Ref : ACJU / GEN / 2020/025

2020.09.10 / 1442.01.21

 

ඊයේ දිනයේ ජනාධිපති විමර්ශන කොමිසම් සභාවේ සිදුවූ සිද්ධිය සම්බන්ධයෙන්

2020.09.09 බදාදා, එනම් ඊයේ දිනයේ ජනාධිපති විමර්ශන කොමිසම් සභාවෙහි සිදුවූ සිද්ධිය පිළිබඳව අපගේ දැඩි අප්‍රසාදය හා කනස්සල්ල පළ කර සිටිමු.

එහිදී සමස්ත ලංකා ඉස්ලාම් ආගමික විද්වතුන්ගේ සභාව නියෝජනය කරමින් සහභාගී වූ සහකාර මහලේකම් අෂ්-ෂෙයික් එම්.එම්.එම්. මුර්ෂිද් තුමන් පිළිබදව මාධ්‍යයෙහි පල වූ සිද්ධිය සම්බන්ධයෙන් පැහැදීමක් ලබා ගැනීම සඳහා විධායක කමිටුවේ හදිසි රැස්වීමක් අද පෙ.ව. 10.30 ට අප ප්‍රධාන කාර්යාලයෙහි පැවැත් විණි. එහිදී සමස්ත ලංකා ඉස්ලාම් ආගමික විද්වතුන්ගේ සභාවේ ව්‍යවස්ථාවට අනුකූලව සිද්ධිය සම්බන්ධයෙන් සොයා බැලීම සඳහා කමිටුවක් පත් කරන ලදී.

 

මෙම අවස්ථාවේ දී, අෂ්-ෂෙයික් එම්.එම්.එම්. මුර්ෂිද් තුමන් තම විමර්ශන කටයුතු අවසන් වන තුරු තමා සමස්ත ලංකා ඉස්ලාම් ආගමික විද්වතුන්ගේ සභාවේ සහකාර මහලේකම් ධූරයෙන් ඉවත් වන බව ලිඛිතව දැනුම් දී තිබේ. සමස්ත ලංකා ඉස්ලාම් ආගමික විද්වතුන්ගේ සභාව ද ඔහුගේ ඉල්ලා අස්වීම පිළිගත් බව මෙයින් දන්වා සිටිමු.

 

අෂ්-ෂෙයික් එම්.එස්.එම්. තාසිම්

සහකාර මහලේකම්

සමස්ත ලංකා ඉස්ලාම් ආගමික විද්වතුන්ගේ සභාව

 

ACJU/MED/2020/005

23.05.2020 / 29.09.1441

සමස්ත ලංකා ඉස්ලාම් ආගමික විද්වතුන්ගේ සභාවේ රමළාන් උත්සව පණිවි

ඩයකෝවිඩ්-19 වසංගතය පවතින අර්බුදකාරි තත්ත්වයක පුරා මාසයක් උපවාසශිලයේ හා යහක්‍රියාවන් වල යෙදී අද දින රමළාන් උත්සවය සමරන මුස්ලිම් ජනයාට සමස්ත ලංකා ඉස්ලාම් ආගමික විද්වතුන්ගේ සභාවේ රමළාන් උත්සව සුබපැතුම දන්වා සිටියි. තවද අප යෙදුනු උපවාසශීලය ඇතුලූ සියලූ යහකි‍්‍රයා අල්ලාහ් පිළිගනිත්වා යැයිද ප‍්‍රාර්ථනා කරමු.

කෝවිඩ්-19 පැතිරීම වැළැක්වීමේ පියවර ලෙසින් ආරක්‍ෂක හා සෞඛ්‍ය බලධාරීන් නිර්දේශ කර ඇති මාර්ගෝපදේශ පිළිපැදිය යුතුව තිබෙන හෙයින්, පසුගිය වසරවල මෙන් නොව මෙවර අප රමළාන් උත්සවය ඉතා චාම් ආකාරයෙන් සමරමු. තවද එම නිර්දේශවලට අනුව අප මෙවර සැමරීම අපගේ නිවසට පමණක් සීමා කරමු. එමෙන්ම අප රට ඇතුලූ මුළු ලොවටම ඇති වී තිබෙන මෙම ව්‍යසනය ඉවත් වන මෙන්ද අප සැම මෙම උවදුරෙන් ආරක්ෂා කරන මෙන්ද සර්වබලධාරී අල්ලාහ්ගෙන් අප අයැද සිටිමු. මෙම ව්‍යසනය ලොවින් තුරන් කරන්නට අප සැම එක්ව හා සහයෝගයෙන් මෙන්ම තිර අධිෂ්ඨානයෙන් කටයුතු කරන්නට අවශ්‍ය ඉවසීම හා චිත්ත ධෛර්යය අපට ලබා දී ආශීර්වාද කරන මෙන් ලාංකික මුස්ලිම් අප සැම අල්ලාහ්ගෙන් ප්‍රාර්ථනා කළ යුතුය.

මෙම උතුම් දිනයේ ඉස්ලාමීය මගපෙන්වීම් නිසි අයුරින් අනුගමනය කරමින් මුළු ලොවම හා අප මාතෘභුමිය මෙම වසංගතයෙන් ආරක්ෂා වීමට අප සියල්ලන්ම සර්වබලධාරි අල්ලාහ්ගෙන් අයැද සිටිමු.

එමෙන්ම මෙම දුර්භීක්ෂයෙන් අපගේ දේශය ගලවා ගැනීමට අව්, වැසි, දිවා, රාති‍්‍ර නොබලා කැපවීමෙන් කටයුතු කරන රාජ්‍ය නිළධාරීන්, සෞඛ්‍ය අංශයේ නිළධාරීන්ට ද පොලිස් නිළධාරීන් හා ති‍්‍රවිද හමුදාවට ද අපගේ හෘදයාංගම ස්තූතිය මෙම රමළාන් උත්සව දිනයෙහි සමස්ත ලංකා ඉස්ලාම් ආගමික විද්වතුන්ගේ සභාව ප‍්‍රකාශ කර සිටියි.

 

 

අෂ්-ෂෙයික් එම්.එස්.එම්. තාසිම්

සහකාර ලේකම්,

සමස්ත ලංකා ඉස්ලාම් ආගමික විද්වතුන්ගේ සභාව

 

 

2020.03.27

අස්සලාමු අලෙයිකුම් වරහ්මතුල්ලාහි වබරකාතුහු

ජනාසාවක අවසන් කටයුතු සම්බන්ධව සමස්ත ලංකා ඉස්ලාම් ආගමික විද්වතුන්ගේ සභාවේ විශේෂ ඉල්ලීම

මුළු ලොවම එකම එක් ව්‍යසනයක් නිසා කම්පාවට පත්ව සිටිනු අපි දනිමු. කොරෝනා නම් වන මෙම වසංගතයට සිය ගණනින් දැනටමත් ගොදුරු වී මිය ගොස් ඇති අතර විශාල ආසාදිතයන් සංඛ්‍යාවක් රෝහල් වල ප්‍රතිකාර ලබමින් සිටියි. මෙම තත්ත්වය පාලනය කිරීමේ එක් පියවරක් ලෙසින් ලොව රටවල් සෑම එකක්ම පාහේ ඇඳිරි නීතිය පනවා ඇත. අන් බොහෝ රටවල මෙන් අප රටේද දෛනික සියලු කටයුතු සම්පුර්ණයෙන්ම අඩාල වී ඇත.

මෙම ව්‍යසනයෙන් මීදීම පිණිස රජය විසින් ඇඳිරි නීතියට අමතරව තවත් විවිධ පියවර ගණනාවක්ම ගනිමින් සිටින අතර මුස්ලිම් ප‍්‍රජාවද රජයේ නීති නිර්දේශවලට අවනත වෙමින් නීති ගරුක පුරවැසියන් ලෙස කටයුතු කරමින් පෙර නොවිරූ අන්දමින් පස්වේල සලාතය සහ සිකුරාදා ජුමුආ නැමදුම තමතමන්ගේ නිවෙස්වලම ඉටු කර රජයේ නියෝග පරිදි සියලුම ආකාරයේ ආගමික හා සමාජමය එක් රැස්වීම්ද නවතා දමා ඇත. එමෙන්ම මුස්ලිම් ප‍්‍රජාව මෙරට හා රට වැසියන්ගේ ආරක්ෂාව පතා සහය දක්වමින් සිටියි.

මේ අතර අල්ලාහ්ගේ අභිමතය පරිදි කෙනෙකු අභාවයට පත් වූ විට එයට අදාළව මුස්ලිම්වරුන්ට ෆර්ලු කිෆායා වගකීම් කිහිපයක් තිබෙන හෙයින් එය ඉටු කිරීම පිණිස කිහිප දෙනෙකු එක්රැස්වීම යනු නොවැළැක්විය කාරණාවකි. එහෙයින් මිනිසුන් රැස්වන විට මෙම රෝගය ආසාදනය වීමේ ප්‍රවණතාවක් ඇත යැයි සෞඛ්‍ය බලධාරීන් අවවාද කර ඇත. ඒ අනුව මුස්ලිම්වරයෙකු අභාවයට පත් වූ විට පහත කරුණු අනුගමනය කරන මෙන් සමස්ත ලංකා ඉස්ලාම් ආගමික විද්වතුන්ගේ සභාව ලාංකේය මුස්ලිම් ප‍්‍රජාවගෙන් ඉල්ලා සිටියි:

  1. මරණයක් සිදු වු වහාම ඔබ අයත් වන පොලිස් ස්ථානයට එය පිළිබදව දැන්විය යුතුය.
  2. පොදු ජනතාවට මරණය සම්බන්ධව දන්වන විට අවසන් කටයුතු සඳහා බොහෝ දෙනෙක් එක් රැස්වීමට නොහැකි හෙයින් තම නිවෙස් වලම සිට අභාවයට පත් වූ තැනැත්තා වෙනුවෙන් ප‍්‍රාර්ථනා කරන මෙන් ඉල්ලා සිටිය යුතුය.
  3. ජනාසා නැමදුම සඳහා ගෙන යන විට අදාළ පොලිසිය විසින් අනුමැතිය දුන් සංඛ්‍යාවේ තැනැත්තන් පමණක් එය සමග යා යුතුය.
  4. මරණය සිදුවූ නිවසේ මිනිසුන් රැස්වන විට සෞඛ්‍ය බලධාරීන් විසින් ලබා දී ඇති මාර්ගෝපදේශ ඉතා සැලකිල්ලෙන් යුතුව අනුගමනය කළ යුතුය.
  5. ජනාසාව ස්නානය කරවන අය පමණක් නොව එය සමග සුසාන භූමියට යන පුද්ගලයන් සියලු දෙනාම මුඛ හා නාස් ආවරණ නොවරදවා පැළඳගත යුතුය.
  6. ජනාසා සලාතය මස්ජිද් පරිශ්‍රයේ සිදු කළ යුතුය.
  7. ජනාසා සලාතය සඳහා සිට ගන්නා විට උරෙනුර ගැටී සිට ගැනීම සාමාන්‍ය රීතිය වුවද මෙවන් අවස්ථාවක මඳක් ඈත්ව සිට ගැනීමට ඉස්ලාමය අනුමැතිය ලබා දෙන හෙයින් එසේ සිට ගත යුතුය.
  8. භූමදානය කරන විට අත්‍යවශ්‍ය කිහිප දෙනෙකු පමණක් ඒ වටා සිටිය යුතු අතර අන් අය ඈතින් හා එක් රෝක් නොවී විසිරී සිටිය යුතුය.
  9. භූමදාන කටයුතු අවසන් වු පසු ප‍්‍රාර්ථනාවල යෙදී ඉක්මනින් සිය නිවෙස්වලට යා යුතු අතර මුසාෆහා හෙවත් අතිනත දී ආචාර කිරීමෙන් වැළකී සිටිය යුතුය.

ඉහත කරුණු අනුගමනය කරන මෙන් සමස්ත ලංකා ඉස්ලාම් ආගමික විද්වතුන්ගේ සභාව ලක්වාසී මුස්ලිම් ප්‍රජාවගෙන් ඉල්ලා සිටියි.

සැ.යු. - අල්ලාහ් මෙසේ පවසයි : “අල්ලාහ් නුඹලාට පහසුව අපේක්ෂා කරන අතර නුඹලාට දුෂ්කරතාව අපේක්ෂා නොකරයි.” (සූරා අල් බකරා 185)

නබි මුහම්මද් තුමන් (සල්) මෙසේ උපදෙස් කර ඇත : “නිශ්චය වශයෙන්ම මෙය පහසු දහමකි. කවුරුන් හෝ මෙම දහම ඔහුට අසීරු කර ගතහොත් එය ඔහු අභිබවනු ඇත. (සහීහුල් බුහාරි 39)

ඉහත මාර්ගෝපදේශ මෙම ශුද්ධ කුර්ආන් වැකිය, නබිවදන හා ආගමික විශාරදයින්ගේ අදහස් පදනම් කර ගනිමිනි.

 

අෂ් ෂෙයික් එම්. එල්. එම්. ඉල්යාස්

ලේකම් - ෆත්වා කමිටුව,

සමස්ත ලංකා ඉස්ලාම් ආගමික විද්වතුන්ගේ සභාව

2019.06.08

මාධ්‍ය ප‍්‍රකාශය

පසුගිය ගිය සති කිහිපය අප රටට අතිශය ශෝචනීය කාල වකවානුවක් බව විශේෂයෙන් සඳහන් කළ යුතු නැත. මෙවන් නොසන්සුන් වාතාවරණයක පසුගිය ජූනි මස 6 වන දින ත්‍රයි නිකායන්ට අයත් අති පූජ්‍ය මහා සංඝ නායකයන් මාධ්‍ය හමුවක් කැඳවා මෙරටේ සියලූ ජනකොටස් සාමයෙන් එක්සත්ව කටයුතු කළ යුතුය යැයිද විශේෂයෙන් මුස්ලිම් ජනයා සමග තමන්ට කිසිඳු අහිතක් හෝ නොසතුටක් නොමැත යැයිද ඈත අතීතයේ පටන් මුස්ලිම් ප‍්‍රජාව සමග සිංහළ ජනයා වාසය කළේ සුහඳ මිත‍්‍රශීලී ආකල්පයෙන් බව පෙන්වා දෙමින් එය එසේම පැවතිය යුතුය යැයිද විශේෂ ප‍්‍රකාශයක් කර තිබීම ඉතා අගය කළ යුතු කරුණකි.

මෙලෙසින් අප රටේ සාමය හා ජනකොටස් අතර එකමුතුබව සඳහා මහා සංඝරත්නය ඉටු කර ඇති මෙහෙය හා ලබා දී ඇති දායකත්වය සුළුපටු නොවේ. එසේම අතීතයේ සේම වර්තමානයේත් රටේ අභිවෘධිය උදෙසා එක්සත්ව කටයුතු කරන්නට ශ‍්‍රී ලාංකික මුස්ලිම් ප‍්‍රජාවද මුස්ලිම් ආගමික ප‍්‍රධානීන්ද නිරන්තරයෙන්ම සුදානමින් සිටින බව මෙරටේ සියලූ ජනයාට මෙන්ම රජයටද පවසනු කැමැත්තෙමු.

ත‍්‍රස්තවාදය, අන්තවාදය හා ජාතිවාදය වැනි අපගේ රටට ව්‍යසනයක් විය හැකි හා රට අස්ථාවර කළ හැකි දුෂ්ට බලවේග කුමන වෙසකින් පැමිණියද ඒ සියල්ල පරාජය කිරීමට ශ‍්‍රී ලාංකිකයන් ලෙසින් සියලූ වෙනස්කම් පසෙකලා අප සැම එක හඬින් නැගී සිටිය යුතුය.

ජනකොටස් අතර අන්‍යෝන්‍ය වැටහීම සහ එක්සත් බව ඇති කර රටේ සාමය හා සමාදානය මෙන්ම අභිවෘධිය ඇති කරත්වා යැයි අල්ලාහ්ගෙන් ප‍්‍රාර්ථනා කරමු.

වස්සලාම්

 

අෂ් ෂෙයික් එම්.එම්. මුර්ෂිද් මුලෆ්ෆර්

සහකාර ලේකම්,

සමස්ත ලංකා ඉස්ලාමීය වියතුන්ගේ සම්මේලනය

(All Ceylon Jamiyyathul Ulama) 

 

2019.05.28 (1440.09.22)

රමළාන් උත්සවය සම්බන්ධ මගපෙන්වීම්

රටේ පවතින අසාමාන්‍ය තත්ත්වය සැලකිල්ලට ගනිමින් සමස්ත ලංකා ඉස්ලාම් ආගමික වියතුනගේ සම්මේලනය (ජම්යියතුල් උලමා සම්මේලනය) ලාංකික මුස්ලිම් ජනයාට පහත උපදෙස් ඉදිරිපත් කරයි,

  1. කොළඹ ප‍්‍රධාන මස්ජිදය, සමස්ත ලංකා ජම්යියතුල් උලමා සම්මේලනය සහ මුස්ලිම් ආගමික හා සංස්කෘතික කටයුතු දෙපාර්තමේන්තුව යන ආයතන එක්ව නව සඳ දිස්වීම පිලිබඳව ගන්නා සාමුහික තීරණය අනුව ප‍්‍රකාශයට පත් කරන දිනයෙහි රමළාන් ඊද් උත්සවය සැමරිය යුතුය.
  2. රමළාන් ඊද් සලාතය ක‍්‍රීඩා පිටි හෝ එවැනි එළිමහන් ස්ථානවල පැවැත්වීමෙන් වැළකී සලාතය මස්ජිද්වල පමණක් ඉටුකළ යුතුයි.
  3. රමළාන් ඊද් සලාතය සඳහා මස්ජිද්වලට පැමිණෙන්නන් වාහනවලින් පැමිණීමෙන් වැළකිය යුතුය. ඊට නොහැකි තත්ත්වයකදී තනි තනි වාහන වලින් නොපැමිණ සාමුහික වශයෙන් වාහනයක පැමිණීමට කටයුතු කළ යුතුයි.
  4. සියලුම මස්ජිද්වල පරිපාලකයින් ඒ ඒ පෙදෙස්වල පොලිස් ස්ථාන හා සම්බන්ධ වී තම මස්ජිද්වලට විශේෂ ආරක්‍ෂාව ලබා ගැනීමට කටයුතු කළ යුතුය.
  5. පීඩාවට පත්වුවන් ගැන සැළකිලිමත් වෙමින් රමළාන් ඊද් උත්සව කටයුතු චාම් ලෙස සිදුකිරීමට සිහි තබා ගතයුතු අතර ආහාර පාන අසල්වැසියන් හා දුගීන් සමග නොමසුරුව බෙදා ගත යුතුය. ඊද් උත්සව ආගමික කටයුතු වලින් සීමා කර ගනිමින් වැය කරන මුදල ඉතිරි කර පීඩාවට පත්වුවන්ට ලබා දීමට කටයුතු කළ යුතුය.
  6. බඩු බාහිරාදිය මිලට ගැනීම සඳහා කාන්තාවන් නොගොස් හැකි පමණින් පිරිමි ඒවා සිදුකර දීමට වැඩි අවධානයක් යොමු කළ යුතුය.

දයාව හා පරෝපකාරය උනන්දු කරන මෙම සුවිශේෂී මාසයේ අප සිදු කරන ආගමික් වතාවත් වන්දනා මාන හා දන්දීම සියල්ල අල්ලාහ් දෙවියන් පිළිගෙන ඒවායෙහි මහිමයෙන් රටේ ව්‍යාකූල තත්ත්වය ඉක්මනින්ම පහ වී නැවතත් අපගේ මාතෘභූමියට සතුට සැනසීම හා අභිවෘධිය ඇති කරත්වා.

වස්සලාම්

 

අෂ් ෂෙයික් එච්. උමර්දීන්

ලේකම්,

ප‍්‍රචාරක කමිටුව,

සමස්ත ලංකා ඉස්ලාම් ආගමික වියතුන්ගේ සම්මේලනය (ACJU)

2019 මැයි මස 22

අනුස්මරණ දිනය සහ ඉදිරියට කළ යුතු දේ

2019 අප්‍රේල් මස 21 වන දින අප කිසිවෙකුට අමතක කළ නොහැකි දිනයකි. පල්ලිවල ආගමික වතාවත්වල යෙදී සිටි කතෝලික බැතිමතුන් හා හෝටල් කිහිපයක උදේ ආහාර ගනිමින් සිටි අහිංසකයන් සිය ගණනක් කුරිරු ත්‍රස්ත ප්‍රහාරයකට ලක්ව ඝාතනය වුයේ මෙම දිනයේය. මෙම අමානුෂික ඝාතන පෙළ සිදු කළ කුරිරු පුද්ගලයන් කිහිප දෙනා ‘මුස්ලිම්’ යැයි තමන්ව හඳුන්වා ගත් හෙයින් මෙය සම්බන්ධව, කවදත් සාමය අගයන ලාංකික මුස්ලිම් ප්‍රජාවට ඇති වුයේ දැඩි අසීරුතාවක් හා දැරිය නොහැකි කම්පාවකි. ඒ අනුව සමස්ත ලංකා ඉස්ලාම් ආගමික වියතුන්ගේ සම්මේලනය නොහොත් ජම්යියතුල් උලමා සම්මේලනය ප්‍රමුඛ මුළු මහත් ලාංකික මුස්ලිම් ජනයා සිය සංවේගය හා කණගාටුව නැවතත් ප්‍රකාශ කර සිටිති.

අයි.එස්. ත්‍රස්ත කල්ලිය බිහි වු පසු 2014 වසරෙහි ලොව සියල්ලන්ටම ප්‍රථමයෙන් එය හෙළා දුටු ආගමික සංවිධානය වුයේ සමස්ත ලංකා ඉස්ලාම් ආගමික වියතුන්ගේ සම්මේලනයයි. එවක පටන් එම බිහිසුණු ත්‍රස්ත කල්ලියේ අමානුෂික ක්‍රියාකාරකම් විටින් විට දැඩි දෝෂාරෝපණයට ලක් කරමින් ඔවුන්ගේ ක්‍රියා සහ ඉස්ලාම් ධර්මයේ ඉගැනුම්වලට කිසිඳු සම්බන්ධයක් නොමැති බවද ඒ අනුව අයි.එස්. ත්‍රස්තවාදීන් මුස්ලිම් නොවේය යැයිද අප අවධාරණයෙන් ප්‍රකාශ කරමින් සිටියෙමු. මන්දයත් අන්තවාදය, ප්‍රචණ්ඩත්වය හෝ මරාගෙන මැරෙන ඇතුළු අන් සියලුම ආකාරවල ත්‍රස්ත ප්‍රහාරවලට කිසිසේත් ඉස්ලාමය අනුබල නොදෙන හෙයිනි.

වසර දහසකට අධික කාලයක් මුළුල්ලේ මුස්ලිම් ජනයා මෙරට බහුතර සිංහල සහෝදර සහෝදරියන් සමග සාමයෙන් හා එක්සත්ව වාසය කරමින් සිටින බව ප්‍රකට කරුණකි. අප්‍රේල් ප්‍රහාර මාලාවේ කම්පනය නිසා මුස්ලිම්වරුන් වශයෙන් සහෝදර ජනතාව අතර සබඳතාව වඩාත් ශක්තිමත් කිරීමටත් විවිධ ජනකොටස් සමග වඩාත් සමීප වීමටත් වූ අධිෂ්ඨානය තර වී ඇත. ජාතීන් අතර වන මෙම සංහිඳියාව තවතවත් ශක්තිමත් කරන්නට මුස්ලිම් අප සැම විශේෂයෙන් කැපවීමකින් කටයුතු කළ යුතු අවදිය මෙයයි. ඒ අනුව පහත කරුණු ගැන සැළකිලිමත් වන මෙන් ලංකාවාසී මුස්ලිම්වරුන්ගෙන් සහ මස්ජිද්වල භාරකරුවන්ගෙන් සමස්ත ලංකා ඉස්ලාම් ආගමික වියතුන්ගේ සම්මේලනය කාරුණිකව ඉල්ලා සිටියි.

  • 2017 වසර සමස්ත ලංකා ඉස්ලාම් ආගමික වියතුන්ගේ සම්මේලනය විසින් මස්ජිද්වලට හඳුන්වා දෙන ලද ‘සාම මධ්‍යස්ථාන සංකල්පය’ වඩාත් ඕනෑකමින් ක්‍රියාත්මක කළ යුතුය.
  • ඕනෑම ජන කොටසකට අයත් ඕනෑම කෙනෙකුට පැමිණ කරුණු විමසා පැහැදිළි කිරීම් ලබා ගැනීමට හැකි වන අයුරින් ඔබගේ ප්‍රදේශවල මස්ජිද්, මක්තබ් පාසල් සහ මද්රසා පාසල් විවෘතව තැබිය යුතුය.
  • ආදර්ශමත් ප්‍රජාවක් ලෙස මුස්ලිම් තරුණයන් බිහි වන ආකාරයෙන් මස්ජිදය මුල් කර ගත් ව්‍යාපෘති සැලසුම් කළ යුතුය.
  • මස්ජිදයේ විවිධ අවස්ථාවල ඉමාම්වරුන් පවත්වන දේශනා විෂයයෙහි වගකීම දැරිය යුතු වන්නේ ඒ ඒ මස්ජිද්වල පරිපාලකයින් වන හෙයින් එම දේශනාවල අන්තර්ගතය සිරිත් පරිදි ඉස්ලාමීය ඉගැන්වීම්, සදාචාරාත්මක අගයන්, සාමය හා සංහිඳියාව, ජනකොටස් අතර සුහදත්වය, යහපත් ප්‍රජාවක් වීමේ වැදගත්කම ආදිය අවධාරණය කරනා ලෙසින් තිබීමට තහවුරු කර ගත යුතුය. මෙම දේශනා සඳහා පිළිගැනීමක් ඇති, උගත්, පරිණත ආගමික වියතුන් පමණක් තෝරා ගත යුතුය. යමෙකු පිළිබඳ විමසීමක් අවශ්‍ය වු විට ඔහු පිළිබඳ සමස්ත ලංකා ඉස්ලාම් ආගමික වියතුන්ගේ සම්මේලනයෙන් විමසා සැක හැර ගත යුතුය.
  • අපගේ මාතෘභූමියෙන් ත්‍රස්තවාදයේ සියළුම කුරිරු සැවනැලි මුලිනුපුටා දැමීම සඳහා මෙයට පෙර කටයුතු කළා සේම රජය, හමුදාව ඇතුළු ආරක්‍ෂක අංශ සහ නීතිය ක්‍රියාවේ යොදවන සියළු රාජ්‍ය ආයතනවලට පූර්ණ සහය ලබා දිය යුතුය. එමෙන්ම පවතින හා රටේ ආරක්‍ෂාව වෙනුවෙන් අවස්ථානුකූලව පනවනු ලබන නව නීති හා නිවේදන අකුරටම පිළිපැදිය යුතුය.

එමෙන්ම ප්‍රහාර නිසා හානියට හා දුකට පත්ව සිටින සියළුම පවුල් වෙනුවෙන්ද අපගේ මව්බිමේ පවතින ව්‍යාකූලතා සියල්ල පහ වී නැවතත් සාමයේ හා අභිවෘධියේ මාවතේ ලක්මව ගමන් කරවිය යුතු යැයි ද නිතිපතා අල්ලාහ්ගෙන් ප්‍රාර්ථනා කරන මෙන් ඉල්ලා සිටිමු.

ස්තූතියි.

 

 

ගරු මුෆ්ති එම්.අයි. එම්. රිස්වි                                                                                ගරු අෂ් ෂෙයික් අගාර් මොහමඩ්

සභාපති,                                                                                                          නියෝජ්‍ය සභාපති,

සමස්ත ලංකා ඉස්ලාම් ආගමික වියතුන්ගේ සම්මේලනය (ACJU)                                      සමස්ත ලංකා ඉස්ලාම් ආගමික වියතුන්ගේ සම්මේලනය (ACJU)

 

 

 

15.05.2019 (08.09.1440)

මුස්ලිම්වරුන් සඳහා වන වැදගත් මාර්ගෝපදේශ කිහිපයක්

රටෙහි පසුගිය දින කිහිපය තුල සිදුවුනු සිද්ධි නිසා උද්ගතව ඇති අර්බුදකාරී තත්ත්වය පිළිබඳව අප සංගමය මෙන්ම අනෙකුත් මුස්ලිම් සිවිල් සංවිධාන දිගින් දිගටම සාකච්ඡුා පවත්වමින් ඒ ඒ අවස්ථාවලට සුදුසු මගපෙන්වීම් ලාංකික මුස්ලිම් ජනයාට ලබා දෙමින් සිටියේය.
තවද මෙම කාර්‍යභාරය සංකීර්ණතාවලින් තොරව ඒකාකාරීව හා එක්සත්ව සිදු කිරීම සඳහා තිබෙන්නා වු මුස්ලිම් ආගමික හා සිවිල් සංවිධාන සියල්ල එක්ව පොදු කමිටුවක් ස්ථාපිත කර ඇත. මෙම පොදු කමිටුවේ කි‍්‍රයා පටිපාටියක් අනුව අවශ්‍ය හා හදිසි අවස්ථාවල අතිගරු ජනාධිපතිවරයා, ගරු අග‍්‍රාමාත්‍යවරයා සහ ආරක්‍ෂක අංශවල ප‍්‍රාධානීන් සමග සම්බන්ධ වී කරුණු පැහැදිලි කිරීම් සිදුකර නිසි පියවර ගැනීම සඳහා ඔවුන්ට පුර්ණ සහය ලබා දෙනු ලැබේ.

පසුගිය අපේ‍්‍රල් 21 වන පාස්කු ඉරු දින සිදු කරන ලද අමානුෂික ත‍්‍රස්ත ප‍්‍රහාර රැුල්ල මුළු මහත් ශ‍්‍රී ලාංකික ජනතාවම දැඩි කම්පාවට පත් කළේය. ඒ අනුව ශ‍්‍රී ලංකාවේ තිබෙන සියලූ මුස්ලිම් සංවිධාන ප‍්‍රමූඛ දිවයිනේ පැතිරී වාසය කරන සමස්ත මුස්ලිම් ජනතාවම මෙම කුරිරු කි‍්‍රයාවලට එරෙහිව සිය හෙළා දැකීම එක හඬින් ප‍්‍රකාශ කර සිටියහ. එපමණක් නොව එවන් ම්ලේච්ඡු කි‍්‍රයාවල යෙදී සිටියවුන් හා යෙදෙන්නට හැකිය යැයි සැක සිතුනු පුද්ගලයන් හා ස්ථාන ගැනද නොපමාව ආරක්‍ෂක අංශවලට දැනුම් දී ඔවුන් කොටු කර ගැනීමටද මුස්ලිම්වරුන් සම්පුර්ණ සහය ලබා දුන්හ. මුස්ලිම්වරුන්ගේ මෙවන් සහය නොතිබෙන්නට සිදු වුවාට වඩා අති දැවැන්ත විනාශයක් අප රටට ඇති වන්නට තිබුනු බව ආරක්‍ෂක අංශ ප‍්‍රධානීන් පවා ස්තූති මුඛයෙන් ප‍්‍රසිද්ධියේ ප‍්‍රකාශ කර සිටි බව ප‍්‍රකට කරුණකි. දේශයේ සාමය, ආරක්‍ෂාව හා භෞමික අඛණ්ඩතාවය රැුක ගැනීම සඳහා එදත්, අදත්, ඉදිරියටත් දේශ හිතෛෂී ලාංකික මුස්ලිම් ජනයාගේ සම්පුර්ණ සහයෝගය රජයට හා ආරක්‍ෂක අංශවලට ඒකාන්තයෙන්ම තිබෙනු ඇත. මන්ද යත් අහිංසකයන් ඉලක්ක කර ගෙන සිදු කරන කිසිදු ප‍්‍රචණ්ඩ කි‍්‍රයාවක් ඉස්ලාමය කිසිසේත් අනුමත නොකරන හෙයිනි. මග වරදවා ගත් හෝ වෙනයම් දුෂ්ට බලවේගවල ඉත්තන් ලෙසින් මෙහෙයවනු ලැබු මුස්ලිම් නමින් පෙනී සිටි අතලොස්සක් පුද්ගලයන් විසින් සිදු කරනු ලැබු වනචාරී කි‍්‍රයාවලට මුළු මහත් ලාංකික මුස්ලිම් ප‍්‍රජාවටම චෝදනා එල්ල කිරීම හෝ තවත් ඉදිරියට යමින් කිසිදු වරදක් නොකළ මුස්ලිම් ජනයාට හිරිහැර කිරීම, ඝාතනය කිරීම හෝ ඔවුන්ගේ නිවාස, දේපළ, ව්‍යාපාර සුනුවිසුනුකර ගිනි බත් කිරීම කොහොත්ම සාධාරණ විය නොහැක. රජය හා ආරක්‍ෂක අංශද දිගින් දිගටම අවධාරණ කරමින් සිටින්නේද මෙයම බැවින් මෙම තත්ත්වය නොබෝ දිනකින් සමනය වනු ඇතය යනු අපගේ විශ්වාසයයි, අපගේ පැතුමයි.

මෙවන් තත්ත්වයක පහත කරුණු සැලකිල්ලට ගනිමින් ඉවසීමෙන් කටයුතු කරන මෙන් සමස්ත ලංකා ජමියතුල් උලමා සංගමය ලාංකික මුස්ලිම් ප‍්‍රජාවගෙන් ඉල්ලා සිටියි,

01. සියලූම තත්ත්වයන්හිදී සිරිත් පරිදි මුස්ලිම්වරුන් යොමු විය යුත්තේ අල්ලාහ් දෙසටය හා කන්නලව් කළ යුත්තේ ඔහුටය. අල්ලාහ්ගේ පිහිට හා ආරක්‍ෂාව ලබනු පිණිස සලාතය, උපවාසය, ප‍්‍රාර්ථනාව, දානය හා සමාව අයැදීම වැඩි වැඩියෙන් සිදු කළ යුතුය.

02. මෙම අර්බුදකාරී වාතාවරණයෙහි කලකිරීමට, කලබලයට හෝ බියට පත් නොවී පැහැදිලි මනසින් හා තියුණු විමසිල්ලෙන් මුස්ලිම්වරුන් නැණවත් ලෙසින් කටයුතු කළ යුතුය.

03. මේ රටේ වැසියන් ලෙසින් ලාංකික මුස්ලිම්වරුන්ගේ ජීවිත හා දේපළ ආරක්‍ෂා කර දීම රජයේ වගකීමකි. එය එලෙසින්ම සිදු වනු ඇත යැයි අප විශ්වාස කරන අතර අප පවතින නීතියට හා රජය විසින් අවස්ථානුකූලව සිදු කරන නව නිර්දේශවලට ගරු කරමින් අප අකුරටම නීතිය පිළිපැදිය යුතුය.

04. විශේෂයෙන් දැනට හදිසි නීතිය කි‍්‍රයාත්මක කර ඇති බැවින් එය ගැන අවශ්‍ය පමණ දැනුවත් වී සංවර ජනකොටසක් ලෙසින් ඒ අනුව කි‍්‍රයා කළ යුතුය.

05. සමාජ ජාල ඔස්සේ තමන්ට ලැබෙන ඕනෑම හා සියලූම පුවත් කිසිදු වගවිභාගයකින් තොරව අන් අයට යැවීමෙන් වැළකී සිටිය යුතුය. වගකීමෙන් තොරව කි‍්‍රයා කිරීම නිසා අතීතයේ ඇතිවු වුනු විනාශකාරී ප‍්‍රතිවිපාකවලින් පාඩම් ලැබ ප‍්‍රවේශමෙන් කටයුතු කළ යුතුය.

06. තමන් වාසය කරන ප‍්‍රදේශවල මුස්ලිම් ප‍්‍රජා නායකයන් හා ආගමික ප‍්‍රධානීන්ගේ උපදෙස් අනුව ඔවුන්ට කීකරුව කටයුතු කළ යුතුය.

07. පවතින අසහනකාරී තත්ත්වයෙන් මිදීමට හා රටේ සාමය ඇති වනු පිණිස පස්වේල සලාතයෙහිම කුනූත් අන්නාසියා ප‍්‍රාර්ථනාව සිදු කර අල්ලාහ්ගේ උදව් පැතිය යුතුය. දිනකට පස්වේලම මෙය සිදු කළ යුතු බැවින් බැතිමතුන්ට අසීරුතා ඇති නොවන ආකාරයෙන් ජමියතුල් උලමා සංගමය පෙන්වා දී ඇති පරිදි එම ප‍්‍රාර්ථනාව කෙටි කර ගත යුතුය.

08. මේ රටේ බහුතර සිංහළ ජනයා සාමය හා රටේ අභිවෘධිය ගැන සිතන යහපත් හා කරුණා ගුණයෙන් යුත් පර සත්කාරය විෂයයෙහි ලෝ ප‍්‍රකට ජන කොටසක්ය යන කරුණ අමතක නොකර අතීතයේ ඔවුන් සමග කටයුතු කළා සේම ඉදිරියටත් සුහද ආකාරයෙන් කටයුතු කළ යුතුය.

09. තමන් වාසය කරන පෙදෙස්වල ආගමික හා සමාජ ප‍්‍රධානීන් සමග සහයෝගයෙන් කටයුතු කරමින් ප‍්‍රදෙශයේ සාමය හා සංහිඳියාව රැුක ගැනීමට සහය විය යුතුය.

හස්බුනල්ලාහු වනිඃමල් වකීල් - අල්ලාහ්ම අපට ප‍්‍රමාණවත්ය. විශිෂ්ඨතම රැුකවලා ඔහුමය.

වස්සලාම්


අෂ් ෂෙයික් අගාර් මුහම්මද්
නියෝජ්‍ය සභාපති
සමස්ත ලංකා ජම්ය්යතුල් උලමා සංගමය

25.04.2019

ජාතික ආරක්ෂාව පවත්වාගෙන යෑම

 

වගකීම් සහිත රටවැසියන් හැටියට අපගේ මාතෘභූමිය ආරක්ෂා කිරීමටත්, සාමය හා නිසි පාලනය පවත්වාගෙන යෑමටත් මුස්ලිම්වරුන් වන අපි බැඳී සිටින්නෙමු. ආරක්ෂක අංශ හා නීතිය පවත්වාගෙන යෑමට ඇති ආයතන සමග පුර්ණ සහයෝගයෙන් කටයුතු කරන ලෙස අපි සැමගෙන් ඉල්ලා සිටින්නෙමු. විශේෂයෙන් ම සියළු සහෝදරියන්ගෙන් ඉතා බලවත් ලෙස ආයාචනා කොට සිටින්නේ දැනට අප රටේ ඇතිවී ඇති හදිසි හා බරපතල තත්ත්වය සැලකිල්ලට ගෙන කෙනෙකුගේ අනන්‍යතාව අවශ්‍යය වන තත්ත්වයකදී ආරක්ෂක අංශ මුහුණ පාන දුෂ්කර තත්ත්වය අවබෝධ කර ගෙන කටයුතු කරන ලෙසය. එහෙයින් පවතින තත්ත්වය සැලකිල්ලට ගෙන  අපගේ සහෝදරියන් විසින් මුහුණු ආවරණය (නිකාබ්) පැළඳීමෙන් ජාතික ආරක්ෂාව පවත්වාගෙන යෑමට සිටින ආරක්ෂක අංශයන්ට බාධාවක්වන අයුරින් කටයුතු නොකරන මෙන් ඉල්ලා සිටින්නෙමු.

එලෙසම සෑම අයෙකුම තමන්ගේ ජාතික හැඳුනුම් පත අවශ්‍ය අවස්ථාවකදී නිළධාරීන් වෙත ඉදිරිපත් කිරීම පිණිස තමන් භාරයේ තබා ගන්නා ලෙස උපදෙස් දෙන්නෙමු. 

 

අෂ් ෂෙයික් එම්. එල්. එම්. ඉල්යාස්

ලේකම් - ෆත්වා අංශය,

සමස්ත ලංකා ඉස්ලාම් ආගමික වියතුන්ගේ සංගමය.

සමස්ත ලංකා ඉස්ලාම් ආගමික වියතුන්ගේ සංගමයේ (ACJU) විශේෂ නිවේදනය

2019 අප්‍රේල් මස 21 වැනි ඉරුදින ශ්‍රී ලංකාවේ විවිධ ප්‍රදේශයන්හි සිදු වූ ත්‍රස්තවාදී ප්‍රහාර ලාංකික මුස්ලිම් ප්‍රජාව හැටියට තරයේ හෙළා දකින්නෙමු.

එක් ජීවයකට හානියක් කිරීම මුළු මහත් මිනිස් සංහතියටම හානියක් කළ හා සමානයි යැයි උගන්වන ඉස්ලාමය මෙවැනි කුරිරු ත්‍රස්තවාදී ක්‍රියාවන් කිසිසේත්ම අනුමත කරන්නේ නැත. මෙවන් කෲර ක්‍රියාවන් හි නියැලෙන්නන් ඉස්ලාමය හා කිසිම සම්බන්ධයක් නොමැති බවත් මෙය ත්‍රස්තවාදී ක්‍රියාවක් බවත් තරයේ පවසා සිටින්නෙමු.

ඊයේ දින දින සිදු වූ මෙම ත්‍රස්තවාදී ප්‍රහාරයට ලක් වී ජීවිතක්ෂයට පත් වූවන්ගේ පවුලේ උදවිය හා තුවාල ලැබූ සියලුම සහෝදර ජනතාව සමඟ ඔවුන්ගේ දුක බෙදා හදා ගන්නා ලෙසත් හැකි සෑම සහයෝගයක්ම ලබා දෙන ලෙසත් දිවයින පුරා ඇති සියළුම මුස්ලිම් දේවස්ථාන වල භාරකාර මණ්ඩල වලින් අප සංගමය ඉතා කාරුණිකව ඉල්ලා සිටිමු.

එහෙයින් පහත නිර්දේශිත කරුණු ඔස්සේ ක්‍රියාකරන ලෙස අප ඔබ සැමගෙන් ඉල්ලා සිටිමු.

1) මෙවන් කෲර ක්‍රියාවන්ට සම්බන්ධ ත්‍රස්තවාදීන් හඳුනා ගැනීම සඳහා ආරක්ෂක අංශයන්ට පූර්ණ සහය ලබාදෙන ලෙස සියලුම මුස්ලිම් වරුන්ගෙන් ඉල්ලා සිටිමු.

2) මෙම ත්‍රස්තවාදී ක්‍රියාවන්ට භාජනය වූ සියලුම ප්‍රදේශයන්හි ආගමික නායකයින් හා එක්ව, පීඩාවට පත්වූවන්ට අස්වැසිල්ලක් වන පරිදි සහය දක්වන ලෙස කාරුණිකව ඉල්ලා සිටිමු.

3) පීඩාවට පත්වූවන්ට තම ශ්‍රමයෙන් හා ධනයෙන් හැකි අන්දමින් උදව් උපකාර කරන ලෙස අප ඉල්ලා සිටිමු.

4) පීඩාවට පත්වූ ජනතාවට සහන සැලසීම සඳහා සියලුම මුස්ලිම් දේවස්ථාන තුළින් ධන පරිත්‍යාග රැස් කර නිසි අයුරින් බෙදාදීමට කටයුතු කරන මෙන් ඉල්ලා සිටිමු.

5) පීඩිත ජනතාව විසින් තමන්ගේ කම්පනයත් සමග යම්කිසි වේදනාකාරි අයුරින් ප්‍රකාශයක් හෝ හැසිරීමක් සිදු වූයේ නම් ඒ පිළිබඳව ඉතාමත් සාවධානව ඉවසීමෙන් කටයුතු කිරීම වැදගත්වේ

6) එම ත්‍රස්තවාදී ක්‍රියාව හෙළා දකිමින් සහ පීඩිත ජනතාවට අස්වැසිල්ලක් වන පරිදි බැනරයක් සෑම මුස්ලිම් දේවස්ථානයක් ඉදිරිපිට ම ප්‍රදර්ශනය කරන ලෙසත් ශෝකය ප්‍රකාශ කරමින් සුදු කොඩියක් ඔසවා තබන ලෙසත් ඉල්ලා සිටිමු.

7) එළඹෙන ඉරිදා දිනයේ දී කිතුනු සහෝදරයින් දේව මෙහෙයට සහභාගී වන අවස්ථාවේදී, ඔවුන්ට එරෙහිව සිදු කල මෙම ත්‍රස්තවාදී ප්‍රහාරය හෙළා දකිමින් සහ අපගේ සහෝදරත්වය විදහා දක්වමින් හැකි පමණින් එම දේවස්ථාන පරිශ්‍රයට එක්වන මෙන් ඉතා කාරුණිකව ඉල්ලා සිටිමු.

ස්තුතියි.

 

අෂ් ෂෙයික් එච්. උමර්දීන්

ලේකම්ප්‍රචාරක අංශය

සමස්ත ලංකා ඉස්ලාම් ආගමික වියතුන්ගේ සංගමය

 

මාධ්‍ය ප‍්‍රකාශය - 12.07.2017

2017 ජූලි 09 ඉරිදා දින මව්බිම පුවත්පතෙහි පල වූ ”ගුවන් විදුලි සංස්ථාවේ අයුතු වැඩ” සම්බන්ධවයි

2017 ජූලි 09 ඉරිදා දින මව්බිම පුවත්පතෙහි ජනමාධ්‍ය හා මුදල් අමාත්‍ය මංගල සමරවීර මහතා විසින් අනාවරණය කොට තිබෙන මෙගා හර්ට්ස් 102.1 නාළිකාව ඔස්සේ අන්තවාදි වැඩසටහන් පවත්වාගෙන යන්නේ යැයි සිදු කර ඇති ප‍්‍රකාශය සමස්ත ලංකා ජම්ඉයියතුල් උලමා සංගමය වන අප එය විශ්වාස නොකරන්නෙමු. එවැනි අසත්‍ය ප‍්‍රකාශයක් එතුමා සිදු කර ඇත්නම් එයද සමස්ත ලංකා ඉස්ලාමීය විද්වතුන්ගේ සංගමය වශයෙන් අප තරයේ ප‍්‍රතික්‍ෂ්ප කරන්නෙමු.

1956 සිට නොමිලේ විකාශය වු මෙම සේවාව මෑත කාලයේදී වාණිජ සේවාවක් ලෙසට පත් විය. නමුත් මුස්ලිම් ජනයා එම සේවාව ලබා ගැනීම සඳහා එයට දායක්වය ලබා දීම අප සියලු දෙනාටම නොරහසකි. එම වැඩසටහන පසු ගිය අවුරුදු 65 කට අධික කාලයකට වඩා පැවත ඒම ශී‍්‍ර ලංකා ගුවන් විදුලි සංස්ථාව මුස්ලිම් සමාජයට කළ මහගු සේවාවක් වේ. මෙම කාර්යභාරය නිසා මුස්ලිම් සමාජය සෑම දිනකම ශී‍්‍ර ලංකා ගුවන් විදුලි සංස්ථාවට හා රජයට තමන්ගේ තුතිය පුද කරයි. තවද මෙම සේවාව මගින් මුස්ලිම් සමාජයට පමණක් නොව අපගේ අන් ආගමික සහෝදරයින් හටද ප‍්‍රයෝජනය ගෙන දෙන වැඩසටහන සිදු කරන අතර ඔවුන් විසින් එය අගය කොට සැලකූ බව අපට අසන්නට ලැබුනි.

මෙකි වැඩසටහන් ඉතා සාර්ථකව පැවැත්වෙන කාලවකවාණුවක එය නවතා දැමීමට සිදුකරන කුමන්ත‍්‍රණයක් දෝ යන සැකය අපට මතු වී ඇත. එම නාලිකාවෙහි වැඩසටහන් සිදු වන්නේද රාජ්‍යය අනුග‍්‍රහය මගින්ය. අද රට තුල විවිධාකාර පුද්ගලයින් සිදු කරගෙන යන අන්තවාදී වැඩ කටයුතු වලට මෙම ප‍්‍රකාශය ඉමහත් රුකුලක් බවට පත් වී ඇත. තවද පාරම්පරිකව මෙම රට තුල සෑම ජාතියක්ම සහජීවනය හා සංහිඳියාව පැවත එන අතර තම තමන්ගේ අගමික වැඩ කටයුතු දියත් කරමින් සිටිති. තවද ශී‍්‍ර ලාංකේය මුස්ලිම් ජනතාව කිසිවිටක අන්තවාදයට හෝ ත‍්‍රස්තවාදයට සහයෝගය දක්වන්නේ ද නැත. මුස්ලිම් ප‍්‍රජාව මෙරට තුල සාමය සහජීවනය හා සංහිඳියාව ඇති කිරීමට කැප වී වැඩ කටයුතු කරගෙන සිටිති. අප ශී‍්‍ර ලාංකිකයන් ලෙස ජීවත් වී මෙම මාතෘ භූමියට කළ හැකි උපරිමය සිදු කිරීම අපගේ අපේක්‍ෂාව වේ. එම නිසා මෙවැනි ප‍්‍රකාශයන් සිදු කර රට තුල පවතින සහජීවනය හා සංහිඳියාවට තර්ජනයක් ඇති නොකිරීමට සෑම වගකිවයුත්තෙක්ම වග බලා ගත යුතු වේ.
මෙයට


අෂ් ෂේක් එම්.එම්.ඒ. මුබාරක්
මහ ලේකම්
සමස්ත ලංකා ඉස්ලාමීය විද්වතුන්ගේ සංගමය