ACJU/NGS/09-17/002

21.09.2017/ 29.12.1438

சமயோசிதமாகவும் நிதானமாகவும் நடந்து கொள்வோம்

புனித இஸ்லாம் இன, மத பேதமின்றி அனைத்து உயிர்களையும் சமமாக  மதிக்கின்றது. எந்தவோர் உயிரும் அநியாயமாகக் கொலை செய்யப்பட அது அனுமதிப்பதில்லை. இஸ்லாம் இதனை வன்மையாகக் கண்டிக்கிறது. ஒருவரை அநியாயமாகக் கொலை செய்வது முழு மனித சமூகத்தையும் கொலை செய்த குற்றத்துக்கு சமம் என்பதே இஸ்லாத்தின் நிலைப்பாடாகும்.

ரோஹிங்ய முஸ்லிம்களின் உரிமைகள் பறிக்கப்பட்டு அநியாயமாக அவர்கள் கொன்றுகுவிக் கப்படுவதை முழு உலகமும் கண்டிக்கின்றது. நமது நாட்டு மக்கள் பொதுவாகவும் முஸ்லிம்கள் குறிப்பாகவும் தமது கண்டனங்களைத் வெளியிட்டு வருகின்றனர்.

அல்லாஹுதஆலாவின் மீது அசைக்க முடியாத நம்பிக்கை கொண்ட  முஸ்லிம்களாகிய நாம் சோதனைகள், கஷ்டங்கள் வருகின்றபோது நமது பாவங்களிலிருந்து தௌபா செய்து மீளுதல், அவன் பக்கம் நெருங்குதல், அதிகதிகம் துஆ செய்தல் ஆகிய ஆன்மீக முயற்சிகளில் ஈடுபடுவதுடன் எம்மால் முடிந்த உதவிகளைச் செய்வதிலும் அவர்களை பாதுகாப்பதற்கான சர்வதேச அழுத்தங்களை உருவாக்குவதிலும் முன்னிற்க வேண்டும். இதுவல்லாமல் பெரும்பான்மையாக பௌத்த மக்கள் வாழ்ந்து வரும் நமது நாட்டில் அவர்களது பகையைச் சம்பாதித்துக் கொள்ளும் வண்ணம் செயற்படுவது ஆரோக்கியமாகாது என்பதை அகில இலங்கை ஜம்இய்யத்துல் உலமா இலங்கை வாழ் அனைத்து முஸ்லிம்களுக்கும் சுட்டிக் காட்ட விரும்புகின்றது.

ரோஹிங்கியா முஸ்லிம்கள் விடயமாக ஆரம்ப கட்டத்திலேயே அந்நாட்டுத் தூதுவராலயம், ஐ.நா சபை இலங்கை ஜனாதிபதி முதலிய சகல தரப்பினருக்கும் கண்டனக் கடிதங்களை அனுப்பி உரிய நடவடிக்கைகளை மேற்கொள்ள வேண்டுமென ஜம்இய்யா வேண்டிக் கொண்டது.

ஏதாவதொரு விடயத்திற்கு ஆர்ப்பாட்டம் செய்வதாக இருந்தால் அது எவ்வாறு அமைய வேண்டும் என்ற ஷரீஆவின் வழிகாட்டலையும் ஜம்இய்யா வெளியிட்டுள்ளது. அது இத்துடன் இணைக்கப்படுகின்றது.

எனினும் தற்போதைய சூழலில் ஆர்ப்பாட்டங்கள் மற்றும் வீண் வம்புகளை விலைக்கு வாங்கும் செயற்பாடுகளை விட்டும் தவிர்ந்திருக்குமாறு அகில இலங்கை ஜம்இய்யத்துல் உலமா இலங்கை வாழ் அனைத்து முஸ்லிம்களையும் வேண்டிக் கொள்கின்றது.

எனவே குறித்த பிரச்சினையில் மிகவும் நிதானமாகவும், நாட்டு நிலமைகளைக் கவனத்திற் கொண்டும் நடந்து கொள்ளுமாறு தனது மாவட்ட பிரதேசக் கிளைகள் மற்றும் முஸ்லிம் அமைப்புக்கள், இலங்கை வாழ் அனைத்து முஸ்லிம்களையும் ஜம்இய்யா கேட்டுக் கொள்கின்றது.

 

 

 

அஷ்-ஷைக் எம்.எம்.அஹ்மத் முபாறக்

பொதுச் செயலாளர்

அகில இலங்கை ஜம்இய்யத்துல் உலமா

 

ஹர்த்தால், ஆர்ப்பாட்டம் பற்றிய இஸ்லாமிய வழிகாட்டல்

http://www.acju.lk/fatwa-bank-ta/recent-fatwa/item/826-2016-08-08-07-48-04

கண்டி மாவட்டத்தில் சிறப்புததேர்ச்சி பெற்ற மாணவர்கள் கௌரவிப்பு

கடந்த 2016 ஆம் ஆண்டு க.பொ.த உயர் தரம் மற்றும் க.பொ.த சாதாரண தரம் பரீட்சைகளில் சிறந்த பெருபேறுகளைப் பெற்ற மாணவர்களை கௌரவிக்கு ஒரு நிகழ்வு சென்ற 17.09.2017 ஞாயிற்றுக்கிழமை காலை 9.00 மணியளவில் அகில இலங்கை ஜம்இய்யத்துல் உலமா கண்டி மாவட்டக்கிளையின் தலைமை பீடம் கேட்போர் கூடத்தில் நடைபெற்றது.

கண்டி மாவட்டக் கிளையின் தலைவர் அஷ்-ஷைக் எச்.உமர்தீன் அவர்களின் தலைமையில் நடைபெற்ற இந்நிகழ்வில் ஜம்இய்யாவின் கண்டி மாவட்ட நிறைவேற்றுக்குழு அங்கத்தவர்களும், மாவட்டத்தின் 13 பிரதேசக் கிளை உறுப்பினர்கள் சிறப்புச் தேர்ச்சி பெற்ற மாணவ மாணவிகளின் பெற்றோர்கள் என பலரும் கலந்துகொண்டனர். நிகழ்ச்சியின் பிரதம அதிதியாக கண்டி மாவட்ட முஸ்லிம் பாடசாலைகளுக்குப் பொறுப்பான பிரதிக் கல்விப் பணிப்பாளர் அஷ்-ஷைக் எம்.இரான் நழீமி அவர்கள் கலந்து கொண்டு சிறப்புரை ஆற்றினார்.

அஷ்-ஷைக் எச்.உமர்தீன் அவர்கள் தமதுரையில்: இன்றைய தலைமுறையினரை கல்வியின் பால் உற்சாகமூட்டுவது எமது பாரிய கடமையாகும். கல்வி என்பது ஒரு சமூகத்தின் முதுகொழும்பாகும். ஏதிர்கால சமூகத்தைக் கட்டியெழுப்பவும், வளாந்து வருவோருக்கு சரியான பாதையைக் காட்டி அவர்களை நேர்வழிப்படுத்துவதுமே இந்நிகழ்ச்சியின் நோக்கமாகும். பெருபேறுகளின் அடிப்படையில் நோக்கும் போது ஆண்களை விட பெண்கள்; தேர்ச்சியின் விகிதாசாரமே அதிகம். பெண்கள் கல்வியில் காட்டுகின்ற ஆர்வம் போலவே ஆண்களும் அதிகம் அக்கரை காட்ட வேண்டும். சமுகமளித்திருக்கும் பெற்றோர்கள் உங்கள் மகளின் கல்வியில் அக்கரை காட்டுவது பொலவே ஆண் பிள்ளைகளினதும் கல்வியில் அக்கரை காட்ட வேண்டும் என உருக்கமாகக் கூறினார்.

மாவட்டத்தில் நூற்றுக்கும் மேற்பட்ட மாணவ மாணவிகள் சிறப்புத் தேர்ச்சி பெற்றிருந்த போதிலும் கிடைக்கப்பெற்ற விண்ணப்பங்கள் அடிப்படையில் இந்நகிழ்வில் சுமார் 80 மாணவ மாணவிகள் நினைவுச் சின்னங்கள் வழங்கி கௌரவிக்கப்பட்டனர் என கண்டி மாவட்ட ஜம்இய்யத்துல் உலமாவின் கௌரவ செயலாளர் அஷ்-ஷைக் அப்துல் கப்பார் தீனி அவர்கள் தெரிவித்தார்.

 

பேராசிரியர்/கலாநிதி கநோக் வுன்ங்டன்கோன் அகில இலங்கை ஜம்இய்யத்துல் உலமாவிற்கு விஜயம் செய்தார்……….

   இலங்கைக்கு விஜயம் ஒன்றினை மேற்கொண்டுள்ள தாய்லாந்து நாட்டின் முன்னாள் பாராளுமன்ற உறுப்பினரும்,அந்நாட்டுப் பிரதமரின் முன்னாள் சிரேஷ்ட ஆலோசகருமான பேராசிரியர்/கலாநிதி கநோக் வுன்ங்டன்கோன் நேற்று (2017/09/12ம் திகதி செவ்வாய் கிழமை) மாலை 6:00 மணியளவில் அகில இலங்கை ஜம்இய்யத்துல் உலமாவின் தலைமையகத்திற்கு விஜயம் செய்தார்.

   அகில இலங்கை ஜம்மியதுல் உலமாவின் தலைவர்,உபதலைவர்,செயலாளர் மற்றும் அதன் உறுப்பினர்களுடன் கலந்துரையாடினார்.அதன் போது அவர் உரையாற்றுகையில் தாய்லாந்து நாட்டின் அறிமுகத்தை வழங்கியதோடு அங்குள்ள முஸ்லிம்கள் பற்றியும் குறிப்பிட்டார்.இலங்கை முஸ்லிம்கள் எதிர் நோக்கிய பிரச்சினைகள் கவலை அளிப்பதாகவும் தெரிவித்த அவர் சமூக ஒற்றுமையை வலியுறுத்திக் கூறியதோடு பிறமதத்தவருடனான சகவாழ்வின் முக்கியத்துவம் பற்றியும் சுட்டிக்காட்டினார்.இஸ்லாத்தின் மீது குறை கூறுபவர்கள் அல்குர்ஆனையும் குறை கூறுவதாகவும் குறிப்பிட்ட அவர் அது அல்குர்ஆனை சரிவர விளங்காத காரணத்தால் தான் நடப்பதாகவும், அல்குர்ஆனில் அல்ல பிழை இருப்பது குறை கூறுபவர்களிடம் தான் என்று கூறியது கோடிட்டு காட்ட வேண்டிய ஒன்றாக அமைந்தது.

   தொடர்ந்து அகில இலங்கை ஜம்மியதுல் உலமாவின் சார்பில் உரையாற்றிய அதன் தலைவர் அஷ்ஷைக் ரிஸ்வி முப்தி அவர்கள் அண்மைக் காலமாக உலகளாவிய ரீதியில் முஸ்லிம்கள் சந்திக்கும் அவல நிலைகள் மிகவும் வருத்தம் அளிப்பதாகவும்,ரோஹின்யா முஸ்லீம்கள் விடயத்தில் அனைவரும் ஒன்றிணைந்து தீர்வு ஒன்றினைப் பெற்றுக்கொடுக்க முன்வர வேண்டும் என்றும் குறிப்பிட்டதோடு ஒற்றுமை பற்றியும்,சகவாழ்வு பற்றியும் எடுத்துக் கூறினார்.

  இலங்கையில் முஸ்லிம்களின் வரலாறு 1000 வருடங்களுக்கு முன்னிருந்து ஆரம்பிப்பதை தெளிவாகக் கூறிய அவர் இந்த நாட்டின் மீது முஸ்லிம்கள் அளவு கடந்த அன்பு வைத்திருப்பதாகவும்,நாட்டுக்காக அன்று தொடக்கம் போராடி வருவதாகவும் சுட்டிக்காட்டினார்.

  அகில இலங்கை ஜம்இய்யத்துல் உலமா பற்றிய பேராசிரியர்/கலாநிதி கநோக் வுன்ங்டன்கோன் அவர்களின் கேள்விக்கு தலைவர் பின்வருமாறு பதிலளித்தார் ”இந்த நாடு சுதந்திரம் அடைவதற்கு முன் 1924ம் ஆண்டு எமது முன்னோர்களால் திட்டமிட்டு இலங்கை முஸ்லிம்களை ஒரு குடையின் கீழ் கொண்டு வரும் முயற்சியில் ஈடுபட்டதன் விளைவாகவே அகில இலங்கை ஜம்இய்யத்துல் உலமா ஆரம்பிக்கப்பட்டு பல பகுதிகளாக இன்றுவரை செயற்படுவதாக குறிப்பிட்டதோடு அகில இலங்கை ஜம்இய்யத்துல் உலமாவின் ஒவ்வொரு பிரிவு பற்றியும் ஒரு தெளிவை வழங்கினார் தலைவரின் உரையில் வேற்றுமையில் ஒற்றுமை எனும் விடயத்தை வலியுறுத்திப் பேசியது குறிப்பிடத் தக்க விடயமாக அமைந்தது.

  சுமார் 2மணி நேரம் வரை நீடித்த இச்சந்திப்பில் அகில இலங்கை ஜம்இய்யத்துல் உலமாவின் தலைவர் அஷ்ஷைக் ரிஸ்வி முப்தி,உபதலைவர் அஷ்ஷைக் அப்துல்ஹாலிக் ,பொதுச்செயளாலர் அஷ்ஷைக் முபாரக் ,உட்பட அதன் செயற்குழு உறுப்பினர்களும் கலந்து கொண்டனர்.                        

                                                                                                                                                                                                                                                             

                                                                                                                                                                                                                                                                                            ஊடகப்பிரிவு

                                          அகில இலங்கை ஜம்இய்யத்துல் உலமா

11.07.2017 (16.10.1438)

அகில இலங்கை ஜம்இய்யத்துல் உலமாவின் கௌரவத் தலைவர் அஷ்-ஷைக் முப்தி எம்.ஐ.எம். றிழ்வி அவர்களின் அனுதாபச் செய்தி

அஷ்-ஷைக் எம். றியாழ் பாரி அவர்களின் மரணச் செய்தி எம்மைக் கவலையில் ஆழ்த்துகின்றது. இலங்கையின் தலைசிறந்த உலமாக்களில் ஒருவரும், கொழும்பு பெரிய பள்ளிவாயல் மதீனதுல் இல்ம் அரபிக் கல்லூரியின் அதிபரும், பெரிய பள்ளிவாயல் பிறைக்குழுத் தலைவருமான அஷ்-ஷைக் எம். றியாழ் பாரி அவர்கள் இன்று (11.07.2017) தனது 63வது வயதில் வபாத்தானார்கள். இன்னா லில்லாஹி வஇன்னா இலய்ஹி ராஜிஊன். அவர்களின் மரணம் இலங்கைவாழ் மக்களுக்கேற்பட்ட பெரும் இழப்பாகும்.

கடந்த 2003 ஆம் ஆண்டுமுதல் சுமார் 15 வருடகாலமாக அவர்களுடன் நெருங்கிப் பழகும் சந்தர்ப்பம் எனக்குக் கிடைத்தது. தனது சொந்த அமல்களில் பேணுதலும், பிறருடன் அன்பாகவும் பணிவாகவும் பழகும் குணமும், பொறுப்புணர்வுடன் செயலாற்றும் தன்மையும், பிறருடன் நல்ல உறவைப் பேணும் அன்னாரது பண்பும் எம் உள்ளத்தை விட்டு ஒருபோதும் நீங்க மாட்டாது. காலம் சென்ற அப்துல் சமத் ஆலிம் மற்றும் அன்னாரது சகோதரர் மௌலவி அப்துல் லதீப் ஆலிம் போன்றோர்களோடு நெருங்கிய தொடர்புகளை கொண்டிருந்த அன்னார் மிகவும் நற்குணம்படைத்தவராக காணப்பட்டார்கள்.
தனக்கு ஏற்பட்டிருந்த நோயையும் பொருட்படுத்தாமல் றமழான் மாதத் தலைபிறைக் கூட்டத்துக்கு அவர்கள் வருகை தந்தமை அன்னார் தமது பணிகளில் கொண்டிருந்த பொறுப்புணர்வைக் காட்டுகின்றது. இது உலமாக்களுக்கு நல்லதொரு முன்மாதிரியாகும்.
எல்லாம் வல்ல அல்லாஹுதஆலா அன்னாரது நல்லமல்களை அங்கீகரித்து, சகல பிழைகளையும் பொறுத்து, நல்லடியார்களின் கூட்டத்தில் சேர்த்தருள்வானாக, அவர்களது குடும்பத்தினர், மாணவர்கள் அனைவருக்கும்; ஆறுதலையும் நற்கூலியையும் வழங்குவானாக, ஆமீன்.
வஸ்ஸலாம்.


அஷ்-ஷைக் முப்தி எம்.ஐ.எம் றிழ்வி
தலைவர் - அகில இலங்கை ஜம்இய்யத்துல் உலமா

2017.05.28 / 1438.09.02

மண்சரிவு, வெள்ளம் போன்றவற்றால் பாதிக்கப்பட்டவர்களுக்கு உதவுவோம்

தொடர்ச்சியாக பெய்துவரும் மழை காரணமாக மண்சரிவு, வெள்ளம் போன்ற பாரிய அனர்த்தங்கள் ஏற்பட்டு பொதுமக்கள் தமது வாழ்விடங்களை இழந்துள்ளதுடன் பாரியளவிலான உயிர், உடமை இழப்புக்களும் ஏற்பட்டுள்ளமை குறிப்பிடத்தக்கதாகும்.

இது போன்ற சந்தர்ப்பங்களில் தொழுகை, துஆ, பாவமன்னிப்புத் தேடுதல் போன்ற வணக்க வழிபாடுகளில் நபி சல்லல்லாஹு அலைஹி வஸல்லம் அவர்கள் ஈடுபடுவார்கள். இதனடிப்படையில் அல்லாஹ்வின் அன்பையும் றஹ்மத்தையும் நெருக்கத்தையும் பெற்றுத்தரக் கூடிய வணக்க வழிபாடுகளில் ஈடுபடுமாறும் தற்போது நிலவும் அசாதாரண காலநிலை நீங்கி பொதுமக்கள் தமது வழமைக்குத் திரும்புவதற்காக பிரார்த்தனைகளில் ஈடுபடுமாறும் அகில இலங்கை ஜம்இய்யத்துல் உலமா அனைவரையும் அன்புடன் வேண்டிக் கொள்கின்றது.

அத்துடன் பாதிக்கப்பட்ட மக்களுக்கு உரிய நிவாரணங்களை வழங்குவதற்கான நடவடிக்கைகளை மேற்கொள்ளுமாறு அகில இலங்கை ஜம்இய்யத்துல் உலமா தனது சகல மாவட்ட, பிரதேசக் கிளைகளை வேண்டிக் கொள்கின்றது. மஸ்ஜித் நிர்வாகிகள் மற்றும் அனைவரையும் இவ்விடயத்தில் ஒத்துழைப்புடன் செயற்படுமாறு அன்புடன் வேண்டிக் கொள்கின்றது.

அகில இலங்கை ஜம்இய்யத்துல் உலமா ஊடாக உதவிகள் செய்ய விரும்புவோர் தமது நிதியை கீழ்வரும் வங்கிக் கணக்கில் வைப்புச் செய்யுமாறு கேட்டுக் கொள்கின்றோம். அத்துடன் எதிர்வரும் ஜும்ஆக்களில் நிவாரண உதவிகளை (பணமாக) சேமித்து இவ்வங்கிக் கணக்கில் வைப்புச் செய்யுமாறும் அது பற்றிய தகவலை 0117-490490 என்ற இலக்கத்தினூடாக எமக்கு அறியத்தருமாறும் சகல பள்ளிவாயல்களின் நிருவாகிகளையும் கேட்டுக் கொள்கின்றோம்.

வஸ்ஸலாம்

COMMERCIAL BANK

ALL CEYLON JAMIYYATHUL ULAMA

A/C  NO 1901005000

COMMERCIAL BANK

BRANCH : ISLAMIC BANKING UNIT

SWIFT CODE : CCEYLKLX

 

AMANA BANK

ALL CEYLON JAMIYYATHUL ULAMA

A/C  NO 0010112110014

AMANA BANK

BRANCH : MAIN BRANCH

SWIFT CODE : AMNALKLX

 

அஷ்-ஷைக் எம்.எம்.ஏ முபாறக்
பொதுச் செயலாளர்
அகில இலங்கை ஜம்இய்யத்துல் உலமா

2017.05.18 / 1438.08.21

நாட்டு நிலைமைகள் சீராகி சமாதானமும் சகவாழ்வும் நிலவ முனைப்புடன் செயற்பட்டு அதற்காக அல்லாஹ்விடம் பிரார்த்திப்போம்!

இந்நாட்டில் முஸ்லிம்களாக வாழும் நாம் வரலாறு நெடுகிலும் பல சோதனைகளுக்கு முகங்கொடுத்து வந்துள்ளோம். இவற்றின்போது நாம் இஸ்லாமிய போதனைகளுக்கு ஏற்ப பொறுமையுடனும் நிதானமாகவும் செயற்பட்டு வெற்றிபெற்றுள்ளோம்.

சோதனைகளின் போது அல்லாஹ்வின் மீது நம்பிக்கை கொண்டு செயற்படுவோர் தனக்கு ஏற்படும் பிரச்சினைகளிலிருந்து நிச்சயம் ஈடேற்றம் பெறுவர். நபிமார்களின் வரலாறு இதற்குச் சான்றாகும். எனவே, முஸ்லிம்கள் பெரும்பாவங்களிலிருந்து தம்மைப் பாதுகாத்துக் கொள்வதிலும் அல்லாஹு தஆலாவுடனான தமது தொடர்பைச் சீராக்கிக் கொள்வதிலும் அதிக கவனம் செலுத்த வேண்டும். குறிப்பாக சில தினங்களில் எம்மை வந்தடையவுள்ள றமழான் மாதத்தில் நாம் அதிகளவு நல்லமல்களில் ஈடுபட வேண்டும். நிச்சயமாக நமது நல்லமல்கள் முஸ்லிம்களுக்கு குறிப்பாகவும் நாட்டு மக்களுக்கு பொதுவாகவும் நிம்மதியையும் சுபீட்சத்தையும் கொண்டு வரும் என்பது உறுதியான விடயமாகும்.

தற்போது நிலவிவரும் அசாதாரண நிலைமைகள் காரணமாக முஸ்லிம்கள் சற்று அமைதியிழந்து காணப்படுகின்றனர். சிலர் முஸ்லிம்களுக்கு எதிரான இனவாதத்தை தூண்டும் செயற்பாடுகளை தொடர்ந்தும் மேற்கொண்டு வருகின்றனர். ஒரு சமூகத்தை அச்சுறுத்தும் இவ்வாறான நடவடிக்கைகள், இந்நாட்டில் நிலவும் சமாதானத்தையும் சகவாழ்வையும் பாதித்து நாட்டின் அபிவிருத்திக்கு தடையாக அமைவதுடன், இந்நாட்டின் யாப்பு உறுதிப்படுத்தியுள்ள உரிமைகளை மீறும் செயற்பாடுகளாகவும் காணப்படுகின்றன.

எனவே, இந்நாட்டு முஸ்லிம்கள் இஸ்லாமிய போதனைகளைப் பேணி, இன ஐக்கியத்தையும் சமூக ஒற்றுமையையும் பாதுகாக்கும் வகையில் நடந்து கொள்ளுமாறும், இஸ்திஃபார், ஸதகா, நோன்பு, துஆ போன்ற நல்லமல்களில் ஈடுபட்டு அல்லாஹ்வின் பக்கம் திரும்புமாறும் குனூத் அந்நாஸிலா ஓதுவதற்கான ஜம்இய்யாவின் வழிகாட்டல்களுக்கு ஏற்ப ஐவேளை தொழுகைகளிலும் குனூத் அந்நாஸிலாவை றமழான் மாதம் வரை ஓதுமாறும் அகில இலங்கை ஜம்இய்யதுல் உலமா கேட்டுக் கொள்கின்றது.

அத்துடன் ஒவ்வொரு ஊரிலும் உள்ள உலமாக்களும் துறைசார்ந்தவர்களும் சமூகத் தலைவர்களும் ஒன்றிணைந்து இனவாதத்தை முறியடிக்க உரிய நடவடிக்கைகளை மேற்கொள்ளுமாறும், பொது மக்களுக்கு இதுதொடர்பில் வழிகாட்டுமாறும் ஜம்இய்யா வேண்டிக் கொள்கின்றது.

நாட்டில் ஐக்கியம் மற்றும் சகவாழ்வு வளரவும் தீய சக்திகளின் மோசமான திட்டங்கள் தோல்வியுற்று அனைத்து சமூகங்களும் புரிந்துணர்வோடு வாழவும் எல்லாம் வல்ல அல்லாஹ் நல்லருள் பாலிப்பானாக.

வஸ்ஸலாம்.

அஷ்-ஷைக் எச். உமர்தீன் 

செயலாளர் - பிரச்சாரக்குழு
அகில இலங்கை ஜம்இய்யத்துல் உலமா

ஊடக அறிக்கை
1438-03-14 / 2106-12-15

சிரியா நாட்டு மக்களுக்காகப் பிரார்த்தனை செய்வோம்!

சிரியாவில் கடந்த ஜந்து ஆண்டுகளாக உள்நாட்டுப் போர் நடந்து வருகின்றது. அதன் காரணமாக பொதுமக்கள் மிகவும் அவதிப்பட்டுக் கொண்டு இருக்கின்றார்கள். கடந்த சில தினங்களாக சிரியாவின் பெரிய நகரமான அலெப்போவில் மோதல்கள் தீவிரமடைந்துள்ளன.

இதனால் அங்கிருந்து பொதுமக்கள் வெளியேறிக் கொண்டிருக்கின்றார்கள். அவர்கள் பல அசௌகரியங்களையும், கஷ்டங்களையும் எதிர்நோக்குகின்றார்கள். குழந்தைகள் பெண்கள் என்று பாராமல் அந்நாட்டு இராணுவமும் அதன் நேச நாட்டு இராணுவமும் சேர்ந்து முஸ்லிம் மக்களை படுகொலை செய்துவருகின்றது.

ஆதலால் சிரியா மக்களின் விடுதலைக்காகவும் அவர்களின் விமோசனத்திற்காகவும் துஆப் பிரார்த்தனைகளில் ஈடுபடுமாறும் அவர்களுக்கான உதவிகளை மேற்கொள்ள முன்வருமாறும் இலங்கை வாழ் அனைத்து முஸ்லிம்களையும் அகில இலங்கை ஜம்இய்யத்துல் உலமா வலியுறுத்திக் கேட்டுக் கொள்கின்றது.

 

அஷ்-ஷைக் எச். உமர்தீன்

பிரச்சாரக் குழு செயலாளர்
அகில இலங்கை ஜம்இய்யத்துல் உலமா

பின்வரும் துஆக்களை ஓதுவோம்:

 

اَللّهُمَّ  إِنَّا نَسْأَلُكَ يَا اللهُ  يَا عَظِيْمُ   يَا قَوِيُّ  يَا مَتِيْنُ.

اَللَّهُمَّ احْفَظْ حَلَبَ وَأهْلَهَا، اَللَّهُمَّ احْفَظْ حَلَبَ وَأهْلَهَا .

اَللّهُمَّ  احْفَظْ حَلَبَ وَأَهْلَهَا بِحِفْظِكَ يَا رَبَّ الْعَالَمِيْنَ.

اَللّهُمَّ إِنَّا اسْتَوْدَعْنَاكَ حَلَبَ وَأَهَلَهَا : أَمْنَهَا وَأَمَانَهَا،  لَيْلَهَا وَنَهَارَهَا ، أَرْضَهَا وَسَمَاءَهَا فَاحْفَظْهُمْ يَارَبَّ الْعَالَمِيْنَ مِنْ كُلٍ سُوْءٍ وَمَكْرُوْهٍ.

اَللّهُمَّ إِنَّا نَسْتَوْدِعُكَ رِجَالَ حَلَبَ وِنِسَاءَهَا وَشَبَابَهَا وَأَطْفَالَهَا.

اَللَّهُمَّ احْفَظْهُمْ وَارْعَهُمْ وَانْصُرْهُمْ عَلَى عَدُوِّهِمْ يَارَبَّ الْعَالَمِيْنَ.

اَللّهُمَّ  انْصُرْهُمْ عَلَى عَدُوِّهِمْ ، اَللّهُمَّ  انْصُرْهُمْ عَلَى عَدُوِّهِمْ ، اَللّهُمَّ  انْصُرْهُمْ عَلَى عَدُوِّهِمْ. اَللّهُمَّ انْصُر إِخْوَانَنَا الْمُسْلِمِيْنَ فِيْ كُلِّ مَكَانٍ اَلْمُسْتَضْعَفِيْنَ مِنْهُمْ  يَا رَبَّ الْعَالَمِيْنَ.

اَللّهُمَّ عَلَيْكَ بِمَنْ يُرِيْدُ ظُلْمًا أَوْ سُوْءً لِلْإِسْلَامِ وَالْمُسْلِمِيْنَ.

اَللّهُمَّ انْصُرِ الْإِسْلَامَ وَأَهْلَهُ بِرَحْمَتِكَ يَا أَرْحَمَ الرِّاحِمِيْنَ.

அகில இலங்கை ஜம்இய்யத்துல் உலமா மற்றும் ஜனாதிபதி சட்டத் தரணி அலி சப்ரி அவர்கள் தொடர்பாக பரப்பப்பட்டு வரும் பொய்யான செய்தி

பொது பல சேனாவுக்கு ஆதரவாக வாதிடுமாறு ஜனாதிபதி சட்டத் தரணி அலி சப்ரி அவர்களைப் பணித்தது அகில இலங்கை ஜம்இய்யத்துல் உலமாவாகும் என்று சமூக வலைத் தளங்களில் பரப்பப்பட்டு வரும் செய்தி முற்றிலும் பொய்யானதாகும்.

சமூகத்துக்குப் பிழையான தகவல்களை வழங்கி ஒற்றுமைக்குக் குந்தகம் விளைவிக்கும் இவ்வாறான செயற்பாடுகளை அகில இலங்கை ஜம்இய்யத்துல் உலமா வன்மையாகக் கண்டிக்கின்றது. இது பற்றி ஜனாதிபதி சட்டத் தரணி அலி சப்ரி அவர்கள் தெளிவு படுத்தம் பொழுது:

' சமூக ஊடகங்களில் பரப்பப்பட்டு வரும் மேற் கூறிய செய்தி முற்றிலும் பொய்யான தாகும். நான் ஒரு போதும் பொது பல சேனாவுக்கு ஆதரவாக வாதாடியதில்லை. SLTJ யின் செயலாளரான அப்துல் ராசிக் அவர்கள் புத்தர் மனித மாமிசம் சாப்பிட்டார் என்று கூறி பௌத்த மதத்தை இழிவு படுத்தியதற்காகவும் பௌத்த மதத்தின் மும்மணிகள் தொடர்பான நம்பிக்கையை அவை வெறும் மூன்று கற்கள் மாத்திரமே என்று கூறி பௌத்த மதத்தை இழிவு படுத்தியதற்காகவும் அவர் மீது பொலிசார் வழக்குத் தொடுத்த போது நான் அவ்வழக்கில் ஆஜராகினேன். அப்துல் ராசிக் அவர்களுக்கு முஸ்லிம்கள் ஒரு போதும் ஆதரவானவர்கள் அல்லர் என்பதையும் அவர் வழி தவறியவர் என்பதையும் அவரது மேற் கூறிய கூற்று இஸ்லாத்திற்கும் நபி ஸல்லல்லாஹு அலைஹிவஸல்லம் அவர்களின் போதனைக்கும் முற்றிலும் முரணானது என்பதையும் மக்களுக்குக் காண்பிக்கவே நான் இவ்வழக்கில் ஆஜராகினேன். இதன் காரணமாக அப்போது நாட்டில் காணப்பட்ட மோசமான சூழ் நிலையை எம்மால் கட்டுப் படுத்த முடிந்தது. அதே நேரம் இக்குறித்த வழக்கில் அல்குர்ஆனை அவமதித்தமைக்கு ஞானசார தேரருக்கு எதிராக வழக்குத் தொடருமாறு நான் பொலிசாரைக் கேட்டுக் கொண்டேன். பொலிசாரும் அதனை மேற்கொண்டனர். எனவே நான் பொது பல சேனாவுக்கு சார்பாக வாதாடினேன் என்பது முற்றிலும் பொய்யான செய்தியாகும்.' என்று குறிப்பிட்டுள்ளார்கள்.

எனவே அகில இலங்கை ஜம்இய்யத்துல் உலமா மேற்படி பொய்யான செய்திகளைப் பரப்புவதை விட்டும் தவிர்ந்து கொள்ளுமாறு அனைவரையும் வேண்டிக் கொள்வதோடு உரிய அதிகாரிகள் இவ்வாறான செயற்பாடுகளைத் தடுத்து நிறுத்துவதற்கு ஆவன செய்ய வேண்டும் என்றும் கேட்டுக் கொள்கின்றது.

 

அஷ்ஷைக் - பாழில் பாரூக்

செயலாளர் - ஊடகப் பிரிவு
அகில இலங்கை ஜம்இய்யத்துல் உலமா

 

بسم الله الرحمن الرحيم

தலைப்பு: குத்பா பிரசங்கம் - “நெருக்கடியான சூழ் நிலையில் நாம் என்ன செய்யவேண்டும்

தயாரிப்பு: பிரசாரக் குழு - அகில இலங்கை ஜம்இய்யத்துல் உலமா

திகதி: 24-11-2016 / 23-02-1438

 

الحمد الله رب العالمين والصلاة والسلام على محمد وعلى آله وصحبه أجمعين !

  • அனைத்து நிகழ்வுகளும் அல்லாஹ்விடமிருந்துதான் வருகின்றன இதனை உறுதி கொள்வது ஈமானின் அடையாளமாகும்.

(مَاۤ اَصَابَ مِنْ مُّصِيْبَةٍ اِلَّا بِاِذْنِ اللّٰهِ‌ؕ وَمَنْ يُّؤْمِنْۢ بِاللّٰهِ يَهْدِ قَلْبَهٗ‌ؕ وَاللّٰهُ بِكُلِّ شَىْءٍ عَلِيْمٌ‏ ( التغابن :11

நிகழும் நிகழ்வுகள் எல்லாம் அல்லாஹ்வின் அனுமதி கொண்டேயல்லாமல் (வேறு) இல்லை மேலும், எவர் அல்லாஹ்வின் மீது ஈமான் கொள்கிறாரோ, அவருடைய இருதயத்தை அவன் நேர்வழியில் செலுத்துகிறான் - அல்லாஹ் ஒவ்வொரு பொருளையும் நன்கறிந்தவன். ( அத் தஙாபுன்:11)

 

  • ஒரு விசுவாசி (உண்மை முஃமின்) இக்கட்டான எந்த நிலைமைகளிலும் பயப்படவும் மாட்டான் கவலைப்படவும் மாட்டான்.

(وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ) آل عمران :139

எனவே நீங்கள் தைரியத்தை இழக்காதீர்கள்; கவலையும் கொள்ளாதீர்கள்; நீங்கள் முஃமின்களாக இருந்தால் நீங்கள் தாம் உன்னதமானவர்களாக இருப்பீர்கள்.     (ஆலுஇம்ரான்:139)

 

  • உண்மைவிசுவாசிகளுக்கு அல்லாஹ்வின் உதவி வாக்குறுதி அளிக்கப்பட்டுள்ளது.

وكان حقا علينا نصر المؤمنين (الروم : 47)

முஃமின்களுக்கு உதவி புரிதல் நம் கடமையாகும்.      (அர்ரூம்:47)

 

  • பொதுவாக, நிலைமைகளில் மாற்றம் ஏற்படுவது அல்லாஹ்வின் பக்கம் திரும்புவதற்கே ஆகும்.

 

 وَبَلَوْنَاهُم بِالْحَسَنَاتِ وَالسَّيِّئَاتِ لَعَلَّهُمْ يَرْجِعُونَ (الأعراف : 168)

அவர்கள் (நன்மையின் பால்) திரும்பும் பொருட்டு அவர்களை நன்மைகளைக் கொண்டும், தீமைகளைக் கொண்டும் சோதித்தோம்.     (அல் அஃராப்:168)

 

நிலைமைகள் மோசமாகின்ற பொழுது நாம் செய்யவேண்டிய  கடமைகள் பற்றி எமது மார்க்கத்தில் தெளிவான சில வழிகாட்டல்கள் கூறப்பட்டுள்ளன.

  1. தொழுகை, நோன்பு, ஸதகா மற்றும் பாவமன்னிப்பு போன்ற நல்லமல்கள் மூலம் அல்லாஹ்வின் பக்கம் திரும்ப வேண்டும். இதுவே நபிமார்களினதும் ஸஹாபாக்களினதும் வழிமுறையாகும்.

يٰٓاَيُّهَا الَّذِيْنَ اٰمَنُوا اسْتَعِيْنُوْا بِالصَّبْرِ وَالصَّلٰوةِ ؕ اِنَّ اللّٰهَ مَعَ الصّٰبِرِيْنَ (البقرة:153 )

நம்பிக்கை கொண்டோரே! பொறுமையுடனும், தொழுகையுடனும்(அல்லாஹ் விடம்;) உதவி தேடுங்கள்;. நிச்சயமாக அல்லாஹ் பொறுமையுடையவர்களுடன் இருக்கின்றான்.   (அல் பகரா:153)

 

  • சிறுபான்மை சமூகமாக இருந்த பனூ இஸ்ரவேலர்களை இல்லாதொழிக்குமாறு பிர்அவ்னின் சமூகப்பிரமுகர்கள் ஆலோசனைக் கூறினர். அப்பொழுது பிர்அவ்ன் எடுத்த முடிவு பற்றியும் அந்த முடிவினால் பயந்து போன பனூ இஸ்ரவேலர்களுக்கு மூஸா(அலைஹிஸ்ஸலாம்) அவர்கள் எவ்வாறு வழிகாட்டினார்கள் என்பதைப் பற்றியும் அல் குர்ஆனில் பின் வருமாறு விபரிக்கப்பட்டுள்ளது.

 

وَقَالَ الْمَلَاُ مِنْ قَوْمِ فِرْعَوْنَ اَتَذَرُ مُوْسٰى وَقَوْمَهٗ لِيُفْسِدُوْا فِى الْاَرْضِ وَيَذَرَكَ وَاٰلِهَتَكَ‌ ؕ قَالَ سَنُقَتِّلُ اَبْنَآءَهُمْ وَنَسْتَحْىٖ نِسَآءَهُمْ‌ ۚ وَاِنَّا فَوْقَهُمْ قَاهِرُوْنَ    (الأعراف :127)

அதற்கு, ஃபிர்அவ்னின் சமூகத் தலைவர்கள் (அவனை நோக்கி) 'மூஸாவும் அவருடைய சமூகத்தாரும் பூமியில் குழப்பம் உண்டாக்கி, உம்மையும் உம் தெய்வங்களையும் புறக்கணித்து விடும்படி நீர் அவர்களை விட்டு வைப்பீரா?' என்று கேட்டார்கள். அதற்கு அவன், '(அவ்வாறன்று!) நாம் அவர்களுடைய ஆண் மக்களை வெட்டிக் கொன்றுவிட்டு, (அவர்களைச் சிறுமைப் படுத்துவதற்காக) அவர்களுடைய பெண் மக்களை மட்டும் உயிருடன் வாழவிடுவோம் - நிச்சயமாக நாம் அவர்கள் மீது பூரண ஆதிக்கம் பெற்றுள்ளோம்' என்று கூறினான்.  (அல் அஃராப்:127)

 

قَالَ مُوْسٰى لِقَوْمِهِ اسْتَعِيْنُوْا بِاللّٰهِ وَاصْبِرُوْا‌ ۚ اِنَّ الْاَرْضَ لِلّٰهِيُوْرِثُهَا مَنْ يَّشَآءُ مِنْ عِبَادِهٖ‌ ؕ وَالْعَاقِبَةُ لِلْمُتَّقِيْنَ (الأعراف :128(

(அதற்கு) மூஸா தன் இனத்தாரை நோக்கி 'நீங்கள் அல்லாஹ்விடம் உதவி தேடி (ஃபிர்அவ்னால் உங்களுக்கு ஏற்படும் துன்பங்களை) பொறுமையுடன் சகித்திருங்கள். நிச்சயமாக இந்த பூமி அல்லாஹ்வுக்குரியதே! அதனை அவன் தன் அடியார்களில் தான் விரும்பியவர்களுக்குச் சொந்தமாக்கி விடுவான். (அல்லாஹ்வுக்கு) பயப்படுகிறவர்களே முடிவில் வெற்றி பெறுவார்கள்' என்று கூறினார்.    (அல்அஃராப்:128)

 

قَالُـوْۤا اُوْذِيْنَا مِنْ قَبْلِ اَنْ تَاْتِيَنَا وَمِنْۢ بَعْدِ مَا جِئْتَنَا‌ ؕ قَالَ عَسٰى رَبُّكُمْ اَنْ يُّهْلِكَ عَدُوَّكُمْ وَيَسْتَخْلِفَكُمْ فِى الْاَرْضِ فَيَنْظُرَ كَيْفَ تَعْمَلُوْنَ (الأعراف:129(

(அதற்கு மூஸாவுடைய மக்கள் அவரை நோக்கி) நீங்கள் நம்மிடம் வருவதற்கு முன்னரும் நாங்கள் துன்புறுத்தப்பட்டோம்; நீங்கள் வந்ததன் பின்னரும் (துன்புறுத்தப்பட்டே வருகின்றோம். நீங்கள் வந்ததால் எங்களுக்கு ஒன்றும் பயனேற்படவில்லை) என்று கூறினார்கள். (அதற்கு மூஸா) 'உங்களுடைய இரச்சகன்; உங்களுடைய எதிரிகளை அழித்து (அவர்களுடைய) பூமிக்கு உங்களை அதிபதியாக்கி வைக்கக்கூடும். உங்களுடைய நடத்தை எவ்வாறு இருக்கின்றது என்பதை அவன் கவனித்துக் கொண்டு இருக்கின்றான்' என்று கூறினார். (அல்அஃராப்:129)

 

  • நபி(ஸல்) அவர்களும் இக்கட்டான எல்லா நிலைமைகளிலும் தொழுகையின் பக்கமே கவனம் செலுத்துவார்கள்.

 

عن حذيفة بن اليمان رضي الله عنه قال كان النبي صلى الله عليه وسلم  إذا حزبه أمر صلى (أبو داود(

 

  • அல்லாஹ்விடம் பாவ மன்னிப்புக் கோரி அவன் பக்கம் திரும்புவார்களை அல்லாஹ் சந்தோஷம் அடையச் செய்வான்.

 

)وَّاَنِ اسْتَغْفِرُوْا رَبَّكُمْ ثُمَّ تُوْبُوْۤا اِلَيْهِ يُمَتِّعْكُمْ مَّتَاعًا حَسَنًا اِلٰٓى اَجَلٍ مُّسَمًّى وَ يُؤْتِ كُلَّ ذِىْ فَضْلٍ فَضْلَهٗ ‌ؕ(هود: 3)

நீங்கள் உங்கள் இரட்;சகனிடத்தில் பாவ மன்னிப்பைக் கோரி (பாவங்களை விட்டு) அவன் பக்கம் திரும்புங்கள். (அவ்வாறு செய்தால்) ஒரு குறிப்பிட்ட (நீண்ட) காலம் வரையில் உங்களை இன்பமடையச் செய்வான். (தன் கடமைக்கு) அதிகமாக நன்மை செய்தவர்களுக்கு (மறுமையில்) அதிகமாகவே கொடுப்பான்.  (ஹுத்:3)

 

  • நெருக்கடியான நிலைமைக்கு தள்ளப்பட்டிருந்த யூனுஸ் (அலைஹிஸ்ஸலாம்) அவர்கள்: لا إله إلا أنت سبحان إني كنت من الظالمين  என்ற பிராத்தனையில் ஈடுபட்டு அல்லாஹ்வின் பக்கம் திரும்பிய போது அவர்களை துக்கத்திலிருந்து விடுவித்தாகவும்,  இவ்வாறே விசுவாசிகளுடன் நடந்து கொள்வதாகவும் அல்லாஹ் வாக்குறுதி அளித்திருக்கின்றான்.

فَنَادٰى فِى الظُّلُمٰتِ اَنْ لَّاۤ اِلٰهَ اِلَّاۤ اَنْتَ سُبْحٰنَكَ ‌ اِنِّىْ كُنْتُ مِنَ الظّٰلِمِيْنَ‌ ۖ  ஃفَاسْتَجَبْنَا لَهٗۙ وَنَجَّيْنٰهُ مِنَ الْـغَمِّ‌ؕ وَكَذٰلِكَ نُـنْجِى الْمُؤْمِنِيْنَ‏

 (الأنبياء :(87/88

(யூனுஸ் ஆகிய) அவர் (மீன் வயிற்றின்) ஆழ்ந்த இருளிலிருந்து 'உன்னைத் தவிர வணக்கத்திற்குரிய நாயன் யாருமில்லை; நீ மிகவும் தூய்மையானவன்; நிச்சயமாக நான் அநியாயக்காரர்களில் ஒருவனாகி விட்டேன்' என்று பிரார்த்தித்தார்.

எனவே, நாம் அவருடைய பிரார்த்தனையை ஏற்றுக் கொண்டோம்; அவரைத் துக்கத்திலிருந்தும் விடுவித்தோம். இவ்வாறே முஃமின்களையும் விடுவிப்போம்.(அல் அன்பியா:87,88)

 

  1. பாவமான விடயங்களிருந்து எம்மையும் எமது குடும்பத்திரையும் தற்காத்துக் கொள்ள வேண்டும். அப்படி  ஏதெனும் பாவங்கள் நிகழ்ந்தாலும் உடனடியாக அல்லாஹ்விடம் பாவமன்னிப்புத் தேட வேண்டும். 

 

பூமியில் குழப்பங்கள் வெளிப்படுவதற்கு அடிப்படைக் காரணம் மனிதர்களின் கைகள் சம்பாதித்த தீய வினைகளே ஆகும்.

وَمَاۤ اَصَابَكُمْ مِّنْ مُّصِيْبَةٍ فَبِمَا كَسَبَتْ اَيْدِيْكُمْ وَيَعْفُوْا عَنْ كَثِيْرٍؕ‏ )الشورى :30(

 

அன்றியும் தீங்கு வந்து உங்களை அடைவதெல்லாம், அது உங்கள் கரங்கள் சம்பாதித்த (காரணத்)தால் தாம், எனினும், பெரும்பாலானவற்றை அவன் மன்னித்தருள்கின்றான்.    (அஷ்ஷுரா:30)

 

  • உமர் இப்னு அப்துல் அஸீஸ் (ரஹ்) அவர்கள் தனது படைத் தளபதி மன்ஸுர் இப்னு ஹாலிப் என்பவருக்கு நீண்டதொரு அறிவுரை பகர்ந்தார்கள். அதில் பின்வரும் விடயத்தையும் குறிப்பிட்டார்கள்.

 

فإن الذنوب أخوف عندي على الناس من مكيدة عدوهم وإنما نعادي عدونا وننصر عليهم بمعصيتهم ولولا ذلك لم تكن لنا قوة بهم لأن عددنا ليس كعددهم ولا عدتنا كعدتهم فلو استوينا نحن وهم في المعصية كانوا أفضل منا في القوة و العدد  (حلية الأولياء)

 

கருத்துச் சுருக்கம்: விரோதிகளுடைய சூழ்ச்சியை விட நான் மிகவும் அதிகமாகப்பயப்படுவது எமது மக்களால் நிகழும் பாவங்களையே ஆகும். விரோதிகள் அல்லாஹ்வுக்கு மாறு செய்கின்றார்கள் என்ற  காரணத்தினால் தான் அவர்களுக்கு எதிராக எங்களுக்கு அல்லாஹ்வின் உதவி வந்துக்கொண்டிருக்கின்றது. அவ்வாறு இல்லையெனில் அவர்களை எதிர்த்து நிற்க எங்களிடம் வேறு எந்த சக்தியும்கிடையாது. அவர்களின் எண்ணிக்கையும், ஏற்பாடுகளும், எங்களைக் காட்டிலும் அதிகமானவையாகும். நாங்களும் அவர்களும் அல்லாஹ்வுக்கு மாறு செய்வதில் சமனாகிவிட்டால் அவர்கள் தான் மிகைப்பார்கள் ஏனெனில் அவர்கள் எங்களைவிட என்ணிக்கையிலும் ஏனைய ஏற்பாடுகளிலும் மிகச் சிறந்தவர்களாக இருக்கின்றார்கள்.

  • ரோமர்கள் தோல்வியை தழுவிய பொழுது அவர்களிடம் ஹிரக்கல் மன்னன் உங்களை எதிர் கொள்ளும் முஸ்லிம் படையினர்களைப் பற்றி எனக்குக் கூறுங்கள் ஏனெனில் நீங்கள் அவர்களை விட அதிகமானவர்களாக இருக்கும் நிலையில் உங்களுக்கு ஏன் தோல்வி ஏற்படுகின்றது என்று விசாரித்தான். அப்போது ஒரு முக்கிய பிரமுகர்  பின்வருமாறு பதில் கூறினார்.

 

من أجل أنهم يقومون الليل ويصومون النهار ويوفون بالعهد ويأمرون بالمعروف وينهون عن المنكر ويتناصفون بينهم، ومن أجل أنا نشرب الخمر ونزني ونركب الحرام وننقض العهد ونغصب ونظلم ونأمر بالسخط وننهى عما يرضى الله ونفسد في الأرض.

(البداية والنهاية)

கருத்துச் சுருக்கம்: அவர்களுக்கும் எங்களுக்கும் இடையில் வித்தியாசம் இருக்கின்றது. அவர்கள் இரவில் நின்று வணங்கின்றனர், பகலில் நோன்பு நோக்கின்றனர், உடன் படிக்கையை பூர்த்தி செய்கின்றனர், நன்மையை ஏவி தீமையை தடுக்கின்றனர், தங்களுக்கு மத்தியில் நீதமாக நடந்து கொள்கின்றனர். ஆனால் நாங்களே மது அருந்துகின்றோம், விபசாரம் புரிகின்றோம், தடுக்கப்பட்ட செயல்களில் ஈடுபடுகின்றோம், உடன் படிக்கைகளை முறிக்கின்றோம், மேலும்  இப்பூமியில் குழப்பம் செய்கின்றோம், இதை கேட்ட ஹிரக்கல் மன்னர் நீர் எனக்கு உண்மையை கூறிவிட்டீர் என பதில் கூறினார்;.

 

  1. கொடுக்கல் வாங்கல் மற்றும் செயல்பாடுகள் மூலம் அந்நியமக்களுடன் நல்ல முறையில் நடந்து இஸ்லாதத்தின் உண்மை வடிவத்தை எடுத்துச் செல்வோம்.

இஸ்லாம் சாந்தியையும், சமாதானத்தையும், ஐக்கியத்தையும் விரும்பும் மார்க்கம்;. மேலும்  மனிதர்களுக்கு மாத்திரமல்ல சகல படைப்பினங்களுடனும் கருணையுடன் நடக்கும் படி கட்டளையிடும் மார்க்கம்.  இஸ்லாம் என்பதன் கருத்து சாந்தி சமாதானம் என்பதாகும்.  இந்த விடயங்களை எமது செயல் பாடுகள், நன்னடத்தைகள் மூலம் மாற்று மத சகோதர்களுக்கு  புரியவைக்கவேண்டும்.

இது சம்பந்தமாக அகில இலங்கை ஜம்இய்யத்துல் உலமாவினால் வெளியிடப்பட்டிருக்கம் (சமாஜ சங்வாத) எனும் பிரசுரத்தை முடியுமான அளவு பிறசமூகங்களுக்கு கிடைக்கச்செய்ய வேண்டும்.

 

  1. நாங்கள் வாழும் நாட்டில் மனிதநேயத்தை கட்டியெழுப்பக்கூடிய, மனித விழுமியங்களை பாதுகாக்கக்கூடிய மார்க்கத்திற்கு முரண் இல்லாத அனைத்து விடயங்களிலும் பிற சமூகங்களுடன் சேர்ந்து ஒத்துழைப்பு வழங்கவேண்டும்.

நபி(ஸல்) அவர்கள் தனது இருபதாம் ஆம் வயதில் தனது சிறிய தந்தைமார்களுடன் சேர்ந்து  حلف الفضول   என்ற ஒப்பந்தத்தில் கலந்து கொண்டார்கள்;. அந்த ஒப்பந்தத்தில் குறிப்பிடப்பட்ட மிக முக்கிய விடயம் யாதெனில் அனைத்து மக்களினதும்  உரிமைகள் பாதுகாக்கப்பட வேண்டும் அதற்காக அனைவரும் ஒன்றினைந்து முயற்சிக்கவேண்டும்.

நபி(ஸல்லல்லாஹு அலைஹி வஸல்லம்) அவர்கள் பிற்காலத்தில் இந்த ஒப்பந்தத்தைப் பற்றி நினைவு கூறும் போது இது போன்ற  ஒப்பந்ததில் கலந்து கொள்ள  இப்போது நான் தயார் என்று கூறினார்கள்.

 

  1. எங்களுக்கு மத்தியில் ஒற்றுமைப்படுவோம்.

எங்களுக்குள் சண்டையிட்;டுக்கொள்வது அல்லாஹ்வின் உதவியையும் எங்களிடமிருக்கும்; தைரியத்தையும் இல்லாமல் ஆக்கி விடும். எனவே சிறிய சிறிய விடயங்களில் எல்லாம் பிரிந்துக் கொண்டு எங்களுக்கு மத்தியில் பிரிவினை வாதத்தை உண்டாக்கும் முயற்சியில் அறவே ஈடுபடக் கூடாது.

وَاَطِيْعُوا اللّٰهَ وَرَسُوْلَهٗ وَلَا تَنَازَعُوْا فَتَفْشَلُوْا وَتَذْهَبَ رِيْحُكُمْ‌ وَاصْبِرُوْا‌ ؕ اِنَّ اللّٰهَ مَعَ الصّٰبِرِيْنَ‌ۚ‏ )الأنفال: 46)

இன்னும் அல்லாஹ்வுக்கும், அவனுடைய தூதருக்கும் கீழ்படியுங்கள் - நீங்கள் கருத்து வேறுபாடு கொள்ளாதீர்கள்;. (அவ்வாறு கொண்டால்) கோழைகளாகி விடுவீர்கள். உங்கள் பலம் குன்றிவிடும்; (துன்பங்களைச் சகித்துக் கொண்டு) நீங்கள் பொறுமையாக இருங்கள் - நிச்சயமாக அல்லாஹ் பொறுமையுடையவர்களுடன் இருக்கின்றான்.   )அன்பால்:46)

 

  1. வீண் வதந்திகளை தவிர்ந்து கொள்வேம்

உறுதிப்படுத்தப் படாத  தகவல்களை அடுத்தவர்களுக்கு பகிர்வது பாவமாகும் நபி(ஸல்லல்லாஹு அலைஹி வஸல்லம்) அவர்கள் கூறினார்கள்

كفي بالمرء كذبا أن يحدث بكل ما  سمع (مسلم في مقدمة صحيحه)

தான் செவிமடுக்கும் எல்லா விடயங்களையும் பிறருக்கு கூறுபவன் பொய்யன் ஆவான்.     (முஸ்லிம்)

 

يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ) الحجرات: 6(

முஃமின்களே! ஃபாஸிக் (தீயவன்) எவனும் உங்களிடம் ஒரு செய்தியைக் கொண்டு வந்தால், அதைத் தீர்க்க விசாரித்துக் கொள்ளுங்கள்; (இல்லையேல்) அறியாமையினால் (குற்றமற்ற) ஒரு சமூகத்தாருக்கு நீங்கள் தீங்கு செய்து விடலாம்;. பின்னர் நீங்கள் செய்தவை பற்றி நீங்களே கைசேதப் படுபவர்களாக (கவலைப்படுபவர்களாக) ஆவீர்கள். (அல்ஹுஜராத் : 6)

 

  1. எங்களுக்கு கிடைத்த செய்திகளை மற்றவர்களுக்கு பகிர்வதற்கு முன்னர் உலமாக்கள், சமூகத்தின் தலைவர்கள், மற்றும் துறைசார்ந்தவர்களினது, கவனத்திற்கு கொண்டு செல்வோம்.

 

وَإِذَا جَاءَهُمْ أَمْرٌ مِّنَ الْأَمْنِ أَوِ الْخَوْفِ أَذَاعُوا بِهِ ۖ وَلَوْ رَدُّوهُ إِلَى الرَّسُولِ وَإِلَىٰ أُولِي الْأَمْرِ مِنْهُمْ لَعَلِمَهُ الَّذِينَ يَسْتَنبِطُونَهُ مِنْهُمْ ۗ وَلَوْلَا فَضْلُ اللَّهِ عَلَيْكُمْ وَرَحْمَتُهُ لَاتَّبَعْتُمُ الشَّيْطَانَ إِلَّا قَلِيلًا )النساء:83(

பயம் அல்லது அமைதியை பற்றிய யாதொரு செய்தி அவர்களுக்கு எட்டினால் (உடனே) அதனை (வெளியில்) கூற ஆரம்பித்து விடுகின்றனர். (அவ்வாறு செய்யாது) அதனை (அல்லாஹ்வுடைய) தூதரிடமும், அவர்களில்(மார்க்க ஞானமுள்ள) அதிகாரமுடையவர்களிடம் தெரிவித்தால் அவர்களிருந்து அதனை ஆய்ந்து எடுப்பவர்கள் அதனை நன்கறிந்து (தக்க நடவடிக்கைகளை எடுத்துக்) கொள்வார்கள். )அன்னிஸா:83)

இந்த விடயங்களை கருத்தில் கொண்டு நாம் செயல் படுவோம் அல்லாஹ் நம் அனைவருக்கும் நல்வழி காட்டுவானாக.

ஆமீன்!

முஸ்லிம் பாராளுமன்ற உறுப்பினர்களுடனான சந்திப்பு 

கடந்த 20.11.2016 ஆம் திகதி ஞாயிற்றுக் கிழமை மாலை அகில இலங்கை ஜம்இய்யத்துல் உலமா நாட்டின் தற்பொழுதுள்ள நிலமை தொடர்பில் முஸ்லிம் அமைப்புகளுடனான சந்திப்பொன்றை ஏற்பாடு செய்திருந்தது. அன்றைய சந்திப்பில் பல அமைப்புக்கள் கலந்துகொண்டு முஸ்லிம்களுக்கெதிராக முன்னெடுக்கப்படும் நடவடிக்கைகள் தொடர்பில் கலந்துரையாடியதுடன் பல்வேறு தீர்மானங்களும் எடுக்கப்பட்டன. அதன் முதற்கட்டமாக 21.11.2016 ஆம் திகதி முஸ்லிம் பாராளுமன்ற உறுப்பினர்களுடனான சந்திப்பை அகில இலங்கை ஜம்இய்யதுல் உலமாவின் தலைமையகத்தில் நடாத்துவதாக தீர்மானிக்கப்பட்டது.

அன்றைய தீர்மானத்துக்கமைய முஸ்லிம் பாராளுமன்ற உறுப்பினர்களுடனான சந்திப்பு நேற்றைய தினம் (21.11.2016) இரவு 08:00 மணியவில் அகில இலங்கை ஜம்இய்யதுல் உலமாவின் தலைமையகத்தில் நடைபெற்றது. ஜம்இய்யாவின் கௌரவப் பொதுச் செயலாளர் அஷ்-ஷைக் எம்.எம்.ஏ. முபாறக் அவர்கள் அனைவரையும் வரவேற்று கூட்டத்தை ஆரம்பித்துவைத்தர்கள். அதனை தொடர்ந்து அகில இலங்கை ஜம்இய்யதுல் உலமாவின் கௌரவத் தலைவர் அஷ்-ஷைக் முப்தி எம்.ஐ எம். றிஸ்வி அவர்கள் கூட்டத்தின் நோக்கம் பற்றி தெளிவு படுத்தினார்கள்.

தற்போது நாட்டில் காணப்படும் அசாதாரண நிலையை சீராக்க முஸ்லிம் பாராளுமன்ற உறுப்பினர்கள் அனைவரும் ஒன்றிணைந்து முனைப்புடன் செயற்பட வேண்டும் என்றும் அனைத்து முஸ்லிம்களும் பாவங்களிலிருந்து தௌபா செய்து அல்லாஹுதஆலாவின் பக்கம் திரும்ப வேண்டும் என்றும் கேட்டுக் கொண்டதுடன் முஸ்லிம் தனியார் சட்டம் தொடர்பான விடயங்களையும் தெளிவு படுத்தினார்.

மேற்குறித்த விடயங்கள் தொடர்பில் கூட்டத்தில் கலந்து கொண்டு பாராளுமன்ற உறுப்பினர்களும் முஸ்லிம் அமைப்புகளின் பிரதிநிதிகளும் தமது கருத்துக்களை முன்வைத்தனர். அத்துடன் தற்போது எழுந்துள்ள ISIS சர்ச்சை தொடர்பான விடயங்களை அணுகும் முறை பற்றியும் இனவாதத்திற்கு எதிராக பதியப்பட்ட வழக்குகள் முன்னெடுத்துச் செல்லப்படாமல் தேங்கி நிற்பது பற்றியும் கலந்தாலோசிக்கப்பட்டது.

மேலும் 22.11.2016 ஆம் திகதி (இன்று) மேற்குறிப்பிட்ட விடயங்களை அமைச்சரவையில் கலந்துரையாடுவதாக அமைச்சரவை உறுப்பினர்கள் உறுதியளித்தனர். அத்துடன் 23.11.2016 ஆம் திகதி நீதி அமைச்சர் விஜேதாஸ ராஜபக்ஷ அவர்களை சந்தித்து இந்நாட்டு முஸ்லிம்களின் உண்மையான நிலை பற்றியும் ஏலவே முஸ்லிம் அமைப்புகள் 23.07.2015 வெளியிட்ட ISIS க்கு எதிரான பிரகடனம் பற்றியும் தெளிவுபடுத்துவதாக தீர்மானிக்கப்பட்டது.

இறுதியாக முஸ்லிம் பாராளுமன்ற உறுப்பினர்கள் அரசாங்கத்துடன் தொடர்பு கொண்டு தற்போது நாட்டில் நிலவி வரும் அசாதாரண நிலையை தணிக்க உரிய நடவடிக்கை எடுப்பதாக உறுதியளித்தனர். அத்துடன் முஸ்லிம் தனியார் சட்ட விடயத்திலும் ISIS தொடர்பாக தற்போது எழுந்துள்ள பிரச்சினைகளுக்கு தீர்வு காண்பதிலும் முனைப்புடன் செயற்படுவதாகவும் உறுதியளித்தனர்.