Super User

Super User

2019 නොවැම්බර් 18

ශ්‍රී ලංකා ප්‍රජාතන්ත්‍රවාදී සමාජවාදී ජනරජයේ

අතිගරු ජනාධිපති ගෝඨාභය රාජපක්ෂ මැතිතුමා,

 

අපගේ අතිගරු ජනාධිපතිතුමන්ට සුබ පැතුම්

අප මාතෘ භූමියේ 07 වන විධායක ජනාධිපති වශයෙන් අතිගරු ජනාධිපති ගෝඨාභය රාජපක්ෂ මහතා තෝරා පත් වීම මෙරටේ පුරවැසියන් වන අප සියලු දෙනාටම ඓතිහාසික සිද්ධියකි.

ආසියාවේ පැරණිතම ප්‍රජාතන්ත්‍රවාදී රටක පුරවැසියන් වන අප, අපගේ නායකයා නිදහස් හා සාධාරණ ප්‍රජාතන්ත්‍රවාදී ආකාරයකින් තෝරා පත් වීම ශ්‍රී ලාංකේය අප සැමගේ සතුටට කරුණකි.

බහු ආගමිකයින් ලෙස බෞද්ධ, හින්දු, මුස්ලිම් සහ කිතුනුවන් වන අපි මෙම ජයග්‍රහණය ප්‍රජාතන්ත්‍රවාදයේ ජයග්‍රහණයක් ලෙස සලකන අතර මෙම රටේ සියලු ජන කොටස් අතර සමගිය හා සාමකාමී සහජීවනය පවත්වා ගනිමින් සංවර්ධනය හා සමෘද්ධිය කරා මෙරට ධජය ගෙන යනු ඇතැයි අපි තරයේ විශ්වාස කරමු.

සමස්ත ලංකා ජම්යියතුල් උලමා සංගමය (ACJU) යනු දේශපාලනික නොවන සංගමයක් වන අතර දශක 9 කට වැඩි එහි ඉතිහාසය පුරාම මෙරට සංවර්ධනය සඳහා රජයන් සමඟ සමීපව කටයුතු කර ඇති අතර ප්‍රජාවන් අතර සමගිය හා සාමකාමී සහජීවනය ගොඩනැගීමේ උත්සාහයන්හි ක්‍රියාකාරීව නිරත වී ඇත.

සාමය, සමගිය සහ සමෘද්ධිය ගොඩනැංවීමත් සමඟම මෙරට උන්නතිය උදෙසා අතිගරු ජනාධිපතිතුමා සමඟ කටයුතු කිරීමට අපි ඉතා උනන්දුවෙන් බලා සිටිමු.

සර්වබලධාරී දෙවියන් වන අල්ලාහ් සිය විශේෂ මඟ පෙන්වීම තුළින් අපගේ මාතෘ භූමියට දයාව හා ආශිර්වාදය පිරිනමත්වා, සංවර්ධනය, සාමය, සමගිය සහ සමෘද්ධිය කරා මෙරට මෙහෙයවීමට ඔබට ශක්තිය ලබා දෙත්වා.

 

මුෆ්ති එම්.අයි.එම්. රිස්වි

සභාපති - සමස්ත ලංකා ජම්යියතුල් උලමා සංගමය (ACJU)

 

 

අෂ් ෂෙයික් එම්.එම්.ඒ. මුබාරක්

මහලේකම් - සමස්ත ලංකා ජම්යියතුල් උලමා සංගමය (ACJU)

 

13.11.2019 /15.03.1441

ඡන්ද දිනයෙහි නැණවත් ලෙසින් කටයුතු කරමු

ජනාධිපතිවරණය එළඹෙන නොවැම්බර් මස 16 වන දින පැවැත්වීමට නියමිත බව අප දනිමු. ශ‍්‍රී ලාංකික ප‍්‍රජාව හැටියට අප කැමති අපේක්‍ෂකයෙකුට ඡන්දය ලබා දීමට අපට අයිතිය ඇත. එනිසා මෙම අයිතිය අපතේ නොයවා වගකීමෙන් යුතුව ඡන්දය භාවිත කරන මෙන් ඉල්ලා සිටිමු.

එදින සවස වන තෙක් කාලය ගත නොකර හැකි පමණ උදෑසනින්ම ඡන්දපොළට ගොස් තමන් කැමති අපේක්‍ෂකයාට ඡන්දය ප‍්‍රකාශ කරන මෙන්ද, ඡන්ද පොළවල කටයුතු කරන නිලධාරීන් හා කාර්ය මණ්ඩලයටද ඔවුන්ගේ රාජකාරිය ඉටු කිරීමට පහසු වනු අයුරින්ද, ඡන්දය ප‍්‍රකාශ කිරීමට යන විට ජාතික හැඳිනුම්පත හෝ අන්‍යයතාවය තහවුරු කළ හැකි වෙනත් නීත්‍යානුකූල ලියවිල්ලක් ගෙන යන මෙන්ද ඉල්ලා සිටිමු.

ඡන්ද පොළට යන විට තමන්ගේ අන්‍යයතාවය තහවුරු කිරීම අවශ්‍ය හෙයින් විශේෂයෙන් මුහුණු ආවරණය පළදින කාන්තාවන් තම මුහුණු නිරාවරණය කොට අනන්‍යතාව තහවුරු කරන මෙන් ද,  අදාල නිලධාරීන්ට තම කාර්යයන් ඉටුකිරීමට සහයෝගය දක්වන මෙන්ද, එසේ යන විට තමන්ට මහ්රම් නෑකමක් ඇති පුරුෂයෙකු සමග යන මෙන්ද,  හැකි පමණින් වාහනයකින් ම ස්ථානයට යන මෙන්ද, ඡන්දය ප‍්‍රකාශ කළ සැණින් තමන්ගේ නිවෙස්වලට යන මෙන්ද ඉල්ලා සිටිමු. මෙසේ කිරීම මගින් අනවශ්‍ය ගැටුම් මගහරවා ගත හැකිය යැයි උපදෙස් කරන්නෙමු.

තවද ඡන්දය ප‍්‍රකාශ කළ සැණින් මහමග රැදී කාලය නාස්ති නොකොට ප්‍රයෝජනවත් ක්‍රියාවන්හි කාලය ගත කරන මෙන්ද, ඡන්දයෙන් තේරී පත්වන්නා රටට ආදරය කරන, රට වැසියන්ගේ යහපත වෙනුවෙන් කටයුතු කරන, රට සංවර්ධිත කිරීමට උනන්දුවත් හැකියාවත් ඇති පුද්ගලයෙකු වන මෙන් ප්‍රාර්ථනා කරන මෙන් ඉල්ලා සිටිමු.

මෙහි සඳහන් මගපෙන්වීම් තම තමන්ගේ පෙදෙස්වල ජනයාට පැහැදිලි කර දෙන මෙන් ආගමික ප‍්‍රධානීන් මස්ජිද්වල පරිපාලකයින් මෙන්ම ජම්ඉයියතුල් උලමා සංගමයේ ප‍්‍රාදේශීය හා දිස්ත‍්‍රික්ක කාර්යාලවල නියෝජිතයන්ගෙන් ඉල්ලා සිටිමු.

 

සටහන : මෙම දැන්වීම එළඹෙන 15 වන සිකුරාදා ජුමුආ සලාතය අවසානයේ මස්ජිදයේ ප‍්‍රසිද්ධියේ කියවන්නට කටයුතු කරන මෙන් දිවයිනේ සියලුම මස්ජිද්වල භාකරුවන්ගෙන් ඉල්ලා සිටිමු.

 

අෂ් ෂෙයික් එ.සී. අගාර් මුහම්මද්

නියෝජ්‍ය සභාපති,

සමස්ත ලංකා ජම්ඉයියතුල් උලමා සංගමය

10.11.2019/12.03.1441

 

සකල ලෝ වැසියන්ට ආශිර්වාදයක් ලෙසින් එවනු ලැබු නබි මුහම්මද් (සල්තුමන්ගේ ජන්ම දිනය නිමිත්තෙන් විශේෂ පණිවිඩයක් නිකුත් කිරීමෙහිලා සමස්ත ලංකා ජම්යියතුල් උලමා සංගමය ඉමහත් සතුටට පත් වෙයි.

 

ආරාබි ලිත අනුව වන රබිඋනිල් අව්වල් මාසය මානව සංහතියට අතිශය වැදගත්කමක් ඇති මාසයකි. මන්දයත් මිනිස් සමාජයට ඍජූ ජීවන මාර්ගයක් පෙන්වීම සඳහා ලොවට ආශිර්වාදයක් ලෙසින් අල්ලාහ් දෙවියන් විසින් එවන ලද අවසාන වක්තෘ නබි මුහම්මද් (සල්) තුමන් ඉපදුනේ මෙම මාසයේ බැවිනි.

 

රබිඋන් යන අරාබි වචනයේ අරුත වසන්තය යනුයි. වසන්ත ඍතුව පොළොවට හරිත හා සශ‍්‍රීක බවද අලංකාරයද ගෙන දෙයි. එසේම වසන්තයේ ආරම්භය යන තේරුම ඇති රබිඋනිල් අව්වල් මාසයෙහි නබි මුහම්මද් (සල්) තුමන් ඉපදීම මගින් මිනිස් වර්ගයාට අභිවෘද්ධිය, විමුක්තිය, සාමය, සතුට හා සැනසීම ගෙන දෙන අංග සම්පුර්ණ ජීවන ක‍්‍රමයක් දායාද කළේය.

 

නබි මුහම්මද් (සල්) තුමන් ඉපදුනු එම අවදිය ලොව සැම තැනම ආධ්‍යාත්මිකව හා ලෞකික පසුබෑමක් වූ ඉඩෝර අවදියක් විය. මිනිස් වර්ගයාට වසන්තයක දැඩි  ඕනෑකමක් තිබුනු කාලපරිච්ඡේදයක් ලෙසින් එය තිබුනි. එම වසන්තය කාරුණික නබි මුහම්මද් (සල්) තුමන් රැගෙන ආ ජීවන මග පිරිපුන්ය.

 

වර්තමානයේ මානව දයාව සානුකම්පාව පරාර්ථකාමය සංහිඳියාව යන ගුණාංග නගා සිටුවීමේ හැකියාව එතුමන් ගෙන ආ සාමයේ පණිවිඩයට සත්‍යයය ලෙසින් හැකිවනු ඇත. තවද නව ලොවක් නවාකාරයෙන් බිහිකිරීමේ හැකියාව එතුමන් දෙසූ වදන් තුළින් හැකිවනු නියතය.

 

නබි මුහම්මද් (සල්) තුමන්ව සංවේදි ලෙසින් සිහිපත් කරන මෙම දිනවල එතුමන් දෙසු මානව දයාව සානුකම්පාව පරාර්ථකාමය සංහිඳියාව යන ගුණාංග නගා සිටුවීම තුළින් එතුමන් ගෙන ආ සාමයේ පණිවිඩයට සත්‍යය ලෙසින් සාක්‍ෂි දැරීමේ වගකීම මුස්ලිම්වරුන්ට ඇත.

 

අපගේ මාතෘභූමියෙහි සාමය හා ශාන්තිය පැවතිය යුතුය හා ජනකොටස් අතර සුහදත්වය පැවතිය යුතුය යැයි මෙම විශේෂ දිනයෙහි අප අල්ලාහ් දෙවියන්ගෙන් ඉල්ලා සිටිමු. එසේම අපගේ රට සංවර්ධිත රටක් වශයෙන් පත් කර දෙන් මෙන්ද අප අල්ලාහ් දෙවියන්ගෙන් අයැද සිටිමු.

 

අෂ් ෂෙයික් ඒ.සී. අගාර් මුහම්මද්                  

නියෝජ්‍ය සභාපති,                                 

සමස්ත ලංකා ජම්යියතුල් උලමා සංගමය                

 

අෂ් ෂෙයික් එම්.එම්.ඒ. මුබාරක්

මහ ලේකම්,

සමස්ත ලංකා ජම්යියතුල් උලමා සංගමය

 

මුෆ්ති එම්.අයි.එම්. රිස්වි

සභාපති ,

සමස්ත ලංකා ජම්යියතුල් උලමා සංගමය

 

 

 

 

29.10.2019

මුළු ලොවටම පිළිලයක් ලෙසත් ඉස්ලාම් ධර්මයහි වූ දයාව, ආදරය,  කරුණාව, ගෞරවය, බල නොකිරීම වැනි ශ්‍රේෂ්ඨ ඉගැන්වීම් විකෘති කර අන්තවාදී සාහසික දේශනා තුළින් ලේ වැගිරවීම් කලාවූත් ISIS ත්‍රස්ත සංවිධානයේ නායකයා යැයි කියැවෙන අබුබකර් අල්-බග්දාදී නැමැත්තා මරණයට පත්ව ඇති බව දැනගැනීමට ලැබීම ශ්‍රී ලංකාවේ ඇතුළුව සකල ලෝකවාසී මුස්ලිම් ජනයාටම ඉමහත් අස්වැසිල්ලක් වනු ඇත.

2015 වසරේදීම, මෙම ISIS ත්‍රස්ත සංවිධානය හා ඉස්ලාම් ධර්මය අතර කිසිදු සම්බන්ධතාවක් නොමැති බව සමස්ත ලංකා ජම්ඉය්යතුල් උලමා සභාව (ACJU) ඇතුළු ශ්‍රී ලාංකික මුස්ලිම් ප්‍රජාව විසින් සිදු කරනු ලැබූ ඒකමතික ප්‍රකාශය ගැන සියලු දෙනාගේ අවධානය යොමු කරනු කැමැත්තෙමු.

ශ්‍රී ලංකාවේ අප්‍රේල් 21 වැනිදා සිදු වූ කුරිරු ත්‍රස්ත ප්‍රහාරයට ද පොළඹවාලීම් සහ අවාදර්ශයන් ලබා දුන්නේ යැයි සැක කරන මෙම ත්‍රස්ත සංවිධානයේ මූලිකයාගේ අවසානය ශ්‍රී ලාංකික අප සියලු දෙනාටම යම් අයුරකින් අස්වැසිල්ලක් වනු නියතය.

එම ත්‍රස්ත ප්‍රහාරයට සම්බන්ධ ත්‍රස්තවාදීන්ගේ මළ සිරුරු කොටස් පවා ඉස්ලාමීය දේවස්ථානවලට හෝ සුසාන භූමි වෙත භාර නොගැනීමට සමස්ත ලංකා ජම්ඉය්යතුල් උලමා සභාව උපදෙස් දුන් බව ද මතක් කරනු කැමැත්තෙමු.

තවද, මෙවන් ප්‍රචණ්ඩ, අන්තවාදී සහ ත්‍රස්ත ක්‍රියාකාරකම්, දෘෂ්ටිවාදයන් සහ පෙළඹවීම් වලින් ඈත් වීමටත් ආරක්ෂක අංශ සමග සහයෝගයෙන් තවදුරටත් ජාතික ආරක්ෂාව තහවුරු කිරීමට උපරිම සහයෝගය ලබා දීමටත්, ප්‍රජාවන් තුළ අන්තවාදය පෝෂණය කරනවුන් ගැන විමසිල්ලෙන් සිටින ලෙසත් සමස්ත ලංකා ජම්ඉය්යතුල් උලමා සභාව ශ්‍රී ලංකේය මුස්ලිම් ප්‍රජාවගෙන් ඉල්ලා සිටී.

 

අෂ්-ෂෙයික් එම්.එම්. අහ්මද් මුබාරක්

ලේකම්

සමස්ත ලංකා මුස්ලිම් වියතුන්ගේ සම්මේලනය

 2019.10.25

(හිජ්රි 25.02.1441)

ලබන නොවැම්බර් 16 වන දින පැවැත්වීමට නියමිත ජනාධිපතිවරණ සමයෙහි පහත කරුණු ගැන සැලකිලිමත් වෙමින් කටයුතු කරන මෙන් ශ‍්‍රී ලාංකික මුස්ලිම් ජනයාගෙන් සමස්ත ලංකා මුස්ලාමීය වියතුන්ගේ සම්මේලනය හෙවත් ජම්යියතුල් උලමා සම්මේලනය කාරුණිකව ඉල්ලා සිටියි.

  1. ගත වුනු 90 වසරකට ආසන්න කාලයක් මෙරට ආගමික, සමාජීය හා මානුෂීය සත්කාර මෙහෙවරවල යෙදී සිටින ජම්යියතුල් උලමා සම්මේලනය සිය කටයුතුවල කිසිඳු දේශපාලන පක්‍ෂයකට පක්‍ෂව හෝ විපක්‍ෂවම කි‍්‍රයා නොකරන බව කවුරුත් දනියි. එනිසා අපගේ මෙම ප‍්‍රතිපත්තියට හානි වන ආකාරයෙන් අප සම්මේලනයේ නාමය කිසිඳු දේශපාලන කටයුත්තකට හෝ ප‍්‍රකාශයකට භාවිත නොකරන මෙන් සැමගෙන් හා විශේෂයෙන් ලාංකික මුස්ලිම් ප‍්‍රජාව වෙතින් තරයේ ඉල්ලා සිටිමු.
  2. විශ්වයේ සියලුම දේ සිදුවන්නේ විශ්වාධිපති අල්ලාහ්ගේ සිතැගි පරිදිය යන විෂයෙහි නොසෙල්වෙන විශ්වාසයක් තබා සිටින මුස්ලිම්වරුන් වන අපි, ජනාධිපතිවරණයෙන් කවුරු ජය ගත්තත් එයද අල්ලාහ්ගේ තීරණය පරිදි සිදුවුවක් යැයි හෘදයාංගමව පිළිගැනීම අපගේ වගකීමකි.
  3. මෙලොව මෙන්ම එලොව ජීවිතයේද ජය රඳා පවතින්නේ අපගේ වක්තෘ මුහම්මද් තුමන්ගේ ආදර්ශමත් ජීවිතය අනුව අපගේ දිවිය හැඩ ගස්වා ගැනීමෙන් පමණි. මෙම ආකල්පය ජනාධිපතිවරණ සමයටද අදාළ විය යුතුය. විශේෂයෙන් මෙම කාලයෙහි අපගේ මව්බිමට සාමයෙන් සපිරි සමෘද්ධිමත් අනාගතයක් අත් වේවා යැයි අප ප‍්‍රාර්ථනා කළ යුතුය. එමෙන්ම අල්ලාහ්ගේ උපකාරය ලබා ගත හැකි යහකි‍්‍රයාවල අප නියැලිය යුතුය.
  4. ප‍්‍රජාතන්ත‍්‍රවාදී මුලධර්ම අනුව කටයුතු කරන මෙරටෙහි ඕනෑම කෙනෙකුට හා පක්ෂයකට මැතිවරණයකට තරඟ කළ හැකිය. එසේම ඕනෑම රට වැසියෙකුට තමන් කැමති අපේක්‍ෂකයෙකුට ඡන්දය ලබා දිය හැකිය. මෙය යුතුකමක් හා අයිතියක් මෙන්ම භාරදුර වගකීමක්ද වන්නේය. මුස්ලිම්වරුන්ටත් මෙම ප‍්‍රජාතාන්ත‍්‍රික අයිතිය හා වගකීම ඇත. එනිසා ඡන්දය ප‍්‍රකාශ කිරීමෙන් වැළකී නොසිට එයට වැදගත්කමක් ලබා දිය යුතුය.
  5. දේශයට ආදරය කරන, ජනතාව වෙනුවෙන් කැපවනු හා රට දියුණු කරනු ඇත යැයි අප විශ්වාස කරන අපේක්‍ෂකයෙකුට අපගේ ඡන්දය ප‍්‍රකාශ කළ යුතුය.
  6. ඡන්ද සමයෙහි හෝ ඕනෑම කාලයක එය හා සම්බන්ධ කිසිඳු වැරදි හෝ නොමනා කි‍්‍රයාවක අප නොයෙදිය යුතුය. එමෙන්ම දූෂ්‍ය ආරංචි, අසත්‍ය හෝ සැක සහිත තොරතුරු හා පුවත් පැතිරවීමෙන්ද අප වැළකී සිටිය යුතු අතර එසේ වීමෙන් අපගේ ආගමික විශ්වාසයද පළුදු විය හැකිය.
  7. ආගමික විද්වතුන් සිකුරාදා ජුමුආ දේශනය ඇතුලූ කිසිදු ආගමික දේශනයක මෙන්ම පුද්ගලික සංවාදවලදී ද කිසිදු අපේක්‍ෂකයෙකුට පක්‍ෂව හෝ විරුද්ධව අදහස් නොදැක්විය යුතුය. මෙම මාර්ගෝපදේශ පිළිබඳව ජනයා දැනුවත් කළ යුතුයි. එමෙන්ම මස්ජිදය දේශපාලන කටයුතු සඳහා භාවිත නොකළ යුතුය.
  8. ඡන්ද විමසීම අවසන් වු පසුව ඉතා සන්සුන්ව කටයුතු කළ යුතුය. මුස්ලිම් ප‍්‍රජාව ඕනෑම අවස්ථාවක සාමය සහජීවනයට රුකුල් වන අයුරින් කටයුතු කළ යුතුයි.

මස්ජිද් පරිපාලකයන්, මුස්ලිම් ආගමික වියතුන්, ආගමික ප‍්‍රධානීන් මෙන්ම ජම්යියතුල් උලමා සංවිධානයේ ශාඛාවල සේවයේ යෙදී සිටින්නන් ඉහත මාර්ගෝපදේශ අනුගමනය කර ඔවුන් ඇසුරු කරන ප‍්‍රදේශවාසී මුස්ලිම්වරුන්ටද අවශ්‍ය මගපෙන්වීම් ලබා දිය යුතු බව අප සංගමය කාරුණිකව ඉල්ලා සිටියි.  

 

අෂ් ෂෙයික් ඒ.සී. අගාර් මුහම්මද්

උප සභාපති

සමස්ත ලංකා ඉස්ලාමීය වියතුන්ගේ සම්මේලනය

 

සෑම ආගමකට අයත් පුද්ගලයෙක්ම තම තමන්ගේ ආගමික නායකයින් දේශකයින් බිහිකිරීම සඳහා වෙන වෙනම පාසල් හා පුහුණු මධ්‍යස්ථාන පිහිටුවාගෙන ඇති පරිදි ඉස්ලාමීය දේශකයින් හා ආගමික නායකයින් බිහි කිරීමේ අරමුණින් පසු ගිය වසර 150 ක් තිස්සේ ශ්‍රී ලංකාවේ ක්‍රියාත්මක වෙමින් පවතින කලා පීඨ මද්රසා හෙවත් අරාබි දහම් පාසල් නමින් හැඳින් වේ.

ලංකාවේ මුල්ම අරාබි විදුහල වර්ෂ 1870 දී ගාල්ල තලාපිටිය ‘සාවියතුල් මක්කීයතුල් ෆාසිය්යතුල් ෂාදුලිය්යා’ යන නමින් ආරම්භ කරන ලද අතර  වර්ෂ 1884 දී වැලිගම ‘අල් මද්රසතුල් බාරි’ අරාබි විදුහල ද වර්ෂ 1894 දී ගාල්ල ‘බහ්ජතුල් ඉබ්‍රාහිමිය්යා’ අරාබි විදුහල ද, වර්ෂ 1931 දී මහරගම ගෆූරිය්යා අරාබි විදුහල ද, වර්ෂ 1954 දී අට්ටාලච්චේන ‘ලංකා නැගෙනහිර අරාබි විදුහල ද, වර්ෂ 1955 දී කාත්තන්කුඩි අල් ෆලාහ් අරාබි විදුහල ද, වර්ෂ 1959 දී කාන්තාවන් සඳහා කල්එලිය මුස්ලිම් බාලිකා අරාබි විදහල ද ආරම්භ කරන ලදී.

අරාබි ඉස්ලාම් පාඨමාලාව ශ්‍රී ලංකාවේ අධ්‍යාපන ක්‍රමවේදය තුළ ඉතා මුල් කාලයේ සිටම ඇතුළත්ව තිබුණු පාඨමාලාවක් බව මෙහි දී ඉතා අවධාරණයෙන් සඳහන් කරනු ලැබීය. රාජ්‍ය මට්ටමින් පාසල්වල ද විශ්ව විද්‍යාල මට්ටමින් ද අරාබි භාෂාව ඇතුළු ඉස්ලාමීය පාඨමාලා එදා පටන් උගන්වනු ලැබීය. 1940 මුල් කාලයේ පේරාදෙණිය විශ්ව විද්‍යාලයේ අරාබි, ඉස්ලාම් සංස්කෘතිය යන අංශ පිහිටුවන ලදී.

 

පාසල් මට්ටමින් අරාබි හා ඉස්ලාම් පාඩම් ඉගැන්වීම සඳහා ගත වූ දසකය  කාලයක් තිස්සේ මව්ලවි ගුරුපත් වීම් රජය විසින් පිරිනමන ලදී.

ඉස්ලාමයේ ඇති ප්‍රධාන මූලාශ්‍ර සියල්ල අරාබි බසින් තිබෙන බැවින් මද්රසා හෙවත් අරාබි පාසල් තුළ අරාබි භාෂාව හා  වෙනත් ඉස්ලාමීය කලාවන් උගන්වන අතරම සිංහල, ඉංග්‍රීසි යන භාෂාවන් ද උගන්වනු ලැබේ. මද්රසා බොහෝමයක අපොස සාමාන්‍ය පෙළ හා උසස් පෙළ සඳහා සිසු දරුවන් සූදානම් කරනු ලැබේ.

රාජ්‍ය අනුමැතිය හිමි වූ පළමු අරාබි ඉස්ලාම් පාඨමාලාව මුල් කර ගනිමින් 2013 වර්ෂයේ සිට විභාග දෙකක් විභාග දෙපාර්තමේන්තුව විසින් පවත්වනු ලබයි. ඒ අනුව රාජ්‍ය අනුමැතිය හිමි වූ පාඨමාලාව මුල් කර ගනිමින් මද්රසාවන් තුළ ඉගැන්වීම් කටයුතු සිදු කරනු ඇත.  

රටට, සමාජයට හා දහමට සේවය කරන සදාචාරසම්පන්න හා යහපත් ගතිපැවතුම් ඇති දේව ගැත්තන් හා දැහැමි පුරවැසියන් බිහි කිරීමේ මහඟු සේවාවක අරාබි මද්රසා නියැළී සිටියි. විශේෂයෙන් වර්තමානයේ ජාතීන් අතර පවතින් ගැටුම් කාරී තත්ත්වය සැලකිල්ලට ගෙන සමාජ යහපත හා  සහජීවනය උදා කිරීමට අවශ්‍ය මග පෙන්වීම් මද්රසා සිසු දරුවන් සඳහා උගන්වනු ලබන බව තරයේ පවසා සිටින්නට කැමැත්තෙමු.

 උක්ත මහා සමුළුවෙහි පහත සඳහන් තීන්දු තීරණ ගන්නා ලදී.

  1. 2019 අප්‍රේල් මස 21 වැනි දින සිදු කරන ලද ම්ලේච්ච ත්‍රස්ථවාදී ප්‍රහාරය මෙම සමුළුම ඉතා දැඩි ලෙස හෙළා දකියි.
  2. මෙම ප්‍රහාරයෙන් මිය ගිය ඇත්තන්ගේ පවුල් සාමාජිකයිනට තම බලවත් ශෝකය ඵල කර සිටි අතර තුවාළ ලැබූවන් ඉතා ඉක්මණින් සුවය ලබන්නට මෙම සමුළුව ප්‍රාර්ථනා කරයි.
  3. ම්ලේච්ච ත්‍රස්තවාදයට හා සාමය, සමාදානය හා සහජීවනය යන උසස් ගුණාංග උගන්වා දිරිමත් කරන ඉස්ලාමයට කිසිදු සම්බන්ධතාවක් නැති බව මෙම සමුළුව තරයේ පවසා සිටියි.
  4. මෙම ප්‍රහාරයට ඍජුව හෝ වක්‍රව කටයුතු කළ සියලු දෙනාහට දැඩි දඬුවම් දිය යුතු බව මෙම සමුළුව ඉල්ලා සිටියි.
  5. කුරුණෑගල, පුත්ලම, ගම්පහ යන පළාත්වල මුස්ලිම්වරුන්ට එරෙහිව ක්‍රියාත්මක වූ ජාතිවාදී ප්‍රහාරයන්ද සමුළුව ඉතා දැඩි ලෙස හෙළා දකින අතර එම කටයුතු වල නිරත වූවන් සඳහා නිසි දඬුවම් ලබා දිය යුතු බව අදාළ බලධාරීන්ගෙන් මෙම සමුළුව ඉල්ලා සිටියි.
  6. ත්‍රස්තවාදී ප්‍රහාරයත් සමග සමබ්න්ධ පුද්ගලයින් ඉතා කෙටි කලක් තුළ අත් අඩංගුවට ගෙන රටේ ආරක්ෂාව තහවුරු කිරීමට අදාළ ක්‍රියාමාර්ග ගත් ජනාධිපති තුමා, අගමැති තුමා ඇතුළු රජයට හා ආරක්ෂක අංශවලට මෙම සමුළුව ස්තුතිය පුද කර සිටියි. එමෙන්ම ත්‍රස්තවාදී ප්‍රහාරයත් සමග අත් අඩංගුවට පත්ව ඇති අසරණ නිර්දෝෂී පුද්ගලයින් ඇත්නම් ඉතා ඉක්මණින් නිදහස් කිරීමට රජය කටයුතු කළ යුතු යැයි ද මෙම සමුළුව ඉල්ලා සිටියි. ‍
  7. මද්රසා තුළ ක්‍රියාත්මක වන පාඨමාළා සියල්ල මෙරටේ නීතියට යටත්ව පිහිටා ඇති බවත් එහි ත්‍රස්තවාදය දිරිගන්වන හෝ උගන්වන කිසිදු කරුණක් නොමැති බවත් ස්ථීර වශයෙන් හා වගකීමෙන් යුතුව මෙම සමුළුව පවසා සිටියි.
  8. ලංකාවේ ත්‍රස්තවාදය හා එම චින්තනය මුල් සමග උගුලා දමන්නට මද්රසා වන් කැපවීමෙන් ක්‍රියා කරනු ඇතැයි මෙම සමුළුව වගකීමෙන් ප්‍රතිඥා දෙයි.
  9. මෙරටේ මද්රසා අරාබි පාසල් පිළිබඳ දකින්නට ඇති වැරදි මත දුරු කොට ජාතීන් අතර අවබෝධය හා සහජීවනය ඇති කරන්නට මද්රසා ඉදිරියෙන් සිට කටයුතු කරනු ඇතැයි මෙම සමුළුව ප්‍රකාශනයට පත් කර ඇත.
  10. වසර දහසක ඉතිහාසය තුළ මුස්ලිම්වරු මෙරටට සෙත සලසන, සාමය ආරක්ෂා කරන, එකමුතුව ජීවත් වන්නට ප්‍රිය කරන ජන සමූහයක් ලෙස සිටි බවත් ත්‍රස්ත ක්‍රියාවන් සඳහා පක්ෂව කටයුතු කර නොමැති බවත් පවසන්නට කැමැත්තෙමු. ඉදිරියටත් එලෙසම මුස්ලිම්වරු සිටිනු ඇතැයි ද එසේ අපි කටයුතු කරන්නෙමු යැයි ද මෙම සමුළුව තරයේ පවසා සිටියි.
  11. රටේ ඇති මාධ්‍ය ආයතන පුවත් සැපයීමේදී වගකීමෙන් යුතුව ක්‍රියා කළ යුතු අතර මාධ්‍ය ධර්මතාවන් පිළිපැදිය යුතු බවත් මෙම සමුළුව ඉල්ලා සිටියි.
  12. ජාතීන් අතර එකමුතුකම හා සමාජ යහපත මෙරට තුළ ඉදිරියටත් ආරක්ෂා කිරීමට රජය, පර්ලිමේන්තු සමාජිකයින්, ආගමික නායකයින්, සිවිල් සමාජය ජාති ආගම් භාෂා භේදයකින් තොරව කැපවීමෙන් කටයුතු කළ යුතු යැයි මෙම සමුළුව ඉල්ලා සිටියි.

2019.06.19

මක්තබ් දහම් පාසල සම්බන්ධව බොදුබලසේනා සංවිධානයේ අසත්‍ය ප‍්‍රචාරය සමස්ත ලංකා ඉස්ලාමීය වියතුන්ගේ සම්මේලනය (ACJU) තරයේ හෙළා දකියි

ශ‍්‍රී ලංකාවාසී මුස්ලිම් ළමුන්ට ආචාර ධර්ම සහ යහගුණ ප‍්‍රගුණ කරන මක්තබ් අධ්‍යාපනය ත‍්‍රස්තවාදයට සහ අන්තවාදයට සහය වන්නක් ලෙසින් බොදුබල සේනා සංවිධානය විසින් මාධ්‍යයට නිකුත් කළ ප‍්‍රචාරය සමස්ත ලංකා ඉස්ලාමීය වියතුන්ගේ සම්මේලනය (ACJU) තරයේ හෙළා දකියි. සත්‍යට එරෙහිව මෙවැනි කටකථා පතුරවන්නන් විෂයයෙහි විමසිල්ලෙන් සිටින ලෙසද ලංකා වාසී සැමගෙන් අප සම්මේලනය ඉල්ලා සිටියි.

ලාංකික මුස්ලිම්වරුන්ට මෙරට වසර දහසකට අධික ඉතිහාසයක් ඇත. ඈත අතීතයේ පටන් මුස්ලිම් දරුවන්ට ආචාර ධර්ම උගන්වා ඔවුන්ව යහපත් පුරවැසියන් බවට පත් කරන අධ්‍යාපනය මුස්ලිම් පල්ලිවල ලබා දෙනු ලැබේ.

මෙවන් ඉතිහාසයක් ලද මස්ජිද් හරහා වූ ආගමික දැනුම හදාරවන ක්‍රමයක් මුස්ලිම් ආගමික කටයුතු දෙපරේතමේන්තුව විසින් 2010 වසරේදී හඳුන්වාදෙන ලදී. එම පාඨමාලාවට අනුව පෙළපොත් සම්පාදනය කර ඒ සඳහා වන නියාමන රීතීන් හඳුන්වා දී මුස්ලිම් පල්ලිවල පැවැත්වෙන එම ළදරු පාසැල් මක්තබ් යන නමින් ප‍්‍රතිසංස්කරණය කරන ලදී. එම මක්තබ් පාසැල් ඒ ඒ මස්ජිද්හි අධීක්‍ෂණය හා මාර්ගෝපදේශ යටතේ පවත්වන්නැයි සමස්ත ලංකා ඉස්ලාමීය වියතුන්ගේ සම්මේලනය (ACJU) උපදෙස් කරමින් සිටියි.

මක්තබ් යන අරාබි වචනයෙහි අරුත ලියන හා ඉගෙනගන්නා ස්ථානය යනුයි. මත්කබ් පාසැල්වල සිදු වන්නේ ලිවීමට හා කියවීමට ඉගැන්වීම හෙයින් මෙම නාමය මේ ස්ථානවලට යොදා ඇත.

මක්තබ් සිසුන්ගෙන් මාසිකව අය කරනු ලබන මුදල මත්කබ් පාසැල්වල ගුරුවරුන්ට වැටුප් ගෙවීම සහ අධ්‍යාපනය හා සම්බන්ධ අනෙකුත් වියදම් සඳහා වැය කරනු ලැබේ. මෙම කටයුතු ඒ ඒ පල්ලිවල මක්තබ් සම්බන්ධ කටයුතු කිරීමේ වගකීම භාරව සිටින්නන් විසින් සිදු කරනු ලැබේ. ඊට පටහැණිව සමස්ත ලංකා ඉස්ලාමීය වියතුන්ගේ සම්මේලනයට (ACJU), එහි පරිපාලනයට හා කළමනාකරණයට භාවිත නොකරන බව සමස්ත ලංකා ඉස්ලාමීය වියතුන්ගේ සම්මේලනය (ACJU) වගකීමෙන් කියා සිටියි.

එනිසා සියවස් ගණනාවක් මෙහි පැවත එන කුඩා ළමුන්ගේ ආගමික අධ්‍යාපනය සම්බන්ධ මෙහෙයක් අසත්‍ය හා අමූලික ප‍්‍රචාර සිදු කිරීම මගින් ජාතිවාදි ද්වේෂය උසි ගන්වන්නට හා සාමය හා එකමුතුබව විනාශ කරන්නට කටයුතු නොකරන ලෙස අප සම්මේලනය කාරුණිකව ඉල්ලා සිටියි.

 

අෂ් ෂේහ් මුර්ෂිද් මුලෆ්ෆර්

සහකාර ලේකම්

සමස්ත ලංකා ඉස්ලාමීය වියතුන්ගේ සම්මේලනයට (ACJU)