට සිදුකරන කුමන්ත‍්‍රණයක් දෝ යන සැකය අපට මතු වී ඇත. එම නාලිකාවෙහි වැඩසටහන් සිදු වන්නේද රාජ්‍යය අනුග‍්‍රහය මගින්ය. අද රට තුල විවිධාකාර පුද්ගලයින් සිදු කරගෙන යන අන්තවාදී වැඩ කටයුතු වලට මෙම ප‍්‍රකාශය ඉමහත් රුකුලක් බවට පත් වී ඇත. තවද පාරම්පරිකව මෙම රට තුල සෑම ජාතියක්ම සහජීවනය හා සංහිඳියාව පැවත එන අතර තම තමන්ගේ අගමික වැඩ කටයුතු දියත් කරමින් සිටිති. තවද ශී‍්‍ර ලාංකේය මුස්ලිම් ජනතාව කිසිවිටක අන්තවාදයට හෝ ත‍්‍රස්තවාදයට සහයෝගය දක්වන්නේ ද නැත. මුස්ලිම් ප‍්‍රජාව මෙරට තුල සාමය සහජීවනය හා සංහිඳියාව ඇති කිරීමට කැප වී වැඩ කටයුතු කරගෙන සිටිති. අප ශී‍්‍ර ලාංකිකයන් ලෙස ජීවත් වී මෙම මාතෘ භූමියට කළ හැකි උපරිමය සිදු කිරීම අපගේ අපේක්‍ෂාව වේ. එම නිසා මෙවැනි ප‍්‍රකාශයන් සිදු කර රට තුල පවතින සහජීවනය හා සංහිඳියාවට තර්ජනයක් ඇති නොකිරීමට සෑම වගකිවයුත්තෙක්ම වග බලා ගත යුතු වේ.
මෙයට

අෂ් ෂේක් එම්.එම්.ඒ. මුබාරක්
මහ ලේකම්
සමස්ත ලංකා ඉස්ලාමීය විද්වතුන්ගේ සංගමය

23.07.2015

සමස්ත ලංකා ඉස්ලාමීය විද්වතුන්ගේ සංගමය විසින් 2015 ජූලි මස 22 දින පහත සඳහන් ශ්‍රී ලාංකේය ප්‍රධාන මුස්ලිම් සංවිධානයන්හි සහභාගිත්වයෙන් සංවිධානය කරන ලද අන්තවාදීත්වයට විරෝධී සමුළුවේ නියෝජිතයින් වන අපි සියලුම ආකාරයේ ප්‍රචණ්ඩත්වයන් හා ත්‍රස්තවාදී ක්‍රියාවන් ඒකාර්ථයෙන් හා ඒකමතිකව හෙළාදකින්නෙමු.

ඉස්ලාමය සකල මනුෂ්‍ය වර්ගයාටම මෛත්‍රිය හා කරුණාව දැක්වීම පදනම් කරගත් දහමකි. එය සදාතනික සාමයේ, ශාන්ත භාවයේ, ආරක්ෂාවේ හා සහෝදරත්වයේ උල්පතකි. ආගමික හෝ වාර්ගික භේදයකින් තොරව ඉස්ලාමය මිනිස් ජීවිතයන්ට උත්තරීතර අගයක් ලබාදී ඇත්තේ එක් අයෙකුව නිරපරාදේ මරා දැමීම මුළු මහත් මනුෂ්‍ය වර්ගයාම මරා දැමීම හා සම කරමිනි. සාමය හා සහෝදරත්වය සම්බන්ධයෙන් වූ එහි ඉගැන්වීම් සකල මනුෂ්‍ය වර්ගයා කෙරෙහිම අදාළ හා ආවරණය කරන්නක් ලෙස පවතී. කිසිදු භේදයකින් තොරව සැමට සහෝදරත්වයෙන්, මෛත්‍රියෙන්, සාධාරණත්වයෙන්  හා යුක්ති ගරුකව කටයුතු කරන ලෙස ඉස්ලාමය උගන්වයි. ඉස්ලාමය සියලුම ආකාරයේ හිංසනයන්, කලහකම් හා ත්‍රස්ත ක්‍රියාවන් ඉතා දැඩි අයුරින් හෙළාදකියි. ඉස්ලාමීය ඉගැන්වීම් අනුව හිංසනය, අනර්ථකම්, කලහකම් හා මිනිස් ඝාතනයන් බරපතල පාපයන් හා අපරාධයන් ලෙස සැලකේ.

අයි.එස්.අයි.එස්. සංවිධානය සාහසික අන්තවාදී සංවිධානයක් වේ. එය නොමග ගිය සංවිධානයක් වන අතර එහි ක්‍රියාකාරකම් ඉස්ලාමීය ප්‍රතිපත්ති හා ශික්ෂාවන්ට පටහැනිය. අවාසනාවට බටහිර මාධ්‍ය විසින් ‘ජිහාද්’ යන පදය වැරදි හා අනිසි අයුරින් යොදා ගනිමින් එය මිනිස් ඝාතන හා අසාධාරණ යුද ගැටුම් අර්ථවත් කරන්නක් බව හුවා දක්වමින් කටයුතු කරයි. ඕනෑම සංවිධානයක් අහිංසක මිනිසුන් ඝාතනය කිරීමට ‘ජිහාද්’ සංකල්පයේ මුවාවෙන් කටයුතු කරන්නේ නම් සත්‍යය වශයෙන්ම එය පරිපූර්ණ ලෙසම ඉස්ලාමයට පටහැනි ක්‍රියාවකි. නිවැරදි ඉස්ලාමීය මුලාශ්‍ර පදනම් කරගනිමින් සමස්ත ලංකා ඉස්ලාමීය විද්වතුන්ගේ සංගමය විසින් ‘ජිහාද්’ සංකල්පයේ ආධ්‍යාත්මිකත්වය විග්‍රහ කරමින් නිකුත් කොට ඇති ග්‍රන්ථය අපි සම්පූර්ණයෙන්ම  අනුමත කරන්නෙමු.

2014 ජූලි  මස 6 වැනි දින ශ්‍රී ලංකා ගුවන් විදුලි සංස්ථාව මගින් විකාශනය කරන ලද සවිස්තරාත්මක ගුවන් විදුලි වැඩ සටහන මගින් හා 2014 අගෝස්තු මස 30 වැනි දින නිකුත් කරන ලද මාධ්‍ය ප්‍රකාශනය මගින් සමස්ත ලංකා ඉස්ලාමීය විද්වතුන්ගේ සංගමය විසින් අයි.එස්.අයි.එස්. සංවිධානය ඉස්ලාමයට පටහැනි අන්තවාදී සංවිධානයක් ලෙස හෙළිදරවු කිරීමට ගත් පියවරයන් අපි ඉතා අගය කොට සලකන්නෙමු.             

අයි.එස්.අයි.එස්. හෝ අන් ඕනෑම අන්තවාදී සංවිධානයක් සමග ඉස්ලාමය කඩතුරාවක් කරගනිමින් සම්බන්ධතාවන් පවත්වන සියල්ලන් ව අපි ඉතා දැඩි ව හා ඒකාර්ථයෙන් ම හෙළාදකින්නෙමු. ඕනෑම ආකාරයේ අන්තවාදී  ක්‍රියාවන් හි නියැලෙන ඕනෑම පුද්ගලයෙකු හෝ සංවිධානයක් සාධාරණීය කිරීමට සහතික වශයෙන්ම කිසිදු අවස්ථාවක අපි ඉදිරිපත් නොවන්නෙමු.     

අන්තවාදී ක්‍රියාවන් හි නියැලෙන සියලු පුද්ගලයන්ට එරෙහි ව තරාතිරම හෝ අන් කිසිදු සාධකයක් ගැන තැකීමකින් තොරව නීතිය දැඩි අයුරින් ක්‍රියාත්මක කරන ලෙස අපි රජයෙන් ඉතා ඕනෑකමින් ඉල්ලා සිටින්නෙමු. අපගේ මාතෘ භූමියෙන් මෙවන් ව්‍යසනයන් සහමුලින්ම තුරන්කර දැමීම පිණිස සමාජ විරෝධී හා අපරාධකාරී  පුද්ගලයින් ගැන කටයුතු කරන සියලු රාජ්‍ය ආයතන වෙත අපගේ පූර්ණ සහයෝගය හා උපකාරයන් ලබා දීමට සූදානමින්  සිටින්නෙමු.

මෙම කර්තව්‍යයේදී ඉතා වගකීම් සහිත හා නිවැරදි අරමුණු පදනම් කරගනිමින් කටයුතු කරන ලෙස සියලු මාධ්‍ය ආයතනයන් වෙත ඉතා කාරුණික ව ආයාචනය කර සිටින්නට කැමැත්තෙමු. විවිධ වාර්ගිකයින් අතර රටේ දැනට පවතින ශුභවාදී සහජීවන රටාවට හානියක් වන අයුරින් මෙවන් ක්‍රියා හා බැඳි ප්‍රවෘත්ති සංවේදීත්වය දනවන ලෙසින් පළ නොකරන ලෙසද ඉතා කාරුණික ව ඉල්ලා සිටින්නෙමු.    

ආරම්භයේ සිට ශත වර්ෂ ගණනාවක් තිස්සේ ශ්‍රී ලාංකේය මුස්ලිම් ප්‍රජාව තම මාතෘ භූමියට කොන්දේසි විරහිත පක්ෂපාතිත්වයෙන් මෙන්ම දේශාභිමානය හා දේශානුරාගයෙන් යුක්තව කටයුතු කොට ඇත. අපගේ මාතෘ භූමියට අපකීර්තියක් හෝ කැළලක් වන අයුරින් කිසිදු ක්‍රියාවක් කිරීමට හෝ අනුමත කිරීමට මුළුමහත් මුස්ලිම් ප්‍රජාවම බැඳී සිටින බව ඒකාර්ථයෙන් හා ඒකමතිකව සහතික කරන්නෙමු.

1. All Ceylon Jamiyyathul Ulama (ACJU)
2. Muslim Council of Sri Lanka (MCSL)
3. Sri Lanka Jamat e Islami (SLJI)
4. Jama'athus Salama
5. Jamiyyathus Shabab (AMYS)
6. Al-Muslimath
7. International Islamic Relief Organization (IIRO)
8. World Assembly of Muslim Youth (WAMY)
9. All Ceylon YMMA Conference (YMMA)
10. Thableegh Jama'ath
11. All Ceylon Thowheedh Jama'ath (ACTJ)
12. Colombo District Masjid Federation (CDMF)