Super User

Super User

ACJU/NGS/2021/200

2021.09.16

 

පාස්කු ඉරිදා ප්‍රහාර මාලාව මෙන් ත්‍රස්තවාදී ප්‍රහාරයක් මෙරටට නැවත නුදුරු අනාගතයේදීම එල්ල විය හැකි යැයි 2021.09.13 වැනි දින එක්තරා රූපවාහිනී නාලිකාවක විකාශය කෙරුණු සංවාදාත්මක වැඩසටහනක දී පූජ්‍ය ගලගොඩඅත්තේ ඥානසාර ස්වාමීන් වහන්සේ විසින් ප්‍රකාශ කර තිබේ. මෙම ප්‍රකාශය පදනම් කරගනිමින් පුවත්පත් වාර්තා ද පළ වී ඇති බව අප නිරීක්ෂණය කළෙමු.

ඥානසාර ස්වාමීන් වහන්සේගේ මෙම ප්‍රකාශය පොදු ජනතාව අතර මහත් භීතියක් සහ සංත්‍රාසයක් ඇති කර තිබේ. කෙසේ වුවද, පාස්කු ඉරුදින ප්‍රහාරය නිසා ඇති වූ ජීවිත විනාශය, ඉන්පසුව මෙරට ජනතාවට ඇති වූ ප්‍රශ්න සහ අභියෝග පිළිබඳව ද අපි හොඳින් දනිමු.

එබැවින්, අදාළ නිලධාරීන් ස්වාමීන් වහන්සේ කළ ප්‍රකාශය සම්බන්ධයෙන් අවශ්‍ය පරීක්ෂණ සිදුකොට, ජාතික ආරක්ෂාව සහ ජාතීන් අතර සමගිය තහවුරු කිරීම පිණිස අදාළ පියවර ගන්නා ලෙසත්, එම ප්‍රකාශයේ සත්‍ය-අසත්‍ය බව ජනතාවට හෙළිකරන ලෙසත් ඉතා ගෞරවයෙන් ඉල්ලා සිටිමු.

තවද, ඉහත සඳහන් කළ ස්වාමීන් වහන්සේ විසින් ඉස්ලාමය පිළිබඳ නගා ඇති පදනම් විරහිත චෝදනාවලට අදාල පැහැදිලිකිරීම් හැකි ඉක්මනින් ලබා දීමට කටයුතු කරන බවත් සඳහන් කිරීමට කැමැත්තෙමු.

 


අෂ්-ෂෙයික් එම්. අර්කම් නූරාමිත්
මහලේකම්
සමස්ත ලංකා ඉස්ලාම් ආගමික විද්වතුන්ගේ සභාව

යොමු අංකය : ACJU/NGS/2021/188

2021 සැප්තැම්බර් මස 06 වෙනිදා (1443.01.27)

 

ආදරණීය සැමට,

අස්සලාමු අලෙයිකුම් වරහ්මතුල්ලාහි වබරකාතුහූ

 

වර්තමානයේ අප රට ඇතුළු මුළු ලොවේම කොවිඩ් -19 ව්‍යාප්තිය නිසා ඉතා වේගවත් ලෙස රෝහල් තුළ රෝගීන්ගේ පිරී යාම අපි දනිමු.

මෙම දැඩි අසීරු අවස්ථාවේදී, සමාජ මෙහෙවරවල නියැලීමට සහ දුප්පතුන්, පීඩිතයින් සහ රෝගීන් වැනි අවශ්‍යතා ඇති අයට උපකාර කිරීමට ඉස්ලාමය අපට මඟපෙන්වා ඇත.

“කවරෙකු ආත්මාවක් ජීවත් කරවන්නේ ද ඔහු මිනිසුන් සියල්ල (ආරක්ෂා කර) ජීවත් කරවන්නෙකු මෙන් වන්නේය” (මූලාශ්‍රය : අල්-කුර්ආනය 5;32)

නබි මුහම්මද් (r) තුමාණෝ මෙසේ පැවසූහ. "කවරෙකු තම සහෝදරයෙකුගේ අපහසුතාවන් ඉවත් කිරීමට කටයුතු කරන්නේද, ඒ වෙනුවෙන් අල්ලාහ්, මරණින් මතු විනිශ්චය දිනයේදී ඔහුගේ අපහසුතාවන් ඉවත් කරයි." (මූලාශ්‍රය : මුස්ලිම්;2699)

රුධිරය යනු මිනිසාට ඉතා අත්‍යාවශ්‍ය දෙයකි. දැනට පවතින වාතාවරණය තුළ රෝගීන්ට ප්‍රතිකාර කිරීම සඳහා මෙරට රෝහල්වල රුධිර හිඟයක් පවතින බව අදාළ බලධාරීන්ගෙන් තොරතුරු ලැබී ඇත.

ලේ දන්දීම සම්බන්ධව මගපෙන්වීම් හා කොන්දේසි සමස්ත ලංකා ඉස්ලාම් ආගමික විද්වතුන්ගේ සභාවේ ෆත්වා කමිටුව මඟින් ප්‍රකාශයට පත් කොට ඇති ආගමික විග්‍රහයෙහි කියවිය හැක. සබැඳිය : (https://acju.lk/fatwa-bank-ta/recent-fatwa/item/746-2016-08-04-06-22-09)

උක්ත කරුණට අදාළව සෞඛ්‍ය මාර්ගෝපදේශ යටතේ සමස්ත ලංකා ඉස්ලාම් ආගමික විද්වතුන්ගේ සභාවේ ප්‍රාදේශීය ශාඛා විද්වතුන් මස්ජිද් පරිපාලකයින්ගේ සහය ඇතිව ලේ දන්දීම සම්බන්ධව කටයුතු සම්පාදනය කරන මෙන් ඉතා කාරුණිකව ඉල්ලා සිටිමු.

වස්සලාම්.

 

අෂ්-ෂෙයික්, එම්. අර්කම් නූරාමිත්

මහලේකම්,

සමස්ත ලංකා ඉස්ලාම් ආගමික විද්වතුන්ගේ සභාව

යොමු අංකය: ACJU/NGS/2021/190

2021 සැප්තැම්බර් 04 වෙනිදා

 

2021 සැප්තැම්බර් 3 වන දින නවසීලන්තයේ ඕක්ලන්ඩ් හිදී සිදු වූ අමානුෂික ප්‍රහාරයෙන් විපතට පත් අය කෙරෙහි අපගේ බලවත් ශෝකය ප්‍රකාශ කර සිටිමු. ඔහු ශ්‍රී ලාංකික සම්භවයක් ඇති අයෙකු බවත් ඔහුගේ අමානුෂික ක්‍රියාව මෙහෙයවනු ලැබුවේ අයි.එස්.අයි.එස්. ත්‍රස්තවාදී මතවාදයක් බවත් වාර්තා වීම ගැන අපි දැඩි කම්පාවට හා කණගාටුවට පත්ව සිටිමු.

සමස්ත ලංකා ඉස්ලාම් ආගමික විද්වතුන්ගේ සභාව (ACJU) ශ්‍රී ලංකාවේ මුස්ලිම් සිවිල් සංවිධාන හා ඒකාබද්ධව වර්ෂ 2015 දී අයි.එස්.අයි.එස්. ත්‍රස්තවාදී මතවාදය ප්‍රතික්ෂේප කරමින් සහ හෙළා දකිමින් 'ඒකාබද්ධ ප්‍රකාශයක්' නිකුත් කළහ. මෙම ත්‍රස්තවාදී මතවාදය මගින් සාමය, ආදරය, දයාව, යුක්තිය, මධ්‍යස්ථභාවය සහ සැමට ගෞරවය ප්‍රවර්ධනය කරන ඉස්ලාම් නැමැති සුන්දර දහම පළුදු කොට ඇත.

ලොව පුරා බොහෝ තරුණ පිරිස් විවිධාකාර ආකාර අන්තවාදී මතවාදයන්ට ගොදුරු වී ඇති බව කණගාටුවට කරුණකි. එමනිසා අපේ තරුණ පරම්පරාව රැකගැනීම හා මඟපෙන්වීම සඳහා වැඩි ප්‍රයත්නයන් දැරීම අත්‍යවශ්‍ය ය.

නවසීලන්ත අග්‍රාමාත්‍ය ජසින්ඩා ආඩර්න් තුමියගේ ප්‍රකාශය අපි ඇත්තෙන්ම අගය කරමු; “එය වෛරයකි, වැරැද්දකි, තනි පුද්ගලයෙකු විසින් එල්ල කර ඇත්තකි, එය ආගමට, ජාතියට හෝ සංස්කෘතියට සම්බන්ධ නොවූවකි. මෙම අමානුෂීය ක්‍රියාවන්හි වගකීම ඔහු පමණක් දරයි.” යනුවෙන් ඇය කළ මෙම ප්‍රකාශය තුළින් ආදරය, යුක්තිය සහ අපක්ෂපාතී බව ප්‍රවර්‍ධනය කරන පුදුමාකාර නායකත්ව ගුණාංගය පිළිඹිඹු වෙයි.

ශුද්ධ වූ අල්-කුර්ආනයේ 41:34 වන වාක්‍යයේ සඳහන් පරිදි ඉවසීම, දයානුකම්පාව සහ වාර්ගික සමගිය විදහා දැක්වීම ගැන නවසීලන්ත ජනතාවට අපි බෙහෙවින් ප්‍රශංසා කරමු. එනම්,

“තවද යහපත හා අයහපත සම නොවන්නේය. (එබැවින්) ඉතා යහපත් දැයින් (අයහපත) වළක්වවු. එ(සේ කළ )විට නුඹ අතර හා කවරෙකු අතර සතුරුකමක් ඇත්තේ ද ඔහු සැබැවින්ම සමීපතම මිතුරෙකු මෙන්( වන්නේ)ය.“

වර්තමාන ලෝකය තුළ සියලු දෙනාටම සාමය, ආදරය, දයාව, යුක්තිය, මධ්‍යස්ථභාවය සහ ගෞරවය ප්‍රවර්‍ධනය කරමින් සියලු ආකාරයේ අන්තවාදයන් මුලිනුපුටා දැමීම සඳහා අපි සියලු දෙනාම වගකීම දැරිය යුතුයි.

ලොව පුරා වෙසෙන සියලු‍ මිනිසුන්ගේ ආරක්ෂාව සඳහා අප ප්‍රාර්ථනා කරන අතර සර්වබලධාරි අල්ලාහ් අන්තවාදීන්ගේ ක්‍රියාවන්ගෙන් සහ සියලු‍ ආකාරයේ නපුරුකම් වලින් මානව වර්ගයා ආරක්ෂා කර සදාකාලික සාමය හා සමෘද්ධිය ලබා දී මෙලොව ආශීර්වාද කරත්වා. 

 

අෂ්-ෂෙයික්, එම්. අර්කම් නූරාමිත්

මහලේකම්,

සමස්ත ලංකා ඉස්ලාම් ආගමික විද්වතුන්ගේ සභාව

යොමු අංකය : ACJU/NGS/2021/186

2021 සැප්තැම්බර් මස 02 වෙනිදා (1443.01.23)

 

මේ වන විට අප මව්බිම ඇතුළු මුළු ලෝකයම කොරෝනා වසංගත තත්ත්වයෙන් පීඩාවට පත්ව ඇති අතර, බඩු මිල ඉහළ යාම ජනතාවගේ දෛනික ජීවිතයට බෙහෙවින් බලපා ඇති කරුණකි.

ඉස්ලාමය අපට සමාජ මෙහෙවරවල නියැලීමට සහ දුප්පතුන්, පීඩිතයින් සහ රෝගීන් වැනි අවශ්‍යතා ඇති අයට උපකාර කිරීමට මඟපෙන්වා ඇත.

ජනතාවගේ දෛනික අවශ්‍යතා සපුරාලීමේදී වෙළෙඳුන් විශාල කාර්යභාරයක් ඉටු කරති. සර්වබලධාරී අල්ලාහ්, ඔවුන්ගේ ව්‍යාපාර දියුණු කරනු මැනව! යනුවෙන් අපි මේ අවස්ථාවේදී ප්‍රාර්ථනා කරමු.

සෑම අවස්ථාවකදීම වෙළෙන්දෝ අවංකව කටයුතු කළ යුතු බව ඉස්ලාමය අවධාරණය කරයි. අවංක වෙළඳුන් වෙනුවෙන් නබි මුහම්මද් (සල්) තුමාණෝ ප්‍රාර්ථනා කර ඇති අතර ලොව අවසන් විනිශ්චය දිනයේදී ඔවුන් නබිවරුන්, සත්‍යවාදීන් සහ දහම වෙනුවෙන් තම ජීවිතය කැපකළවුන් සමඟ සිටින බව සුභාරංචි පවසා ඇත.

කෙසේ වෙතත්, පවතින වාතාවරණය තුළ ඇතැම් වෙළෙඳුන් අත්‍යාවශ්‍ය භාණ්ඩ අලෙවි නොකර මිල ඉහළ යැවීම සඳහා භාණ්ඩ ගබඩා කර තබන බවත් ඒ සඳහා රජය ඇතැම් පියවර ගනිමින් සිටින බවත් මාධ්‍ය මඟින් වාර්තා වී ඇත.

අවශ්‍ය භාණ්ඩ අලෙවි නොකර ගබඩා කරන අය පව්කාරයින් හා ශාපලත් අය බව නබිවදන් මගින් අනතුරු අඟවා ඇත. මෙලෙස මිනිසුන්ට අවශ්‍ය ඕනෑම භාණ්ඩයක් අලෙවි නොකර ගබඩා කර තැබීම හරාම් යනුවෙන් ආගමික විද්වතුන් ප්‍රකාශ කර ඇත. මෙහි වැඩි විස්තර සමස්ත ලංකා ඉස්ලාම් ආගමික විද්වතුන්ගේ සභාවේ ෆත්වා අංශය මගින් (ACJU/FTW/2021/020-435) දරණ ෆත්වා අංකයෙන් ප්‍රකාශයට පත් කර ඇත.

සබැඳිය:https://acju.lk/fatwa-bank-ta/recent-fatwa/item/2274-fatwa-on-monopoly-in-islam-tamil

එම නිසා මෙම පීඩාකාරී තත්ත්වය තුළදී ජනතාවගේ යහපත උදෙසා අත්‍යාවශ්‍ය භාණ්ඩ ගබඩා නොකර සාධාරණ මිලකට අලෙවි කිරීමට කටයුතු කරන මෙන් අපි වෙළෙඳ ප්‍රජාවගෙන් ඉතා කාරුණිකව ඉල්ලා සිටිමු.

 

අෂ්-ෂෙයික්, එම්.එල්.එම්. ඉල්යාස්

ලේකම්,

ෆත්වා කමිටුව,

සමස්ත ලංකා ඉස්ලාම් ආගමික විද්වතුන්ගේ සභාව

 

අෂ්-ෂෙයික්, එම්. අර්කම් නූරාමිත්

මහලේකම්,

සමස්ත ලංකා ඉස්ලාම් ආගමික විද්වතුන්ගේ සභාව

යොමු අංකය : ACJU/NGS/2021/184

2021 අගෝස්තු මස 31 වෙනිදා

 

කොවිඩ්-19 වසංගත තත්ත්වය මේ වන විටත් රට තුළ සීඝ්‍රයෙන් ව්‍යාප්ත වෙමින් පවතී. මේ නිසා බොහෝ ප්‍රදේශවල ජනතාව විවිධ දුෂ්කරතාවන්ට මුහුණ පා සිටිති. සෑම දිනකම බොහෝ දෙනෙක් අප හැර මිය යති. තවත් බොහෝ දෙනෙක් ප්‍රතිකාර සඳහා රෝහල්ගත වන අතර තවත් බොහෝ දෙනෙක් නිවසේම ස්වයං නිරෝධායනයේ යෙදෙති.

මෙවන් තත්ත්වයකදී සමාජය සමඟ බැඳී ජීවත් වන ලෙසත්, සමාජ සත්කාරයන්ට හවුල්වන ලෙසත්, අසරණයින්, විපතට පත්වූවන් හා දුප්පතුන් හඳුනාගෙන ඔවුන්ට උපකාර කරන ලෙසත් ඉස්ලාමය අපට දිරිගන්වා ඇත.

නබි මුහම්මද් (සල්ලල්ලාහු අලෙයිහි වසල්ලම්) තුමාණෝ මෙසේ පැවසූහ. "යමෙක් තම සහෝදරයාට උපකාර කරමින් සිටින තුරා සර්වබලධාරී අල්ලාහ්, ඔහුට උපකාර කරමින් සිටියි. කවරෙකු තම සහෝදරයෙකුගේ අපහසුතාවන් ඉවත් කිරීමට කටයුතු කරන්නේද, ඒ වෙනුවෙන් අල්ලාහ්, මරණින් මතු විනිශ්චය දිනයේදී ඔහුගේ අපහසුතාවන් ඉවත් කරයි." (මූලාශ්‍රය : මුස්ලිම්)

මෙම ඛේදවාචකයේදී විපතට පත් වූවන්ට හැකි සෑම අයුරකින්ම උපකාර කිරීමට ඉදිරිපත් වන මෙන් සමස්ත ලංකා ඉස්ලාම් ආගමික විද්වතුන්ගේ සභාව සමස්ත ජනතාවගෙන් ඉතා කාරුණිකව ඉල්ලා සිටියි.

පසුගිය කාලයේ දී, අප සභාවේ මඟපෙන්වීම යටතේ, අප ප්‍රාදේශීය ශාඛාවල (DRCC) ආපදා සහන සම්බන්ධීකරණ මධ්‍යස්ථාන, මස්ජිදයන් හරහා සහ පෞද්ගලික වශයෙන් ඔබ විවිධ ආධාර සහ සහන සේවාවන් ලබා දී ඇත. එකී සහන සේවාවන් නැවත ආරම්භ කරන ලෙසත් විශේෂයෙන් රෝගයෙන් පෙලෙන අය වෙනුවෙන් කටයුතු කිරීමට ඉදිරිපත්වන ලෙසත් අප සභාව ඉල්ලා සිටී.

විශේෂයෙන්, රෝග ලක්ෂණ ඇති අයට අවශ්‍යවන (Antigen, PCR වැනි) පරීක්ෂාවන් ඉක්මනින් සිදුකිරීමේ හදිසි පිළියම් හා විධිවිධාන ප්‍රදේශයේ වෛද්‍යවරුන් සමඟ සාකච්ඡා කොට ඉටු කරන ලෙස අප සභාව සිය ප්‍රාදේශීය ශාඛාවන්, මස්ජිද් සම්මේලන සහ සමාජ ක්‍රියාකාරීන්ගෙන් ඉතා කාරුණිකව ඉල්ලා සිටී.

වර්තමානයේ රෝගීන් සංඛ්‍යාව අඛණ්ඩව ඉහළ යමින් පවතින හෙයින් සෞඛ්‍ය අංශයන් සමඟ සාකච්ඡා කර සුදුසු ස්ථාන තෝරාගෙන තාවකාලික කෝවිඩ්-19 ප්‍රතිකාර මධ්‍යස්ථාන පිහිටුවීමට ඉදිරිපත් වන මෙන් අප සභාව අදාළ ප්‍රදේශවාසීන්ගෙන් ඉල්ලා සිටී. නිවසේ නවාතැන් හිඟකම හේතුවෙන් රෝගය සෙසු අයට බෝවීමේ අවදානමක් පවතින නිසා එම ප්‍රදේශයේ පහසුකම් ඇති ස්ථාන පිළිබඳව අදාළ නිලධාරීන් සමඟ සාකච්ඡා කර ප්‍රාදේශීය මට්ටමින් රෝගීන් නිරෝධායනයට යොමුකිරීමේ විධිවිධාන සලසන ලෙසද අප සභාව ඉල්ලා සිටී.

ඊට අමතරව ඇතැම් අරාබි විද්‍යාලවල සහ මස්ජිදයන්වල සේවය කරන ආචාර්යවරුන්, ඉමාම්වරුන්, මුඅද්දින්වරුන් සහ අනෙකුත් කාර්ය මණ්ඩලවල මාසික වැටුප් නොගෙවන බවට අපට තොරතුරු ලැබී ඇත. එම නිසා මේ සම්බන්ධව ත්‍යාගශීලී වී වැටුප් කඩිනමින් ගෙවන ලෙස අප සභාව අදාළ භාරකරුවන්ගෙන් ඉල්ලා සිටී. එමෙන්ම දෛනික හා මාසික වැටුප් සඳහා වැඩ කරන අයගේද නියමිත වේලාවට වැටුප් ගෙවීමට කටයුතු කරන ලෙසද අප සභාව කාරුණිකව ඉල්ලා සිටී.

සර්වබලධාරි අල්ලාහ්, අපගේ උත්සාහයන් පිළිගනිත්වා! අපේ ජීවිතයේ අභිවෘද්ධිය උදා කරත්වා! මෙලොවෙහි හා පරලොවෙහි කරුණාව දක්වත්වා!

 

අෂ්-ෂෙයික් එම්. අර්කම් නූරාමිත්

මහලේකම්,

සමස්ත ලංකා ඉස්ලාම් ආගමික විද්වතුන්ගේ සභාව

 

1) 2019.04.21 - අපගේ ක්‍රිස්තියානි සහෝදර සහෝදරියන් පාස්කු මංගල්‍යය සමරමින් සිටියදී ක්‍රිස්තියානි දේවස්ථාන සහ වෙනත් ස්ථානවලට අද දින එල්ල වූ අමානුෂික ත්‍රස්ත ප්‍රහාරය සමස්ත ලංකා ඉස්ලාම් ආගමික විද්වතුන්ගේ සභාව දැඩි ලෙස හෙළා දකී.

මෙම ශෝකජනක මොහොතේදී සියලු ක්‍රිස්තියානි සහෝදර සහෝදරියන් වෙනුවෙන් සමස්ත ලංකා ඉස්ලාම් ආගමික විද්වතුන්ගේ සභාව වන අප සියලු ශ්‍රී ලාංකික මුස්ලිම් ජනතාව නියෝජනය කරමින් අපගේ සහයෝගය, ආදරය සහ සෙනෙහස පළ කර සිටිමු.

සියලුම ආගමික සිද්ධස්ථාන වහාම ප්‍රමාණවත් ලෙස ආරක්ෂා කරන බවට සහතික වන ලෙසටත්, මෙම අපරාධ සිදු කළ අපරාධකරුවන් වහාම නීතිය ඉදිරියට පමුණුවන බවට සහතික වන ලෙසටත් අපි අදාළ බලධාරීන්ගෙන් ඉල්ලා සිටිමු.

https://acju.lk/si/news-si/acju-news-si/item/1614-2019-04-21-08-17-08

2) 2020.04.20 - පසුගිය 2019 වසරේ පාස්කු ඉරිදා සිදුවූ දරුණු ත්‍රස්ත ප්‍රහාරය සම්බන්ධව..

තම ආදරණීයයන් අහිමි වීම නිසා පීඩා විඳින සියලු දෙනාටම සැනසිල්ල මගින් ආශිර්වාද කරන ලෙසත් ජීවිතයේ සියලු ආකාරයේ වාසනාවන්ගෙන් ඔවුන්ට සිදු වූ අලාභය සඳහා වන්දි ලබා දෙන ලෙසත් අපි සර්වබලධාරි අල්ලාහ්ගෙන් ප්‍රාර්ථනා කරමු.

අපරාධකරුවන් මනුෂ්‍යත්වයේ සතුරන් වූ අතර මෙම අපරාධවලට සම්බන්ධ වූ කවරෙකු වුව ද දඬුවම් ලැබිය යුතුය.

ප්‍රජාව සැනසවීමේ ප්‍රශංසනීය ප්‍රයත්නයන්ට සහ මුස්ලිම් ප්‍රජාවට එරෙහිව සිදු වන්නට ගිය ඵලවිපාක වළක්වාලමින් සාමය සහ සමගිය ඇති කිරීමට උත්සාහ කිරීම වෙනුවෙන් අති උතුම් කාදිනල් මැල්කම් රංජිත් හිමිපාණන්ට අපගේ හද පිරි ප්‍රණාමය පුද කිරීමට අප මෙය අවස්ථාවක් කර ගනිමු.

https://acju.lk/si/news-si/acju-news-si/item/1919-2020-04-20-06-42-08

3) 2020.04.20 - පසුගිය 2019 වසරේ පාස්කු ඉරිදා දින සිදු වූ දරුණු ත්‍රස්ත ප්‍රහාරය පිළිබඳ (මුෆ්ති එම්.අයි.එම්. රිස්වි තුමාගේ) වීඩියෝ දර්ශනය - https://youtu.be/bT_7zg3VDaE

4) 2021.02.21 - ශ්‍රී ලාංකික මුස්ලිම් ජනතාවගේ අයිතිවාසිකම්, අනන්‍යතාවය සහ ගෞරවය ආරක්ෂා කිරීම

පාස්කු ඉරිදා ත්‍රස්ත ප්‍රහාරයේ වරදකරුවන් හෙළි කර නීතිය ඉදිරියට ගෙන ඒමට සහ වැරදිකරුවන්ට නීතිය අනුව දඬුවම් ලබා දීමට අවශ්‍ය පියවර ගන්නා ලෙස අපි බලධාරීන්ගෙන් ඉල්ලා සිටිමු.

https://acju.lk/si/news-si/acju-news-si/item/2092-rights-identity-of-muslims-english

5) 2021.03.04 - පාස්කු ප්‍රහාරයේ වින්දිතයින්ගේ කැඳවීමට සමස්ත ලංකා ඉස්ලාම් ආගමික විද්වතුන්ගේ සභාව තම සහාය දක්වයි.

2019 අප්‍රේල් 21 පාස්කු ඉරිදා දින අහිංසක බැතිමතුන්ට සහ වෙනත් අයට සිදු වූ දරුණු ප්‍රහාරයේ වගකිව යුතු ප්‍රධාන මොළකරුවන් නීතිය ඉදිරියට ගෙන ඒම සඳහා වන ක්‍රිස්තියානි ප්‍රජාවගේ වින්දිතයින්ගේ සහ අපේ මව්බිමේ අනෙකුත් පුරවැසියන්ගේ කැඳවීමට සමස්ත ලංකා ඉස්ලාම් ආගමික විද්වතුන්ගේ සභාව සහ මුස්ලිම් ප්‍රජාව තම නොමසුරු සහයෝගය ලබාදෙන්නෝය. මෙම නීච ත්‍රස්ත ප්‍රහාර නිසා ඇති වන වේදනාව හා කණගාටුව පිළිබඳව අපි සියලු ආගම් වල සහෝදර සහෝදරියන්ගේ ශෝකය හා කණගාටුව බෙදා ගන්නෙමු.

සැබෑ අපරාධකරුවන් මෙතෙක් සොයා ගැනීමට නොහැකි වීම සහ අහිංසක වින්දිතයින් වෙනුවෙන් යුක්තිය සෙවීමට අසීරු වීම පිළිබඳ අපි බලවත් කණගාටුව පළ කරන්නෙමු. එබැවින් අතිගරු කාදිනල් මැල්කම් රංජිත් හිමිපාණන් සහ වින්දිතයින්ගේ කැඳවීමට හෘදයාංගවම සහයෝගය දෙන ලෙස අපි සෑම ආගමකම නිවැරදි සිතුවිලිවලින් යුක්ත ජනතාවගෙන් ඉල්ලා සිටිමු.

මෙම හැඟීම් සමඟ අප මුළු හදවතින්ම සම්බන්ධ වන අතර අපරාධකරුවන් හෙළිදරව් කරන ලෙස පීඩාවට පත් වූවන්ගේ ඉල්ලීමත් සමග එක්වන ලෙස සහ යුක්තිය හා සාමය ලබා දීමෙන් යම් තරමක හෝ සහනයක් ලබා දෙන ලෙසත් අපි සියලු ශ්‍රී ලාංකිකයින්ගෙන් ඉල්ලා සිටිමු.

https://acju.lk/si/news-si/acju-news-si/item/2099-2021-03-05-10-36-25

6) 2021.04.02 - අපගේ ප්‍රාර්ථනා හා සිතුවිලි ක්‍රිස්තියානි ප්‍රජාව සමඟ ඇත්තේය.

මෙම අමානුෂික කුරිරු ක්‍රියාව අපි තරයේ හෙළා දකින අතර, ජීවිත අහිමි වූ සහ තුවාල ලැබූ සියලු දෙනාගේ පවුල් වලට අපගේ බලවත් කණගාටුව සහ ශෝකය ප්‍රකාශ කරන අතර, තම ආදරණීයයන් අහිමි වීම නිසා පීඩාවට පත් වන සියලු දෙනා වෙනුවෙන් සැනසිල්ල මගින් ආශිර්වාද කරන ලෙසත් ජීවිතයේ සියලු ආකාරයේ වාසනාවන්ගෙන් ඔවුන්ට සිදු වූ අලාභය සඳහා වන්දි ලබා දෙන ලෙසත් අපි සර්වබලධාරි අල්ලාහ්ගෙන් ප්‍රාර්ථනා කරමු.

සැබෑ අපරාධකරුවන් සහ මහමොළකරුවන් හඳුනාගෙන නීතිය ක්‍රියාත්මක කළ යුතු යැයිද යුක්තිය ඉටු කළ යුතු යැයිද අප අවංකවම ප්‍රාර්ථනා කරමු.

https://acju.lk/en/news/acju-news/item/2123-our-prayers-and-thoughts-are-with-the-christian-community

7) 2021.04.21 - සමස්ත ලංකා ඉස්ලාම් ආගමික විද්වතුන්ගේ සභාව සහ මුස්ලිම් ප්‍රජාව මුළු මහත් ජාතිය සමඟ අපගේ බලවත් ශෝකය, කණගාටුව සහ චිත්තවේගී වේදනාව ප්‍රකාශ කරමු.

2019 අප්‍රේල් 21 වන දින පාස්කු ඉරිදා සිදු වූ ම්ලේච්ඡ සියදිවි නසාගැනීමේ ත්‍රස්ත ප්‍රහාරය සිහිපත් කිරීම සඳහා කොළඹ අගරදගුරු තුමාගේ කැඳවීමට සහයෝගය දෙන ලෙස අපි සියලු ශ්‍රී ලාංකිකයින්ගෙන් ඉල්ලා සිටිමු.

සැබෑ අපරාධකරුවන් සහ මහමොළකරුවන් හඳුනාගෙන නීතිය ක්‍රියාත්මක කළ යුතු යැයිද යුක්තිය ඉටු කළ යුතු යැයිද අප අවංකවම ප්‍රාර්ථනා කරමු.

https://acju.lk/en/news/acju-news/item/2141-easter-attack-message

8) 2021.05.14 - ඊදුල් ෆිත්ර් උත්සව දින පණිවිඩය

මෙම ආශීර්වාද ලත් දිනයේදී, පාස්කු ප්‍රහාරයෙන් අසාධාරණයට ලක් වූවන්, දැඩි පීඩාවට පත් වූවන්ට සහ ඔවුන්ගේ පවුලේ උදවියට යුක්තිය සහ සහනය ලබා දෙන මෙන් අපි ප්‍රාර්ථනා කරමු.

https://acju.lk/si/news-si/acju-news-si/item/2159-eid-day-message-sinhala

9) 2021.06.18 - අතිගරු ජනාධිපති ගෝඨාභය රාජපක්ෂ මහතාට යැවූ ලිපිය - පාස්කු ප්‍රහාරය පිළිබඳ විමර්ශන කඩිනම් කරන ලෙසත් නියම මහ මොළකරුවන් හඳුනාගෙන යුක්තිය තහවුරු කරන ලෙසත් කරන ලද ඉල්ලීම. (සිංහල)

https://acju.lk/en/news/acju-news/item/2252-letter-to-he-gotabaya-rajapakse

10) 2021.06.18 - ගරු අග්‍රාමාත්‍ය මහින්ද රාජපක්ෂ මහතාට යැවූ ලිපිය - පාස්කු ප්‍රහාරය පිළිබඳ විමර්ශන කඩිනම් කරන ලෙස සහ නියම මහ මොළකරුවන් හඳුනාගෙන යුක්තිය තහවුරු කරන ලෙස කරන ලද ඉල්ලීම. (සිංහල)

https://acju.lk/en/news/acju-news/item/2254-letter-to-pm-mahinda-rajapakse


11) 2021.06.18 - ගරු මහජන ආරක්ෂක අමාත්‍ය ආචාර්ය සරත් වීරසේකර මහතා හට යැවූ ලිපිය - පාස්කු ප්‍රහාරය පිළිබඳ විමර්ශන කඩිනම් කරන ලෙසත් නියම මහ මොළකරුවන් හඳුනාගෙන යුක්තිය තහවුරු කරන ලෙසත් කරන ලද ඉල්ලීම. (සිංහල)

https://acju.lk/en/news/acju-news/item/2253-letter-to-minister-of-public-security

12) 2021.06.18 - ගරු ආරක්ෂක ලේකම්, (විශ්‍රාමික) ජනරාල් කමල් ගුණරත්න මහතා වෙත යැවූ ලිපිය - පාස්කු ප්‍රහාරය පිළිබඳ විමර්ශන කඩිනම් කරන ලෙස සහ නියම මහ මොළකරුවන් හඳුනාගෙන යුක්තිය තහවුරු කරන ලෙස කරන ලද ඉල්ලීම. (සිංහල)

https://acju.lk/en/news/acju-news/item/2255-letter-to-secretary-of-defence

 

මාධ්‍ය අංශය
සමස්ත ලංකා ඉස්ලාම් ආගමික විද්වතුන්ගේ සභාව

යොමු අංකය : ACJU/NGS/2021/182

2021 අගෝස්තු මස 25 වෙනිදා

 

මෙරට හිටපු අමාත්‍ය සහ ජ්‍යෙෂ්ඨ දේශපාලනඥයෙකු වූ ගරු මංගල සමරවීර මහතා කොරෝනා වෛරසය ආසාදනය වී ඊයේ දිනයේ අප අතුරින් සමුගත් පුවත අපව බලවත් ශෝකයට පත් කළේය.

එතුමා මෙරට ප්‍රජාතන්ත්‍රවාදී අගයන් තුළ කටයුතු කළ අයෙකු මෙන්ම මෙරටට විශාල දේශපාලන මෙහෙවරක් ඉටුකළ මධ්‍යස්ථ මතදාරී පුද්ගලයෙකි. එපමණක් නොව, ඔහු සුළු ජාතීන් වැළඳගනිමින්, ඔවුන්ගේ අභිලාෂයන්ට ගරු කළ සහ ඔවුන්ගේ අයිතිවාසිකම් වෙනුවෙන් හඬනැගූ අයෙකි.

විශේෂයෙන්ම ඔහු මුස්ලිම්වරු පිළිබඳව දැඩි අවධානයකින් කටයුතු කළ අතර පාස්කු ඉරුදින ප්‍රහාරයේ පටන් මුස්ලිම් ප්‍රජාව මුහුණ දුන් ගැටලුවලදී මුස්ලිම්වරුන්ට සහයෝගයක් ලෙස ක්‍රියා කිරීම අප මෙනෙහි කිරීමට කැමැත්තෙමු. එතුමාගේ මෙම ගුණාංග හා ක්‍රියාවන් දේශපාලනඥයින් සියලු දෙනා ආදර්ශයක් වශයෙන් ගෙන කටයුතු කළේ නම්, අප රට සංවර්ධනයේ මාවතට ගමන් කළ හැක යන්න අපගේ විශ්වාසයයි.

සමස්ත ලංකා ඉස්ලාම් ආගමික විද්වතුන්ගේ සභාව සමස්ත මුස්ලිම් ප්‍රජාව වෙනුවෙන්, එතුමාගේ පවුලේ අයට, ඥාතීන්ට සහ හිතවතුන්ට සිය බලවත් කණගාටුව ප්‍රකාශ කරයි.

 

අෂ්-ෂෙයික්, එම්. අර්කම් නූරාමිත්

මහලේකම්,

සමස්ත ලංකා ඉස්ලාම් ආගමික විද්වතුන්ගේ සභාව

2021.06.30

 

සියලු ප්‍රශංසා සර්ව බලධාරී අල්ලාහ්ට හිමිය. සලාත් නැමැති ශාන්තිය සහ සලාම් නැමැති සමාදානය නබි මුහම්මද් (සල්) තුමාණන් සහ එතුමන්ගේ අනුගාමිකයන් සහ සමකාලීන අනුගාමික සගයන්හට අත් වේවා!

කුළී පදනම යටතේ දීම යනු යම් දේපළක් එහි හිමිකරු විසින් වෙනත් අයෙකුට නිශ්චිත කාලයකට නිශ්චිත මුදල් ප්‍රමාණයක් වෙනුවෙන් භාවිතයට දීමයි. මෙම ගනුදෙනු ක්‍රමය ඉස්ලාම් දහම තුළින් අනුමත කොට ඇත.

කුළී පදනම යටතේ සිදුවන ගනුදෙනුවේදී දේපළ හිමියාට මාසිකව කුළිය ලබා ගත හැකිය, නැතහොත් ගනුදෙනුවේ ගිවිසුම සිදුවන අවස්ථාවේදී එය සම්පූර්ණයෙන් ලබාගෙන මාසික ගෙවීමක් අඩු කරගත හැකිය.

බදු පදනම යටතේ දීම නමින් ගනුදෙනු ක්‍රමයක් වර්තමානයේ බහුලව දක්නට ලැබේ. එනම්, දේපළ හිමියා විසින් විශාල මුදල් ප්‍රමාණයක් ලබා ගෙන, කිසිඳු කුළියක් නොගෙන හෝ ඉතා සුළු මාසික කුළියක් ගෙවන කොන්දේසිය මත නිශ්චිත කාලයක් සඳහා තම දේපළ පරිහරණය සඳහා වෙනත් අයෙකුට දීමයි. එම කාලය අවසානයේදී ඔහු ලබා ගත් විශාල මුදල නැවත හරවා දී තම දේපළ නැවත ලබා ගනී.

මෙය ඉස්ලාම් ආගමික නීති මාලාවට අනුව අනුමැතිය නැත. මන්දයත් ආපසු ගෙවීමේ කොන්දේසිය මත ලබා දෙන මුදල ණයක් වන අතර ණය කේන්ද්‍රගත කිරීමෙන් කිසිඳු ප්‍රතිලාභයක් නොලැබිය යුතු අතර එසේ ගැනීම පොළියක් වනු ඇත.

බදු පදනම යටතේ මුදල් දුන් තැනැත්තා මුදල් ලබා ගත් තැනැත්තාගේ දේපළ භාවිත කිරීම එම මුදල් වෙනුවෙන් ලබන ප්‍රතිලාභයක් ලෙස සැලකේ. මෙයට හේතුව, මුදල් දුන් තැනැත්තා විසින් දේපළ භාවිත කිරීමට අවසර ලැබීම යන කොන්දේසිය මත මුදල් දීමයි. එම කොන්දේසියට දේපළ හිමියාගේ අනුමැතිය නොලැබුනහොත් ඔහු විසින් මුදල් නොදෙනු ඇත. එහෙත් බදු පදනම යටතේ මසකට ඉතා සුළු මුදලක් කුළියක් වශයෙන් ගත්තද, එය ද පොළියක් වනු ඇත.

ඊට හේතුව, දේපළ හිමියා තමාට ලැබුණු විශාල මුදල නිසා කුඩා කුළියක් වුවද ලබා ගැනීමට එකඟ වීමයි. තවද එසේ විශාල මුදලක් නොලැබුනහොත් ඔහු ඊට එකඟ නොවන බැවිනි.

එබැවින් බදු පදනම යටතේ දීම කිසිසේත් ඉස්ලාම් දහම තුළ අනුමැතිය නැත. නමුත් නිශ්චිත කාලයක් සඳහා දේපළ කුළියට ගැනීම අනුමැතිය ඇති අතර එහි කුළිය එකවර මුළුමනින්ම හෝ මාසිකව හෝ ලබා ගැනීමට අනුමැතිය ඇත.

අල්ලාහ් සර්වඥය.

වස්සලාමු අලෙයිකුම් වරහ්මතුල්ලාහි වබරකාතුහූ.

2021.08.12

 

ශ්‍රී ලංකාවේ අමරපුර නිකායේ මහා නාහිමියන් ලෙස වැඩ සිටි කොඩුගොඩ ධම්මාවාස මහා නාහිමියන්ගේ අපවත්වීමෙන් පසු අමරපුර ශ්‍රී කල්‍යාණිවංශ පාර්ශවයේ මහා නායක, කලපළුවාව ගෝතම තපෝවනය ප්‍රධාන තදනුබද්ද ආයතනය සමූහයේ විහාරාධිපති, අමරපුර කළ්‍යාණිවංශ පාර්ශවයේ මහනායක, කළ්‍යාණිවංශ කීර්ති ශ්‍රී විපස්සනා කම්මට්ඨානාචාර්ය, වංගීසවංසාලංකාර, අග්ගමහා පණ්ඩිත අති ගෞරවනීය දොඩම්පහළ ශ්‍රී චන්ද්‍රසිරි අභිධාන මහනායක මාහිමිපාණන් වහන්සේ පසුගිය මස ශ්‍රී ලංකා අමරපුර මහා නිකායේ උත්තරීතර මහා නායක ධුරයට පත්වූ සේක.

මෙම පත්වීම ශ්‍රී ලංකික බෞද්ධයන් හට වැදගත් පත්වීමක් ලෙස සැලකෙන හෙයින්, සමස්ත ලංකා ඉස්ලාම් ආගමික විද්වතුන්ගේ සභාවේ උප සභාපතිවරයෙකු වන අෂ්-ෂේක් එච්. උමර්දීන් තුමන්ගේ නායකත්වයෙන් යුතුව, සහකාර ලේකම් අෂ්-ෂේක් එම්.එස්.එම්. තාසීම්, විධායක කමිටු සාමාජික අෂ්-ෂේක් එම්.එෆ්.එම්. ෆරූද්, නැගෙනහිර කොළඹ ශාඛාවේ භාණ්ඩාගාරික අෂ්-ෂේක් ෆිර්දව්ස් තුමන් සහ ඉස්ලාම් ආගමික විද්වතුන් කණ්ඩායමක් 2021.08.11 දින රාජගිරියෙහි පිහිටි විහාරස්ථානයේදී උන් වහන්සේ බැහැ දැක උන් වහන්සේ හට සුභපැතුම් පිරිනැමූහ.

මෙම හමුවේදී රටේ සමාජ සහජීවනය සහ එක්සේසත්භාවය ගොඩනැගීම පිළිබඳව දීර්ඝ ලෙස සාකච්ඡා වී තිබීම විශේෂත්වයකි.

 

මාධ්‍ය අංශය
සමස්ත ලංකා ඉස්ලාම් ආගමික විද්වතුන්ගේ සභාව

 

ACJU/NGS/2021/166

2021 අගෝස්තු මස  10 වෙනිදා /1442.12.30

 

“සර්වබලධාරී අල්ලාහ්! මෙම නවසඳ සමග අභිවෘද්ධිමත් බව, විශ්වාසය, ඉස්ලාමය සහ සාමය අපට උදා කරනු මැනව! මාගේ සහ (නවසඳ වන) ඔබගේ ස්වාමියා සර්වබලධාරී අල්ලාහ් ය”

 

අල්-කුර්ආනය සහ නබිපිළවෙත් පදනම් කරගනිමින් ඉස්ලාමීය හිජ්රි දින දර්ශනය කාලානුක්‍රමිකව භාවිත කරන අතර එතුළින් මුස්ලිම්වරුන්ගේ ජීවිතයේ වැදගත් කාර්යභාරයක් ඉටු කරයි. මුස්ලිම්වරුන්ට අනිවාර්ය වූ  ප්‍රධාන වන්දනාමාන අතුරින් වාර්ෂික සකාත් දන්දීම, උපවාසශීලය සහ හජ් වන්දනය වැනි ආගමික වතාවත් ඉටු කිරීම සඳහාද මෙය අත්‍යාවශ්‍ය කරුණක් වේ.

 

හිජ්රි දින දර්ශනය යනු ඉස්ලාමීය චන්ද්‍ර දින දර්ශනයයි. එය චන්ද්‍ර මාස දොළහකින් සමන්විත වන අතර සෑම මසකම නවසඳ බලා එය තීරණය වේ. එනම්; මුහර්රම් (පළමු මාසය), සෆර්, රබීඋනිල් අව්වල්, රබීඋනිල් ආකිර්, ජුමාදල් ඌලා, ජුමාදල් ආකිරා, රජබ්, ෂඃබාන්, රමළාන්, ෂව්වාල්, දුල් කඃදා, දුල් හිජ්ජා.

 

සර්වබලධාරී අල්ලාහ්, අල්-කුර්ආනයේ මෙසේ පවසයි: “අහස් හා මිහිතලය මැවූ දින (සිට) අල්ලාහ්ගේ (ආරක්ෂිත) ලේඛනයෙහි ඇති පරිදි සැබැවින්ම අල්ලාහ් අබියස මාස ගණන මාස දොළොහකි.” (පරිච්ඡේදය: අත්-තව්බා, වාක්‍යය: 36)

 

ඉස්ලාමීය හිජ්රි දින දර්ශනයට අනුව මාසයක් යනු දින 29 කින් හෝ දින 30 කින් සමන්විත විය හැකිය. මේ අනුව, වසරකට දින 354 ක් හෝ 355 ක් තිබිය හැකිය. ඉස්ලාමීය හිජ්රි දින දර්ශනයේ අවුරුද්දක දින ගණන ග්‍රෙගෝරියානු සූර්ය දින දර්ශනයේ දින ගණනට වඩා දින දහයක් හෝ එකොළහක් අඩුව දැකිය හැකිය. ඉස්ලාමීය හිජ්රි දින දර්ශනය ශුද්ධ මාස හතරක් සහිත මාස දොළහක චන්ද්‍ර දින දර්ශනයක් පමණක් නොවන අතර එය මුස්ලිම්වරුන්ගේ අනන්‍යතාව ගෙන දෙන විෂයක්ද වන්නේය.

 

නව හිජ්රි වර්ෂයේ නව උදාව තුළින් නබි මුහම්මද් සල්ලල්ලාහු අලෛහි වසල්ලම් තුමාණෝ මදීනා දේශය වෙත සංක්‍රමණය කිරීම සිහිපත් කෙරෙන අතර එහි මුළු ලෝකයට ආදර්ශයක් වශයෙන් පිහිටුවන ලද මදීනා ප්‍රඥප්තිය අපට සිහිපත් කර දෙයි. එය සහජීවනය, යහපැවැත්ම, යුක්තිය, සාධාරණත්වය, දේශප්‍රේමය යන සෑම අංශයක්ම මූර්තිමත් කරන අතරම වර්තමාන ශ්‍රී ලාංකික හා ගෝලීය පැවැත්මට අදාළ කරුණු ඉදිරිපත් කරන ව්‍යවස්ථාවකි.

 

සර්වබලධාරි අල්ලාහ්, උදාවූ මෙ​ම හිජ්රි 1443 නව අවුරුදු උදාවේ අපගේ දේශ​ය තුළ සහ ගෝලීය වශයෙන් සාමය හා සමගිය වර්ධනය කර, කෝවිඩ්-19 පැතිර යාමේ අවදානමෙන් සියලු දෙනාම ආරක්ෂා  කරත්වා’යි සමස්ත ලංකා ජම්ඉයියතුල් උලමා සභාව ප්‍රාර්ථනා කරයි.

 

අෂ්-ෂෙයික්, එම්. අර්කම් නූරාමිත්

මහලේකම්

සමස්ත ලංකා ජම්ඉයියතුල් උලමා සභාව