19.06.2019
மக்தப் தொடர்பாக பொதுபல சேனா அமைப்பின் பிரச்சாரத்தை ஜம்இய்யா வன்மையாக கண்டிக்கின்றது


இலங்கை வாழ் முஸ்லிம் சிறார்களின் நல்லொழுக்கத்திற்கும், நற்பண்புகளுக்கும் வழிவகுக்கக் கூடிய மக்தப் கல்வியை பயங்கரவாதத்திற்கும், தீவிரவாதத்திற்கும் துணை போகக் கூடியதாக சித்தரித்து பொதுபல சேன அமைப்பினால் ஊடகங்களுக்கு அனுப்பப்பட்டிருக்கும் அறிக்கையை அகில இலங்கை ஜம்இய்யத்துல் உலமா வன்மையாகக் கண்டிக்கின்றது. உண்மைக்குப் புறம்பான இத்தகைய வதந்திகளைப் பரப்புவோர் விடயத்தில் கவனமாக இருக்குமாறு ஜம்இய்யா அனைவரையும் வேண்டிக் கொள்கின்றது.


முஸ்லிம்கள் இந்நாட்டில் ஆயிரம் வருடங்களுக்கு மேலான வரலாற்றைக் கொண்டவர்கள். வரலாறு நெடுகிலும் முஸ்லிம் சிறார்களின் நல்லொழுக்கத்திற்கும், நற்பண்புகளுக்கும் வழிவகுக்கக் கூடிய, அவர்களை நாட்டின் நற்பிரஜைகளாக வாழச் செய்யக் கூடிய கல்வி மஸ்ஜித்களில் வழங்கப்பட்டு வருகின்றன.


இத்தகைய வரலாற்றுப் பின்புலம் கொண்ட மஸ்ஜித் கல்விக் கூடங்களுக்கான பாடத்திட்ட முறையை முஸ்லிம் சமயப் பண்பாட்டலுவல்கள் திணைக்களம் கடந்த 2010ஆண்டு அறிமுகம் செய்தது. குறித்த பாடத்திட்டத்தைத் தழுவிய பாட நூற்களை அமைத்து அதற்குத் தேவையான ஒழுங்குவிதிகளையும் அறிமுகம் செய்து அந்தப் பள்ளிக் கூடங்களை மக்தப் எனும் பெயரில் அகில இலங்கை ஜம்இய்யத்துல் உலமா புனரமைப்புச் செய்தது. அதனை ஒவ்வொரு மஸ்ஜிதும் தமது மேற்பார்வையின் கீழ் நடாத்தும் வண்ணம் ஜம்இய்யா வழிகாட்டி வருகின்றது.


மக்தப் என்பது எழுதும் இடம், படிக்கும் இடம் எனும் கருத்துக்களைக் கொடுக்கும் அரபுச் சொல்லாகும். குறித்த செயற்பாடுகள் அங்கு நடைபெறுவதால் அச்சொல் வழங்கப்படுகிறது.


மக்தப் மாணவர்களிடமிருந்து பெறப்படும் மாதாந்தக் கட்டணங்கள் ஆசிரியர்களின் மாதாந்த கொடுப்பனவு மற்றும் மாணவர்களின் கல்வி சார்ந்த நடவடிக்கைளுக்கே உபயோகிக்கப்படுகின்றன. அதனை அவ்வந்த மஸ்ஜித்களின் மக்தபுக்கான பிரதிநிதிகள் பொறுப்பேற்றுச் செய்கின்றனர். அது வல்லாமல் ஜம்இய்யாவிற்கோ அல்லது ஜம்இய்யா சார்ந்த நடவடிக்கைகளு;ககோ அது சொந்தமானதல்ல என்பதையும் ஜம்இய்யா பொறுப்புடன் கூறிக்கொள்கின்றது.


எனவே எவ்வித உண்மையும் இல்லாத இனக் குரோதங்களை தூண்டி விடக் கூடிய பொய்யான பிரசாரங்களை செய்து இந்நாட்டின் அமைதிக்கும் சமாதானத்திற்கும் பங்கம் விளைவிக்காமல் நடந்து கொள்ளுமாறு ஜம்இய்யா அனைவரையும் கேட்டுக் கொள்கின்றது.

 

அஷ்-ஷைக் முர்ஷித் முழப்பர்
உதவிச் செயலாளர்
அகில இலங்கை ஜம்இய்யத்துல் உலமா

 14.06.2019 (10.10.1440)


பொசன் பண்டிகை தொடர்பில் முஸ்லிம்களுக்கான சில வழிகாட்டல்கள்


எமது நாடு பல்லினத்தவர்களும் சமயத்தவர்களும் வாழும் ஒரு நாடு என்ற வகையில் பிற மத சகோதரர்களோடு நடந்துகொள்ள வேண்டிய ஒழுங்குகள் பற்றிய மார்க்க நிலைப்பாடுகளை நாம் அறிந்து செயல்படுவது காலத்தின் தேவையாகும்.


இந்தவகையில் எதிர்வரும் பொசன் பண்டிகைத் தினங்களில் கீழ்வரும் ஒழுங்குகளை கவனத்திற் கொள்ளுதல் வேண்டும் என அகில இலங்கை ஜம்இய்யதுல் உலமா நாட்டு முஸ்லிம்களை வேண்டிக் கொள்கிறது.


1. நாட்டின் தற்போதைய நிலைமையைக் கவனத்திற் கொண்டு சமூக நல்லிணக்கத்தையும் சகவாழ்வையும் மீளக் கட்டியெழுப்பும் ஒரு தருணமாக இந்த பொசன் காலப்பகுதியை அமைத்துக் கொள்ளுதல் வேண்டும்.

2. இப்பண்டிகைக்கு இடையூறு இல்லாத வகையில் எமது செயற்பாடுகளை அமைத்துக் கொள்வதோடு மனிதாபிமான ரீதியில் அவர்களுடன் ஒத்துழைப்புடன் நடந்துகொள்ள வேண்டும்.

3. பொசன் தினத்தில் ஆடு, மாடு, கோழி அறுப்பதற்கும், அவற்றை விற்பனை செய்வதற்கும் அரசாங்கம் தடை விதித்திருப்பதால் இவற்றை கட்டாயமாக தவிர்ந்து கொள்ள வேண்டும். பிற மதத்தவர்களின் மத உணர்வுகளை மதிப்பதாகவும் இது அமையும்.

4. இன நல்லிணக்கத்தையும் சகவாழ்வையும் கட்டியெழுப்புகின்ற எமது அனைத்து செயற்பாடுகளிலும் மார்க்க வரையறைகள் பேணப்படுவதை உத்தரவாதப்படுத்திக் கொள்ள வேண்;டும்.

5. இது தொடர்பான மேலதிக தெளிவுகளுக்கு ஜம்இய்யாவின் பத்வாப் பிரிவை தொடர்புகொள்ளுமாறும் ஜம்இய்யா வேண்டிக் கொள்கிறது. 0117-490420
வஸ்ஸலாம்


அஷ்-ஷைக் எச். உமர்தீன்
செயலாளர் - பிரச்சாரக் குழு
அகில இலங்கை ஜம்இய்யத்துல் உலமா

2019.06.12 ஆம் திகதி புதன் கிழமை தெஹிவளை முஹியித்தீன் ஜுமுஆ மஸ்ஜிதில் நடைபெற்ற இலங்கையிலுள்ள மத்ரஸாக்களின் அதிபர்கள், நிர்வாகிகளுக்கான மாநாட்டின் தீர்மானங்கள்

ஓவ்வொரு மதத்தினரும் தத்தம் மதத்திற்கான மதகுருமார்களையும் போதகர்களையும் உருவாக்குவதற்கென  தனியான கலாபீடங்களையும் பயிற்சி நிலையங்களையும் கொண்டிருப்பது போலவே இஸ்லாமியப் போதகர்களையும் மதத் தலைவர்களையும் உருவாக்கும் நோக்குடன் கடந்த 150 வருட காலமாக இலங்கையில் இயங்கி வரும் கலா பீடங்களே அரபு மத்ரசாக்களாகும்.

இலங்கையின் முதல் அரபுக் கல்லூரி 1870 ஆம்; ஆண்டு ஸாவியதுல் மக்கிய்யத்துல் பாஸிய்யத்துல் ஷாதுலிய்யா என்ற பெயரில்; காலி தலாபிடியிலும் 1884ஆம் ஆண்டு அல் மத்ரசதுல் பாரி வெலிகமயிலும் 1894 ஆம் ஆண்டு பஹ்ஜதுல் இப்றாஹீமிய்யா காலியிலும் 1931ஆம் ஆண்டு கபூரிய்யா அரபுக் கல்லூரி மகரகமயிலும் 1954 ஆம் ஆண்டு கிழக்கிலங்கை அரபுக் கல்லூரி அட்டாளைச் சேனையிலும்; 1955 ஆம் ஆண்டு காத்தான்குடி அல் பலாஹ் அரபுக் கல்லூரியும் 1959ஆம் ஆண்டு மகளிருக்கான கல்எலிய மகளிர் முஸ்லிம் அரபுக் கல்லூரியும் ஆரம்பிக்கப்பட்டன.

அரபு இஸ்லாமிய கற்கை நெறிகள் இலங்கையின் கல்வித் திட்டத்திலும் மிக ஆரம்ப காலம் முதலே உள்வாங்கப்பட்டுள்ளமை இங்கு ஈண்டு குறிப்பிடத்தக்கதாகும். அரச பாடசாலை மட்டத்திலும் கல்வியற் கல்லூரிகள், பல்கலைக் கழக மட்டங்களிலும் அரபு மொழி உட்பட இஸ்லாமிய கற்கை நெறிகள் காலாகாலமாக போதிக்கப்பட்டு வருகின்றன. 1940களின் ஆரம்பத்திலேயே பேராதனைப் பல்கலைக்கழகத்தின் அரபு இஸ்லாமிய நாகரிகத் துறை ஸ்தாபிக்கப்பட்டது.

பாடசாலை மட்டத்தில் அரபு இஸ்லாம் பாடங்களைப் போதிப்பதற்காக மௌலவி ஆசிரியர்கள் கடந்த பல தசாப்தகாலமாக அரசினால் நியமிக்கப்பட்டு வந்துள்ளனர்.

இஸ்லாத்தின் அடிப்படை மூலாதாரங்கள் அனைத்தும் அரபு மொழியில் இருக்கின்ற காரணத்தினால் மத்ரசாக்களில் அரபு மொழியும் ஏனைய இஸ்லாமிய கலைகளும் போதிக்கப்படுகின்றன. அவற்றோடு சிங்களம் ஆங்கிலம் ஆகிய மொழிகளும் கற்பிக்கப்படுகின்றன. பெரும்பாலான மத்ரசாக்களில் மாணவர்கள் கல்விப் பொதுத் தராதர சாதாரண மற்றும் உயர் தரப் பரீட்சைகளுக்கும் தயார் செய்யப்படுகின்றனர்.

2013ஆம் ஆண்டு முதல் அரச அங்கீகாரம் பெற்ற அரபு இஸ்லாமிய பாடத்திட்டத்தை அடிப்படையாகக் கொண்ட இரண்டு பரீட்சைகள் பரீட்சைத் திணைக்களத்தினூடாக நடாத்தப்பட்டு வருகின்றன. அந்த வகையில் அரச அங்கீகாரம் பெற்ற பாடத்திட்டங்களை அடிப்படையாகக் கொண்டு மத்ரசாக்களில் பாடப்போதனைகள் நடைபெறுகின்றன.

நாட்டுக்கும் சமூகத்துக்கும் சமயத்துக்கும் சேவை செய்யக் கூடிய நல்லொழுக்கமும் பண்பாடும் கொண்ட இறையடியார்களையும் நற்பிரஜைகளையும் உருவாக்கும் மகத்தான பணியிலேயே அரபு மத்ரசாக்கள் ஈடுபட்டு வருகின்றன. குறிப்;பாக அண்மைக் கால இன முரண்பாடுகளைக் கவனத்திற்கொண்டு சமூக நல்லிணக்கத்தையும் சக வாழ்வையும் கட்டியெழுப்பத் தேவையான வழிகாட்டல்களையும் மத்ரசாக்கள் மாணவர்களுக்கு வழங்குகின்றன என்பதையும் ஈண்டு குறிப்பிட விரும்புகின்றோம். 

 

குறித்த மாநாட்டில் பின்வரும் தீர்மானங்கள் மேற்கொள்ளப்பட்டன.

  1. 2019 ஏப்ரல் மாதம் 21 ஆம் திகதி நடைபெற்ற பயங்கரவாத தாக்குதலை இம்மாநாடு வன்மையாகக் கண்டிக்கின்றது.
  2. இந்த தாக்குதல்களில் உயிரிழந்தவர்களின் குடும்பங்களுக்கு ஆறுதல் கூறுவதுடன் காயமுற்றவர்கள் விரைவில் குணமடைய இம்மாநாடு பிரார்த்திக்கின்றது.
  3. சாந்தி, சமாதானம், சகவாழ்வு ஆகிய உயர் குணங்களை ஊக்குவிக்கும் இஸ்லாத்துக்கும் பயங்கரவாதத்துக்கும் எவ்வித தொடர்பும் இல்லை என்பதை இம்மாநாடு உறுதியாகக் கூறிக்கொள்கின்றது.
  4. இந்த தாக்குதல்களுக்கு நேரடியாக மற்றும் மறைமுகமாக காரணமாக இருந்தவர்கள் அனைவருக்கும் உயர்ந்தபட்ச தண்டனையை வழங்க வேண்டும் என்று இம்மாநாடு கேட்டுக் கொள்கின்றது.
  5. குருநாகல், புத்தளம், கம்பஹா ஆகிய மாவட்டங்களில் முஸ்லிம்களுக்கெதிராக மேற்கொள்ளப்பட்ட இனவாதத் தாக்குதலையும் இம்மாநாடு வன்மையாகக் கண்டிக்கும் அதே நேரம் அதில் ஈடுபட்டவர்களுக்கு உரிய தண்டனைகளை வழங்கவேண்டுமென்றும் உரிய அதிகாரிகளிடம் இம்மாநாடு வேண்டிக்; கொள்கின்றது.
  6. பயங்கரவாத தாக்குதலுடன் சம்பந்தப்பட்டவர்களைக் குறுகிய காலத்தில் கைது செய்து நாட்டின் பாதுகாப்பை உறுதி செய்ய உரிய நடவடிக்கைகளை மேற்கொண்ட நாட்டின் ஜனாதிபதி, பிரதமர், அரசாங்கம், பாதுகாப்பு தரப்பினர்களுக்கு இம்மாநாடு நன்றிகளைத் தெரிவித்துக் கொள்கின்றது. மேலும் பயங்கரவாதத் தாக்குதலை அடுத்து கைது செய்யப்பட்டுள்ள அப்பாவிகளை அவசரமாக விடுவிக்க அரசாங்கம் ஆவண செய்ய வேண்டுமெனவும் இம்மாநாடு கேட்டுக் கொள்கின்றது.
  7. மத்ரஸாக்களில் உள்ள பாடத்திட்டங்கள் அனைத்தும் இந்நாட்டின் சட்டதிட்டங்களுக்கு உட்பட்டது என்பதையும் அவற்றில் பயங்கரவாதத்தை தூண்டும் அல்லது போதிக்கும் எத்தகைய விடயங்களும் இல்லை என்பதையும் உறுதியாகவும் பொறுப்புடனும் இம்மாநாடு கூறிக் கொள்கின்றது.
  8. இலங்கையில் பயங்கரவாதத்தையும்; அதன் சிந்தனையையும் வேரோடு இல்லாதொழிக்க மத்ரஸாக்கள் முனைப்புடன் செயற்படும் என்பதற்கு இம்மாநாடு பொறுப்புடன் உறுதிமொழியளிக்கின்றது.
  9. இந்நாட்டில் மத்ரஸாக்கள் பற்றி காணப்படும் தப்பபிப்பிராயங்களைக் கலைந்து இனங்களுக்கு மத்தியில் புரிந்துணர்வையும் சகவாழ்வையும் ஏற்படுத்த மத்ரஸாக்கள் முன்நின்று செயற்படும் என்பதையும் இம்மாநாடு பிரகடனப்படுத்துகின்றது.
  10. ஆயிரம் வருட கால வரலாற்றில் முஸ்லிம்கள் இந்நாட்டின் நலன்விரும்பிகளாகவும் சமாதானத்தை பேணுபவர்களாகவும் ஐக்கியத்தோடு வாழ விரும்புவர்களாகவும் இருந்து வந்துள்ளார்கள் என்பதையும் இவ்வாறான தீவிரவாத செயற்பாடுகளுக்கு துணைபோகவில்லை என்பதையும் கூறிக் கொள்ள விரும்புவதுடன் எதிர்காலத்திலும் அவ்வாறே முஸ்லிம்கள் இருப்பார்கள் இருப்போம் என்பதையும் இம்மாநாடு உறுதியாகக் கூறிக் கொள்கின்றது.
  11. நாட்டின் ஊடகங்கள் செய்திகளை வழங்குவதில் பொறுப்புணரச்சியுடன் நடந்து கொள்வதுடன் ஊடக தர்மத்தை பேண வேண்டும் என இம்மாநாடு வேண்டிக் கொள்கின்றது.
  12. இன ஐக்கியத்தையும் சமூக நல்லிணக்கத்தையும் தொடர்ந்தும் இந்நாட்டில் பேணுவதற்கு அரசாங்கம், பாராளுமன்ற உறுப்பினர்கள், மதத் தலைவர்கள், சிவில் சமூகம் இன மத மொழி வேறுபாடின்றி தொடர்ந்தும் அயராது உழைக்க வேண்டும் என்று இம்மாநாடு வேண்டிக் கொள்கின்றது.

அரபுக் கல்லூரிகளின் அதிபர்கள் மற்றும் நிருவாகிகளுக்கான மாநாடு

12.06.2019ஆம் திகதி அகில இலங்கை ஜம்இய்யத்துல் உலமா, முஸ்லிம் பண்பாட்டலுவல்கள் திணைக்களம் மற்றும் அகில இலங்கை அரபுக் கல்லூரிகள் ஒன்றியம் ஆகியன இணைந்து அரபுக் கல்லூரிகளின் அதிபர்கள் மற்றும் நிறுவாகிகளுடனான மாநாடொன்று தெஹிவளை ஜுமுஆ மஸ்ஜிதில் நடை பெற்றது.

அஷ்-ஷைக் பவ்ஸான் அவர்களின் கிராத்துடன் ஆரம்பமான இந்நிகழ்வின் வரவேற்புரையை அகில இலங்கை ஜம்இய்யத்துல் உலமாவின் உப தலைவர்களின் ஒருவரான அஷ்-ஷைக் ரிழா அவர்கள் நிகழ்த்தினார்கள். அதன் போது அரபுக் கல்லூரிகளின் அவசியம் தொடர்பாக பல விடயங்களை முன் வைத்தார். அதனைத் தொடர்ந்து நிகழ்வின் தலைமை உரையை எமது உப தலைவர்களின் ஒருவரான முப்தி எம்.யூசுப் ஹனீபா அவர்கள் நிகழ்த்தினார்கள். தனதுரையில் தற்போதைய நிலையில் முஸ்லிம்கள்   சோதனைகளை எவ்வாறு எதிர் கொள்ள வேண்டும் என்பதை சுட்டிக் காட்டினார்.

அதனைத் தொடர்ந்து அகில இலங்கை ஜம்இய்யத்துல் உலமாவின் நிறைவேற்றுக் குழு உறுப்பினர்களில் ஒருவரான அஷ்-ஷைக் இல்யாஸ் அவர்களின் உரை இடம் பெற்றது. இதனை போது அரபுக் கல்லூரிகளின் செயற்பாடுகள் தொடர்பாக பல விடயங்களையும், வழிகாட்டல்களையும் குறிப்பிட்டார். அதனைத் தொடர்ந்து தெஹிவளை பிரதேச உயர் பொலிஸ் அத்தியச்சகர் அவர்களின் உரை இடம் பெற்றது. இவ்வுரையில் நாட்டின் தற்போதைய நிலை தொடர்பாக விளக்கப்பட்டதுடன் தொடர்ந்து அரபுக் கல்லூரிகள் எவ்வாறான முறையில் தமது நடவடிக்கைகளை மேற் கொள்ள வேண்டும் என்பது தொடர்பாகவும் கலந்துரையாடினார். அந்நிகழ்வினை தொடர்ந்து நிகழ்வின் முதல் கட்ட நிகழ்வுகள் நிறைவு பெற்றன.

மீண்டும் இரண்டாம் கட்ட நிகழ்வுகள் நிறைவேற்றுக் குழு உறுப்பினர் பாழில் அவர்களின் நிகழ்வுடன் ஆரம்பமானது. இதன் போது தற்போதைய நிலையில் அரபுக் கல்லூரிகள் சட்டரீதியாக கையாள வேண்டிய விடயங்கள் தொடர்பாக விரிவாக கலந்துரையாடப்பட்டது. இந்நிகழ்வினை தொடர்ந்து அனைத்து அரபுக் கல்லூரிகளினதும் பிரதிநிதிகள் எட்டு பகுதிகளைக பிரிக்கப்பட்டு ஆலோசனைகளும், கலந்துரையாடல்களும் நடை பெற்றது இந்நிகழ்வுடன் பகல் உணவிற்காக இடை வேளை வழங்கப்பட்டு இரண்டாவது அமர்வு நிறைவு பெற்றது.

மீண்டும் அஸர் தொழுகையுடன் நிகழ்வின் மூன்றாம் கட்ட நிகழ்வு அகில இலங்கை ஜம்இய்யத்துல் உலமாவின் உதவிச் செயலாளர் அஷ்-ஷைக் முர்ஷித் அவர்களின் தற்போதைய நிலையில் சகவாழ்விற்காக அரபுக் கல்லூரிகளின் பங்களிப்பு எனும் தலைப்பிலான உரையுடன் ஆரம்பமானது. இந்நிகழ்வின் போது இஸ்லாம் தொடர்பான பிழையான கருத்துக்களை போக்குவதில் அரபுக் கல்லூரிகளின் பங்களிப்பு எவ்வாறு அமைய வேண்டும் என்பது தொடர்பாக மிகவும் விரிவாக கலந்துரையாடப்பட்டது. இதில் அகில இலங்கை ஜம்இய்யத்துல் உலமாவின் தேசிய வலையமைப்புத் திட்டம் தொடர்பாக வலியுறுத்தப்பட்டது.

அதனைத் தொடர்ந்து நிறைவேற்றுக் குழு உறுப்பினர் அஷ்-ஷைக் உமர்தீன் அவர்களின் உரை இடம் பெற்றது. இதன் போது இஸ்லாம் தொடர்பான விடயங்களுக்கான விளக்கங்களை பிற சமூகத்தினருக்கு அகில இலங்கை ஜம்இய்யத்துல் உலமா எவ்வாறான செயற்பாடுகள் மூலமாக வழங்கி வருகின்றது என்பதை குறிப்பிட்டார். அத்துடன் நிகழ்வின் மூன்றாம் கட்ட அமர்வு நிறைவு பெற்றது.

மஃரிப் தொழுகையை தொடர்ந்து மாநாட்டின் நான்காவது கட்ட நிகழ்வு அகில இலங்கை ஜம்இய்யத்துல் உலமாவின் கௌரவத் தலைவர் முப்தி எம்.ஐ.எம் அவர்களின் உரையுடன் ஆரம்பமானது. அவர் தனதுரையில் இன்றைய நிலைமையில் முஸ்லிம்கள் ஒற்றுமையுடன் ஒரே அணியில் பயணத்தை தொடர்வதினூடாகவே இவ்வாறான சவால்களை எம்மால் வெற்றி கொள்ள முடியும் எனவும் எமது உரிமைகளை நாம் முன்னோர்கள் போன்று இன்றும் பாதுகாக்க முன்வர வேண்டும். இவையனைத்தையும் நிதானமாகவும் முறைகளை பேணியுமே நாம் முன்னெடுக்க வேண்டும் எனவும் குறிப்பிட்டார்.

இதனைத் தொடர்ந்து இன்றைய மாநாட்டின் பிரகடனம் அகில இலங்கை ஜம்இய்யத்துல் உலமாவின் உதவிச் செயலாளர் அஷ்-ஷைக் தாஸிம் அவர்களினால் வாசிக்கப்பட்டது. இத்துடன் நிகழ்வுகள் யாவும் கப்பாரதுல் மஜ்லிஸுடன் இனிதே நிறைவு பெற்றது. இந்நிகழ்வில் சுமார் 950 இற்கும் மேற்பட்டவர்கள் கலந்து சிறப்பித்தனர்.

 

ஊடக அறிக்கை

செப் 22, 2019

 08.06.2019


ஊடக அறிக்கை


தற்போது நாட்டில் நிலவிவரும் அசாதாரண சூழ்நிலையில் கடந்த 05.06.2019 ஆம் திகதி நடைபெற்ற மகா சங்கத்தினரின் ஊடகவியலாளர் மாநாட்டில் நாட்டிலுள்ள சிங்கள, தமிழ், முஸ்லிம் உள்ளிட்ட அனைத்து இன மக்களும் ஒன்றிணைந்து செயற்பட வேண்டும் என்று கோரிக்கை விடுத்து, முஸ்லிம் மக்களுடன் எமக்கு எவ்வித எதிர்ப்பும், குரோதமும் வைராக்கியமும் இல்லை, நாம் ஒன்றாகவே வாழ்ந்து வந்தோம் என்று குறிப்பிடப்பட்டிருப்பதானது மிகவும் வரவேற்கத்தக்க, பாராட்டத்தக்க விடயமாகும்.


இந்நாட்டின் சமாதானத்திற்காகவும் இனங்களுக்கிடையிலான ஐக்கியத்திற்காகவும் வரலாறு நெடுகிலும் மகா சங்கத்தினர் மேற்கொண்டுவந்துள்ள பங்களிப்பு மெச்சத்தக்கதாகும். எமது தாய் நாட்டின் ஒற்றுமைக்காகவும் அபிவிருத்திக்காகவும் இணைந்து செயற்பட முஸ்லிம் சமூகமும் உலமாக்களும் அன்றுபோல் என்றும் தயாராக இருப்பதை இந்நாட்டு மக்களுக்கும் அரசுக்கும் நாம் கூறிக்கொள்ள விரும்புகின்றோம்.


பயங்கரவாதம், தீவிரவாதம், இனவாதம் போன்ற எமது தாய்நாட்டை பலவீனப்படுத்தும் தீய சக்திகள் எவ்வடிவில் வந்தாலும் அதனை நாம் அனைவரும் இன, மத பேதமின்றி இலங்கையர்களாக ஒரே அணியில் நின்று எதிர்த்து முறியடிக்க முன்வர வேண்டும்.


எல்லாம் வல்ல அல்லாஹ் நம்நாட்டில் இனங்களுக்கிடையே பரஸ்பர புரிதலையும் ஒற்றுமையையும் ஏற்படுத்தி, நாட்டில் அமைதியையும் சமாதானத்தையும் அபிவிருத்தியையும் ஏற்படுத்த பிரார்த்திக்கின்றோம்.
வஸ்ஸலாம்.


அஷ்-ஷைக் எம்.எம்.எம் முர்ஷித்
உதவிச் செயலாளர்
அகில இலங்கை ஜம்இய்யத்துல் உலமா

 

30.05.2019 (24.09.1440)

அப்பாவிகளைக் காட்டிக் கொடுப்பதும் மஸ்ஜித்களை இடிப்பதும் அல்லாஹ்வின் கோபத்துக்குரிய செயலாகும்

நாட்டில் நிலவுகின்ற அசாதாரண சூழ்நிலையை மையப்படுத்தி அவசரகால சட்டம் பிறப்பிக்கப்பட்டிருக்கும் இந்நிலையில் பலர் சந்தேகத்தின் பெயரில் கைதுசெய்யப்பட்டு விசாரணைக்குட்படுத்தப்பட்டு வருவது யாவரும் அறிந்ததே. இந்நிலையில் குற்றவாளிகள் பற்றிய விபரத்தை பாதுகாப்பு பிரிவினரின் கவனத்திற்கு கொண்டு வருகின்ற கடப்பாடு நம்மனைவருக்கும் உண்டு. அதே வேளையில் சந்தர்ப்பத்தைப் பயன்படுத்தி தனிப்பட்ட விருப்பு வெறுப்புகளுக்காகவும் முரண்பாடுகளுக்காகவும் அப்பாவி மக்களைக் காட்டிக் கொடுப்பது மிகப்பெரும் அநீதியும் பாவமுமாகும் என்பதை அனைவரும் மனதில் கொள்ளல் வேண்டும்.

மேலும், பள்ளிவாயல்கள் எந்த சாரார் நிர்வகிப்பதாக இருந்தாலும் அவை அல்லாஹ்வின் இல்லங்களாகும். சட்டத்தை கையிலெடுத்து ஒரு சாரார் மறு சாராரின் மஸ்ஜிதில் கைவைப்பது சட்ட முரணான செயல் மாத்திரமன்றி மார்க்க விரோத செயலுமாகும். அல்லாஹ்வின் கோபத்தையும் சாபத்தையும் கொண்டுவரும் மிகப் பயங்கரமான செயலுமாகும்.

ஒரு சாராரின் செயற்பாடுகளில் பிரச்சினை இருப்பதாகக் காணுகின்றபோது அவற்றுக்கான தீர்வை முறையாகவும் பண்பாடாகவும் தேவைப்படின் சட்ட ரீதியாகவும் பெற்றுக் கொள்ள முயல்வதே சரியான நிலைப்பாடாகும்.

இவ்விடயங்களைக் கவனத்திற்கொண்டு முஸ்லிம் சமூகம் விழிப்புடனும்> கவனமாகவும்> நிதானமாகவும் நடந்துகொள்ள வேண்டுமென்று அகில இலங்கை ஜம்இய்யத்துல் உலமா சகலரையும் கேட்டுக்கொள்கின்றது.

வஸ்ஸலாம்!

 

 

அஷ்-ஷைக் எம்.எம்.எம். முர்ஷித்

உதவிச் செயலாளர்

அகில இலங்கை ஜம்இய்யத்துல் உலமா

 

 

 2019.05.28 (1440.09.22)

நோன்புப் பெருநாள் தொடர்பான வழிகாட்டல்கள்


நாட்டில் நிலவும் அசாதாரண சூழ்நிலையைக் கவனத்திற் கொண்டு அகில இலங்கை ஜம்இய்யத்துல் உலமா முஸ்லிம்களுக்கு பின்வரும் வழிகாட்டல்களை வழங்குகின்றது.


1. கொழும்பு பெரிய பள்ளிவாசல், அகில இலங்கை ஜம்இய்யத்துல் உலமா, முஸ்லிம் சமய, பண்பாட்டலுவல்கள் திணைக்களம் ஆகியன இணைந்து பிரகடனப்படுத்தும் தினத்திலேயே சகல முஸ்லிம்களும் பெருநாளைக் கொண்டாடுமாறு வேண்டிக் கொள்கின்றோம்.


2. நாட்டின் நிலைமையைக் கருத்திற் கொண்டு பெருநாள் தொழுகையை மைதானங்கள், திடல்கள் முதலான பொது இடங்களில் நடத்துவதைத் தவிர்க்குமாறும் மஸ்ஜித்களில் மாத்திரம் தொழுகைகளை நடத்துமாறும் வேண்டிக் கொள்கின்றோம்.


3. பெருநாள் தொழுகைக்காக வருகை தரும்போது வாகனங்களில் வருவதை முற்று முழுதாகத் தவிர்ந்து கொள்ளல் வேண்டும். தவிர்க்க முடியாத இக்கட்டான கட்டத்தில் வாகனங்களில் வருகை தருபவர்கள் ஒவ்வொரு வரும் தனித்தனி வாகனங்களில் வருகை தராமல் பலர் இணைந்து ஒரு வாகனத்தில் வருதல் வேண்டும்.

 

4. பள்ளிவாசல் நிர்வாகத்தினர் தத்தமது பிரதேச பொலிஸ் நிலையங்களுக்கூடாக மஸ்ஜித்களின் பாதுகாப்பை உறுதிசெய்து கொள்ளவும்.


5. பாதிக்கப்பட்ட மக்களின் நிலையைக் கவனத்திற் கொண்டு எதிர்வரும் பெருநாளை அடக்கமாக அனுஷ்டிக்குமாறும் பெருநாளுக்காக தயாரிக்கப்படும் உணவுப் பண்டங்களை சகோதர மதத்தவர்களுடனும், ஏழைகளுடனும் பகிர்ந்து கொள்ளுமாறும் வீண்விரயத்தையும் ஆடம்பரத்தையும் தவிர்த்து பாதிக்கப்பட்ட மக்களுக்காக உதவிக் கரம் நீட்டுமாறும் வேண்டுகின்றோம்.

 

6. பெருநாளுக்காக பொருட்கள் மற்றும் துணிமணிகள் வாங்குவதற்காக பெண்கள் செல்வதை முடிந்தளவு தவிர்த்து ஆண்களே அவற்றை மேற்கொள்ளுமாறு வலியுறுத்துகின்றோம்.

 

எல்லாம் வல்ல அல்லாஹ் எமது ரமழான் கால வணக்க வழிபாடுகளையும் நற்காரியங்களையும் ஏற்று அங்கீகரித்து நமது நாட்டில் அமைதியையும் சமாதானத்தையும் மலரச் செய்வானாக!
வஸ்ஸலாம்!

 

அஷ்-ஷைக் எச். உமர்தீன்
செயலாளர் - பிரச்சாரக் குழு
அகில இலங்கை ஜம்இய்யத்துல் உலமா

முஸ்லிம்கள் சார்பாக நிவாரண நிதி கையளிப்பு   

கடந்த 21.04.2019 ஆம் திகதி நாட்டில் நடாத்தப்பட்ட மிலேச்சத்தனமான தாக்குதல்களால் பாதிக்கப்பட்ட மக்களுக்கான நிவாரண நிதி அகில இலங்கை ஜம்இய்யத்துல் உலமாவினால் சேகரிக்கப்பட்டு நேற்று 26.05.2019 கையளிக்கப்பட்டது.

அகில இலங்கை ஜம்இய்யத்துல் உலமாவின் தலைவர் முஃப்தி எம்.ஐ.எம். ரிஸ்வி அவர்களின் தலைமையிலான குழுவினர் காடினல் மல்கம் ரஞ்சித் அவர்களை அவரின் உத்தியோகபூர்வ இல்லத்தில் சந்தித்து இந்நிவாரண நிதியை வழங்கி வைத்தனர். 

இதன் போது நாட்டின் தற்போதைய நிலைகள் பற்றியும், சமூகங்களுக்கிடையிலான நல்லுறவைக் கட்டியெழுப்ப எவ்வாறான முயற்சிகளை மேற்கொள்வது என்பன போன்ற பல விடயங்கள் ஆராயப்பட்டன.

மேலும் முஸ்லிம்கள் எதிர் நோக்குகின்ற பிரச்சினைகள் தொடர்பாகவும் கலந்துரையாடப்பட்டது. இவை தொடர்பாக தாமும் சம்பந்தப்பட்ட தரப்போடு பேசுவதாக காடினல் மல்கம் ரஞ்சித் அவர்கள் தெரிவித்ததுடன் இடம் பெற்ற தாக்குதல்களை  சர்வதேச நிகழ்ச்சி நிரலாகவே தாம் பார்ப்பதாகவும் அவர் சுட்டிக் காட்டினார்.

குறித்த சந்திப்பில் ஜம்இய்யாவின் தலைவர் முஃப்தி எம்.ஐ.எம். ரிஸ்வி பிரதித் தலைவர் அஷ்-ஷைக் ஏ.சீ. அகார் முஹம்மத், உதவிச் செயலாளர் அஷ்-ஷைக் தாஸிம், ஊடகச் பேச்சாளர் அஷ்-ஷைக் பாஸில் பாறூக், கொழும்பு பள்ளிவாசல்கள் சம்மேளன பிரதிநிதிகளாக அல்-ஹாஜ் இஸ்மாஈல் மற்றும்;  அல்-ஹாஜ் அஸ்லம் ஆகியோரும் கலந்து கொண்டனர்.

 

 ஊடகப்பிரிவு

அகில இலங்கை ஜம்இய்யத்துல் உலமா 

 

 

1440.09.17

2019.05.23

 

ரமழான் கடைசிப் பத்து நாட்கள் தொடர்பான வழிகாட்டல்கள்

நாட்டில் நிலவும் அசாதாரண சூழ்நிலையைக் கவனத்திற் கொண்டு அகில இலங்கை ஜம்இய்யத்துல் உலமா முஸ்லிம்களுக்கு பின்வரும் வழிகாட்டல்களை வழங்க விரும்புகின்றது.

  1. ரமழானின் இறுதிப் பத்தில் நல்லமல்களில் முனைப்புடன் ஈடுபடுமாறும் நாட்டின் நிலைமை சீராக துஆப் பிரார்த்தனைகளில் ஈடுபடுமாறும் வேண்டுகிறோம்.
  2. ரமழானில் எஞ்சியுள்ள நாட்களில் தத்தமது மஸ்ஜித் மற்றும் பிரதேசங்களுக்குரிய பாதுகாப்பு ஏற்பாடுகளை மஸ்ஜித் நிர்வாகிகளும் ஊர் முக்கியஸ்தர்களும் பொலிஸ் மற்றும் பாதுகாப்புப் பிரிவினருடன் இணைந்து மேற்கொள்ளுமாறு கேட்டுக்கொள்கின்றோம்.
  3. இரவு நேரங்களில் விளையாட்டுக்களில் ஈடுபடுவதையும் பிறருக்கு இடையூறு விளைவிக்கும் வகையில் நடந்து கொள்வதையும் முற்றாக தவிர்க்கவும்.
  4. ஒற்றைப்படை இரவில் குறிப்பாக 27ஆம் நாள் இரவு வணக்க வழிபாடுகளை ஏற்பாடு செய்யும்போது அவ்வப் பிரதேச நிலைமைகளைக் கவனத்திற் கொண்டு குறுகிய நேரத்தில் அமல்களை முடித்துக் கொள்ள ஆவன செய்யவும்.
  5. இரவுத் தொழுகை தொழுவதற்கு ஆரோக்கியமான சூழல் இருக்கும் பகுதிகளில் பொலிஸ் மற்றும் பாதுகாப்பு உத்தியோகத்தர்களின் உதவியுடன் தொழுது கொள்ளுமாறு வேண்டப்படுகின்றீர்கள்.
  6. இஃதிகாப் இருப்பவர்கள் தத்தமது பிரதேச நிலைமைகளைக் கவனத்திற் கொள்வதோடு அப்பிரதேச பொலிஸ் நிலைய அனுமதியையும் பெற்றுக் கொள்ளவும்.
  7. ஆரோக்கியமற்ற நிலை நிலவும் ஊர்களில் இஃதிகாப் இருப்பதை தவிர்த்துக் கொள்ளுமாறு ஆலோசனை வழங்குகின்றோம்.

எல்லாம் வல்ல அல்லாஹ் எமது ரமழான் கால வணக்க வழிபாடுகளையும் நற்காரியங்களையும் ஏற்று அங்கீகரித்து நமது நாட்டில் அமைதியையும் சமாதானத்தையும் மலரச் செய்வானாக!

வஸ்ஸலாம்.

 

 

அஷ்-ஷைக் எச். உமர்தீன்

செயலாளர் - பிரச்சாரக் குழு

அகில இலங்கை ஜம்இய்யத்துல் உலமா