Super User

Super User

ACJU/MED/2020/001

2020.05.06

ඇඳිරි නීතිය ලිහිල් කිරීම හා රමළාන් මාසයේ ඉතිරි දින කිහිපය සම්බන්ධ උපදෙස්

කෝවිඩ්-19 වසංගතයේ අවදානම තවමත් අප රටින් මුළුමනින්ම ඉවත් නොවී තිබුණ ද මහජන අවශ්‍යතාව තකා යම් කොන්දේසි හා උපදෙස් සහිතව පවතින ඇඳිරි නීතිය ලිහිල් කරන්නට රජය පියවර ගනිමින් සිටියි. මෙවන් තත්ත්වයක පුරවැසියන් ලෙසින් වගකීමෙන් යුතුව හා අපගේ මෙන්ම අන් අයගේද ආරක්ෂාව ගැන සැලකිලිමත් වෙමින් ප‍්‍රවේශමින් අප කටයුතු කළ යුතුය. රජය විසින් නියම කරන උපදෙස් හා කි‍්‍රයාමාර්ග එලෙසින්ම අනුගමනය කළයුතු අතරම සමස්ත ලංකා ඉස්ලාම් ආගමික විද්වතුන්ගේ සභාව විසින් දෙනු ලබන පහත කරුණුද සැලකිල්ලට ගනිමින් කටයුතු කරන මෙන් ලාංකික මුස්ලිම් ප‍්‍රජාවගෙන් අප ඉල්ලා සිටිමු.

  • රමළාන් මාසය උදා වන්නට දින කිහිපයකට පෙර අප විසින් ලබා දෙන ලද උපදෙස් අනුව ලාංකික මුස්ලිම් ජනයා කටයුතු කරමින් සිටීම ගැන සතුටු වන අතර ම සියලු ප්‍රජාවන්ගේ දෙළොව ජයග්‍රහණය වෙනුවෙන් සමස්ත ලංකා ඉස්ලාම් ආගමික විද්වතුන්ගේ සභාව ප්‍රාර්ථනා කරන්නෙමු. එම උපදෙස් ඉදිරි දින කිහිපයටත් එලෙසින්ම අනුගමනය කරන මෙන් ඉල්ලා සිටිමු. එමෙන්ම සලාතය, කුර්ආන් පාරායනය, ප‍්‍රාර්ථනා ආදියෙහි වැඩි වැඩියෙන් නිරත විය යුතු යැයි ඉල්ලා සිටින්නෙමු.
  • කොරෝනා තර්ජනය තවමත් පහව ගොස් නොමැති හෙයින් රජය විසින් ඇඳිරි නීතිය පියවරෙන් පියවර ලිහිල් කළ ද අප ඉතාමත් ප‍්‍රවේශමෙන් කටයුතු කළ යුතුය. ඒ අනුව රජයට උපරිම සහය ලබා දෙමින් සෞඛ්‍ය අංශවල උපදෙස් අකුරටම පිළිපැදිය යුතුය. අපගේ හා පවුලේ අයගේ මෙන්ම රටේ ජනතාවගේද සෞඛ්‍යය ආරක්ෂාව තහවුරු වන්නේ අප සැම අන්‍යෝන්‍ය සහයෝගයෙන් කටයුතු කළහොත් පමණි.
  • සමාජ දුරස්ථභාවය පවත්වාගෙන යාම කොරෝනා උවදුර තුරන් කිරීමේ එක් වැදගත් පියවරක් හෙයින් ඒ පිළිබඳ අප සැලකිල්ලෙන් කටයුතු කළ යුතුය. එමෙන්ම මුඛ ආවරණය (MASK) හා නිතර අත් සෝදා ගැනීම, අවශ්‍යතාවක් නොමැතිව නිවසින් පිටතට නොයෑම වැනි සෞඛ්‍ය උපදෙස් පිළිපැදිය යුතුය. මෙවන් අවස්ථාවකදී ඉහත කී උපදෙස් පිළිපැදීම ඉස්ලාමීය හරය වන හෙයින් ඒ පිළිබදව මුස්ලිම්වරුන් ආදර්ශමත්ව කටයුතු කළ යුතුය.
  • රමළාන් ඊදුල් ෆිත්ර් උත්සව සමයෙහි භාණ්ඩ මිලදී ගැනීම සදහා කණ්ඩායම් වශයෙන් කඩසාප්පුවලට යාමෙන් අප මෙවර වැළකී මේ පිළිබදව රජය හා සෞඛ්‍ය අංශවල උපදෙස් නිසි අයුරින් පිළිපැදිය යුතුය. හැකි පමණින් අත්‍යාවශ්‍ය භාණ්ඩ නිවසට ගෙන්වා ගැනීමේ සේවා (HOME DELIVERY SERVICE) හරහා මිල දී ගන්නට පියවර ගැනීම ආරක්ෂිතය.
  • රටේ වර්තමාන තත්ත්වය සැළකිල්ලට ගනිමින් අපගේ ඊදුල් ෆිත්ර් උත්සව කටයුතු හැකි පමණ චාම් අන්දමින් නිවසේ සාමාජිකයන් සමග පමණක් සීමා කරගත යුතුය. (ඉන්ෂා අල්ලාහ් ඊදුල් ෆිත්ර් උත්සවය සම්බන්ධ විස්තරාත්මක මගපෙන්වීම් එම දිනවලට අදාළව සමස්ත ලංකා ඉස්ලාම් ආගමික විද්වතුන්ගේ සභාව විසින් ලබා දෙනු ඇත.)
  • රටේ බොහෝ තැන්වල එක දිගටම ඇඳිරි නීතිය පනවා තිබුනු හෙයින් දෛනික ආදායම් ලබන ජීවනෝපාවල යෙදී සිටි බොහෝ අපගේ සහෝදර ලාංකිකයන් දැඩි ආර්ථික අසීරුතාවලට ලක්ව තිබීම හා මූලික අවශ්‍යතාවන් පවා සපුරා ගැනීමට නොහැකිව ලත වෙමින් සිටින බව කවුරුත් දන්නා කරුණකි. ඔවුනට කිසිදු භේදයකින් තොරව උදව් කිරිමට අප සියල්ලන්ම ඉදිරියට ආ යුතුයි. අපගේ ඊද් උත්සවය වෙනුවෙන් වැය කරන මුදල් උපරිමයෙන් සීමා කොට මෙවන් යහක්‍රියාවන්ට වැය කිරීම කාලෝචිතය.
  • මෙම සමයෙහි වැඩි වැඩියෙන් සදකා, සකාත් වැනි දන්දීම් මගින් අන් අයට පිහිට වන මෙන් හා සකාතුල් ෆිත්ර් දන්දීමද නිසි දිනවලට, ලැබීමට සුදුසුකම් ඇති සහෝදර සහෝදරියන්ට ලබා දීමට කටයුතු කළ යුතුය.
  • පෙරදීම වක්ෆ් මණ්ඩලය හා මුස්ලිම් ආගමික හා සංස්කෘතික කටයුතු දෙපාර්තමේන්තුව විසින් නිකුත් කළ උපදෙස් මස්ජිද් පරිපාලකයින් විසින් අනුගමනය කළ යුතුය.
  • මස්ජිද්වලට සලාතය සඳහා රැස්වීමට පවා තහනමක් පවතින මෙම දිනවල අප පිරිස් වශයෙන් කිසිදු ස්ථානයක රැස්වීමෙන් වැළකී සිටිය යුතුය.

ඇඳිරි නීතිය ලිහිල් කළ ද අප ඉතාමත් අවධානයෙන් නිසි උපදෙස් පිළිපදිමින් කටයුතු කිරීම මගින් අපට හා අපගේ සමුහයාට ඇති විය හැකි අනවශ්‍ය ප‍්‍රශ්න වළකාගත හැකිය. ඉහත කී උපදෙස් සියලු මුස්ලිම් ජනයා අනුගමනය කරන මෙන් ද මෙම උවදුර ඉවත් කර ජන ජීවිතය යතා තත්ත්වයට නොපමාව පත් කර දෙන මෙන් මෙම ශුද්ධ වූ රමළාන් මාසයේ අල්ලාහ්ගෙන් අයැදින මෙන් ද සමස්ත ලංකා ඉස්ලාම් ආගමික විද්වතුන්ගේ සභාව ලාංකීය මුස්ලිම් ප‍්‍රජාවගෙන් ඉල්ලා සිටිමු.

 

 

අෂ් ෂෙයික් එම්.එම්.ඒ. මුබාරක්

මහලේකම්,

සමස්ත ලංකා ඉස්ලාම් ආගමික විද්වතුන්ගේ සභාව

 

සැ: යු:

ඉහත කී මගපෙන්වීම් අසාන් නැමැති ඇරයුමට පසු යම් වේලාවක්  තෝරාගෙන මස්ජිද් ශබ්ද විකාශනය හරහා සමාජ ගත කිරීමට කටයුතු කරන මෙන් මස්ජිද් පරිපාලකයින්ගෙන් ඉල්ලා සිටින අතර මේවා ක්‍රියාත්මක කිරීමට සියලු දෙනා සහයෝගය දක්වන මෙන් අප ඉතා කාරුණිකව ඉල්ලා සිටිමු.

ACJU/NGS/2020/007

2020/04/21 (1441/08/27)

පසුගිය වසරේ පාස්කු ඉරු දින සිදු වූ ම්ලේච්ඡ ප්‍රහාරය සම්බන්ධව

පසුගිය වසරේ අපේ‍්‍රල් 21 වන පාස්කු ඉරු දින අපේ රටේ සිදු වූ කුරිරු මරාගෙන මැරෙන බෝම්බ ප‍්‍රහාර පිළිබදව මෙරට සියලු ජනයා මහත් ශෝකයකින් හා බලවත් කම්පනයකින් සිහිපත් කරන මෙම මොහොතේ අපගේ බලවත් කණගාටුව ද ප්‍රකාශ කරන අතර නැවත වරක් එම ම්ලේච්ඡ ක්‍රියාව තරයේ හෙළා දකිමු.

ඒ අතරම, මෙවැනි සිදුවීම් වලින් මියගිය සහ දුක් විඳින අයගේ ඥාතීන්ට අපගේ ගැඹුරු කම්පාව සහ කණගාටුව පිරිනමන අතර ඥාතීන් අහිමිවූවන්ට සන්සුන් භාවය හා ජීවිතයේ සෑම ආකාරයකම යහපත් දෑ අත් විය යුතු යැයි සර්වබලධාරී අල්ලාහ්ගෙන් ප්‍රාර්ථනා කරමු.

අහිංසක වන්දනාකරුවන් සහ අනෙකුත් සිවිල් වැසියන් ඔවුන්ගේ පූජනීය ස්ථානවල ඝාතනය කිරීම ඉස්ලාමීය ඉගැන්වීම්වලට අනුව සම්පූර්ණයෙන් පටහැනි ක්‍රියාවක් බවට කිසිදු සැකයක් නැත. මෙය කරන අය මනුෂ්‍යත්වයේ සතුරෝ ය. කෙසේ වෙතත්, මෙම ක්‍රියාවට සම්බන්ධ ඕනෑම කෙනෙකුට අනිවාර්යයෙන්ම දඩුවම් ලැබිය යුතුය.

ශුද්ධ වූ අල් කුර්ආනයෙහි 5 වන පරිච්ඡේදයෙහි 32 වන වැකියෙහි

“කවරෙකු (අයුක්ති සහගතව තවත්) ආත්මාවක් ඝාතනය කරන්නේ ද ඔහු මිනිසුන් සියල්ල ඝාතනය කළ කෙනෙකු මෙන් වන්නේය’ තවද ‘කවරෙකු ආත්මාවක් ජීවත් කරවන්නේ ද ඔහු මිනිසුන් සියල්ල ජීවත් කරවන්නෙකු මෙන් වන්නේය.” යනුවෙන් සර්වබලධාරී අල්ලාහ් සඳහන් කොට ඇත.

බෞද්ධ, කිතුනු, හින්දු හා ඉස්ලාම් ඇතුළු කිසිදු දහමක් ප්‍රචණ්ඩත්වයට ඉඩ නොදෙන බව අපි දනිමු. කෙසේ වෙතත්, පොදුවේ කුමන දහමක් තුළ ද, එම දහමේ නාමයෙන් එහි ඉගැන්වීමට සම්පූර්ණයෙන් පටහැනිව ක්‍රියා කරන හා විනාශකාරී ක්‍රියා සිදු කරන පිරිසක් සිටීම අපට පෙනේ. කෙසේ වෙතත්, එවැනි නොමග ගියවුන් කිහිප දෙනෙකුගේ නින්දාසහගත හැසිරීම ප්‍රමාණ කිරීම මගින් කිසිදු දහමක් හෝ එහි අනුගාමිකයින් ඇගයීම සාධාරණ නොවන බව අපි මෙහිදී පෙන්වා දීමට කැමැත්තෙමු.

මෙම භයානක සිදුවීමෙන් ඉක්බිතිව මුස්ලිම් ප්‍රජාවට එරෙහිව ප්‍රචණ්ඩත්වය වැළැක්වීම සඳහා ස්ථීර පියවර ගනිමින් ප්‍රමුඛව කටයුතු කළ අගරදගුරු මැල්කම් රංජිත් පියතුමන්ට සහ පීඩාවට ලක් වූ ඉවසිලිමත් ජනතාවට අපගේ අවංක කෘතඥතාව පළ කර සිටිමු.

එමෙන්ම අප සියලු දෙනාම මෙම මාතෘ භූමියේ දුවාදරුවන් වීමෙන් අප අතර ඇති ගැටළු සහ මතභේද මෘදුව සංවාදශීලීව විසඳා ගැනීමට අප සියලු දෙනා උත්සාහ කළ යුතු බව මෙහිදී අවධාරණය කිරීමට කැමැත්තෙමු.

දහම, භාෂාව සහ භූමිය ඇතුළු සියලු වෙනස්කම් වලින් ඔබ්බට ගොස් අපේ ජාතිය ගොඩනැගීම සඳහා අප සියලු දෙනාම එක්සත් වී එකට අත් වැල් බැඳ ගත යුතු කාලය පැමිණ ඇති බව ශ්‍රී ලාංකිකයන් වශයෙන් අපි කවුරුත් තේරුම් ගනිමු.

සර්වබලධාරී අල්ලාහ් අපේ රට සියලු ආකාරයේ අන්තරායන් හා විපත් වලින් ආරක්ෂා කරත්වා! ශාන්තිය හා සාමය පවත්නා උයනක් බවට පත් කරත්වා!

ස්තූතියි

 

අෂ් ෂෙයික් එම්. එම්.ඒ. මුබාරක්

මහ ලේකම්,

සමස්ත ලංකා ඉස්ලාම් ආගමික විද්වතුන්ගේ සභාව

ACJU/NGS/2020/003

2020/04/17 (1441.08.23)

දුෂ්කර වාතාවරණයක රමළාන් මාසය සඳහා මගපෙන්වීම

අල්ලාහ් විසින් ශුද්ධ අල් කුර්ආනය පහළ කිරීම හේතුවෙන් රමළාන් මාසය ගෞරවයට පත් කර ඇත. තවද රමළානය යනු ප‍්‍රාර්ථනාවේ හා ඉවසීමේ මාසයයි. මෙම සුවිශුද්ධ මාසයෙහි ලොව පුරා මුස්ලිම් ජනයා ආගමික විද්වතුන්ගේ මගපෙන්වීම් හා උපදෙස් අනුව යහ ක‍්‍රියාවල වැඩි විඩියෙන් හා  ඕනෑකමින් යොමු වේ.

පසුගිය කාලයට වඩා මෙවර රමළානය අපහසු වතාවරණයක් සමග බලාපොරොත්තුවෙන් සිටින්නෙමු. වර්තමානයේ කොවිඩ්-19 වයිරසයේ වේගවත් ව්‍යාප්තිය නිසා ලොව බොහෝ රටවල් පාහේ අගුලු දමා ඇත. ඒ අනුව අපගේ රජයද මෙහි ව්‍යාප්තිය මැඩපැවැත්වීමේ පියවර ගනිමින් සිටින අතර රට අගුලූ දැමීම මගින් ජනයා එක් රැස්වීම හා මිනිසුන් සමීපව ගැවසීම වළකාලන අරමුණින් ඇඳිරි නීතිය රටපුරා පනවා තිබීම ද අපි දනිමු.

මෙවන් තත්ත්වයක මුස්ලිම්වරුන් වන අපි රටේ නීතියට අවනත වෙමින් රාජ්‍ය නිර්දේශවලට අනුකූලව මෙවර රමළාන් මාසයේ ආගමික කටයුතු පහත දැක්වෙන අයුරින් පවත්වා ගත යුතු යැයි සමස්ත ලංකා ජම්ඉයියතුල් උලමා සභාව ලාංකික මුස්ලිම් ප‍්‍රජාවගෙන් ඉල්ලා සිටියි;

රමළාන් මාසයෙහි අනුගමනය කළ යුතු විශේෂ මගපෙන්වීම්

  1. ප‍්‍රාර්ථනාවන් පිළිගනු ලබන මෙම සුවිශේෂී මාසයෙහි ලොවට ඇති වී තිබෙන මෙම වසංගත උවදුර ඉවත් වී මිනිසුන්ගේ ජන ජීවිතය සාමාන්‍ය අතට නැවත පත් වීමට, තම අවශ්‍යතා ඉටුවීමට හා රටේ ජනතාව සුවපහසුවෙන් ජීවත් වීමට අප අල්ලාහ්ගෙන් අයැද සිටිය යුතුය. උපවාසය නිම කරන ඉෆ්තාර් සමය, සහර් වේලාව, අදාන් හා ඉකාමත් අතර ඇති වේලාව ආදිය ප‍්‍රාර්ථනා සඳහා නොවරදවා යොදා ගත යුතුය.
  2. ශුද්ධ අල් කුර්ආනය පහළ කරනු ලැබූ රමළාන් මාසයෙහි අල් කුර්ආනයට වැඩියෙන් අප සමීප විය යුතුය. ඒ අනුව ශුද්ධ අල් කුර්ආනය වැඩි වැඩියෙන් පාරායණය කිරීම එහි උපදෙස් අනුව ජීවිතය හැඩගස්වා ගැනීම එය ගැන අන්අයට පැහැදිලි කර ඒ අනුව කටයුතු කරන්නට උනන්දු කිරීම ආදිය ශුද්ධ අල් කුර්ආනය කෙරෙහි වූ අපගේ වගකීමයි.
  • මක්තබ් හා අල් කුර්ආන් මද්රසා සිසුන්ට දිනපතා අල් කුර්ආනය පාරායණය කිරීම සම්බන්ධ උපදෙස් මාලාවක් මක්තබ් ප‍්‍රධාන කාර්යාලය විසින් ප‍්‍රකාශයට පත් කිරීමට නියමිතය. ඒ අනුව නිවසේ තම ළමුන් කටයුතු කිරීම සඳහා උනන්දු කරවන මෙන් හා සහය දක්වන මෙන් දෙමාපියන් හා භාරකරුවන්ගෙන් ඉල්ලා සිටිමු.
  • ඉමාම්වරුන්, උස්තාද්වරුන්, මක්තබ් ආලිම්වරුන් හා ආලිමාවරියන් හා මුආවින්වරු සියල්ලන්ම මෙම කාලය උපරිමයෙන් ප‍්‍රයෝජනයට ගත යුතු අතර හැකියාව හා පහසුකම් ඇති අය අන්තර්ජාලය ඔස්සේ සිය ඉගැන්වීම් කටයුතු සිදුකරන්නට සැලසුම් කිරීම කාලෝචිතය.
  • සෑම කෙනෙකුම වැඩි වැඩියෙන් ශුද්ධ අල් කුර්ආනය පාරායණය කළ යුතු අතර අවම වශයෙන් දිනකට ජුසු එකක් හෝ පාරායණය කිරීමට උත්සාහ කළ යුතුය.
  1. රටේ පවතින තත්ත්වය සැලකිල්ලට ගෙන පස්වේල සලාතය මෙන්ම තරාවීහ් වැනි සුවිශේෂි සලාතයන් සිය නිවැසියන් සමග පමණක් ජමාඅත් ලෙසින් නිවෙස්වලම ඉටු කිරිමට කටයුතු කළ යුතුය. මෙවිට කිසිසේත් අසල්වැසියන් රැස් නොකර ගත යුතු අතර මේ පිළිබඳ විශේෂයෙන් ප‍්‍රවේසම් විය යුතුය.
  2. සෑම නිවසකම දෛනික නැමදුම්, ආගමික කටයුතු හා අනෙකුත් සියලු කාර්යයන් සඳහා කාල සටහනක් සකසා නිවැසියන් ඒ අනුව නියමිත වේලාවලට අදාළ කටයුතුවල යෙදීමට සූදානම් කළ යුතුයි.
  3. පෙරදීම දැනුම් දී ඇති අයුරින් මස්ජිද්වල පස්වේල නැමදුම හා ජුමුආ නැමදුම සඳහා නැවත දැනුම් දෙන තුරු රැස්වීමෙන් වැළකී සිටිය යුතුයි. ඒ අනුව ඉස්ලාම් ආගමික හා සංස්කෘතික දෙපාර්තමේන්තුව සහ වක්ෆ් මණ්ඩලය පනවා ඇති නිර්දේශ හා මගපෙන්වීම් දිවයිනේ සියලූ මස්ජිද්වල භාරකරුවන් පරිපාලකයන් එලෙසින්ම අනුගමනය කළ යුතුය.
  4. සමස්ත ලංකා ජම්ඉයියතුල් උලමා සභාව පොලිස් මුලස්ථානය සහ අදාළ අනෙකුත් සංවිධාන හා ඒකාබද්ධව නිකුත් කර ඇති මගපෙන්වීම් අනුව කටයුතු කළ යුතු යැයි ඉල්ලා සිටිමු.
  5. යහක‍්‍රියාවල යෙදීමට අවධානය යොමු කළ යුතු අතර නිවසේ සිටම රාත්‍රී වේලාවන්හි නැමදුම් කටයුතු ඉටුකළ යුතුයි. එමෙන්ම අන්තර්ජාලයේ ඇති අනවශ්‍ය ක්‍රීඩාවල යෙදෙමින් කාලය නාස්ති කිරීමෙන් වැළකී සිටිය යුතුයි.
  6. මතභේද ඇති කරුනු සම්බන්ධයෙන් වාද විවාදවල නොපැටලී ආගමික විද්වතුන්ගේ මගපෙන්වීම් අනුව සන්සුන්ව කටයුතු කළ යුතුය.
  • මේ සඳහා සමස්ත ලංකා ජම්ඉයියතුල් උලමා සභාව විසින් ප‍්‍රකාශයට පත් කර ඇති “සමගියේ ප‍්‍රකාශය” කියවා ඒ අනුව කටයුතු කළ යුතු අතර අන්අය සමග බෙදා ගැනීම.
  • සමස්ත ලංකා ජම්ඉයියතුල් උලමා සභාව විසින් ප‍්‍රකාශයට පත් කර ඇති “සමාජ සමගිය, කාලීන අවශ්‍යතාව හා ආගමික වගකීම” යන කෘතිය කියවා ඵල නෙළා ගැනීම.
  1. එදිනෙදා මුදල් උපයන දෛනික ශ‍්‍රමිකයන් අත්‍යාවශ්‍ය අවශ්‍යතාවන් සපුරා ගත නොහැකිව දුක් විඳින උදවිය වෙනුවෙන් මස්ජිදය මුල් කරගෙන සහනාධාර සේවා සැලසුම් කර කි‍්‍රයාත්මක කළ යුතුය.
  • මනුෂ්‍යත්වය අගය කරන කරමින් ආගමික භේදයෙන් ඔබ්බට ගොස් අවශ්‍යතා ඇත්තවුන් හදුනා ගනිමින් ඔවුන් කෙරෙහි සදකා හා හදියා ලබා දීමට වැඩි අවධානයක් යොමු කළ යුතුයි.
  • සකාත් පිරිනැමිය හැකි ත්‍යාගශීලීන් ඒවා නිසි පරිදි ආලිම්වරුන්ගේ මගපෙන්වීම් අනුව ඉටු කළ යුතුය.
  1. සහනාධාර සේවාවන්හි නියැලෙන්නන් පෙදෙසේ අදාළ පොලිස් ස්ථානවල මගපෙන්වීම් අනුව හා අදාළ නිලධාරීන්ගේ අනුමැතිය සහිතව අදාළ නිර්දේශ සැලකිල්ලට ගනිමින් සහනාධාර සේවා සිදු කළ යුතුය.
  2. නිවෙස්වල රාත්‍රී නැමදුම් කටයුතු සිදු කරන විට, විශේෂයෙන් සහර් වේලාවල අන් අයට හිරිහැර ඇති නොවන ආකාරයෙන් ද ගුවන් විදුලි යන්ත‍්‍රය හෝ රූපවාහිනිය නිවසේ සිටින්නන්ට පමණක් ඇසෙන ලෙසින් අවම ශබ්දයෙන් තබා ගත යුතුය.
  3. තරුණයින්ගේ මගපෙන්වීම සඳහා වැඩිහිටියන්, ප‍්‍රධානීන් හා ආගමික විද්වතුන් විශේෂ අවධානයක් යොමු කළ යුතු අතර ඔවුන්ගේ කාලය අල්ලාහ්ගේ තෘප්තියට අනුකූල වන අයුරින් හා අන් කිසිවෙකුට කරදරයක් නොවන ආකාරයෙන් තිබෙනු නිරන්තරයෙන්ම තහවුරු කර ගත යුතුය.
  4. උපවාසශීලයේ යෙදී ඇති අයෙකු තම සාමාන්‍ය කේටය ගිලීමෙන් උපවාසශීලය නොබිදෙන බව ආගමික ඉගැන්වීමකි. නමුත් අසාමාන්‍ය සෙමකැටි ආදිය කෙළ ගැසිය යුතුයි. එහෙත් කොරෝනා වයිරසය කැස්ස හා සෙම මගින් පැතිරෙන රෝගයක් යැයි අදාළ බලධාරීන් අනතුරු අගවා ඇති හෙයින් මහජනයා ගැවසෙන ස්ථානයන්හි කෙළ ගැසීමෙන් වැළකී සෞඛ්‍යාරක්‍ෂක කරුණු සැලකිල්ලට ගනිමින් කටයුතු කරන මෙන් සිහිපත් කරමු.
  5. ඉහත උපදෙස් හා මගපෙන්වීම් කි‍්‍රයාත්මක කිරීම විෂයයෙහි සමස්ත ලංකා ජම්ඉයියතුල් උලමා සභාවේ සියලූම ශාඛා මෙන්ම ඒ ඒ පෙදෙස්වල මස්ජිද්වල පරිපාලකයන් හා මුස්ලිම් ප්‍රජාව විශේෂ අවධානයෙන් කටයුතු කරන මෙන් කාරුණිකව ඉල්ලා සිටිමු.

එහෙයින් මෙම උපදෙස් පිළිපදිමින් ශුද්ධ රමළානය ඉමහත් අයුරින් ඵල නෙළා ගනිමු. අල්ලාහ්, මුළු ලොවම කම්පාවට පත් කර ඇති කොරෝනා වයිරස් උවදුර ලොවින් තුරන් කර සියල්ලන්වම ආරක්ෂා කරනු මැනව. මෙරටේ ජනයා අතර සමගිය සහජීවනය හා යහ අවබෝධය වර්ධනය කරනු මැනව.

වස්සලාම්

 

අෂ් ෂෙයික් එම්.එම්.ඒ. මුබාරක්

මහා ලේකම්,

සමස්ත ලංකා ජම්ඉයියතුල් උලමා සභාව

2020/04/13

සිංහල දමිළ අලුත් අවුරුදු දින පණිවිඩය

ශ්‍රී ලාංකේය ජනතාවගෙන් අති මහත් බහුතරයකගේ සංස්කෘතිමය වශයෙන් වැදගත් වූ සිංහල හා ද්‍රවිඩ අලුත් අවුරුද්ද මෙම වර්ෂයේ පෙර මෙන් සැමරීමට නොහැකිව ඇත්තේ මුළු රටම මුහුණ පා ඇති කොරෝනා වසංගතය හේතුවෙනි.

මෙම අලුත් අවුරුදු උදාවත් සමග නියමිත සෞඛ්‍යය උපදෙස් පිළිපදිමින් අපගේ මාතෘභූමිය මෙම වසංගත තත්ත්වයෙන් මුදා ගන්නට සැමට එක්ව අධිෂ්ඨානශීලීව කටයුතු කරන්නට දෙවියන් භාග්‍ය ලබා දෙත්වා යැයි ප්‍රාර්ථනා කරන්නෙමු.

මෙරට ප්‍රතිසාධනය සදහා කටයුතු කරන රජයටත්, සියළු රාජ්‍ය සේවකයින්ටත්, විශේෂයෙන්ම ඉමහත් කැපවීමකින් කටයුතු කරන සියළු සෞඛ්‍ය සේවා කාර්ය මණ්ඩලයටත්, ත්‍රිවිධ හමුදාවේ හා පොලිසියේ නිළධාරීන්ටත් මෙරට සියළු ජනයාටත් මෙම අවස්ථාවේ දී හෘදයාංගම ප්‍රාණාමය පුද කරන්නෙමු.

 

අෂ් ෂෙයික් එම්.එම්.ඒ. මුබාරක්

මහා ලේකම්,

සමස්ත ලංකා ඉස්ලාම් ආගමික විද්වතුන්ගේ සභාව

 

02.04.2020

කෝවිඩ්-19 වයිරසය නිසා අභාවයට පත්වන්නන්ගේ මෘත දේහය ආදාහනය කිරීම

කෝවිඩ්-19 හෙවත් කොරෝනා වයිරසය අසාදනය වීමෙන් මරණයට පත්වන මෘතදේහ භූමදානය නොකර ආදාහනය කිරීම සම්බන්ධයෙන් 2020 මාර්තු 31 වෙනි දින ප්‍රකාශයට පත්කළ මාර්ගෝපදේශයට, සමස්ත ලංකා ඉස්ලාම් ආගමික විද්වතුන්ගේ සභාව හා ශ්‍රී ලංකාවේ සමස්ත මුස්ලිම් ප්‍රජාව තම දැඩි කණගාටුව ප්‍රකාශ කර සිටිමු. මේ සම්බන්ධයෙන් ලෝක සෞඛ්‍ය සංවිධානය විසින් නිකුත් කරන ලද මාර්ගෝපදේශයෙහි පැහැදිලිව සඳහන් වන්නේ කෝවිඩ්-19 ආසාදනය වීමෙන් මරණයට පත්වන්නන් භූමදානය ද කළ හැකි බවයි. එහෙයින් රටවල් ගණනාවක්ම ආදාහනය වෙනුවට භූමදානය යන ක්‍රමයද ක්‍රියාවට නංවති.

දැනට පවතිත්නා වූ මෙම විකල්පයක් නොමැති තත්ත්වය නිසා, මෘත දේහයක් බලහත්කාරයෙන් ආදාහනය කරනු ලැබුවහොත් එය මුස්ලිම්වරුන්ට පාපී ක්‍රියාවක් ලෙස නොසැලකේ. එමෙන්ම මෙම කාලය තුළ ඉවසීමෙන් කටයුතු කරන ලෙසත්, මරණයට පත් වූ පුද්ගලයාට ස්වර්ගයේ උසස් තත්ත්වයක් ලබා දෙන ලෙසත් අප සැමදෙනා යාච්ඤා කරමු.

දැනට අප මුහුණ දෙමින් සිටින කාලවකවානුව මෙයට පෙර අප මානව ඉතිහාසයේ කිසි විටෙක ඇති නොවනු සංවේදජනක අවදියක් බව විශේෂයෙන් කිව යුතු නැත. ශ්‍රී ලංකාව පමණක් නොව සුපිරි බලවතුන් යැයි කියා ගන්නා රටවල් පවා මෙම ව්‍යසනය ඉදිරියේ අන්ත අසරණ වී සිටිති. ඒ අනුව අපගේ රජයද මෙකී නොකී සියලු පියවර ගන්නේ ජනතා සුබසාධනය අරමුණු කරගෙනය යන කරුණ අප කිසි විටෙක අමතක නොකළ යුතුය. එනිසා අපගේ ලාංකික සහෝදර ජනකොටස් සේම මුස්ලිම් අපද ඒ සඳහා රජයට සම්පුර්ණ සහයෝගය ලබා දිය යුතුය. මෙරට වැසියන් ලෙසින් එය අපට පැහැර හැරිය නොහැකි වගකීමකි.

මෙම කොරෝනා ව්‍යසන සමයෙහි පමණක් නොව මෙයට පෙර ඇති වුනු ජාතික හදිසි තත්ත්වයන්, ආපදා සහ අර්බුද අවස්ථා සියල්ලෙහිම රජයේ නීති නිර්දේශ හා මගපෙන්වීම් අනුව කටයුතු කරන මෙන් අප ලාංකික මුස්ලිම් ප්‍රජාවට උපදෙස් දෙමින් සිටි ආකාරය හා ලාංකික මුස්ලිම්වරුන්ද එයට පුර්ණ ලෙසින් කීකරු වී කටයුතු කළ හා කරමින් සිටින ආකාරයද අප මෙවිට රජයට සිහිපත් කරනු කැමැත්තෙමු.

මෙම අවස්ථාවෙහි එක් වැදගත් කරුණක් අප මුස්ලිම් ප්‍රජාවට කියනු කැමැත්තෙමු. මුස්ලිම්වරුයෙකු අභාවයට පත් වූ විට ඔහුගේ හෝ ඇයගේ දේහය ආදාහනය නොකර භූමදානය කිරීම අපගේ දැඩි ආගමික අවශ්‍යතාවකි. එහෙයින් කෝවිඩ්-19 ආසාදනය වැළැක්වීම හා පාලනය කිරීම සඳහා මෘත දේහයක් ආරක්ෂාකාරීව කළමනාකරණය කිරීම” යන මැයෙන් 2020 මාර්තු 20 වෙනි දින ලෝක සෞඛ්‍ය සංවිධානයේ මාර්ගෝපදේශ හුවා දක්වමින් කොරෝනා ආසාදනය නිසා අභාවයට පත්වන ලාංකික මුස්ලිම්වරුන් විෂයයෙහි රජයේ වත්මන් ස්ථාවරයේ වෙනසක් ඇති කර ගන්නට හැකිද යැයි අප හැකි සෑම උත්සාහයක්ම ගන්නා බව හුදෙක් සඳහන් කර සිටිමු.

2020 මාර්තු 31 වෙනි දින ප්‍රකාශයට පත් කළ ලෝක සෞඛ්‍ය සංවිධානයේ මාර්ගෝපදේශයට අනුව කෝවිඩ්-19 ආසාදනය නිසා මරණයට පත්වන්නන්ගේ දේහය, නිර්දේශිත විශේෂ මගපෙන්වීම් අනුව කටයුතු කරමින්, ආදාහනය හෝ භූමදානය කළ හැකිය යැයි විකල්ප ලබා දී ඇත. බොහෝ රටවල ඒ ඒ ජන කොටස්වලට ඔවුන්ගේ ආගමික මගපෙන්වීම් හා විශ්වාසය අනුව කොරෝනා වයිරසයට ගොදුරු වුවන්ට - අදාළ විශේෂ නිර්දේශ පිළිපදිමින් - අවසන් කටයුතු කිරීමට අවසර දෙන තත්ත්වයද මෙවිට අප රජයට ඉස්මතු කර පෙන්වීමට අදහස් කරමු.

මේ අනුව අප මෙරට රාජ්‍ය බලධාරීන්ගෙන් ලෝක සෞඛ්‍ය සංවිධානයේ මාර්ගෝපදේශයට අනුව භූමිදානය ද ක්‍රමයක් වන හෙයින් මෙම ආසාදනය හේතුවෙන් මරණයට පත්වූ මුස්ලිම්වරයෙකුගේ මෘතදේහ භූමදාන කිරීමට හැකිවන පරිදි සංශෝදනය කරන මෙන් ඉතා කාරුණිකව ඉල්ලා සිටිමු.

එමෙන්ම කොරෝනා වයිසරය අසාදනය වීම නිසා ඇති වන්නේ යැයි සෞඛ්‍ය  අංශ විසින් විස්තර කර ඇති රෝග ලක්‍ෂණ කිසිවක් අපට හෝ අපගේ නිවැසියන්ට ඇතිව තිබේ යැයි සැකයක් ඇති වුනු වහාම එය අදාළ බලධාරීන්ට දන්වා සිටින මෙන්ද අප සභාව ලාංකික මුස්ලිම්වරුන්ගෙන් නැවතත් ඉල්ලා සිටිමු.

වෙනත් රෝග හෝ ආසාදන මෙන් නොව කොරෝනා වයිසරය නිසා ඇති වන රෝගී තත්ත්වය අන් අයටද අවදානම් ඇති කළ හැකි හෙයින් මේ විෂයයෙහි මුස්ලිම් අප විශේෂ අවධානයක් යොමු කළ යුතුය. මන්දයත් පොදු යහපත විෂයන්හි සැලකිලිමත් වීම මුස්ලිම්වරයෙකුගේ කිසිසෙත් පැහැර හැරිය නොහැකි දැවැන්ත ආගමික වගකීමක් වන හෙයිනි.

ඒ අනුව අතීතයේ අප කටයුතු කළා සේම මෙම අර්බුද අවස්ථාවෙහිද රජයේ සියලු නීති නියාමන හා මගපෙන්වීම්වලට අවනත වෙමින් කටයුතු කරන මෙන් ලාංකික මුස්ලිම් ප්‍රජාවගෙන් අප උදක් ඉල්ලා සිටිමු. ශුද්ධ අල් කුර්ආනයේ මගපෙන්වීම මෙන්ම කාරුණික නබි මුහම්මද් තුමාණන්ගේ ප්‍රායෝගික ආදර්ශයද මෙයම වේ.

මුළු රටම යම් තැතිගැන්මකට ලක්ව සිටින මෙම අවස්ථාවේ මානුෂීය සංවේදිතා සහ හැගීම්වලට ගරුකරමින් අන්‍යෝන්‍ය සහයෝගයෙන් ඉවසීමෙන් හා සන්සුන්ව කටයුතු කරන මෙන් අප ලාංකික සැමගෙන්ම ඉල්ලා සිටිමු.

එමෙන්ම මෙම ව්‍යසනයෙන් අප රට ඇතුලු මුලු ලොවම මුදවා ගන්නා මෙන්ද, මිනිස් වර්ගයාගේ කුමන පාපයන් නිසා මෙම පරීක්‍ෂණය එවා ඇත්තේද එම පාපයන් සමා කර මෙය නිම කරන මෙන්ද සර්වබලධාරී අල්ලාහ්ගෙන් අප ඉතා බැගෑපත්ව අයැද සිටිමු.

2020.03.30

1441.08.05

කොරෝනා වයිරසය ආසාදනය වීම හේතුවෙන් මරණයට පත් වුනු කෙනෙකුගේ අවසන් කටයුතු සම්බන්ධ ඉස්ලාම් ආගමික නිර්දේශය

සියලු ප‍්‍රශංසා අල්ලාහ්ටමය. සලවාත් සහ සලාම් අල්ලාහ්ගේ අවසාන දුතයා වන නබි මුහම්මද් තුමන් සහ එතුමන්ගෙන් පැවතෙන්නන් හා සගයන්හට අත් වේවා.

මුස්ලිම්වරයෙකු අභාවයට පත් වූ විට එම දේහය ස්නානය කරවීම, කෆන් නම් සුදු රෙද්දක් ඇන්දවීම, ජනාසා සලාතය ඉටු කර භුමිදාන කිරීම හෙවත් වළලා දැමීම මුස්ලිම්වරුන්ට ෆර්ලු කිෆායා ඝණයේ වගකීමක් වන්නේය. ෆර්ලු කිෆායා යනු සියලුම මුස්ලිම්වරුන් මත ඇති වන අනිවාර්ය වගකීමක් වන නමුත් එය කිහිප දෙනෙකු ඉටුකළ විට එම වගකීමෙන් සියල්ලන්ම නිදහස් වන්නේය. එම වගකීම කිසිවෙකු හෝ ඉටු නොකළ විට අදාළ සියලුම මුස්ලිම්වරුන් වරදකරුවන් වෙති.

එසේම ජනාසා සලාතය ඉටුකිරීමට පෙර දේහය ස්නානය කරවා තිබීම අනිවාර්යය කරුණකි. ජලයේ ගිලී හෝ ගොඩනැගිල්ලක් කඩා වැටී යට වී මරණයට පත් වූ තත්ත්වයක දේහය නොලැබී ස්නානය කරවීමට නොහැකි තත්ත්වයක් ඇති වේ. එම මරණය සඳහා සලාතය ඉටු කළ යුතුද යන කරුණෙහි ආගමික විශාරදයින් අතර මතභේද පවතී. මරණයක් සඳහා ජනාසා සලාතය ඉටු කිරීමට එම දේහය ස්නානය කරවා තිබීම අනිවාර්ය වන හෙයින් ස්නානය කරවීමට අවස්ථාව නොලැබුනු දේහයක් සඳහා ජනාසා සලාතය ඉටු කිරීම අවශ්‍යය නැත යන්න බහුතරයක් ආගමික විශාරදයින්ගේ ස්ථාවරයයි.

එසේ වුවද ජනාසා සලාතයේ අරමුණ මරණයට පත් වු පුද්ගලයා වෙනුවෙන් ප‍්‍රාර්ථනා කිරීමයි. මරණයට පත්වූ දේහය සඳහා අනිවාර්ය වන වගකීම් හතරින් ඇතැම් වගකීම් ඉටුකළ නොහැකි වූ හෙයින් ඉටුකළ හැකි වගකීම්ද අත්හැරිය නොහැක යැයි තවත් ඇතැම් විශාරදයින් අදහස් දක්වති. මේ සඳහා ඔවුන් උපුටා දක්වන්නේ “යම් කාර්යයක් සම්බන්ධව කළ නොහැකි දේ හේතු දක්වා කළ හැකි දේ අත් නොහැරිය යුතුය” යන ස්ථාවරයයි.

මේ හේතුවෙන් කොරෝනා වයිරසය නිසා මරණයට පත් වු දේහයකින් අන් අයට වයිරසය පැතිරීමට ඉඩකඩ ඇති හෙයින් මල්ලක බහා වසාදමනු අතර එම දේහය ස්නානය කරවීමට හා කෆන් කිරීමට අවස්ථාවක් නොලැබෙනු ඇත.

මෙවන් තත්ත්වයකදී ඉහත පවසන ලද දෙවන මතයට අනුව කොරෝනා වයිරසය නිසා මරණයට පත් වු දේහයක් ස්නානය කරවීමට නොහැකි වුවද එම දේහය වෙනුවෙන් ජනාසා සලාතය ඉටු කර භූමිදානය කළ යුතුය.

කොරෝනා කොවිඩ් 19 ආසාදනය හේතුවෙන් මරණයට පත් වූ අයෙකු ගේ අවසන් කටයුතු සම්බන්ධව රජය ප්‍රකාශයක් නිකුත් කොට ඇත.

එහිදී, මරණයට පත් වූ දේහය ස්නානය කරවිය නොහැක, දේහය ආදාහයන කළ යුතුයි. දේහය භුමිදාන කරන්නේ නම් වළ අඩි 6 කට ගැඹුරු විය යුතුයි. රාජ්‍ය බලධාරීන් ඉදිරිපිට භූමිදාන කටයුතු විය යුතුයි. ඉතා සමීප ඥාතීන් කීහිපයකට පමණක් ඒ සදහා සහභාගි වීමට අනුමැතිය දිය යුතුයි. භූමිදාන කටයුතු සුවිශේෂී අදාළ ස්ථානයක විය යුතුයි. යනාදී උපදෙස් පනවා ඇත.

ඉහත පවසන ලද ආගමික උපදෙසට අනුව දේහය ස්නානය කරවීමට හා තයම්මුම් කරවීමට නොහැකි හෙයින් රාජ්‍ය බලධාරීන්ගේ උපදෙස් මත බොහෝ පිරිසක් එක්රැස් නොවී ප්‍රධාන කිහිපදෙනෙක් පමණක් සහභාගී වී ජනාසා සලාතය හා භූමිදාන කටයුතු ඉටුකළ යුතුයි. සෙසු අය මෙවන් දුෂ්කර අවස්ථාවකදී ගායිබ් ජනාසා සලාතය ඉටුකිරීමට ඉස්ලාමයට අනුව අනුමැතිය ඇත.

යා අල්ලාහ්! මෙවැනි රෝගවලින් මරණයට පත්වන්නන්ගේ පව් කමාකොට, ෆිර්දවුස් නැමැති ස්වර්ගය පිරිනමත්වා, එවැන්න්ගේ නිවැසියන්ට සැනසුම දායාද කරත්වා!

සැ. යු;

මෙවන් දේහයන් රාජ්‍ය නිළධාරින්ගේ උපදෙස් මත සොහොන් පිටියෙහි සුවිශේෂි ස්ථානයක භූමිදානය කිරීමට සහාය දක්වන මෙන් මස්ජිද් පරිපාලකයින්ගෙන් ඉල්ලා සිටින්නෙමු.

අල්ලාහ් සර්වඥය.

 

 

අෂ් ෂෙයික් එම්.එල්.එම්. ඉල්යාස්

ලේකම්,

ෆත්වා අංශය,

සමස්ත ලංකා ඉස්ලාම් ආගමික විද්වතුන්ගේ සභාව 

29.03.2020

ශ‍්‍රී ලංකා පොලිසිය හා සමස්ත ලංකා ජම්යියතුල් උලමා සභාව විසින් නිකුත් කරන විශේෂ නිවේදනය

 

  1. ඇඳිරි නිතිය බල පැවැත්වෙන විට අනුගමනය කළ යුතු කරුණු
  • ඇඳිරි නීතිය බල පැවැත්වෙන විට නිවසින් බැහැරව යාමෙන් සම්පුර්ණයෙන් වැළකී සිටීම.
  • අත්‍යවශ්‍ය භාණ්ඩ හැකි පමණින් නිවසට ගෙන්වන සේවාව මාර්ගයෙන් (Delivery Service) ලබා ගැනීම (මේ සඳහා රාජ්‍ය අනුමැතිය ලද ආයතන වල නාමයන් විද්‍යුත් මාධ්‍යවල පළ විය).
  • ඇඳිරි නීතිය බලපැවැත්වෙන අවස්ථාවකදී කිසිවෙකු නිවසින් පිටවිය නොහැක. අතිශයින්ම සුවිශේෂී අවශ්‍යතාවකදී පමණක් නිවසින් බැහැර වීමට පෙර අදාළ ප‍්‍රදේශයේ පොලිස් අවසරයක් (Curfew Pass) ලබා ගත යුතු අතර එය නිකුත් කරන විට කොන්දේසි අදාළ වේ.
  • කොරෝනා වයිරසය පැතිරී යාම වැළැක්වීම සඳහා මහජන යහපත මුල් කරගෙන රජය ඇඳිරි නීතිය පනවා ඇති බව වටහා ගෙන වගකීමෙන් ක‍්‍රියා කළ යුතුයි. ඊට පටහැනි වන තැනැත්තන්ට නීතිමය ක‍්‍රියාමාර්ග දියත් කරනු ලැබේ.

 

  1. රජය ඇඳිරි නීතිය ඉවත් කරන ලද මොහොතක පහත කරුණු වලට සම්පුර්ණයෙන්ම කීකරු වී කටයුතු කළ යුතුයි.
  • අත්‍යවශ්‍ය භාණ්ඩ මිලදී ගැනීම සඳහා නිවසට ගෙන්වන සේවාව මාර්ගයෙන් (Delivery Service) ලබා ගැනීමට කටයුතු කළ යුතු අතර එසේ නොහැකි අවස්ථාවකදී එක් නිවසකින් එක් පුද්ගලයෙකු පමණක් පිටව යා යුතුය.
  • එසේ යන විට නිවසේ සිටින කුඩා හෝ මහලූ පුද්ගලයන් නොයවා තරුණ අය යාමට කටයුතු කළ යුතුය.
  • නිවසින් පිටව යන විට නොවරදවා මුඛ/නාස් ආවරණයක් පැළඳ ගත යුතුය.
  • භාණ්ඩ ලබා ගැනීමට පෝලිමේ සිටින විට එකිනෙකා අතර පරතරය මීටරයක් පමණ ඈතින් තබා ගත යුතුය.
  • වෙළඳ පොලෙහි වැඩ කටයුතු ඉතා සුළු වේලාවකින් නිම කර ගැනීම.
  • නිවසින් පිටතට ගොස් පැමිණි විට වහා සබන් දමා අත් සෝදා ගැනීම හා ස්නානය කර නිවැසියන් සමග සබඳතා පැවැත්වීම.

 

  1. ස්වයං නිරෝධායනයේ යෙදෙන විට අනුගමනය කළ යුතු කරුණු

පසුගිය සති දෙක තුළ කොරෝනා රෝගියෙකු බවට සැක කරන තැනැත්තෙකු ඇසුරු කර තිබේ ද? එසේ නම්, ඔබ වහාම ස්වයං නිරෝධායනයට යොමු විය යුතු ය.

  1. රෝග ලක්ෂණ පිළිබඳ ව අවධානයෙන් සිටින්න.
  2. නිවස තුළ සිටින අන් අයගෙන් වෙන් ව නිවසේම රැඳී සිටින්න.
  3. අන් අය සමග ගැවසීමේ දී අවම වශයෙන් මීටරයක් පමණ දුරස්ථ ව සිටින්න.
  4. සෞඛ්‍ය ආරක්ෂිත මුඛ ආවරණයක් පළඳින්න.
  5. කසින විට හෝ කිවිසන විට මුව ආවරණය කර ගන්න.
  6. නිරන්තරයෙන් සබන් යොදා අත් සෝදන්න.
  7. නිවසේ භාවිත කරන දෑ අන් අය සමග හුවමාරු කර ගැනීමෙන් වළකින්න.
  8. භාවිත කරන දෑ පිරිසිදු කර ගන්න, භාවිත කොට ඉවතලන දෑ විනාශ කරන්න.
  9. ඉවත දැමිය හැකි භාජනයක ආහාර ලබා ගන්න, රෝගියාටම වෙන් වූ වැසිකිළි හා නාන කාමර භාවිත කරන්න.
  10. ස්වයං නිරෝධායනය ආරම්භ කළ දින සිට අවම වශයෙන් දින 14 ක් මෙම ක‍්‍රමය අනුගමනය කරන්න.

 

මෙම කාලය තුළ රෝග ලක්ෂණ මතු වුවහොත් වහාම පහත අංක අමතන්න.

0112444480 / 0112444481 හෝ 1933 නැතහොත් This email address is being protected from spambots. You need JavaScript enabled to view it. ලිපිනයට ඊ-මේල් කරන්න.

 

ඔබ නිරෝධායන උපදෙස් වලට පටහැනි ව ක‍්‍රියා කළහොත් සිදුවන්නේ කුමක් ද?

 

නිරෝධායන හා රෝග වැළැක්වීමේ ආඥා පනතට අදාළ වේ.

  • ඔබ නිරෝධායන ක‍්‍රියාවලියට අනුගත කළ හැකිය.
  • ඔබගේ ගමන් බිමන් සීමා කළ හැකිය.
  • අන් අයගෙන් වෙන් කර තැබීම හෝ ප‍්‍රතිකාර සඳහා බලහත්කාරයෙන් වුව ද යොමු කළ හැකිය.
  • ඊට අවනත නොවීම හේතුවෙන් වරෙන්තුවක් නොමැතිව අත්අඩංගුවට ගෙන නඩු පැවරිය හැකිය.
  • වරදකරුවෙකු වුවහොත් මාස 06 ක් දක්වා සිර ද`ඩුවම් හෝ රු 2,000/- සිට රු 10,000/- දක්වා දඩයකට යටත් කළ හැකිය.

 

ලංකා දණ්ඩ නීති සංග‍්‍රහය අනුව ද වරදකි.

  • නොසැලකිල්ලෙන් හෝ හිතාමතා ම හෝ ද්වේශසහගතව රෝගය පැතිරීමට ඉඩ හැරීම, රෝගය පැතිරවීම හෝ නිරෝධායන රීති අනුගමනය නොකිරීම.
  • මෙය වරෙන්තුවක් නොමැතිව සිර භාරයට ගත හැකි වරදකි.
  • මාස 06 සිට වසර 02 දක්වා සිර දඬුවමකට ද රු 1,500/- ක දඩයකට ද යටත් කළ හැකිය.

 

වැරදි සඳහා අනුබල දීම ද වරදකි.

  • ඉහත වැරදි සඳහා අනුබල දෙන තැනැත්තන් ද සහාය වන තැනැත්තන් ද වරෙන්තුවක් නොමැතිව අත්අඩංගුවට ගෙන නඩු පැවරිය හැකි වරදකි.
  • ඉහත වරදට ද`ඩුවමට ම යටත් කළ හැකිය.

 

ඉහත වැරදි සඳහා යොදාගත් නිශ්චල / චංචල දේපළ ද තහනමට ලක් විය හැකිය.

සැ: යු:

  • ආගමික විෂයන් සඳහා සමස්ත ලංකා ජම්යියතුල් උලමා සභාව මුස්ලිම් ප‍්‍රජාවට පෙර දැනුම් දී ඇති මගපෙන්වීම් අනුගමනය කරන්න.
  • සමස්ත ලංකා ජම්යියතුල් උලමා සභාව පෙර දැනුම් දී ඇති මගපෙන්වීම් අනුගමනය කර මස්ජිදයන් කේන්ද්‍ර කර ගනිමින් තම ප‍්‍රදේශයේ පොලිස් ස්ථානයේ අනුමැතිය ඇතිව සහනාධාර කටයුතු වල නියැළෙන්න.