2019 මැයි මස 22

අනුස්මරණ දිනය සහ ඉදිරියට කළ යුතු දේ

2019 අප්‍රේල් මස 21 වන දින අප කිසිවෙකුට අමතක කළ නොහැකි දිනයකි. පල්ලිවල ආගමික වතාවත්වල යෙදී සිටි කතෝලික බැතිමතුන් හා හෝටල් කිහිපයක උදේ ආහාර ගනිමින් සිටි අහිංසකයන් සිය ගණනක් කුරිරු ත්‍රස්ත ප්‍රහාරයකට ලක්ව ඝාතනය වුයේ මෙම දිනයේය. මෙම අමානුෂික ඝාතන පෙළ සිදු කළ කුරිරු පුද්ගලයන් කිහිප දෙනා ‘මුස්ලිම්’ යැයි තමන්ව හඳුන්වා ගත් හෙයින් මෙය සම්බන්ධව, කවදත් සාමය අගයන ලාංකික මුස්ලිම් ප්‍රජාවට ඇති වුයේ දැඩි අසීරුතාවක් හා දැරිය නොහැකි කම්පාවකි. ඒ අනුව සමස්ත ලංකා ඉස්ලාම් ආගමික වියතුන්ගේ සම්මේලනය නොහොත් ජම්යියතුල් උලමා සම්මේලනය ප්‍රමුඛ මුළු මහත් ලාංකික මුස්ලිම් ජනයා සිය සංවේගය හා කණගාටුව නැවතත් ප්‍රකාශ කර සිටිති.

අයි.එස්. ත්‍රස්ත කල්ලිය බිහි වු පසු 2014 වසරෙහි ලොව සියල්ලන්ටම ප්‍රථමයෙන් එය හෙළා දුටු ආගමික සංවිධානය වුයේ සමස්ත ලංකා ඉස්ලාම් ආගමික වියතුන්ගේ සම්මේලනයයි. එවක පටන් එම බිහිසුණු ත්‍රස්ත කල්ලියේ අමානුෂික ක්‍රියාකාරකම් විටින් විට දැඩි දෝෂාරෝපණයට ලක් කරමින් ඔවුන්ගේ ක්‍රියා සහ ඉස්ලාම් ධර්මයේ ඉගැනුම්වලට කිසිඳු සම්බන්ධයක් නොමැති බවද ඒ අනුව අයි.එස්. ත්‍රස්තවාදීන් මුස්ලිම් නොවේය යැයිද අප අවධාරණයෙන් ප්‍රකාශ කරමින් සිටියෙමු. මන්දයත් අන්තවාදය, ප්‍රචණ්ඩත්වය හෝ මරාගෙන මැරෙන ඇතුළු අන් සියලුම ආකාරවල ත්‍රස්ත ප්‍රහාරවලට කිසිසේත් ඉස්ලාමය අනුබල නොදෙන හෙයිනි.

වසර දහසකට අධික කාලයක් මුළුල්ලේ මුස්ලිම් ජනයා මෙරට බහුතර සිංහල සහෝදර සහෝදරියන් සමග සාමයෙන් හා එක්සත්ව වාසය කරමින් සිටින බව ප්‍රකට කරුණකි. අප්‍රේල් ප්‍රහාර මාලාවේ කම්පනය නිසා මුස්ලිම්වරුන් වශයෙන් සහෝදර ජනතාව අතර සබඳතාව වඩාත් ශක්තිමත් කිරීමටත් විවිධ ජනකොටස් සමග වඩාත් සමීප වීමටත් වූ අධිෂ්ඨානය තර වී ඇත. ජාතීන් අතර වන මෙම සංහිඳියාව තවතවත් ශක්තිමත් කරන්නට මුස්ලිම් අප සැම විශේෂයෙන් කැපවීමකින් කටයුතු කළ යුතු අවදිය මෙයයි. ඒ අනුව පහත කරුණු ගැන සැළකිලිමත් වන මෙන් ලංකාවාසී මුස්ලිම්වරුන්ගෙන් සහ මස්ජිද්වල භාරකරුවන්ගෙන් සමස්ත ලංකා ඉස්ලාම් ආගමික වියතුන්ගේ සම්මේලනය කාරුණිකව ඉල්ලා සිටියි.

  • 2017 වසර සමස්ත ලංකා ඉස්ලාම් ආගමික වියතුන්ගේ සම්මේලනය විසින් මස්ජිද්වලට හඳුන්වා දෙන ලද ‘සාම මධ්‍යස්ථාන සංකල්පය’ වඩාත් ඕනෑකමින් ක්‍රියාත්මක කළ යුතුය.
  • ඕනෑම ජන කොටසකට අයත් ඕනෑම කෙනෙකුට පැමිණ කරුණු විමසා පැහැදිළි කිරීම් ලබා ගැනීමට හැකි වන අයුරින් ඔබගේ ප්‍රදේශවල මස්ජිද්, මක්තබ් පාසල් සහ මද්රසා පාසල් විවෘතව තැබිය යුතුය.
  • ආදර්ශමත් ප්‍රජාවක් ලෙස මුස්ලිම් තරුණයන් බිහි වන ආකාරයෙන් මස්ජිදය මුල් කර ගත් ව්‍යාපෘති සැලසුම් කළ යුතුය.
  • මස්ජිදයේ විවිධ අවස්ථාවල ඉමාම්වරුන් පවත්වන දේශනා විෂයයෙහි වගකීම දැරිය යුතු වන්නේ ඒ ඒ මස්ජිද්වල පරිපාලකයින් වන හෙයින් එම දේශනාවල අන්තර්ගතය සිරිත් පරිදි ඉස්ලාමීය ඉගැන්වීම්, සදාචාරාත්මක අගයන්, සාමය හා සංහිඳියාව, ජනකොටස් අතර සුහදත්වය, යහපත් ප්‍රජාවක් වීමේ වැදගත්කම ආදිය අවධාරණය කරනා ලෙසින් තිබීමට තහවුරු කර ගත යුතුය. මෙම දේශනා සඳහා පිළිගැනීමක් ඇති, උගත්, පරිණත ආගමික වියතුන් පමණක් තෝරා ගත යුතුය. යමෙකු පිළිබඳ විමසීමක් අවශ්‍ය වු විට ඔහු පිළිබඳ සමස්ත ලංකා ඉස්ලාම් ආගමික වියතුන්ගේ සම්මේලනයෙන් විමසා සැක හැර ගත යුතුය.
  • අපගේ මාතෘභූමියෙන් ත්‍රස්තවාදයේ සියළුම කුරිරු සැවනැලි මුලිනුපුටා දැමීම සඳහා මෙයට පෙර කටයුතු කළා සේම රජය, හමුදාව ඇතුළු ආරක්‍ෂක අංශ සහ නීතිය ක්‍රියාවේ යොදවන සියළු රාජ්‍ය ආයතනවලට පූර්ණ සහය ලබා දිය යුතුය. එමෙන්ම පවතින හා රටේ ආරක්‍ෂාව වෙනුවෙන් අවස්ථානුකූලව පනවනු ලබන නව නීති හා නිවේදන අකුරටම පිළිපැදිය යුතුය.

එමෙන්ම ප්‍රහාර නිසා හානියට හා දුකට පත්ව සිටින සියළුම පවුල් වෙනුවෙන්ද අපගේ මව්බිමේ පවතින ව්‍යාකූලතා සියල්ල පහ වී නැවතත් සාමයේ හා අභිවෘධියේ මාවතේ ලක්මව ගමන් කරවිය යුතු යැයි ද නිතිපතා අල්ලාහ්ගෙන් ප්‍රාර්ථනා කරන මෙන් ඉල්ලා සිටිමු.

ස්තූතියි.

 

 

ගරු මුෆ්ති එම්.අයි. එම්. රිස්වි                                                                                ගරු අෂ් ෂෙයික් අගාර් මොහමඩ්

සභාපති,                                                                                                          නියෝජ්‍ය සභාපති,

සමස්ත ලංකා ඉස්ලාම් ආගමික වියතුන්ගේ සම්මේලනය (ACJU)                                      සමස්ත ලංකා ඉස්ලාම් ආගමික වියතුන්ගේ සම්මේලනය (ACJU)

 

 

 

2019 මැයි මස 06 වන දින

රමළාන් මාසය ප‍්‍රයෝජනවත්ව ගත කරමු

රමළාන් මාසය යනු අප ගතකරන මාසයන්ගෙන් සුවිශේෂී වූ මාසයකි. මන්ද එය ශුද්ධ වූ කුර්ආනය පහළ කරනු ලැබු මාසය වන අතර ප‍්‍රාර්ථනාවේ හා ඉවසීමේ ද මාසයයි. තවද අප ඉස්ලාමීය විද්වතුන්ගේ මග පෙන්වීම් සහිතව උනන්දුවෙන් හා ඉවසීමෙන් යහකි‍්‍රයා වැඩිවශයෙන් කිරිමට අදිටන් කර ගනිමු.

ගැත්තන් උපවාසයේ යෙදී ඔවුන්ගේ පෞද්ගලික - සමාජීය හා මිනිස් සංහතියේ උනන්තිය සඳහා කරන ලද ප‍්‍රාර්තනාවන් අල්ලාහු තආලා විසින් පිළිගනු ලබයි. පසුගිය දිනවල සිදු වු ඉතා ඛේදනීය කුරිරු ත‍්‍රස්ත ප‍්‍රහාරයෙන් අප සියලු දෙනාගේම ජන ජීවිතය අවුල් වී තිබෙන මෙවන් කාලයක සියලුම ලක්වැසියන් සාමයෙන් හා සමාදානයෙන් අත්වැල් බැඳ මාතෘ භූමියට සෞභාග්‍යයෙන් පිරි හෙට දිනක් උදාවීම සඳහා අප අල්ලාහ්ගෙන් ප‍්‍රාර්ථනා කළ යුතුය. 

රමළාන් මාසයේ අනුගමනය කළ යුතු කරුණු සඳහා වන මාර්ගෝපදේශ:

  • ශූද්ධ වූ කුර්ආනය පහළ කරනු ලැබු මෙම මාසයෙහි අප වැඩිවශයෙන් එය පාරායණය කිරිම.
  • කාලය නාස්ති නොකර දහවල් කාලයේ මෙන්ම රාත‍්‍රි කාලයේද සලාත් තිලාවත් ඉස්තිග්ෆාර් වැනි කුසල් කි‍්‍රයාවkajල වැඩියෙන් කාලය ගත කිරිම.
  • මත භේද ඇති කරුණු ගැන තර්ක විතර්කවල නොයෙදී අපගේ ආගමික වියතුන්ගේ මගපෙන්වීම අනුව එක්සත්ව කටයුතු කිරිම.
  • විශාල ලෙසින් මුදල් වැය කරන ඉෆ්තාර් හෝ සහර් නොපවත්වා එම මුදල් දුගීන්ට හා අඩු හිගකම් ඇති අය වෙනුවෙන් සදකා ලෙසින් වියදම් කිරිම සහ සකාත් ගෙවීමද නිසියාකාරව ඉටු කිරිම.
  • දුගින්ට හා ඥාතීන්ට සහර් සහ ඉෆ්තාර් බෝජන සඳහා ඇරයුම් කර එය චාම් ආකාරයෙන් පැවැත්වීම.
  • විශේෂයෙන් තරුණයින් රමළාන් මාසයේ රාත‍්‍රියෙහි අන් අයට හිරිහැර ඇති වන ආකාරයෙන් මාර්ගයන්හි ක‍්‍රීඩා කිරීම ඝෝෂා ඇති කිරීම වැනි නොහික්මුනු කි‍්‍රයාවලින් වැළකීම සහ මේ පිළිබඳ දෙමව්පියන් හා වැඩිහිටියන් වැඩි අවධානය යොමු කිරිම. 
  • මස්ජිද්වල රාත‍්‍රි කාලයේ විශේෂ නැමදුම් සිදු කරන විටද බයාන් දේශනා පවත්වන විටද ශබ්ද විකාශන උපකරණ යොදා අනවශ්‍ය ලෙස එය පිටතට ඇසෙන්නට සැලැස්වීම මගින් අන් අයට හිරිහැර ඇති නොකර එම ශබ්ද මස්ජිදය තුලට පමණක් ඇසෙන පරිදි එම දේශනයන් කිරිම.
  • සහර් වේලාවට නිවසේ ගුවන් විදුලි යන්ත‍්‍රයේ ශබ්දය වැඩි කිරීම මගින් අසල්වාසීන්ට හිරිහැර ඇති විය හැකි හෙයින් එය අපට පමණක් ඇසෙන පරිදි පහත් හඬින් තබා ගැනීම.
  • රමළාන් මාසයේ නිවසේ සාදන විශේෂ ආහාර පාන හා රසකැවිලි කිසිම ආගම් භේදයකින් තොරව අසල්වාසීන්ටද ලබා දී සතුට බෙදා ගැනීම.
  • රාතී‍්‍ර කාලයෙහි ස්ත‍්‍රීන් තරාවීහ් වැනි සලාතයන් සඳහා මස්ජිදයට යාමට සුදුසු හා ආරක්‍ෂාකාරී වාතාවරණයක් අප වාසය කරන පෙදෙසේ නොමැති නම් ස්ත‍්‍රීන්ට නිවසේදීම එම කටයුතු කර ගන්නා මෙන් උපදෙස් ලබා දීම.

මස්ජිදයට පැමිණෙන්නන් මස්ජිද් පරීශ‍්‍රයේ වාහන නවතා තැබීමෙන් වැළකිය යුතු අතර නොවැළැක්විය හේතුන් නිසා එසේ වාහනවලින් පැමිණෙන්නන් අන් අයට අවහිර හිරිහැර ඇති නොවන ආකාරයෙන් තමන්ගේ වාහන නවතාතැබීමට කටයුතු කිරිම.

ඉහත උපදෙස් කි‍්‍රයාත්මක කිරීමට මස්ජිදයේ පරිපාලන කටයුතු කරන්නන්ට සැවොම සහය දක්වන මෙන් ඉතා කාරුණිකව ඉල්ලා සිටින අතර මෙම විශිෂ්ඨ මාසය ප‍්‍රායෝජනවත් ලෙස ගත කර අල්ලාහ්ගේ දයාව හා පිළිගැනීම ලබා ගන්නට අපට අල්ලාහ් ආශීර්වාද කරත්වා. තවද රටේ පවතින ව්‍යාකූල තත්වය තුරන් කර නැවතත් සතුට සහජීවනය හා සාමය උදා කරත්වා.

 

වස්සලාම් 

 

අෂ් ෂේශ් උමර්දීන්

ලේකම් - ප‍්‍රචාර අංශය

සමස්ත ලංකා මුස්ලිම් ආගමික විද්වතුන්ගේ සංගමය

 

 

 

 

සැයු: ඉහත උපදෙස් ඉදිරි සිකුරාදා දිනයේ ජුමුආ සලාතයෙන් පසු පැමිණෙන්නන්ට කියවා පෙන්වන මෙන්ද මස්ජිදයේ දැන්වීම් පුවරුවේ ප‍්‍රදර්ශනය කරන මෙන්ද කාරුණිකව ඉල්ලා සිටිමු

 

25.04.2019

ජාතික ආරක්ෂාව පවත්වාගෙන යෑම

 

වගකීම් සහිත රටවැසියන් හැටියට අපගේ මාතෘභූමිය ආරක්ෂා කිරීමටත්, සාමය හා නිසි පාලනය පවත්වාගෙන යෑමටත් මුස්ලිම්වරුන් වන අපි බැඳී සිටින්නෙමු. ආරක්ෂක අංශ හා නීතිය පවත්වාගෙන යෑමට ඇති ආයතන සමග පුර්ණ සහයෝගයෙන් කටයුතු කරන ලෙස අපි සැමගෙන් ඉල්ලා සිටින්නෙමු. විශේෂයෙන් ම සියළු සහෝදරියන්ගෙන් ඉතා බලවත් ලෙස ආයාචනා කොට සිටින්නේ දැනට අප රටේ ඇතිවී ඇති හදිසි හා බරපතල තත්ත්වය සැලකිල්ලට ගෙන කෙනෙකුගේ අනන්‍යතාව අවශ්‍යය වන තත්ත්වයකදී ආරක්ෂක අංශ මුහුණ පාන දුෂ්කර තත්ත්වය අවබෝධ කර ගෙන කටයුතු කරන ලෙසය. එහෙයින් පවතින තත්ත්වය සැලකිල්ලට ගෙන  අපගේ සහෝදරියන් විසින් මුහුණු ආවරණය (නිකාබ්) පැළඳීමෙන් ජාතික ආරක්ෂාව පවත්වාගෙන යෑමට සිටින ආරක්ෂක අංශයන්ට බාධාවක්වන අයුරින් කටයුතු නොකරන මෙන් ඉල්ලා සිටින්නෙමු.

එලෙසම සෑම අයෙකුම තමන්ගේ ජාතික හැඳුනුම් පත අවශ්‍ය අවස්ථාවකදී නිළධාරීන් වෙත ඉදිරිපත් කිරීම පිණිස තමන් භාරයේ තබා ගන්නා ලෙස උපදෙස් දෙන්නෙමු. 

 

අෂ් ෂෙයික් එම්. එල්. එම්. ඉල්යාස්

ලේකම් - ෆත්වා අංශය,

සමස්ත ලංකා ඉස්ලාම් ආගමික වියතුන්ගේ සංගමය.

සමස්ත ලංකා ඉස්ලාම් ආගමික වියතුන්ගේ සංගමයේ (ACJU) විශේෂ නිවේදනය

2019 අප්‍රේල් මස 21 වැනි ඉරුදින ශ්‍රී ලංකාවේ විවිධ ප්‍රදේශයන්හි සිදු වූ ත්‍රස්තවාදී ප්‍රහාර ලාංකික මුස්ලිම් ප්‍රජාව හැටියට තරයේ හෙළා දකින්නෙමු.

එක් ජීවයකට හානියක් කිරීම මුළු මහත් මිනිස් සංහතියටම හානියක් කළ හා සමානයි යැයි උගන්වන ඉස්ලාමය මෙවැනි කුරිරු ත්‍රස්තවාදී ක්‍රියාවන් කිසිසේත්ම අනුමත කරන්නේ නැත. මෙවන් කෲර ක්‍රියාවන් හි නියැලෙන්නන් ඉස්ලාමය හා කිසිම සම්බන්ධයක් නොමැති බවත් මෙය ත්‍රස්තවාදී ක්‍රියාවක් බවත් තරයේ පවසා සිටින්නෙමු.

ඊයේ දින දින සිදු වූ මෙම ත්‍රස්තවාදී ප්‍රහාරයට ලක් වී ජීවිතක්ෂයට පත් වූවන්ගේ පවුලේ උදවිය හා තුවාල ලැබූ සියලුම සහෝදර ජනතාව සමඟ ඔවුන්ගේ දුක බෙදා හදා ගන්නා ලෙසත් හැකි සෑම සහයෝගයක්ම ලබා දෙන ලෙසත් දිවයින පුරා ඇති සියළුම මුස්ලිම් දේවස්ථාන වල භාරකාර මණ්ඩල වලින් අප සංගමය ඉතා කාරුණිකව ඉල්ලා සිටිමු.

එහෙයින් පහත නිර්දේශිත කරුණු ඔස්සේ ක්‍රියාකරන ලෙස අප ඔබ සැමගෙන් ඉල්ලා සිටිමු.

1) මෙවන් කෲර ක්‍රියාවන්ට සම්බන්ධ ත්‍රස්තවාදීන් හඳුනා ගැනීම සඳහා ආරක්ෂක අංශයන්ට පූර්ණ සහය ලබාදෙන ලෙස සියලුම මුස්ලිම් වරුන්ගෙන් ඉල්ලා සිටිමු.

2) මෙම ත්‍රස්තවාදී ක්‍රියාවන්ට භාජනය වූ සියලුම ප්‍රදේශයන්හි ආගමික නායකයින් හා එක්ව, පීඩාවට පත්වූවන්ට අස්වැසිල්ලක් වන පරිදි සහය දක්වන ලෙස කාරුණිකව ඉල්ලා සිටිමු.

3) පීඩාවට පත්වූවන්ට තම ශ්‍රමයෙන් හා ධනයෙන් හැකි අන්දමින් උදව් උපකාර කරන ලෙස අප ඉල්ලා සිටිමු.

4) පීඩාවට පත්වූ ජනතාවට සහන සැලසීම සඳහා සියලුම මුස්ලිම් දේවස්ථාන තුළින් ධන පරිත්‍යාග රැස් කර නිසි අයුරින් බෙදාදීමට කටයුතු කරන මෙන් ඉල්ලා සිටිමු.

5) පීඩිත ජනතාව විසින් තමන්ගේ කම්පනයත් සමග යම්කිසි වේදනාකාරි අයුරින් ප්‍රකාශයක් හෝ හැසිරීමක් සිදු වූයේ නම් ඒ පිළිබඳව ඉතාමත් සාවධානව ඉවසීමෙන් කටයුතු කිරීම වැදගත්වේ

6) එම ත්‍රස්තවාදී ක්‍රියාව හෙළා දකිමින් සහ පීඩිත ජනතාවට අස්වැසිල්ලක් වන පරිදි බැනරයක් සෑම මුස්ලිම් දේවස්ථානයක් ඉදිරිපිට ම ප්‍රදර්ශනය කරන ලෙසත් ශෝකය ප්‍රකාශ කරමින් සුදු කොඩියක් ඔසවා තබන ලෙසත් ඉල්ලා සිටිමු.

7) එළඹෙන ඉරිදා දිනයේ දී කිතුනු සහෝදරයින් දේව මෙහෙයට සහභාගී වන අවස්ථාවේදී, ඔවුන්ට එරෙහිව සිදු කල මෙම ත්‍රස්තවාදී ප්‍රහාරය හෙළා දකිමින් සහ අපගේ සහෝදරත්වය විදහා දක්වමින් හැකි පමණින් එම දේවස්ථාන පරිශ්‍රයට එක්වන මෙන් ඉතා කාරුණිකව ඉල්ලා සිටිමු.

ස්තුතියි.

 

අෂ් ෂෙයික් එච්. උමර්දීන්

ලේකම්ප්‍රචාරක අංශය

සමස්ත ලංකා ඉස්ලාම් ආගමික වියතුන්ගේ සංගමය

 

මාධ්‍ය නිවේදනය

2019 අප්‍රේල් මස 21 වන දින         

සමස්ත ශ්‍රී ලාංකික මුස්ලිම් ප්‍රජාව වෙනුවෙන් කිතුනු ජනයා වෙත අපගේ කනගාටුව ප්‍රකාශ කරන අතර මෙම මොහොතේ දී සහෝදරත්වයේ දෑත් දිගු කොට ඔබ සියලු දෙනා සමඟ එක්සිත් ව සිටින බවට ඉතා හෘදයාංගමව පවසා සිටින්නෙමු. මෙය එක් ජන කොටසකට විශේෂ වූ දිනයක එල්ල කළ ප්‍රහාරයක් වුවද එය සමස්ත ශ්‍රී ලංකාවම කම්පනයට පත් කළ සහ අප සියලු දෙනාම ඉතාමත් කනගාටුවට පත් කර ඇති සෝචනීය දිනයකි.

ආගමික ස්ථාන අවට ආරක්ෂාව මනාව තර කරන ලෙසත් මෙවන් නින්දිත ක්‍රියාවන් කිරීමට සම්බන්ධ සියලු දෙනාට උපරිම දඬුවම් ලබා දීමට කටයුතු කරන ලෙසත් අප රජයෙන් ඉල්ලා සිටින්නෙමු.

මෙම අවාසනාවන්ත සහ ඉතා කනගාටුදායක මොහොතේදී තම සහෝදර කිතුනු ජනයාට අවශ්‍ය සහයෝගය, මානසික ශක්තිය හා ආරක්ෂිත බව තහවුරු කිරීමට හැකි සෑම ක්‍රියාවක් සඳහා ම දායකවන ලෙස ශ්‍රී ලංකාවාසි මුස්ලිම් ඇතුලු සියලු ජනයාගෙන් ද විශේෂයෙන්ම මුස්ලිම් දේවස්ථාන භාරකාර මන්ඩල වලින් ද ඉතා කාරුණිකව ඉල්ලා සිටිමු.

රෝහල්වලට අවශ්‍ය ලේ දන්දීම්, පීඩාවට පත් වූ ප්‍රජාවන්ට අවශ්‍ය මූලික පහසුකම්, රෝගීන්ට අවශ්‍ය සහයෝගය මෙන්ම සහෝදර කිතුනු ජනයා හට මානසික අසල්වැසිල්ලක් ලබාදිය හැකි ආකාරයේ කටයුතු වලට ප්‍රමුඛත්වය දෙන මෙන් ඉල්ලා සිටිමු.

මෙම අවාසනාවන්ත තත්ත්වයෙන් ශක්තිමත්ව හා අන්‍යෝන්‍යය ගෞරවයෙන්, ආදරයෙන් රටක් හැටියට ඉදිරියට යාමට අප සියලු දෙනාටම ශක්තිය ලැබේවායි ප්‍රාර්ථනා කරමු. ජීවිතක්ෂයට පත් වූවන්ගේ පවුලේ උදවියටත් හා තුවාල වූ සියලුදෙනාට අල්ලාහ් දෙවියන් ශක්තිය හා ධෛර්යය ලබාදෙත්වා යැයි ප්‍රාර්ථනා කරමු.

ස්තුතියි

 

මුෆ්ති එම්. අයි . එම්. රිස්වි

සභාපති
සමස්ත ලංකා ඉස්ලාම් ආගමික වියතුන්ගේ සංගමය

 

ජම්යියතුල් උලමා යැයි ප‍්‍රකට සමස්ත ලංකා ඉස්ලාම් ආගමික වියතුන්ගේ සංගමයේ මුලිකත්වයෙන් වසර අටක කාලයක් මුළුල්ලේ සිදු කරන ලද ශුද්ධ අල් කුර්ආනය සරල සිංහල බසින් අර්ථ කථනය කිරීමේ මහගු කර්තව්‍යයේ සියලූ කටයුතු නිම වී එය එළිදැක්වීම උත්සවාකාරයෙන් පසුගිය 2019 අපේ‍්‍රල් 7 වන ඉරු දින බණ්ඩාරනායක අනුස්මරණ ජාත්‍යන්තර සමුළු මණ්ඩපයෙහි පවත්වන ලදී.

අෂ් ෂෙයික් කාරි එම්.එච්.එම්. ෆිර්දවුස් තුමන් විසින් කළ අල් කුර්ආන් පාරායණය සමග ආරම්භ වුනු උත්සවයට සපැමිණි සියලූ අමුත්තන් සාදරයෙන් පිළිගනු ලැබුවේය. එයිනික්බිතිව පිළිගැනීමේ දේශනය පැවැත් වුයේ සමස්ත ලංකා ඉස්ලාම් ආගමික වියතුන්ගේ සංගමයේ උප සභාපති අෂ් ෂෙයික් ඒ.සි. අගාර් මුහම්මද් මැති තුමා විසිනි.

එයින් අනතුරුව සමස්ත ලංකා ඉස්ලාම් ආගමික වියතුන්ගේ සංගමය හා සමීපව කටයුතු කරමින් සංගමයට නෛතික මග පෙන්වීමි හා උපදෙස් ලබා දෙමින් අමිල දායකත්වයක් ලබා දෙමින් සිටින ජනාධිපති නීතිඥ ෆායිස් මුස්තෆා මහතා සභාව ඇමතුවේය. එවිට අවශ්‍ය තැන්වල විග‍්‍රහද ලබා දෙමින් සරල බස් වහරකින් මෙම ශුද්ධ අල් කුර්ආන් අර්ථ සංග‍්‍රහය සිදු කර ඇති ආකාරයේ විශේෂත්වයන් එම මහතා කෙටියෙන් පැහැදිලි කළේය.

එයින් අනතුරුව නැගී සිටියේ පේරාදෙණිය විශ්ව විද්‍යාලයේ සමාජ විද්‍යා පීඨයේ මහාචාර්ය දයා අමරසේකර මහතාය. සභාව ඇමතු මහාචාර්යවරයා මෙම අල් කුර්ආන් අර්ථ සංග‍්‍රහය මුස්ලිම් ජනයා ගැන ඇති වැරදි මත තුරන් කරනු ඇත යැයි තම විශ්වාසය පළ කළේය. එමෙන්ම අනෙක් ජන කොටස් අතර ඇති ප‍්‍රශ්නවලට විසුම් සෙවිය යුත්තේ අන්‍යෝන්‍ය වැටහීම ඇති කිරීම මගින්ම යැයි ද එතුමා පෙන්වා දුන්නේය.

මහාචාර්යවරයාගේ විද්වත් අදහස් දැක්වීම්වලින් පසුව සංගමයේ අල් කුර්ආන් අර්ථ සංග‍්‍රහය සම්බන්ධව සම්පාදනය කරන ලද ශ‍්‍රව්‍ය දෘශ්‍ය පටයක් ප‍්‍රදර්ශනය කරන ලදී.

විඩියෝ විග‍්‍රහයෙන් පසුව උත්සවයේ කේන්‍ද්‍රීය කථනය සමස්ත ලංකා ඉස්ලාම් ආගමික වියතුන්ගේ සංගමයේ සභාපති අෂ් ෂෙයික් එම්.අයි.එම්. රිස්වි මුෆ්ති තුමාණන් විසින් පවත්වන ලදී. සංගමය භාරගත් භාරදුර කටයුත්තේ විශේෂ අවස්ථා ගැන සංගමයේ එතුමා සඳහන් කළ අතර සිය කථාව නිම කරමින් දශකයකට ආසන්න කාලයක් පැවති මෙම අභියෝගාත්මක කර්තව්‍යයට උරදුන් සැමට සිය තුතිය පුදා නිසි දායාද ප‍්‍රදානය කරන මෙන් අල්ලාහ්ගෙන් අයැද සිටියේය.

එයින් අනතුරු මෙම ඓතිහාසික උළෙලේ උච්ච අවස්ථාව වු ශුද්ධ අල් කුර්ආන් අර්ථ සංග‍්‍රහයේ පිටපත් පැමිණ සිටි අමුත්තන්ට ප‍්‍රදානය කිරීම ආරම්භ වු අතර පළමු පිටපත සමස්ත ලංකා මුස්ලිම් ආගමික වියතුන්ගේ සංගමයේ සභාපතිවරයාගේ දෝතින් ප‍්‍රජාතාන්ත‍්‍රික සමාජවාදී ශ‍්‍රී ලංකා ජනරජයේ ජනාධිපති අතිගරු මෛත‍්‍රිපාල සිරිසේන මැතිඳුන්ට පිළිගන්වන ලදී.

ශුද්ධ අල් කුර්ආන් අර්ථ සංග‍්‍රහයේ පිටපත් පිළිගැන්වීමෙන් පසු හිටපු පාර්ලිමේන්තු මන්ත‍්‍රී අල්හාජ් ඉම්තියාස් බාකීර් මාකාර් මහතා සභාව ඇමතුවේය. බහු වාර්ගික දේශයක ලක්‍ෂණ ගැන අගනා අදහස් දැක්වීම් කිහිපයක් සිදු කළ මාකාර් මහතා අන්‍ය ආගම් ගැන දැනුවත් වීම සහජීවනයේ මුලික අවශ්‍යතාවක් යැයි අවධාරණය කළේය.

පසුව සභාව ඇමතු ජනාධිපති අති ගරු මෛත‍්‍රිපාල සිරිසේන මහතා සමස්ත ලංකා ඉස්ලාම් ආගමික වියතුන්ගේ සංගමය කාලීන අවශ්‍යතාවක් ඉටු කර ඇත යැයි ස්වකීය හෘදයාංගම ප‍්‍රශංසාව පළ කළේය.

අවසාන වශයෙන් ස්තූති කථනය සමස්ත ලංකා ඉස්ලාම් ආගමික වියතුන්ගේ සංගමයේ උප ලේකම්වරයෙකු වන අෂ් ෂෙයික් මුර්ෂිද් මුලෆ්ෆර් තුමන් විසින් සිදු කරන ලදි. එයිනික්බිති ගායනා කරන ලද ජාතික ගීයත් සමග උළෙලේ කටයුතු අවසන් විය.

මෙම ඓතිහාසික සංසිද්ධියට සහභාගී වු සියල්ලන්ටම එම සිංහල බසින් එළි දැක්වූ අල් කුර්ආන් අර්ථ සංග‍්‍රහය පිටපත බැගින් නොමිලේ බෙදා දෙන ලද අතර සංග‍්‍රහයක්ද අමුත්තන් වෙනුවෙන් සුදානම් කර තිබුනි. මෙම උළෙල සඳහා දිවයිනේ විවිධ ප‍්‍රදේශවල සිට මුස්ලිම් ආගමික වියතුන් පමණක් නොව අන්‍ය ආගම්වල ප‍්‍රධානීන්ද ඇතුළු විශාල පිරිසක් පැමිණ සිටීම සුවිශේෂී කරුණක් විය.

 

මාධ්‍ය අංශය

සමස්ත ලංකා ඉස්ලාම් ආගමික වියතුන්ගේ සංගමය

 

2019.02.01

අපගේ මව් රට වන ශ්‍රී ලංකාව 71 වැනි නිදහස් දිනය පෙරදැරි කර ගනිමින් සුභපැතුම් පණිවිඩයක් දැනුම් දීමෙහි සමස්ත ලංකා මුස්ලිම් වියතුන්ගේ සම්මේලනයේ ඉමහත් සතුටට පත් වෙයි.

අප මව් රටට මේ නිදහස ලබා දුන් බෞද්ධ, හින්දු, මුස්ලිම්, කිතුනු නායකයින් එක්ව ජාති, ආගම්, භේදවලට එහායින් ගොස් ඇප කැපවී එකමුුතු ව ක්‍රියා කළහ. මෙසේ ක්‍රියා කළ ශ්‍රේෂ්ඨයින් අපගේ නිදහස් දින වැඩසටහන් තුළ මෙනෙහි කරනු ලැබීම අනිවාර්යය කරුණකි.

එමෙන්ම අපගේ මුතුන් මිත්තන් ජාති, ආගම් භේද නොතකා රටේ නිදහස වෙනුවෙන් අරගල කළාක් මෙන්ම අප ද ජාති ආගම් හා දේශපාලනයට එහායින් ගොස් මව් රටේ දියුණුව උදෙසා කැප වන්නට ඉදිරිපත් විය යුතු යැයි සමස්ත ලංකා මුස්ලිම් වියතුන්ගේ සම්මේලනය සියලු රටවැසියන්ගෙන් ඉල්ලා සිටියි.

විශේෂයෙන් මුස්ලිම්වරු, රටේ නිදහස වෙනුවෙන් සටන් කළ අපගේ මුතුන් මිත්තන් වන ටී.බී ජායා, සර් රාසික් ෆරීඩ් වැනි උත්තමයන් ආදර්ශයට ගෙන කටයුතු කොට, දේශය වෙනුවෙන් කැපවන දේශප්‍රේමීන් බවට තමන් හැඩගස්වාගත යුතු යැයි ද අප සම්මේලනය අපේක්ෂා කරයි.

බෞද්ධ, හින්දු, මුස්ලිම්, ක්‍රිස්තියානි යන බහු ආගමිකයින් ජීවත් වන මෙරට කවදත් සමෘද්ධිමත් හා සංවර්දිත රටක් ලෙස වැජඹිය යුතුයි යන්න අපගේ අපේක්ෂාව හා පැතුමයි. රටක සමෘද්ධිය හා සෞභාග්‍යය එරටේ ජනතාවගේ එකමුතුකම හා දේශ ප්‍රේමත්වයෙහි රැඳී පවතින බව සමස්ත ලංකා මුස්ලිම් වියතුන්ගේ සම්මේලනය මතක් කර දෙයි.

එබැවින් මෙරටේ ඒකීයත්වය හා එකමුතුකම නගා සිටුවන්නට එකිනෙකා අනෙකාට ඉඩ දී සියලු ජාතීන් එක මවකගේ දරුවන් මෙන් ජීවත් වන්නට සමස්ත ලංකා මුස්ලිම් වියතුන්ගේ සම්මේලය සුබ පතයි. එමෙන්ම අප රට සියලු සම්පත්වලින් පිරුණු එක්සත් ලංකාවක් ලෙස වැජඹෙන්නට ප්‍රාර්ථනා කරයි.

 

එම්. එම්. ඒ. මුබාරක්.

ලේකම්

සමස්ත ලංකා මුස්ලිම් වියතුන්ගේ සම්මේලනය.

 29.01.2019 / 22.05.1440

ජාතීන් අතර පවතින බහුත්වය එදා පටන් පැවත එන්නකි. ආගම් අතර පවතින බහුත්වය ද යථාර්ථයකි. සෑම ආගමක්ම මෙම සත්‍යය මුළුමණින්ම පිළිගනියි. අන් දහමකට නිගරු කිරීම හෝ හිංසා කිරීම හෝ කිසිවිටෙක කිසිම දහමක් පිළිගන්නේ නැත.

අන් දහමකට අපහාස කිරීමත් අන් ආගමික සහෝදරයින්ගේ හැඟීම් අවුස්සන අයුරින් ක්‍රියා කිරීමත් ඉස්ලාමය තරයේ හෙළා දකියි. අල්ලාහ් හැර ඔවුන් අයැදින දෑට නුඹලා බැණ නොවදින්න” (06:108) යනුවෙන් ශුද්ධ වූ අල් කුර් ආනය මඟ පෙන්වයි. අන් ආගමිකයින් අදහන කිසිවකට බැණ වැදීම හෙළා දකින ඉස්ලාමය, අන් ආගමකට අපහාස වන අයුරින් හෝ අන් ආගමික හැඟීම් ඇවිස්සෙන අයුරින් ක්‍රියා කිරීමට කිසිවිටෙක අනුබල දෙන්නේ නැති බව ඉතා පැහැදිළි කරුණකි.

ඉතිහාසය පුරාවටම ලාංකීය මුස්ලිම් ප්‍රජාව අනෙකුත් ප්‍රජාවන් සමඟ සාමයෙන් ජීවත් වී රටේ සංවර්ධනය උදෙසා නන්අයුරින් දායකත්වය පිරිනැමූ ප්‍රජාවක් ලෙස පැවත එයි. ඒ අනුව ආගමේ නාමයෙන් හෝ ජාතියේ නාමයෙන් හෝ අන් ආගමක් අපහාසයට පත් කරන කිසිදු ක්‍රියාදාමයක් හෝ නීතීය උල්ලංඝණය වන පරිදි කිසිදු ක්‍රියාමාර්ගයක් මුස්ලිම් ප්‍රජාව කිසිවිටෙක පිළිගන්නේ නැත. එමෙන්ම ඉස්ලාමයේ නාමයෙන් සිදුවන කවර අන්තවාදී හා ආගමක් අපහාසයට ලක් වන ක්‍රියාදාමයක් වුවද එය සමස්ත මුස්ලිම් ප්‍රජාවම තරයේ හෙළා දකියි.

මෑතකදී බොද්ධාගමික සහෝදරයන්ගේ හැඟීම් ඇවිස්සෙන පරිදි ඇතැම් අක්‍රමිකතා සිදුවූ බවට වාර්තා වෙයි. සැක පිට ඇතැමුන් සිරභාරයට ගෙන ඇත. විමර්ශනයෙන් පසු වැරදිකරුවන් කවුරුන් වුව ද ඔවුන් නීතිය ඉදිරියට ගෙනැවිත් නිසි දඬුවම් පිරිනැමිය යුතුය. එමෙන්ම රටේ ජාතීන් අතර සාමය හා සමාදානය උදා කිරීමට අවශ්‍ය ක්‍රියාමාර්ග ගත යුතුයි. විශේෂයෙන් තරුණ ප්‍රජාවට දැහැමි අයුරින් මඟ පෙන්වන ක්‍රියා දාමයන් රට පුරා ආගමික ස්ථාන ඇතුළුව වෙනත් සමාජ ආයතන හරහා ක්‍රියාත්මක කළ යුතුයි.

මෙම සිද්ධිය සම්බන්ධයෙන් කිසිදු නිල වාර්තාවක් රජය විසින් නිකුත් කර නොමැති තත්ත්වයක මාධ්‍ය විසින් ප්‍රචාරය කරමින් සිටින අනුමාන, කට කතා, පදනම් විරහිත පුවත් සමාජගත වන බැවින් ප්‍රජාවන් අතර එකමුතුකම හා සහජීවනය පළුදු විය හැකි යැයි මුස්ලිම් ප්‍රජාව බිය වෙයි. එබැවින් මාධ්‍ය ආයතන මාධ්‍ය ආචාරධර්මයන් පිළිපදිමින් රටේ සමගිය හා එකමුතුකම ආරක්ෂාවන පරිදි වගකීමෙන් යුතුව කටයුතු කළ යුතු බව ඉල්ලා සිටින්නෙමු.

එමෙන්ම අන්තවාදී ආගමික ක්‍රියාදාමවල නිරත වන්නන් සෑම දහමකම සිටින බව මෑත කාලයේ රට තුළ සිදුවූ ඇතැම් සිදුවීම් තුළින් පැහැදිලි වෙයි. විටින් විට රට තුළ අන් ආගම් අපහාසයට ලක් වන අයුරින් හා අන් ආගමිකයින්ගේ ජීවිත හා දේපළ විනාශ වන අයුරින් ඇතැමුන් නිතරවීම ඉතා කණගටුවට කරුණකි. පසුගිය කාලවල සිදුවූ පිළිකුල් සහගත ක්‍රියා මෙය කදිමට පෙන්වා දෙයි. මෙවන් ප්‍රචණ්ඩ සංස්කෘතියක් රට තුළ දිගටම ක්‍රියාත්මක වන්නේ නම් වසර ගණනාවක් තිස්සේ අප සියලු දෙනා එක්ව ගොඩ නැගූ අපගේ මව් රටේ අනාගතයට අභියෝගයක් වීමේ කනගාටුදායක තත්ත්වයක් උදාවනු ඇත.

එබැවින් කවර දහමකට අයත් කෙනෙකු මෙවන් ක්‍රියාදාමයක නිරත වුවද කිසිදු වෙනසකින් තොරව නීතිය ඉදිරියට ගෙනැවිත් දඬුවම් ලබා දී රටේ එක්සේසත්කම හා ආරක්ෂාව රජය විසින් තහවුරු කළ යුතුයි. එමෙන්ම ප්‍රචණ්ඩත්වය හා ආගමික ආපහාසය වෙත ගෙන යන අන්තවාදී අදහස් මැඩලීම සම්බන්ධයෙන් රජයේ කාර්යභාරය අතිමහත් බව මෙහිදී පෙන්වා දීමට කැමැත්තෙමු.

කවර දහමකට අයත් පුද්ගලයකු වුවද ඔහුගේ කටයුතුවල එවැනි සළකුණු දක්නට ලැබේ නම්, කල් ඇතිව යථාර්ථය සොයගන්නා බුද්ධි අංශය, නීතිය හා සාමය ආරක්ෂා කරන පොලීසිය, සැමට ආරක්ෂාව සලසන ත්‍රිවිධ හමුදාව, නීතිය ක්‍රියාත්මක කරන අධිකරණය යන රටේ සාමයට වගකිව යුතු සියලු සැළසුම් සකසා දුන් රජය ඒ සම්බන්ධයෙන් විශේෂ අවධානය යොමු කළ යුතු යැයි ඉල්ලා සිටින්නෙමු. 

  1. All Ceylon Jamiyyathul Ulama
  2. Advocacy & Reconciliation Council
  3. Al-Kafaala Foundation
  4. All Ceylon Thawheed Jamath
  5. All Ceylon Young Mens Muslim Association Conference
  6. All University Muslim Students’ Association
  7. Al-Muslimath
  8. Association of Muslim Youth of Sailan
  9. Centre for Islamic Studies
  10. Colombo District Masjid Federation
  11. Families Relief Sri Lanka Trust
  12. Federation Of All Mosques In Ampare District
  13. Federation of Sri Lanka Arabic Colleges
  14. International Islamic Relief Organization
  15. Sri Lanka Islamic Center
  16. Jama’athus Salama
  17. Jamaath Ansari Sunnathil Muhammadiyya of Sri Lanka
  18. Sri Lanka Islamic Students’ Movement
  19. Kandy City Masjid Federaion
  20. Markaz Islamic Center
  21. Muslim Aid
  22. Muslim Council of Sri Lanka
  23. Muslim Women Research Action Front
  24. Nidha Foundation
  25. Shazuliyya Thareeka
  26. Sri Lanka Jama’athe Islami
  27. Sri Lanka Muslim Media Forum
  28. United Thawheed Jamath
  29. World Assembly of Muslim Youth
  30. World Cultural Center for Development and Training
  31. Zam Zam Foundation

 

මාධ්‍ය වාර් තාව

26.12.2018

බුදු පිළිමයට හානි කිරීම සමස්ත ලංකා මුස්ලිම් වියතුන්ගේ සම්මේලනය හෙළා දකියි

දින කිහිපයකට පෙර මාවනැල්ල ප්‍රදේශයේ සිදු වූ ආගම අපහාසයට ලක් කිරීමේ ක්‍රියාදාමය සමස්ත ලංකා මුස්ලිම් වියතුන්ගේ සම්මේලනය හෙළා දකියි.

මෙරටේ ජීවත් වන බහුතර බෞද්ධ ජනතාවගේ වන්දනාවට ලක්ව පවතින බුද්ධ ප්‍රතිමාවට හානි කිරීම ජාතීන් අතර පවතින සහජීවනය හා අවබෝධය පළුදු කරන ක්‍රියාදාමයක් ලෙස සමස්ත ලංකා මුස්ලිම් වියතුන්ගේ සම්මේලනය දකියි. මෙලෙස ප්‍රතිමා විනාශ කිරීම හෝ ඒවා අපහාසයට ලක් කිරීම ඉස්ලාමීය ඉගැන්වීම නොවන බව තරයේ පවසා සිටින්නට කැමත්තෙමු.

බෞද්ධ ජනතාව බහුතරයක් ලෙස ජීවත් වන මෙරටේ මුස්ලිම් හින්දු හා කිතුනු යන සියලු ජනයා භේදයකින් තොරව එකට එක්ව අන්‍යොන්‍ය අවබෝධයකින් යුතුව තමතමන්ගේ ආගමික ඉගැන්වීම් පිළිපදිමින් ජීවත්ව එන පසුබිමක මෙවැනි ක්‍රියාදාමයන් අනවශ්‍ය ගැටලු ඇති වීමට හේතුවක් වනු ඇත.

එහෙයින් මෙම කටයුත්ත කවර කෙනෙකු විසින් සිදු කර තිබුණද ඔවුන් නීතිය හමුවේ ගෙනැවිත් ඔවුනට නිසි තීන්දුවක් නිසිලෙස ලබා දී මෙවැනි ක්‍රියාදාමයන් ඉදිරියට සිදු නොවන්නට සුදුසු ක්‍රියාමාර් ග ගන්නා මෙන් ද මෙය හේතුවක් කර ගනිමින් ප්‍රචණ්ඩත්වය ඇවිළීම වළක්වන මෙන් ද ගරු ජනාධිපතිතුමාගෙන් ද, අගමැති තුමාගෙන්ද, පොලිස්පති තුමා ගෙන්ද සමස්ත ලංකා මුස්ලිම් වියතුන්ගේ සම්මේලනය ඉල්ලා සිටියි.

 

 

අෂ්-ෂෙයික් එම්.එම්. අහ්මද් මුබාරක්

ලේකම්

සමස්ත ලංකා මුස්ලිම් වියතුන්ගේ සම්මේලනය

2018.03.22

ප්‍රශ්නයන් ඇති වන සෑම විටකම මුස්ලිම්වරුන් වන අප ශුද්ධ වූ අල් කුර්ආනය, නබිතුමන්ගේ වැකි වලට අනුව හා එතුමන්ගේ සත්‍ය සහගාමීන්ගේ ආදර්ශයන් මගින් නිසි අවබෝධය ලබා ගෙන කටයුතු කිරීම ඔස්සේ එම ප්‍රශ්නවලට පිළියම් සොයා ගැනීමට හැකි වේ යනුවෙන් සෑම මුස්ලිම්වරයෙකුම තම සිත තුල පතිත කර ගත යුතු වේ.  

විවිධාකාර ජාතීන් හා ආගමිකයන් අතර ජීවත්වන ශ්‍රී ලාංකික මුස්ලිම්වරුන් සාමුහික සහජීවනය පවත්වාගෙන  සුහදත්වයෙන්  කටයුතු කර ඇති බව ඉතිහාසය සාක්‍ෂි දරයි. මෙම අකාරයට ඉදිරයේදී ද කටයුතු කළ යුතුයි යනුවෙන් සමස්ත ලංකා ජම්ඉයියතුල් උලමා සංගමය අවධාරණය කරයි.   

අන්තර්ජාලයේ සමාජ මාධ්‍යයන් පරිහරණය කරන විට අප ඉතා අවධානයෙන් කටයුතු කළ යුතුය. පසු ගිය දිනයන්හි නුවර ප්‍රදේශයේ සිදු වූ කෝලාහලකම්  නිසා සහ්රාන් මව්ලවි නැමැත්තා විසින් අනෙකුත් ආගමිකයන්ට අපහාස කර ශුද්ධ වු අල් කුර්ආන් වැකියන් හුවා දක්වා ඉතා ඉක්මනින්ම යුද්ධයකට ජනතාව සුදානම් වන්න යනුවෙන් පවසා ඇති වීඩියෝ පටය සමාජ මාධ්‍යයන් තුළ දැක ගැනීමට හැකිය. මෙම පුද්ගලයාගේ මෙම කලහකාරී ප්‍රකාශය සමස්ත ලංකා ජම්ඉයියතුල් උලමා සංගමය තරයේ හෙළා දකියි. මෙවන් ප්‍රශ්නසහගත අවස්ථාවන්වලදී සුළුතරයක් වූ මුස්ලිම්වරුන් ක්‍රියා කළ යුතු ආකාරය සම්බන්ධව ඉස්ලාමීය විද්වතුන් විසින් ඉස්ලාමීය නිවැරදි මග පෙන්වීම්  අපට ලබා දී ඇත. 

ප්‍රශ්න සහගත අවස්ථාවන් වලදි මෙවැනි විඩියෝ පට අපගේ සමාජය වැරදි මාර්ගයට යොමු කරාවි. එම නිසා ප්‍රශ්න සහගත අවස්ථාවන් වලදී රටේ නීතියට ගරු කරමින් තමන්ව හා තමාගේ දේපළ ආරක්‍ෂා කර ගැනීමට ආත්ම ආරක්‍ෂාව තහවුරු කර ගැනීම අප සියලු දෙනාගේම වගකීම වේ.

ප්‍රචන්ඩත්වය හා ප්‍රශ්නයන්ව දැඩිව හෙළා දකින ඉස්ලාමය අනෙකුත් ආගමිකයන් සමග කටයුතු කළ යුතු ආකාරය ද පෙන්වා දී ඇත. එලෙසම ජීහාද් පිළිබඳව සම්පූර්ණ විග්‍රහයක් සමස්ත ලංකා ජම්ඉයියතුල් උලමා සංගමය විසින් ප්‍රකාශයට පත් කර  ඇත. එම නිසා මෙවැනි වීඩියෝ පට හා ප්‍රචාරයන් අපව තව තවත් අනවශ්‍ය කෝලාහලකම් වලට මං පාදන නිසා එවැනි දේවල් වලින් සම්පූර්ණයෙන්ම ඉවත් වී ක්‍රියා කරන මෙන් සමස්ත ලංකා ජම්ඉයියතුල් උලමා සංගමය ඉල්ලා සිටියි.

 

 

අෂ්-ෂේක් එච්. උමර්දීන්

ලේකම් (ප්‍රචාරක කමිටුව)

සමස්ත ලංකා ජමිඉයියතුල් උලමා සංගමය