Super User

Super User

Ref No. ACJU/PRO/2020/005

19.11.2020 (02.04.1442)

 

அஸ்ஸலாமு அலைக்கும் வரஹ்மதுல்லாஹி வபரகாதுஹூ


கொவிட் 19 வைரஸ் பரவல் காரணத்தினால் நாட்டில் ஏற்பட்டிருக்கும் அசாதாரண சூழ்நிலையில் சில பிரதேசங்களில் மஸ்ஜித்கள் மூடப்பட்டும், மற்றும் சில பிரதேசங்களில் ஜுமுஆ மற்றும் இதர நற்காரியங்களுக்காக மக்கள் ஒன்று கூடுவது மட்டுப்படுத்தப்பட்டுள்ளதையும் அறிவோம்.
இக்காலப்பகுதியில் ஜுமுஆ பிரசங்கம் செய்ய சந்தர்ப்பம் வழங்கப்படும் பிரதேசங்களில் அதனை உரிய முறையில் சுருக்கமாகவும், பயனுள்ளதாகவும் அமைத்துக் கொள்வதுடன், காலத்திற்கும் நேரத்திற்கும் பொருத்தமான விடயங்களை நினைவுபடுத்துவதாக இருப்பது மிக அத்தியாவசியமாகும்.


அவ்வகையில் கதீப்மார்கள் தங்களின் ஜுமுஆப் பிரசங்கங்களில் பின்வரும் விடயங்களை இணைத்துக் கொள்ளுமாறு அன்பாய் கேட்டுக் கொள்கின்றோம்.


1. தற்போது ஏற்பட்டிருக்கும் இந்த சோதனையிலிருந்து விடுபடுவதற்காக மக்களுக்கு தவ்பா, இஸ்திஃபார், சதகா ஆகியவற்றின் பக்கம் அதிக ஈடுபாடு கொள்ளத் தூண்டல்.



2. ஹூகூகுல்லாஹ் விடயத்தில் நாம் காட்டும் கரிசனை, ஹூகூகுல் இபாத் விடயத்திலும் காட்டப்படல் வேண்டும் என்ற விடயத்தை விளங்க வைப்பதோடு, மனிதனுடைய மானம், மரியாதை, மனதை புண்படுத்தல் போன்ற அல்லாஹ்வுடைய உதவியை தடுக்கக்கூடிய விடயங்களிலிருந்து மக்கள் தவிர்ந்து கொள்வதற்கான வழிகாட்டல்களை வழங்குதல்.

 

3. கொவிட் 19 வைரஸின் பரவலை கட்டுப்படுத்த அரசாங்கம் வழங்கும் வழிகாட்டல்களை அலட்சியம் செய்யாமல் பின்பற்றுவதின் கடமைப்பாட்டை தெளிவுபடுத்தல்.

 

4. முஸ்லிம் சமய பண்பாட்டலுவல்கள் திணைக்களம் மற்றும் வக்ப் சபையினால் வழங்கப்படும் வழிகாட்டல்கள் மற்றும் அறிவித்தல்களை மஸ்ஜித் நிர்வாகத்தினர் அலட்சியம் செய்யாது கண்டிப்பாக கடைப்பிடிக்க வேண்டுமென்ற பொறுப்பை தெளிவுபடுத்தல்.

 

5. பாடசாலைகள், மக்தப் வகுப்புக்கள், மத்ரசாக்கள் அனைத்தும் தற்போது விடுமுறை வழங்கப்பட்டிருப்பதால், பிள்ளைகளின் கல்வி விடயத்தில் பெற்றோர் மிகக் கவனம் செலுத்துவதுடன் இணையதளத்தினூடாக நடாத்தப்படும் வகுப்புக்களின் போது பெற்றோரின் நேரடி கண்காணிப்பை உத்தரவாதப்படுத்திக் கொள்ளவேண்டும் என்ற விடயத்தை தெளிவுபடுத்தல்.

 

6. ஊரடங்குச் சட்டம் அமுல்படுத்தப்பட்ட பகுதிகளில் வாழும் மக்கள், அன்றாட தேவைகளைப் பூர்த்தி செய்வதில் பாரிய கஷ்டங்களை முன்னோக்குகின்றனர். அவர்களின் இயல்பு வாழ்கை மீளத்திரும்ப துஆச் செய்வதுடன், முடியுமான உதவிகளையும் மேற்கொள்ள ஆர்வமூட்டல்.


7. மனித நேயமிக்க மக்களாகிய நாம் இன, மத வரையறைகளுக்கு அப்பால் தேவையுடையோரை இனங்கண்டு, அவர்களுக்கு எமது சதகாக்கள், ஹதியாக்களை வழங்குவதில் கூடுதல் கவனம் செலுத்தல் வேண்டும் என்று ஆர்வமூட்டல்.

 

8. இக்கால கட்டத்தில் கிடைக்கின்ற ஓய்வு நேரங்களை மக்கள் சமூக வலைத்தளங்கள் முதலானவற்றில் வீணாக கழிக்காமல் பயனுள்ள வகையில் அமைத்துக் கொள்வதற்கு தேவையான வழிகாட்டல்களை வழங்குதல்.

 

எல்லாம் வல்ல அல்லாஹ் எம்மனைவரையும் அவன் விரும்பும் பணிகளுக்காக கபூல் செய்வானாக!

 

வஸ்ஸலாம்

 

 

அஷ்-ஷைக் எம்.எஸ்.எம். தாஸீம்
பதில் பொதுச் செயலாளர்
அகில இலங்கை ஜம்இய்யத்துல் உலமா

 
2020.11.18

ஸ்ரீ லங்கா ராமாஞ்ஞ நிகாயவின் பிரதம மதகுரு சங்கைக்குரிய நாபான பிரேமசிரி தேரர் அவர்களின் மறைவினையிட்டு அகில இலங்கை ஜம்இய்யத்துல் உலமா தனது ஆழ்ந்த அனுதாபத்தினை தெரிவித்துக் கொள்கின்றது.


இன, மத வேறுபாடுகளுக்கு அப்பால், அனைத்து இலங்கையர்களின் முன்னேற்றத்துக்கும் ஒரு சிறந்த பௌத்த சமூகத்தை உருவாக்குவதற்கும் நீண்டகாலம் உழைத்த தேரர் அவர்கள் சகவாழ்வு, அமைதி, சகோதரத்துவம் மற்றும் நல்லிணக்கம் போன்றவற்றால் வளமான ஒரு தாய் நாட்டை உருவாக்க வேண்டும் என்று பெரிதும் ஆசைப்பட்டார்.


எல்லோராலும் பாராட்டத்தக்க அன்னாரின் தூய்மையான பணியை தொடர்வதும், அவரது இலக்கினை முன்னோக்கி அனைத்து இலங்கையர்களும் உறுதியுடன் செயல்படுவதும், அன்னாருக்குச் செலுத்தும் மிகப்பெரிய மரியாதையும் கௌரவமுமாகும்.


இலங்கை முஸ்லிம் சமூகமும் அகில இலங்கை ஜம்இய்யத்துல் உலமாவும் அன்னாரின் மறைவால் துயருற்றிருக்கும் பௌத்த சமூகத்திற்கு தமது ஆழ்ந்த இரங்கலை தெரிவித்துக் கொள்கின்றது.

 

இப்படிக்கு


அஷ்-ஷைக் எம்.எஸ்.எம் தாஸீம்
பொதுச் செயலாளர்
அகில இலங்கை ஜம்இய்யத்துல் உலமா

 

ACJU/FTW/2020/30-414

 

2020.11.16

1442.03.29

அஸ்ஸலாமு அலைக்கும் வறஹ்மத்துல்லாஹி வபறகாத்துஹூ


எல்லாப் புகழும் அல்லாஹ்வுக்கே, ஸலாத்தும், ஸலாமும் அவனின் இறுதித் தூதர் முஹம்மத் ஸல்லல்லாஹூ அலைஹி வஸல்லம் அவர்கள் மீதும் அவர்கள் கிளையார்கள், தோழர்கள் மீதும் உண்டாவதாக!


நாட்டின் பல பாகங்களிலிருந்தும் பலர், இக்கட்டான இச்சூழ்நிலையில் ஜுமுஆ தொழுகையை நிறைவேற்றும் விடயத்தில், அகில இலங்கை ஜம்இய்யத்துல் உலமாவின் வழிகாட்டலை கோரிய வண்ணம் உள்ளனர்.

 

ஜுமுஆத் தொழுகை ஏனைய பர்ளான தொழுகைகளை விட்டும் சிறப்பாலும் சட்டத்தாலும், அதனை விடும் பொழுது எச்சரிக்கையாலும் வித்தியாசப்பட்ட ஒரு தொழுகையாகும். ஏனைய தொழுகைகளைப் போன்றல்லாது மக்கள் அனைவரும் ஓர் இடத்தில் ஒன்று சேர்ந்து தொழ வேண்டும் என்பதே ஜுமுஆத் தொழுகை விடயத்தில் நபி ஸல்லல்லாஹூ அலைஹி வஸல்லம் அவர்களின் வழிகாட்டலாகும்.


ஜுமுஆ நிறைவேறுவதற்கு பல ஒழுக்கங்களும் நிபந்தனைகளும் உள்ளன. அந்நிபந்தனைகளில் ஊரில் வசிக்கும் நிரந்தரக் குடியிருப்பாளர்களில் குறிப்பிட்ட எண்ணிக்கையினர் அங்கு சமுகமளித்திருப்பதும் ஒன்றாகும். என்றாலும், குறித்த எண்ணிக்கை விடயத்தில் ஆதாரங்களின் அடிப்படையில் மார்க்க அறிஞர்களுக்கு மத்தியில் கருத்து வேறுபாடுகள் நிலவுகின்ற போதிலும், ஷாபிஈ மற்றும் ஹன்பலி மத்ஹப்களைச் சேர்ந்த அறிஞர்கள் உட்பட இன்னும் பல அறிஞர்கள் 40 நபர்கள் சமுகமளித்திருப்பது கட்டாயம் என்றும் ஹனபி மற்றும் மாலிகி மத்ஹப்களில் அதைவிட குறைவான எண்ணிக்கையுடையோர் சமுகமளித்திருப்பதைக் கொண்டும் ஜுமுஆ நிறைவுறும் என்றும் கூறுகின்றனர்.


இதுபற்றிய விரிவான பத்வா 2017.11.02 ஆம் திகதி ACJU/FTW/2017/029-306 ஆம் இலக்கத்தில் அகில இலங்கை ஜம்இய்யத்துல் உலமாவின் பத்வாப் பிரிவு வெளியிட்டுள்ளது. https://acju.lk/fatwa-bank-ta/recent-fatwa/item/1757-2019-10-11-05-26-46


ஏற்கனவே, 2020.06.16 ஆம் திகதியும், 2020.11.05 ஆம் திகதியும் அகில இலங்கை ஜம்இய்யத்துல் உலமாவினால் கொடுக்கப்பட்ட வழிகாட்டல்களின்படி, ஷாபிஈ மத்ஹபின் மிக உறுதியான கருத்தை முன்வைத்து 40 நபர்கள் இல்லாதபட்சத்தில் ழுஹ்ரை தொழுது கொள்ள வேண்டும் என்று மக்களிடம் வேண்டுகோள் விடுக்கப்பட்டிருந்ததை யாவரும் அறிந்ததே.


எனினும், நாட்டில் தற்போது ஏற்பட்டிருக்கும் அசாதாரண சூழ்நிலையில் மஸ்ஜிதில் 25 நபர்கள் மட்டுமே ஒரே நேரத்தில் ஒன்று சேர முடியுமென்ற கட்டுப்பாடு உள்ளதாலும் தொடர்ந்து இந்நிலை நீடிப்பதால் மக்களுக்கு ஜுமுஆ விடயத்தில் பொடுபோக்கு ஏற்பட்டுவிடுமென்ற அச்சம் பலராலும் உணரப்படுவதாலும் அகில இலங்கை ஜம்இய்யத்துல் உலமா, மக்களுக்கு கீழ்வரும் வழிகாட்டலை வழங்குகிறது.

 

1. நாற்பது நபர்களை விடக் குறைந்த எண்ணிக்கையுடனும் ஜுமுஆ நிறைவேறும் என்ற ஷாபிஈ மத்ஹபைச் சேர்ந்த ஒருசில இமாம்கள் கருத்துத் தெரிவித்திருந்தாலும், ஷாபிஈ மத்ஹபின் பத்வாவுக்குரிய கருத்தின் பிரகாரம் அவ்வாறான நிலையில் ழுஹ்ர் தொழுவது கட்டாயமாகும். இந்தக் கருத்துவேறுபாடின் காரணமா ஜுமுஆத் தொழுது கொள்வது விரும்பத்தக்கதாகும் என்ற அடிப்படையில் ஜுமுஆத் தொழுது விட்டு ழுஹ்ரையும் தொழுது கொள்ளல்.

 

2. நாற்பது நபர்களை விடக் குறைந்த எண்ணிக்கையான 12 நபர்களைக் கொண்டும் ஜுமுஆ நிறைவேறும் என்று மாலிகி மத்ஹபிலும், இமாம் தவிர்ந்து மூன்று நபர்களைக் கொண்டும் ஜுமுஆ நிறைவேறுமென்று ஹனபி மத்ஹபிலும் கூறப்பட்டுள்ளதால், அவர்களின் மத்ஹபில் கடைபிடிக்க வேண்டிய சகல நிபந்தனைகளையும் கடைபிடித்து அம்மத்ஹபைப் பின்பற்றி ஜுமுஆத் தொழுதல். அதன்பின்னர் ஷாபிஈ மத்ஹபின் அடிப்படையில் ழுஹ்ர் தொழுது கொள்வது விரும்பத்தக்கதாகும்.


எமது நாட்டின் தலைசிறந்த ஆலிம்களில் ஒருவரான அல்-ஆலிம் அப்துஸ் ஸமத் (மக்தூமீ, பஹ்ஜீ) றஹ்மத்துல்லாஹி அலைஹி அவர்களும் இதேவிதமாக தீர்ப்பு வழங்கியுள்ளதும் குறிப்பிடத்தக்கதாகும்.1

 

குறிப்பு : மேல் சொல்லப்பட்ட வழிகாட்டலின் மேலதிக விளக்கங்களை உங்கள் பகுதி ஆலிம்களிடம் பெற்றுக் கொள்ளுமாறு கேட்டுக் கொள்கின்றோம்.

 

எல்லாம் வல்ல அல்லாஹ்வே நன்கு அறிந்தவன்.

 


அஷ்ஷைக் எம்.எல்.எம். இல்யாஸ்
செயலாளர் - பத்வாக் குழு 
அகில இலங்கை ஜம்இய்யத்துல் உலமா

 

அஷ்ஷைக் ஐ.எல்.எம் ஹாஷிம் ஸூரி

மேற்பார்வையாளர் - பத்வாக் குழு 
அகில இலங்கை ஜம்இய்யத்துல் உலமா

 

அஷ்ஷைக் எம்.ஐ.எம் ரிஸ்வி முப்தி
தலைவர்
அகில இலங்கை ஜம்இய்யத்துல் உலமா

 

 

 

 

____________________________________________________________________________

 1.  பார்க்க நூல் : (ழவ்உஷ் ஷிர்அஹ் பிஅததில் ஜுமுஆ- பக்கம்: 11, 12, 13)

 

10.11.2020 (23.03.1442)


தற்போது உலக நாடுகளை அச்சுறுத்திக் கொண்டிருக்கும் கொரோனா வைரஸினால் பலர் பாதிக்கப்பட்டுள்ளதை யாவரும் அறிவோம். பாதிக்கப்பட்ட அனைவரும் அவசரமாக இந்நோயிலிருந்து குணமடைய வேண்டுமென அகில இலங்கை ஜம்இய்யத்துல் உலமா பிரார்த்திக்கின்றது.


இவ்வைரஸின் பாதிப்பால் நாட்டில் பலரின் இயல்பு வாழ்க்கை பாதிக்கப்பட்டிருக்கின்றது. குறிப்பாக தனிமைப்படுத்தல் ஊரடங்குச் சட்டம் அமுல்படுத்தப்பட்டுள்ள பொலிஸ் பிரிவுகளுக்குட்பட்டவர்களில் நாளாந்தம் உழைத்து தமது அன்றாட தேவைகளை பூர்த்தி செய்யக்கூடியவர்கள் பெரிதும் பாதிக்கப்பட்டிருக்கின்றார்கள். இவ்வாறானவர்களை அடையாளங் கண்டு இன மத பேதமின்றி அவர்களுக்கு தம்மால் முடிந்த உதவிகளை செய்ய முன் வரவேண்டுமென அகில இலங்கை ஜம்இய்யத்துல் உலமா அனைவரையும் கேட்டுக் கொள்கின்றது.


“அயலவன் பசித்திருக்க தான் மாத்திரம் வயிறு நிரம்ப புசிப்பவன் உண்மை விசுவாசியல்ல” என நபி ஸல்லல்லாஹூ அலைஹி வஸல்லம் அவர்கள் கூறியுள்ளார்கள். உணவளிப்பது என்பது இஸ்லாத்தில் பெரும் நன்மையை ஈட்டித்தரும் செயலாகும். அதேபோன்று சதகாக்கள் சோதனைகளை விட்டும் எம்மைப் பாதுகாக்கும் என்பதும் நபி மொழியாகும். எனவே, இவ்வாறான சந்தர்ப்பங்களில் அதிகமாக சதகாக்களில் ஈடுபடுவது மிகச் சிறந்த அமலாகும்.


அகில இலங்கை ஜம்இய்யத்துல் உலமாவின் மாவட்ட/ பிரதேசக் கிளைகள், மஸ்ஜித் சம்மேளனங்கள், மஸ்ஜித்கள் மற்றும் ஏனைய அமைப்புக்கள் தத்தம் பிரதேசங்களில் வாழும் மக்களை இனங்கண்டு உதவிகளை செய்யவதோடு, பக்கத்து மாவட்டங்களில் பாதிக்கப்பட்டிருக்கும் மக்களுக்கும் தங்கள் உதவிக் கரங்களை நீட்டுமாறு ஜம்இய்யா மிக அன்பாக வேண்டிக் கொள்கின்றது.


மேலும், இவற்றுக்கான ஏற்பாடுகளைச் செய்கின்றவர்கள் அரசாங்கத்தின் சட்டங்களை மதித்து, உரிய அனுமதிகளைப் பெற்று ஏற்பாடுகளை முன்னெடுக்குமாறும் அகில இலங்கை ஜம்இய்யத்துல் உலமா வேண்டிக் கொள்கின்றது.


கொவிட் 19 வைரஸின் காரணமாக ஊரடங்குச் சட்டம் பிறப்பிக்கப்பட்டிருக்கும் பிரதேசங்களும், அப்பிரதேசங்களில் வாழ் மக்களுக்கு உதவிகளை மேற்கொள்ள வேண்டிய ஜம்இய்யாக் கிளைகளின் தகவல்களும் பின்வரும் அட்டவணையில் குறிப்பிடப்பட்டுள்ளன. அதனடிப்படையில் குறிப்பிட்ட ஜம்இய்யாக் கிளைகள் உலர் உணவுப் பொதிகளை வழங்குதல் போன்ற தம்மாலான உதவிகளை வழங்கி நன்மைகளை பெற்றுக் கொள்வதோடு ஏனைய பிரதேசங்களில் உள்ளவர்களுக்கும் உதவிகளை மேற்கொள்வதற்கான ஏற்பாடுகளைச் செய்வதை ஜம்இய்யா எதிர்பார்க்கின்றது.


எனவே, மேற்கூறப்பட்ட அடிப்படையில் உதவிகளை மேற்கொள்ள முன்வருபவர்கள் ஜம்இய்யாவின் சமூக சேவைக் குழு ஒருங்கிணைப்பாளரான அஷ்-ஷைக் எம்.எச்.எம். பவாஸ் 0777571876 அவர்களுடன் தொடர்பு கொள்வதன் மூலம் தேவையான வழிகாட்டல்களைப் பெற்றுக் கொள்ளலாம் என்பதையும் இத்தால் குறிப்பிட்டுக் கொள்கின்றோம்.


உதவித் தேவைப்படும் பிரதேசங்கள் மற்றும் உதவிகளை மேற்கொள்ளும் ஜம்இய்யாவின் மாவட்ட மற்றும் பிரதேசக் கிளைகளின் விபரங்கள்

 

கொவிட் 19 நோயின் காரணத்தினால் ஊரடங்கில் உள்ள பிரதேசங்கள்

உதவிகளை மேற்கொள்வதற்காக பிரித்துக் கொடுக்கப்பட்ட பகுதிகள்/ஜம்இய்யா கிளைகள்
மாவட்டம்  ஊரடங்கு அமுலில் உள்ள பகுதிகள் 
கொழும்பு 




மட்டக்குளிய, முகத்துவாரம், புளுமென்டோல், கொட்டாஞ்சேனை.  மடவளை பிரதேசம்
கிரேண்ட்பாஸ், கரையோர பிரதேச பொலிஸ் பிரிவு, ஆட்டுப்பட்டித் தெரு.  கண்டி நகரம்
மாளிகாவத்தை, தெமட்டகொட

 

அக்குரணை, கல்ஹின்னை


வெல்லம்பிட்டிய
வாழைத்தோட்டம்
பொரலை.
கம்பஹா

வத்தளை, பேலியகொட,

 

மாத்தறை மாவட்டம், ஹம்பாந்தோட்டை மாவட்டம்

கடவத்தை, ராகம,
நீர்கொழும்பு
பமுணுகம
ஜா-எல, சப்புகஸ்கந்த
களுத்துறை ஹொரணை, இங்கிரிய பொலிஸ் பிரிவு மற்றும் வேகட மேற்கு கிராம சேவையாளர் பிரிவு  காலி மாவட்டம்
கேகாலை 
மாவனெல்ல
மாத்தளை மாவட்டம், பலாங்கொடை நகரம்.
ருவன்வெல்ல
குருநாகல் குளியாப்பிட்டிய பொலிஸ் பிரிவு குருணாகலை மாவட்டம்
மட்டக்களப்பு  வாழைச்சேனை பொலிஸ் பிரிவு காத்தானகுடி, ஏறாவூர்
     
குறிப்பு: கொழும்பு மாவட்டக் கிளை பொதுவாக அனைத்து பிரதேசங்களிலும் செயற்படும் 

 

All Ceylon Jamiyyathul Ulama
AC NO 1901005000
Commercial Bank
IBU Branch

 

All Ceylon Jamiyyathul Ulama
AC NO 0010112110014
Amana Bank
Main Branch

 

 

 அஷ்-ஷைக் கே. அப்துர் ரஹ்மான் (பஹ்ஜி) 
செயலாளர் - கிளைகள் விவகாரக் குழு 
அகில இலங்கை ஜம்இய்யத்துல் உலமா 

 

அஷ்-ஷைக் ஏ.எல்.எம். ரிழா
உப தலைவர்
அகில இலங்கை ஜம்இய்யத்துல் உலமா

 

 


09.11.2020 (22.03.1442)

 

கொவிட்-19 தொற்றினால் மரணிப்பவர்களின் உடல்கள் தகனம் செய்யப்படல் வேண்டும் என்று சுகாதார துறையினரின் தீர்மானம் அறிவிக்கப்பட்டபோது, குறித்த வைரஸ் தாக்கத்தினால் மரணமடையும் முஸ்லிம்களது ஜனாஸாக்களை நல்லடக்கம் செய்வதற்கான அனுமதி முஸ்லிம்களுக்கு வழங்கப்பட வேண்டும் என்ற கோரிக்கையை உரிய தரப்பினருக்கு அகில இலங்கை ஜம்இய்யத்துல் உலமா ஏனைய அமைப்புகளோடு சேர்ந்து முன்வைப்பதில் முன்னின்று உழைத்ததை அனைவரும் அறிவர். அந்தவகையில் எமது வேண்டுகோள் கவனத்திற் கொள்ளப்பட்டு, தகனமும் அடக்கமும் என்ற, இருவிதமான அனுமதிகள் கிடைக்கப் பெற்றன. ஆயினும் பின்னர், மீண்டும் அது தகனம் மட்டும் என்ற அடிப்படையில் அரச வர்த்தமானியில் சட்டபூர்வமாக்கப்பட்டது.


அன்று முதல் இன்று வரையில், அகில இலங்கை ஜம்இய்யத்துல் உலமா, துறைசார்ந்தோர், சிவில் அமைப்பினர் மற்றும் அரசியல் பிரமுகர்கள் அனைவரையும் ஒன்றிணைத்து முஸ்லிம் ஜனாசாக்களை அடக்கம் செய்வதற்கான அனுமதியைப் பெறும் நோக்கில் தொடர்ந்து உச்சகட்ட முயற்சிகளை மேற்கொண்டு வருகின்றது.


இது வரை மேற்கொள்ளப்பட்ட முயற்சிகள்:


1. 24.03.2020 ஜனாதிபதி, பிரதமர், கெரோனா பாதுகாப்புப் பிரிவு ஆகிய தரப்பினருக்கு உலக சுகாதாரத் திணைக்களத்தின் அறிவுறுத்தலை அமுல் படுத்த வேண்டி ஒரு கோரிக்கை முன்வைக்கப்பட்டது.


2. 31.03.2020 ஜனாதிபதி, பிரதமர், சுகாதார அமைச்சர், கொரோனா பாதுகாப்புப் பிரிவின் தலைமையகம் மற்றும் டாக்டர் அனில் ஜயசிங்க முதலானோருக்கு மற்றுமொரு வேண்டுகோள் முன்வைக்கப்பட்டது.


3. 01.04.2020 அன்று தகனம் தொடர்பிலான அதிருப்தியைத் தெரிவித்து ஓர் ஊடக அறிக்கையை ஜம்இய்யா வெளியிட்டது.


4. 10.05.2020 சுகாதார அமைச்சருக்கு ஜனாஸாக்களை அடக்கம் செய்ய அனுமதிக்க வேண்டி ஒரு வேண்டுகோள் கடிதம் அனுப்பப்பட்டது.


5. 05.06.2020 மரணித்தவர்களை அடக்கம் செய்வது சம்பந்தமாக ஓர் அறிக்கை விடப்பட்டது.


6. 22.06.2020 ஜனஸா அடக்கம், தகனம் தொடர்பிலான மார்க்கத் தெளிவு கொடுக்கப்பட்டது.


7. 05.07.2020 சுகாதாரச் சேவைகள் பணிப்பாளர் டாக்டர் அனில் ஜயசிங்க அவர்களுக்கு ஒரு கடிதம் அனுப்பிவைக்கப்பட்டது.


அகில இலங்கை ஜம்இய்யத்துல் உலமாவுடன் சேர்ந்து, இவ்விவகாரமாக சிவில் அமைப்பினர் ஆளும் கட்சி, எதிர்க்கட்சி எனப் பல தரப்பினரும் தம்மாலான முயற்சிகளில் இன்று வரை தொடர்ந்தேர்ச்சியாக ஈடுபட்டு வருகின்றனர். எமது இந்த முயற்சிகளை அல்லாஹ் வீணாக்கப்போவதில்லை நாம் உறுதியாக நம்புகிறோம். இன்ஷா அல்லாஹ்.


ஜனாதிபதி சட்டத்தரணி அலி சப்ரி அவர்கள், பாராளுமன்றம் செல்ல முன்பிருந்தே இதற்கான பூரண முயற்சிகளில் ஈடுபட்டு வந்துள்ளதைப் போன்று இன்றும் அமைச்சரவையில் பிரதான இடம் வகிக்கும் நீதி அமைச்சர் என்ற வகையிலும் தனிப்பட்ட முறையிலும் இந்த விவகாரத்தில் அகில இலங்கை ஜம்இய்யத்துல் உலமாவுடன் இணைந்து ஈடுபாடு காண்பித்து வருகிறார் என்பது இங்கு ஈண்டு குறிப்பிடத்தக்கதாகும்.


சுகாதார துறைசார்ந்தோர்கள் சிலரின் அச்சம் அல்லது சந்தேகமே அடக்கம் செய்யும் அனுமதியைப் பெற்றுக் கொள்ள தடையாக இருந்து வருகின்றது என்பதையும் இந்நிலைப்பாடு தொடர்பில் தனக்கு அதிருப்தி இருக்கின்றது என்பதையும் 2020.11.08 ஆந் திகதி கொழும்பு கொல்லுபிட்டி ஜும்ஆப்பள்ளியில் நடைபெற்ற விஸேட வைபவத்தின் போது, மிகத் தெளிவாக கருத்து தெரிவித்தார் என்பது யாவரும் அறிந்ததே.
அரச மருத்துவ அதிகாரிகள் சங்கத்தின் (GMOA) வழிகாட்டலுக்கமைய மையவாடிகள், மண்பரிசோதனை செய்யப்பட வேண்டும் என்பதனால், இன்று (2020.11.09) குப்பியாவத்த மையவாடியில் மண்பரிசோதனை செய்யப்பட்டுள்ளது; அது தொடர்பான அறிக்கையை அமைச்சரவையில் இன்று சமர்ப்பிக்கப்படவுள்ளது என்பதும் குறிப்பிடத்தக்கது.


வஸ்ஸலாம்.


அஷ்-ஷைக் எம்.எஸ்.எம். தாஸிம்
பதில் பொதுச் செயலாளர்
அகில இலங்கை ஜம்இய்யத்துல் உலமா

 

 

 

 

ACJU/FRL/2020/21-238
2020.11.05

1442.03.17

அஸ்ஸலாமு அலைக்கும் வறஹ்மத்துல்லாஹி வபறகாத்துஹூ


எமது நாட்டில் இரண்டாவது தடவையாகவும் கொரோனா வைரஸ் தீவிரமாகப் பரவிவரும் இந்நிலையில் சுகாதார அதிகாரிகளினால் 25 நபர்களுக்கு மேல் மஸ்ஜித்களில் ஒன்றுசேரக் கூடாது என்ற ஒரு வழிகாட்டல் பிறப்பிக்கப்பட்டுள்ளதை நாம் அறிவோம். ஏற்கனவே அகில இலங்கை ஜம்இய்யத்துல் உலமாவினால் 2020.06.16 ஆம் திகதி “கோவிட் 19 அசாதாரண நிலையில் ஜுமுஆ நடாத்துவது தொடர்பான மார்க்க வழிகாட்டல்” என்ற தலைப்பில் வெளியிடப்பட்ட அறிக்கையில், இலக்கம் 2 இல் பின்வருமாறு குறிப்பிடப்பட்டுள்ளது.


“ஜுமுஆக் கடமை நிறைவேறுவதற்கு நிரந்தரக் குடியிருப்பாளர்கள், பருவ வயதை அடைந்த 40 ஆண்கள் சமுகமளித்திருப்பது ஷாபிஈ மத்ஹபின்படி கட்டாயம் என்பதால், நிரந்தரக் குடியிருப்பாளர்கள் 40 ஆண்கள் ஒவ்வொரு ஜுமுஆவிலும் இருப்பதை உறுதி செய்துகொள்ள வேண்டும். இடநெருக்கடி அல்லது சுகாதார அதிகாரிகளின் அனுமதியின்மை அல்லது வேறு காரணங்களினால், 40 பேரைவிட குறைவான எண்ணிக்கையிருப்பின் அவர்கள் ழுஹ்ர் தொழுது கொள்ள வேண்டும்.” https://acju.lk/news-ta/acju-news-ta/item/1964-19


இந்நாட்டு முஸ்லிம்கள் மற்றும் ஆலிம்கள் பல வருடகாலங்களாக இவ்வடிப்படையிலேயே ஜுமுஆவுடைய இந்த அடையாளத்தைப் பாதுகாத்து வந்துள்ளார்கள். அல்ஹம்துலில்லாஹ், அகில இலங்கை ஜம்இய்யத்துல் உலமாவும் இதனையே வலியுறுத்தி வந்துள்ளது.


நாட்டில் நிலவும் இந்த அசாதாரண நிலைமை எதிர்காலத்தில் நீடிக்காமல் அவசரமாக நீங்கி, நல்ல நிலைமை உண்டாகி, ஜுமுஆவை வழமை போன்று நிறைவேற்ற அல்லாஹூ தஆலா அனுகூலம் புரிய வேண்டும் என்றும், அல்லாஹூ தஆலா உங்களது கவலைகளுக்கு பூர்த்தியான கூலிகளைத் தந்தருள வேண்டும் என்றும் பிரார்த்திக்கின்றோம்.


வஸ்ஸலாம்.


அஷ்-ஷைக் எம்.எல்.எம் இல்யாஸ்
செயலாளர், பத்வாக் குழு
அகில இலங்கை ஜம்இய்யத்துல் உலமா

 

 

 

 


2020.11.05 (1442.03.17)


எமது நாட்டில் இரண்டாவது தடவையாகவும் கொரோனா வைரஸ் முன்பு இல்லாதது போன்று தீவிரமாகப் பரவி நாடு மிகவும் ஆபத்தான நிலையில் இருப்பதாக சுகாதார அதிகாரிகள் குறிப்பிடுகின்றனர். இந்த நோய் பரவாமல் இருப்பதற்கு அரசாங்கம் பல வகையான முயற்சிகளை மேற்கொண்டு வருவதை நாம் அறிவோம். இது விடயமாக அரசாங்கம் பொதுமக்களுக்கு வழங்கும் வழிகாட்டல்களை பின்பற்றி இந்த நோய் இலங்கையில் மீண்டும் பரவாமல் இருப்பதற்கு நாம் ஒவ்வொருவரும் ஒத்துழைப்பு வழங்குதல் வேண்டும்.


இவ்வுலகில் அனைத்து விடயங்களும் அல்லாஹ்வின் நாட்டப்படியே நடைபெறுகின்றன என்பதை ஒவ்வொரு முஃமினும் நம்புவது அவசியமாகும். பொதுவாக அனைத்து நோய்களுக்குரிய நிவாரணியை அல்லாஹூ தஆலா இறக்கி வைத்திருக்கின்றான். அல்லாஹ் எந்த நோயையும் அதற்குரிய நிவாரணியை அருளாமல் இறக்குவதில்லை என நபி ஸல்லல்லாஹூ அலைஹி வஸல்லம் அவர்கள் கூறியதாக அபூ ஹூரைரா றழியல்லாஹூ அன்ஹூ அவர்கள் அறிவிக்கின்றார்கள்.


அத்துடன், குறித்த வைரஸ் தாக்கத்திலிருந்;து அனைவரையும் பாதுகாத்துக் கொள்ள பின்வரும் வழிகாட்டல்களை பின்பற்றுமாறு அகில இலங்கை ஜம்இய்யத்துல் உலமா சகல முஸ்லிம்களையும் வேண்டிக் கொள்கின்றது.


1. ஊரடங்கு அமுல்படுத்தப்பட்டுள்ள இடங்களில் வாழும் மக்கள் அதன் சட்டங்களை முழுமையாக பின்பற்றி நடத்தல். அத்துடன் கொரோனா வைரஸ் பரவுவதை தடுக்கும் நோக்கில் எம்மனைவரதும் நலனுக்காகவே ஊரடங்கு சட்டம் அமுல்படுத்தப்பட்டுள்ளது என்பதை விளங்கி பொறுப்புணர்வுடன் நடந்துக் கொள்ளல். (2020.04.06 வெளியிடப்பட்ட அறிக்கை : https://acju.lk/downloads-ta/download-posters-ta/file/244-2020-04-06-15-00-00 )


நபி ஸல்லல்லாஹூ அலைஹி வஸல்லம் அவர்கள் கூறினார்கள். தொழுநோய் இருக்கும் ஊருக்குள் நுழைய வேண்டாம், அந்த நோய் ஏற்பட்ட ஊரிலிருந்து வெளியேரவும் வேண்டாம். (ஸஹீஹூல் புகாரி: 5729, ஸஹீஹூல் முஸ்லிம்: 2219)


2. சுகாதார அதிகாரிகளினால் வழங்கப்பட்டுள்ள அறிவுறுத்தல்களை முழுமையாக பின்பற்றி நடத்தல். குறிப்பாக முகக் கவசம் அணிதல், கைகளை அடிக்கடி கழுவிக் கொள்ளுதல் மற்றும் 1 மீட்டர் இடைவெளியை பேணுதல் போன்ற விடயங்களை கண்டிப்பாக பின்பற்றி செயற்படல்.
நபி ஸல்லல்லாஹூ அலைஹி வஸல்லம் அவர்கள் கூறினார்கள். தொழுநோய் உள்ளவர்கள் ஆரோக்கியமானவர்களிடமிருந்து விலகியிருத்தல் வேண்டும். (ஸஹீஹூல் புகாரி: 5771, ஸஹீஹூல் முஸ்லிம்: 2221)


3. நாட்டில் ஊரடங்கு அமுல்படுத்தப்படாத பகுதிகளில் உள்ளவர்கள் அத்திவசிய தேவைகளுக்கே அன்றி வெளி இடங்களுக்கு செல்வதையும், பொது இடங்களில் ஒன்றுகூடுவதையும் தவிர்த்துக் கொள்ளல்.


நபி ஸல்லல்லாஹூ அலைஹி வஸல்லம் அவர்கள் கூறினார்கள். தன்னையும் மற்றவர்களையும் பாதுகாப்பதற்காக வீட்டில் இருப்பவர்கள் அல்லாஹ்வின் பாதையில் இருக்கின்றனர். (முஸ்னத் அஹ்மத்)


4. ஐவேளைத் தொழுகைகளை வீட்டில் உரியநேரத்தில் ஜமாஅத்தாக நிறைவேற்றிக் கொள்ளல். (2020.05.09 வெளியிடப்பட்ட அறிக்கை : https://acju.lk/downloads-ta/download-posters-ta/file/261-2020-05-24-14-27-19 )

 

5. மஸ்ஜித்களின் விடயங்களில் வக்ப் சபை வழங்கி வருகின்ற வழிகாட்டல்களை முழுமையாக பின்பற்றி நடத்தல்.

 

6. இச்சோதனைகள் நீங்குவதற்காக ஏலவே அறிவுறுத்தியது போல ஒரு மாத காலத்திற்கு குனூத் அந்-நாஸிலாவை ஐவேளை தொழுகைகளில் ஓதுவதோடு, பாவமான காரியங்களிலிருந்து விலகி நடந்து, துஆ, திக்ர், இஸ்திஃபார், நோன்பு மற்றும் ஸதகா போன்ற நல்லமல்களில் ஈடுபட்டு, நாட்டுக்காகவும் நாட்டு மக்களுக்காகவும் பிரார்த்தித்தல். (குனூத் அந்-நாஸிலா பற்றிய விரிவான விளக்கம் 2020.10.26 ஆம் திகதி வெளியிடப்பட்ட அறிக்கையில் குறிப்பிடப்பட்டுள்ளது :https://acju.lk/news-ta/acju-news-ta/item/2005-covid-19)


அத்துடன் பின்வரும் துஆவை அடிக்கடி ஓதிவருதல்:

"‏ اللّٰهُمَّ إِنِّي أَعُوذُ بِكَ مِنَ الْبَرَصِ وَالْجُنُونِ وَالْجُذَامِ وَمِنْ سَيِّئِ الأَسْقَامِ ‏"‏


(பொருள் : யா அல்லாஹ் வெண்குஷ்டம், பைத்தியம், தொழுநோய் மற்றும் மோசமான நோய்களில் இருந்து உன்னிடம் நான் பாதுகாப்பு தேடுகிறேன். (அபூதாவுத் 1554)

 

7. ஆலிம்கள் மேற்குறிப்பிட்ட விடயங்கள் தொடர்பில் பொது மக்களுக்கு விழிப்புணர்வையும் மார்க்க ரீதியான வழிகாட்டல்களையும் அடிக்கடி வழங்கி ஞாபகமூட்டல்.


எல்லாம் வல்ல அல்லாஹ் இது போன்ற கொடிய நோய்களிலிருந்து நம் தாய் நாட்டு மக்களையும் முழு உலக மக்களையும் பாதுகாப்பானாக. ஆமீன்.

 


அஷ்ஷைக் எம்.எஸ்.எம் தாஸீம்
உதவிப் பொதுச் செயலாளர்
அகில இலங்கை ஜம்இய்யத்துல் உலமா

 

குறிப்பு: மேற்படி வழிகாட்டல்களை மஸ்ஜித்கள் மூலம் பொது மக்களுக்கு தொடர்ந்து மூன்று தினங்களுக்கு வாசித்துக் காட்ட ஏற்பாடு செய்யுமாறு ஜம்இய்யாவின் கிளைகளையும் மஸ்ஜித் நிரவாகிகளையும் அன்பாகக் கேட்டுக் கொள்கின்றோம்.

 

30.10.2020 / 12.03.1442

அகிலத்துக்கோர் அருட்கொடையாக வந்துதித்த நபி முஹம்மத் ஸல்லல்லாஹூ அலைஹி வஸல்லம் அவர்களின் பிறந்த தினத்தை முன்னிட்டு ஒரு சிறப்புச் செய்தியை வெளியிடுவதில் அகில இலங்கை ஜம்இய்யத்துல் உலமா பெருமகிழ்ச்சி அடைகின்றது.


ரபிஉனில் அவ்வல் மாதம் மிகவும் முக்கியத்துவம் வாய்ந்த ஒரு மாதமாகும். மனித சமூகத்துக்கு அருளாகவும், அனைவரையும் நேர் வழியின் பக்கம் வழி நடாத்தவும் வந்துதித்த நபி முஹம்மது ஸல்லல்லாஹூ அலைஹி வஸல்லம் அவர்கள் பிறந்த மாதம் இது.


'ரபீஉன்” என்றால் வசந்தம் என்பது பொருள். வசந்த காலம் பூமிக்கு பசுமையையும், அழகையும் கொண்டு வருவது போல 'வசந்தம்' எனப் பொருள்படும் 'ரபீஉனில் அவ்வலில்” பிறந்த நபி முஹம்மத் ஸல்லல்லாஹூ அலைஹி வஸல்லம் அவர்கள் மனித சமூகத்திற்கு சுபீட்சத்தையும், வெற்றியையும், மகிழ்ச்சியையும், அமைதியையும், மன நிறைவையும் கொண்டுவந்தார்கள்.


இன்றைய உலகின் ஆன்மீகத் தேவையை நிறைவேற்றுவதற்கும் மற்றும் உலக அமைதி, சமாதானத்தை நிலைநாட்டுவதற்கும் அவசியமான போதனைகளும் வழிகாட்டல்களும் அன்னார் கொண்டு வந்த தீனுல் இஸ்லாத்தில் நிறைவாக உண்டு.


இறைத்தூதர் நபி முஹம்மத் ஸல்லல்லாஹூ அலைஹி வஸல்லம் அவர்களை அளவிலா அன்புடனும் நேசத்துடனும் மிகவும் உணர்வுபூர்வமாக நினைவு கூருகின்ற இந் நன்னாளில் அவர்கள் போதித்த மனித நேயம், அன்பு, கருணை, பிறர் நலன் பேணல், நல்லிணக்கத்துடன் வாழ்தல் முதலான பண்புகளை கடைப்பிடித்து வாழ நாம் திட சங்கற்பம் பூணுவோமாக.


நடைமுறையில் இத்தினங்களில் முஸ்லிம்கள் பல்வேறு நற்காரியங்களில் ஈடுபடுவர் என்ற வகையில் அனைவரும் பரஸ்பர புரிந்துணர்வுடன் சமூக ஒற்றுமையைப் பேணி, சகோதரத்துவ வாஞ்சையுடன், அடுத்தவர்களின் உணர்வுகளை மதித்தும் நடந்து கொள்ளுமாறு அன்புடன் வேண்டிக் கொள்கின்றோம்.


கொவிட்-19 தொற்றின் காரணமாக நம் நாட்டு மக்களில் பலர் பொருளாதார நெருக்கடிக்கு முகங்கொடுத்திருக்கின்ற சூழலில் இந்த பொன்னான நாளில் தேவையுடைய மக்களுக்கு இன, மத பாகுபாடுகள் இன்றி உதவிக்கரம் நீட்டுமாறும் அனைவரையும் தயவாய் வேண்டிக் கொள்கின்றோம். மேலும் பயங்கர கொரோனா தொட்டின் ஆபத்து நம் நாட்டிலிருந்தும் உலகிலிருந்தும் விரைவில் நீங்கி எல்லோருக்கும் சுபீட்சமான வாழ்வு பிறக்க பிரார்த்தனைகளில் ஈடுபடுமாறும் எல்லோரையும் கேட்டுக் கொள்கின்றோம்.


நமது தாய் மண்ணில் சாந்தியும், சமாதானமும், நல்லுறவும் நல்லிணக்கமும் ஓங்க வேண்டும் என இன்றைய நன்னாளில் எல்லாம் வல்ல அல்லாஹூத் தஆலாவிடம் பிரார்த்திக்கின்றோம்.

 

முப்தி எம்.ஐ.எம் ரிஸ்வி
தலைவர்
அகில இலங்கை ஜம்இய்யத்துல் உலமா