அகில இலங்கை ஜம்இய்யதுல் உலமா குருணாகல் மாவட்ட நிறைவேற்றக்குழு மற்றும் குருணாகல் மாவட்ட மக்தப் மேற்பார்வையாளர்கள் (முஆவின்கள்) உடனான விஷேட கலந்துரையாடல் 16.11.2017 காலை 08:30 முதல் 10:30 வரை அகில இலங்கை ஜம்இய்யதுல் உலமா குருணாகல் மாவட்ட தலைவர் அஷ்ஷேக் சுஹைப்(தீனி) அவர்களின் தலைமையில் மாவட்ட காரியாலயத்தில் நடைபெற்றது.இக்கலந்துரையாடலின் போது மக்தப் சம்பந்தமான விடயங்கள் கலந்தாலோசிக்கப்பட்டது.

 

2017.11.10 (1439.02.21)

அகில இலங்கை ஜம்இய்யத்துல் உலமாவின் மேல்மட்ட உறுப்பினர்களுக்கும் சகோதரர் சிராஸ் நூர்தீன் சட்டத்தரணி தலைமையிலான RRT அமைப்பினருக்கும் இடையில் நேற்று (09.11.2017) விஷேட கலந்துரையாடல் ஒன்று நடைபெற்றது. இக்கலந்துரையாடலில் சமகாலப் பிரச்சினைகள் பலவும் கலந்தாலோசிக்கப்பட்டன. அத்துடன் கடந்த காலங்களில் RRT அமைப்பினர் அகில இலங்கை ஜம்இய்யத்துல் உலமாவுடன் புரிந்துணர்வுடனும், ஒத்துழைப்புடனும் நடந்து கொண்டது போலவே தொடர்ந்தும் சமூக நலன்களில் இணைந்து செயற்பட வேண்டுமென தீர்மானிக்கப்பட்டது.


இக்கலந்துரையாடலில் ஜம்இய்யாவின் கௌரவ தலைவர் அஷ்-ஷைக் ரிஸ்வி முப்தி உட்பட பொதுச் செயலாளர் அஷ்-ஷைக் எம்.எம்.ஏ. முபாறக், பிரதித் தலைவர் அஷ்-ஷைக் ஏ.சீ அகார் முஹம்மத், உதவிச் செயலாளர் அஷ்-ஷைக் எம்.எஸ்.எம். தாஸீம் ஆகியோர் கலந்து கொண்டனர்.

 

ஊடகப் பிரிவு
அகில இலங்கை ஜம்இய்யத்துல் உலமா

அகில இலங்கை ஜம்இய்யத்துல் உலமா மற்றும் இலங்கை அரபுக்கல்லூரிகள் ஒன்றியம் ஒன்றினைந்து அரபுக்கல்லூரி ஆசிரியர்களுக்காகவென ஒழுங்கு செய்த கற்பித்தல் தொடர்பான பாட நெறி ஒன்று கொழும்பு திறந்த பல்கழைகழகத்தினால்  நடாத்தப்பட்டது.இப்பாட நெறி அகில இலங்கை ஜம்இய்யத்துல் உலமாவின் கல்விக்குழுவால் ஒருங்கிணைக்கப்பட்டிருந்தது. 

நான்கு மாதங்களாக நடைபெற்ற இப்பாட நெறியை வெற்றிகரமாக பூர்த்தி செய்தோருக்கான சான்றிதழ் வழங்கும் நிகழ்வு இன்று 2017.11.09 கொழும்பு திறந்த பல்கழைகழகத்தின் கேட்போர் கூடத்தில் நடை பெற்றது.

காலை பத்து மணியளவில் கிராத்துடன் ஆரம்பமான இந்நிகழ்வின் வரவேற்புரையை கொழும்பு திறந்த பல்கழைகழகத்தின் இரண்டாம் மூன்றாம் நிலைக் கல்வித் துறையின் தலைவர் எஸ்.குகமூர்த்தி வழங்கினார்.தமது கல்விப் பீடம் இவ்வாறான ஒரு பயிற்சியை தயாரித்து உலமாக்களுக்கு வழங்கியது ஒரு சாதனையாக இருப்பதாக தனது உரையில் குறிப்பிட்டார்.

தொடர்ந்து கல்விப் பீடத்தின் பீடாதிபதி பேராசிரியர் பீ.சி.பி பக்கீர் ஜஃபார் உரையாற்றுகையில் கற்பித்தல் தொடர்பான சில விளக்கங்களை முன்வைத்ததோடு பயிற்சியை பூர்த்தி செய்தவர்களுக்கு சில அறிவுரைகளையும் வழங்கினார்.

இந்நிகழ்வின் விசேட அதிதியாக கலந்து கொண்ட அகில இலங்கை ஜம்இய்யத்துல் உலமா தலைவர் அஷ்-ஷைக் முப்தி, எம்.ஐ.எம்.ரிஸ்வி அவர்களின் உரை இடம் பெற்றது.தலைவர் தனது உரையில் அனைத்து உலமாக்களும் ஒவ்வொரு துறைகளிலும் கால் பதிக்க வேண்டும் என்று குறிப்பிட்டதோடு, எமது அகில இலங்கை ஜம்இய்யத்துல் உலமா ஒற்றுமை, சகவாழ்வு, கல்வி போன்ற விடயங்களை முன்னிருத்தி தனது செயற்பாடுகளை தற்போது கொண்டு செல்வதாகவும் கூறினார்.

தலைவரின் உரையுடன் சான்றிதழ் வழங்கும் நிகழ்வும்,ஞாப சின்னங்கள் வழங்கும் நிகழ்வும் இடம் பெற்றது.அதை தொடர்ந்து நன்றியுரையை கலாநிதி நவாஸ் தீன் வழங்கி அந்நிகழ்வை சிறப்பாக நிறைவு செய்தார்.இந்நிகழ்வில் அகில இலங்கை ஜம்இய்யத்துல் உலமா பொதுச் செயலாளர் எம்.எம்.ஏ முபாறக், உதவிச் செயலாளர் எம்.எஸ்.எம் தாஸீம் ஆகியோர் கலந்து சிறப்பித்தனர்.

 இந்நிகழ்வு வரலாற்றில் பதிய வேண்டிய ஒன்றாகும். உலமாக்களின் ஆளுமை விருத்திக்கு அடித்தலமாக இருப்பதோடு எதிர் வரும் காலங்களில் இது போன்ற பயிற்சி நெறிகளை ஒழுங்கு படுத்தி செய்வதினூடாக சிறந்த ஒரு சமூகத்தை கட்டியெழுப்ப முடியும் என்பதில் ஐயமில்லை.

 

                      ஊடகப் பிரிவு

அகில இலங்கை ஜம்இய்யத்துல் உலமா

 

  

அகில இலங்கை ஜம்இய்யத்துல் உலமாவின் பிரசாரக் குழுவினால் நாடளாவிய ரீதியில் நடாத்தப்பட்டு வரும் தற்கால பிரச்சினைகளும் அதற்கான தீர்வுகளும் எனும் தலைப்பிலான விழிப்புணர்வு நிகழ்ச்சி இம்முறை அம்பாறை மாவட்டம் அக்கரைப்பற்று ஜும்ஆ  மஸ்ஜிதில்  05.11.2017ம் திகதி ஞாயிற்றுக் கிழமை காலை 9.00 மணியளவில் இடம்பெற இருக்கிறது என்பதை மகிழ்ச்சியுடன் அறியத்தருகின்றோம்.

 

மேற்படி நிகழ்வில் பின்வரும் நிகழ்ச்சிகள் நடைபெற இருக்கின்றது.

  1. சமூகத்தை கட்டியெழுப்புவதில் மஸ்ஜித் நிருவாகிகளின் பங்களிப்பு - அஷ்-ஷைக் உமர்தீன் (ரஹ்மானி), செயலாளர் பிரசாரக்குழு, அகில இலங்கை ஜம்இய்யத்துல் உலமா
  2. பாடசாலை அதிபர்கள் மற்றும் ஆசிரியர்களுக்கான வழிகாட்டல் - அஷ்-ஷைக் ரிஸ்வி முப்தி தலைவர், அகில இலங்கை ஜம்இய்யத்துல் உலமா.
  3. உலமாக்களுக்கான குத்பா கருத்தரங்கு மற்றும் ஆன்மீக வழிகாட்டல் -அஷ்-ஷைக் அலியார் ரியாழி. நிறைவேற்றுக் குழு உறுப்பினர், அகில இலங்கை ஜம்இய்யத்துல் உலமா.
  4. காளிமார்கள் மற்றும் விவாக பதிவாளர்களுக்கான கலந்துரையாடல் - அஷ்-ஷைக் ஹலீல். பொருளாளர், அகில இலங்கை ஜம்இய்யத்துல் உலமா.
  5. தற்கால பிரச்சினைகளும் அதற்கான தீர்வுகளும் அஷ்-ஷைக் ரிஸ்வி முப்தி தலைவர், அகில இலங்கை ஜம்இய்யத்துல் உலமா.

 

  1. சமூகங்களுக்கிடையான கலந்துரையாடல் சம்பந்தமான (ஆறு புத்தகங்கள் பற்றியுண்டான தெளிவு) - PPT - அஷ்-ஷைக் அப்துர் ரஹ்மான்  இணைப்பாளர், ஒத்துழைப்புக்கும் ஒருங்கிணைப்புக்குமான குழு அகில இலங்கை ஜம்இய்யத்துல் உலமா.

 

எனவே இந்நிகழ்வு சிறப்பாக நடைபெற உங்களுடைய துஆக்களை எதிர்பார்ப்பதோடு முடியுமானவர்கள் கலந்து கொள்ளுமாறும் வேண்டிக் கொள்கின்றோம்.

 

ஊடகப்பிரிவு

அகில இலங்கை ஜம்இய்யத்துல் உலமா

     இந்தோனேஷியாவின் இலங்கைக்கான தூதரக பிரதிநிதிகள் அகில இலங்கை ஜம்இய்யத்துல் உலமாவிற்கு இன்று 2017.10.23ம் திகதி காலை பதினொரு மணியளவில் விஜயம் செய்தார்கள்.  அகில இலங்கை ஜம்இய்யத்துல் உலமாவின் சார்பில் அதன் பொதுச்செயலாளர் அஷ்-ஷைக் முபாறக், பொருளாலர் அஷ்-ஷைக் கலீல் மற்றும் அஷ்-ஷைக் நவ்பர், அஷ்-ஷைக் தாஸீம் ஆகியோரும் கலந்து கொண்டனர். 

   இச்சந்திப்பில் இந்தோனேஷியாவின் இலங்கைக்கான தூதரக பிரதிநிதிகள் ஜனாஸாக்களை பிரேதப் பரிசோதனை செய்வது சம்பந்தமாக கேட்டறிந்து கொண்டதோடு, ஜம்இய்யத்துல் உலமா பற்றிய அறிமுகத்தையும் பெற்றுக்கொண்டார்கள்.

 

  அகில இலங்கை ஜம்இய்யத்துல் உலமாவின் தலைமையகத்தில் நேற்று 2017.10.17ம் திகதி செவ்வாய்க்கிழமை இரவு எட்டு மணி முதல் முஸ்லிம் பாராளுமன்ற உறுப்பினர்களுடனான கலந்துரையாடல் ஒன்று இடம் பெற்றது.

இரவு பத்து மணி வரை நீடித்த இக்கலந்துரையாடலில்

  • வட, கிழக்கு எல்லை நிர்ணயத்தில் முஸ்லிம் பாராளுமன்ற உறுப்பினர்கள் தமக்குள் ஒன்று பட்டு செயற்படுதல்.
  • ஊடகங்களில் முஸ்லிம் பாராளுமன்ற உறுப்பினர்கள் சகோதர முஸ்லிம் பாராளுமன்ற உறுப்பினர்கள் பற்றிய வீணான விமர்சனங்கள் மற்றும் தவறான செய்திகளை பரப்புவதில் இருந்து தவிர்ந்து கொள்ளல்.
  • முஸ்லிம் அமைச்சர்கள் தமது கட்சிகளின் அலுவல்களை பார்க்கும் அதே நேரம் தமக்குள் ஒரு தலைமைத்துவத்தை உருவாக்கி ஒற்றுமையாக சேரந்து போக முடியுமான கட்டங்களில் ஒத்துழைத்தல்.

      போன்ற விடயங்கள் கலந்தாலோசிக்கப்பட்ட அதே நேரம் கௌரவ அமைச்சர் பௌசி அவர்களின் ஒருங்கிணைப்பில் முஸ்லிம்கள் சார்ந்த  விடயங்களை கவனிப்பதாகவும் அக்கலந்துரையாடலில் உறுதியளித்தனர்.

    இக்கலந்துரையாடலிற்கு அகில இலங்கை ஜம்இய்யத்துல் உலமாவின் தலைவர் அஷ்-ஷைக் ரிஸ்வி முப்தி அவர்கள் தலைமை தாங்கி தேவையான வழிகாட்டல்களை வழங்கிய அதே நேரம் ஒற்றுமையின் அவசியம் பற்றி வலியுருத்தினார். அகில இலங்கை ஜம்இய்யத்துல் உலமாவின் நிறைவேற்றுக்குழு சார்பாக அதன் உபதலைவர்கள் அடங்களாக 13 பேர் கலந்து கொண்டனர்.

 

ஊடகப்பிரிவு

அகில இலங்கை ஜம்இய்யத்துல் உலமா

அகில இலங்கை ஜம்இய்யத்துல் உலமாவின் பிரசாரக் குழுவினால் நாடளாவிய ரீதியில் நடாத்தப்பட்டு வரும் தற்கால பிரச்சினைகளும் அதற்கான தீர்வுகளும் எனும் தலைப்பிலான விழிப்புணர்வு நிகழ்ச்சி இம்முறை பொலன்னறுவை மாவட்டம் கதுறுவெல ஜும்ஆ மஸ்ஜில் இன்று  18.10.2017ம் திகதி புதன் கிழமை காலை 9.00 மணி முதல் சிறப்பாக இடம்பெற்றுக் கொண்டிருக்கிறது.

மேற்படி நிகழ்வில் பின்வரும் நிகழ்ச்சிகள் நடைபெற இருக்கின்றன.

  1. சமூகத்தை கட்டியெழுப்புவதில் மஸ்ஜித் நிருவாகிகளின் பங்களிப்பு - அஷ்-ஷைக் உமர்தீன் (செயலாளர் பிரசாரக்குழு அகில இலங்கை ஜம்இய்யத்துல் உலமா)
  2. பாடசாலை அதிபர்கள் மற்றும் ஆசிரியர்களுக்கான வழிகாட்டல்கள் - அஷ்-ஷைக் ரிஸ்வி முப்தி தலைவர் அகில இலங்கை ஜம்இய்யத்துல் உலமா.
  3. உலமாக்களுக்கான குத்பா கரத்தரங்கு -அஷ்-ஷைக் அலியார் (நிறைவேற்றுக் குழு உறுப்பினர் அகில இலங்கை ஜம்இய்யத்துல் உலமா.)
  4. காழிமார்கள் மற்றும் விவாக பதிவாளர்களுக்கான கலந்துரையாடல் - அஷ்-ஷைக் ஹலீல். (பொருளாலர் அகில இலங்கை ஜம்இய்யத்துல் உலமா)
  5. தற்கால பிரச்சினைகளும் அதற்கான தீர்வுகளும் அஷ்-ஷைக் ரிஸ்வி முப்தி (தலைவர் அகில இலங்கை ஜம்இய்யத்துல் உலமா)
  6. சமூகங்களுக்கிடையான கலந்துரையாடல் எனும் சிறு நூல்கள் பற்றிய சம்பந்தமான (ஆறு புத்தகங்கள் பற்றியுண்டான தெளிவு) - PPT  - அஷ்-ஷைக் அப்துர் ரஹ்மான் – இணைப்பாளர் ஒத்துழைப்புக்கும் ஒருங்கிணைப்புக்குமான குழு அகில இலங்கை ஜம்இய்யத்துல் உலமா)

 

ஊடகப்பிரிவு

அகில இலங்கை ஜம்இய்யத்துல் உலமா

2017.10.13 / 1439.01.22

ஞானசார தேரருக்கு எதிரான வழக்குகளை வாபஸ் வாங்குமாறு ஜம்இய்யத்துல் உலமாவோ அதன் தலைவரோ யாரிடமும் வேண்டிக் கொள்ள வில்லை

நேற்று முதல் சமூக வலைத்தளங்களில் 'வழக்குகளை வாபஸ் பெற்று ஞானசார தேரரை காப்பாற்ற முயற்சி' என்ற செய்தி பரவி வருகின்றுது. இதில் ஞானசார தேரருக்கு எதிரான வழக்குகளை வாபஸ் வாங்குமாறு ஜம்இய்யத்துல் உலமாவின் தலைவர் சட்டத்தரணி சிராஸ் நூர்தீனிடம் வேண்டியதாக கூறப்பட்டுள்ள செய்தி உண்மைக்கு புறம்பானதாகும். உண்மைக்கு புறம்பான இவ்வாறான செய்திகளை எழுதுகின்றவர்களும் பரப்புபவர்களும் அல்லாஹ்வை பயந்து கொள்ளவேண்டும்.

மேற்படி விடயம் சம்பந்தமாக பின்வரும் விடயத்தை அகில இகில இலங்கை ஜம்இய்யத்தல் உலமா அனைவருக்கும் அறியத்தர விரும்புகின்றது.

இலங்கையில் சகவாழ்வை கட்டியெழுப்ப அகில இலங்கை ஜம்இய்யத்துல் உலமா எடுத்துள்ள முயற்சிகள் நாம் அறிந்ததே. இதில் 2012 ஆம் ஆண்டு ஜம்இய்யா வெளியிட்ட சகவாழ்வு பிரகடனம் குறிப்பிடத்தக்க விடயமாகும். இந்த வகையில் இஸ்லாம் பற்றிய தெளிவு பிற மதத்தவர்களுக்கு வழங்கப்பட வேண்டும், இஸ்லாம் பற்றிய தப்பபிப்பிராயங்கள் களையப்பட வேண்டும், சத்தியம் அனைவருக்கும் போய்ச்சேர வேண்டும் என்ற நிலைப்பாட்டிலேயே ஜம்இய்யா செயற்படுகின்றது. அதற்கான முயற்சிகளாகவே ஜம்இய்யாவின் சமாஜ சங்வாத புத்தக வெளியீடும் பிற மதத் தலைவர்களுடனான சந்திப்புகளும் காணப்படுகின்றன.

ஞானசார தேரரோடு பேச்சுவார்த்தை நடாத்த வேண்டும் என்று ஜம்இய்யாவோ ஜம்இய்யாவின் தலைவரோ யாரிடமும் கேட்டுக் கொள்ளவில்லை. மாறாக சிலர் குறித்த தேரர் இஸ்லாம் பற்றிய சில சந்தேகங்கள் பற்றி கலந்துரையாடி முஸ்லிம்களுடனான தனது பிரச்சினைக்கு தீர்வுகாண விரும்புவதாகவும் அதற்காக அவருடன் சந்திப்பொன்று நடாத்தப்பட இருப்பதாகவும் கூறி அதில் உலமாக்கள் கலந்து கொள்ள வேண்டும் என்றும் ஜம்இய்யாவிடம் வேண்டிக்கொண்டனர். இதன்போது குறித்த இவ்விடயத்தில் அனுபமுள்ள சட்டத்தரணி சிராஸ் நூர்தீன் அவர்களையும் பிரிதொரு சட்டத்தரணியையும் ஜம்இய்யாவின் தலைவர் தொடர்பு கொண்டு இவ்விடயத்தில் எவ்வாறு நடந்து கொள்ளலாம் என ஆலோசனை பெற்றார். அதன்போது சட்டத்தரணி சிராஸ் நூர்தீன் அவர்கள் குறித்த தேரரை சந்திப்பதில் பிரச்சினையில்லை என்றும் தான் இச்சந்திப்பில் கலந்துக் கொள்ள போவதில்லை என்றும் ஞானசார தேரருடனான வழக்குகள் விடயத்தில் அவர் நீதிமன்றத்திலே தனது பிழையை ஏற்றுக் கொண்டு இனிமேல் இதில் ஈடுபட மாட்டேன் என உறுதியளிக்க வேண்டும் என்றும் குறிப்பிட்டார். பின்னர் குறித்த சந்திப்பில் கலந்துகொள்ள அஷ்-ஷைக் பாழில் பாரூக் அனுப்பப்பட்டார்.

அடுத்தநாள் நடைபெற்ற சந்திப்பில் கலந்துகொண்ட அஷ்-ஷைக் பாழில் பாரூக் அவர்;கள் குறித்த தேரர் மீதான வழக்குகள் பற்றி அங்கு கலந்துரையாடவில்லை என்பதாகவும் மாறாக அவரிடம் காணப்பட்ட இஸ்லாம் பற்றிய தப்பபிப்பிராயங்களுக்கு பதில் வழங்கும் வகையியே சந்திப்பு நடைபெற்றதாகவும் உறுதிப்படுத்தினார்.

இவ்விடயம் ஜம்இய்யாவின் கடந்த நிறைவேற்றுக் குழுக் கூட்டத்தில் கலந்துரையாடப்பட்ட போது, குறித்த தேரர் இஸ்லாத்திற்கும் முஸ்லிம்களுக்கும் எதிராக தான் முன்வைத்த கருத்துகளுக்கு மன்னிப்புக் கேட்டு, உண்மையில் இஸ்லாம் பற்றிய அவரது தப்பபிப்பிராயங்களுக்கு தெளிவு பெற விரும்பினால் அவருடன் உரையாடலை தொடரலாம் என்றும் அவருக்கு எதிராக பதியப்பட்டுள்ள வழக்குகள் சம்பந்தமாக குறித்த சட்டத்தரணிகளே முடிவெடுக்க வேண்டும் என்றும் கலந்துரையாடப்பட்டது.

எனவே சமூக வலைத்தளங்களில் பரப்பப்பட்டு வரும் குறித்த செய்தி உண்மைக்கு புறம்பானதாகும். பிழையான தகவல்களைப் பரப்பி மக்கள் மத்தியில் குழப்பங்களை ஏற்படுத்துவதை தவிர்ந்து கொள்ளுமாறு சகலரையும் ஜம்இய்யா கேட்டுக் கொள்கின்றது.
வஸ்ஸலாம்.

 

ஊடகப் பிரிவு
அகில இலங்கை ஜம்இய்யத்துல் உலமா

ACJU/NGS/09-17/002

21.09.2017/ 29.12.1438

சமயோசிதமாகவும் நிதானமாகவும் நடந்து கொள்வோம்

புனித இஸ்லாம் இன, மத பேதமின்றி அனைத்து உயிர்களையும் சமமாக  மதிக்கின்றது. எந்தவோர் உயிரும் அநியாயமாகக் கொலை செய்யப்பட அது அனுமதிப்பதில்லை. இஸ்லாம் இதனை வன்மையாகக் கண்டிக்கிறது. ஒருவரை அநியாயமாகக் கொலை செய்வது முழு மனித சமூகத்தையும் கொலை செய்த குற்றத்துக்கு சமம் என்பதே இஸ்லாத்தின் நிலைப்பாடாகும்.

ரோஹிங்ய முஸ்லிம்களின் உரிமைகள் பறிக்கப்பட்டு அநியாயமாக அவர்கள் கொன்றுகுவிக் கப்படுவதை முழு உலகமும் கண்டிக்கின்றது. நமது நாட்டு மக்கள் பொதுவாகவும் முஸ்லிம்கள் குறிப்பாகவும் தமது கண்டனங்களைத் வெளியிட்டு வருகின்றனர்.

அல்லாஹுதஆலாவின் மீது அசைக்க முடியாத நம்பிக்கை கொண்ட  முஸ்லிம்களாகிய நாம் சோதனைகள், கஷ்டங்கள் வருகின்றபோது நமது பாவங்களிலிருந்து தௌபா செய்து மீளுதல், அவன் பக்கம் நெருங்குதல், அதிகதிகம் துஆ செய்தல் ஆகிய ஆன்மீக முயற்சிகளில் ஈடுபடுவதுடன் எம்மால் முடிந்த உதவிகளைச் செய்வதிலும் அவர்களை பாதுகாப்பதற்கான சர்வதேச அழுத்தங்களை உருவாக்குவதிலும் முன்னிற்க வேண்டும். இதுவல்லாமல் பெரும்பான்மையாக பௌத்த மக்கள் வாழ்ந்து வரும் நமது நாட்டில் அவர்களது பகையைச் சம்பாதித்துக் கொள்ளும் வண்ணம் செயற்படுவது ஆரோக்கியமாகாது என்பதை அகில இலங்கை ஜம்இய்யத்துல் உலமா இலங்கை வாழ் அனைத்து முஸ்லிம்களுக்கும் சுட்டிக் காட்ட விரும்புகின்றது.

ரோஹிங்கியா முஸ்லிம்கள் விடயமாக ஆரம்ப கட்டத்திலேயே அந்நாட்டுத் தூதுவராலயம், ஐ.நா சபை இலங்கை ஜனாதிபதி முதலிய சகல தரப்பினருக்கும் கண்டனக் கடிதங்களை அனுப்பி உரிய நடவடிக்கைகளை மேற்கொள்ள வேண்டுமென ஜம்இய்யா வேண்டிக் கொண்டது.

ஏதாவதொரு விடயத்திற்கு ஆர்ப்பாட்டம் செய்வதாக இருந்தால் அது எவ்வாறு அமைய வேண்டும் என்ற ஷரீஆவின் வழிகாட்டலையும் ஜம்இய்யா வெளியிட்டுள்ளது. அது இத்துடன் இணைக்கப்படுகின்றது.

எனினும் தற்போதைய சூழலில் ஆர்ப்பாட்டங்கள் மற்றும் வீண் வம்புகளை விலைக்கு வாங்கும் செயற்பாடுகளை விட்டும் தவிர்ந்திருக்குமாறு அகில இலங்கை ஜம்இய்யத்துல் உலமா இலங்கை வாழ் அனைத்து முஸ்லிம்களையும் வேண்டிக் கொள்கின்றது.

எனவே குறித்த பிரச்சினையில் மிகவும் நிதானமாகவும், நாட்டு நிலமைகளைக் கவனத்திற் கொண்டும் நடந்து கொள்ளுமாறு தனது மாவட்ட பிரதேசக் கிளைகள் மற்றும் முஸ்லிம் அமைப்புக்கள், இலங்கை வாழ் அனைத்து முஸ்லிம்களையும் ஜம்இய்யா கேட்டுக் கொள்கின்றது.

 

 

 

அஷ்-ஷைக் எம்.எம்.அஹ்மத் முபாறக்

பொதுச் செயலாளர்

அகில இலங்கை ஜம்இய்யத்துல் உலமா

 

ஹர்த்தால், ஆர்ப்பாட்டம் பற்றிய இஸ்லாமிய வழிகாட்டல்

http://www.acju.lk/fatwa-bank-ta/recent-fatwa/item/826-2016-08-08-07-48-04

கண்டி மாவட்டத்தில் சிறப்புததேர்ச்சி பெற்ற மாணவர்கள் கௌரவிப்பு

கடந்த 2016 ஆம் ஆண்டு க.பொ.த உயர் தரம் மற்றும் க.பொ.த சாதாரண தரம் பரீட்சைகளில் சிறந்த பெருபேறுகளைப் பெற்ற மாணவர்களை கௌரவிக்கு ஒரு நிகழ்வு சென்ற 17.09.2017 ஞாயிற்றுக்கிழமை காலை 9.00 மணியளவில் அகில இலங்கை ஜம்இய்யத்துல் உலமா கண்டி மாவட்டக்கிளையின் தலைமை பீடம் கேட்போர் கூடத்தில் நடைபெற்றது.

கண்டி மாவட்டக் கிளையின் தலைவர் அஷ்-ஷைக் எச்.உமர்தீன் அவர்களின் தலைமையில் நடைபெற்ற இந்நிகழ்வில் ஜம்இய்யாவின் கண்டி மாவட்ட நிறைவேற்றுக்குழு அங்கத்தவர்களும், மாவட்டத்தின் 13 பிரதேசக் கிளை உறுப்பினர்கள் சிறப்புச் தேர்ச்சி பெற்ற மாணவ மாணவிகளின் பெற்றோர்கள் என பலரும் கலந்துகொண்டனர். நிகழ்ச்சியின் பிரதம அதிதியாக கண்டி மாவட்ட முஸ்லிம் பாடசாலைகளுக்குப் பொறுப்பான பிரதிக் கல்விப் பணிப்பாளர் அஷ்-ஷைக் எம்.இரான் நழீமி அவர்கள் கலந்து கொண்டு சிறப்புரை ஆற்றினார்.

அஷ்-ஷைக் எச்.உமர்தீன் அவர்கள் தமதுரையில்: இன்றைய தலைமுறையினரை கல்வியின் பால் உற்சாகமூட்டுவது எமது பாரிய கடமையாகும். கல்வி என்பது ஒரு சமூகத்தின் முதுகொழும்பாகும். ஏதிர்கால சமூகத்தைக் கட்டியெழுப்பவும், வளாந்து வருவோருக்கு சரியான பாதையைக் காட்டி அவர்களை நேர்வழிப்படுத்துவதுமே இந்நிகழ்ச்சியின் நோக்கமாகும். பெருபேறுகளின் அடிப்படையில் நோக்கும் போது ஆண்களை விட பெண்கள்; தேர்ச்சியின் விகிதாசாரமே அதிகம். பெண்கள் கல்வியில் காட்டுகின்ற ஆர்வம் போலவே ஆண்களும் அதிகம் அக்கரை காட்ட வேண்டும். சமுகமளித்திருக்கும் பெற்றோர்கள் உங்கள் மகளின் கல்வியில் அக்கரை காட்டுவது பொலவே ஆண் பிள்ளைகளினதும் கல்வியில் அக்கரை காட்ட வேண்டும் என உருக்கமாகக் கூறினார்.

மாவட்டத்தில் நூற்றுக்கும் மேற்பட்ட மாணவ மாணவிகள் சிறப்புத் தேர்ச்சி பெற்றிருந்த போதிலும் கிடைக்கப்பெற்ற விண்ணப்பங்கள் அடிப்படையில் இந்நகிழ்வில் சுமார் 80 மாணவ மாணவிகள் நினைவுச் சின்னங்கள் வழங்கி கௌரவிக்கப்பட்டனர் என கண்டி மாவட்ட ஜம்இய்யத்துல் உலமாவின் கௌரவ செயலாளர் அஷ்-ஷைக் அப்துல் கப்பார் தீனி அவர்கள் தெரிவித்தார்.