14.10.2018 ஆம் திகதி அகில இலங்கை ஜம்இய்யத்துல் உலமாவின் குருணாகல் மாவட்ட நிறைவேற்றுக்குழு ஒன்று கூடல் மாவட்ட  காரியாலயத்தில்  தலைவர் அஷ்-ஷைக் சுஹைப் தீனி அவர்களின் தலைமையில் நடைபெற்றது. இக்கூட்டத்தில் பிரதேசக் கிளைகளை ஊக்குவிக்கும் செயற்திட்டத்தின் முதற்கட்டமாக பம்மன்ன கிளையின் பதவி தாங்குனர்கள் அழைக்கப்பட்டு கிளைத் தொடர்பாக கலந்துரையாடப்பட்டது. மேலும் அகில இலங்கை ஜம்இய்யத்துல் உலமாவினால் அறிமுகப்படுத்தப்பட்டு செயற்படுத்தப்பட்டு வரும் தேசிய வலயமைப்புத் திட்டம் தொடர்பாகவும் கலந்துரையாடப்பட்டது.

 

ஊடகப்பிரிவு 

அகில இலங்கை ஜம்இய்யத்துல் உலமா 

14.10.2018 ஆம் திகதி அகில இலங்கை ஜம்இய்யத்துல் உலமாவின் தோப்பூர் கிளையின் ஒன்று கூடல் கிளையின் தலைவர் அஷ்-ஷைக் நளீம் நுழாரி அவர்களின் தலைமையில் தோப்பூர் நூரிய்யா அரபிக்கல்லூரியில் நடைபெற்றது. இதில் முஸ்லிம் தனியார் சட்டம் தொடர்பாகவும், தற்போது விண்ணப்பம் கோரப்பட்டுள்ள சமய ஆசிரியர் நியமனத்திலுள்ள குறைபாடுகள் தொடர்பாகவும் கலந்தாலோசிக்கப்பட்டது.

 

ஊடகப்பிரிவு

அகில இலங்கை ஜம்இய்யத்துல் உலமா

14.10.2018 ஆம் திகதி அகில இலங்கை ஜம்இய்யத்துல் உலமாவின் அம்பாரை மாவட்டக் கிளையின் மாதாந்த ஒன்று கூடல் மாவட்டக் கிளையின் தலைவர் அஷ்ஷெய்க் ஆதம்பாவா மதனி அவர்களின் தலைமையில் பாலமுனை ஜம்இய்யதுஸ் ஸஹ்வாவில் நடைபெற்றது. இவ்வொன்று கூடலில் முஸ்லிம் தனியார் சட்டம் தொடர்பாகவும், தற்போது விண்ணப்பம் கோரப்பட்டுள்ள சமய ஆசிரியர் நியமனத்திலுள்ள குறைபாடுகள் தொடர்பாகவும் கலந்தாலோசிக்கப்பட்டது.

 

ஊடகப்பிரிவு

அகில இலங்கை ஜம்இய்யத்துல் உலமா

 

 

2018.10.10 அன்று அகில இலங்கை ஜம்இய்யத்துல் உலமாவின் தலைமைக் காரியாலயத்தில் முஸ்லிம் பாராளுமன்ற உறுப்பினர்களுடனான கலந்துரையாடல் ஒன்று இடம் பெற்றது. அகில இலங்கை ஜம்இய்யத்துல் உலமாவின் பிரதித் தலைவர் அஷ்-ஷைக் அகார் முஹம்மத் அவர்களின் தலைமையில் இடம் பெற்ற இந்த கலந்துரையாடலின் வரவேற்புரையை அகில இலங்கை ஜம்இய்யத்துல் உலமாவின் பொதுச்செயலளர் அஷ்-ஷைக் முபாறக் அவர்கள் நிகழ்த்தினார்கள். பொதுப்பணிகளில் தம்மை ஈடுபடுத்த சந்தர்ப்பம் கிடைத்திருப்பது அல்லாஹ்வின் அருள் எனவும், எமது பாதுகாப்புக்களை இஸ்லாம் கூறுகின்ற துஆக்களை ஒதுவதின் மூலமாக உறுதிப்படுத்திக் கொள்ளுமாறும் கேட்டு வருகை தந்தவர்களை வரவேற்றுக் கொண்டார்.

தொடர்ந்தும் தலைமை உரையை அகில இலங்கை ஜம்இய்யத்துல் உலமாவின் பிரதித் தலைவர் அஷ்-ஷைக் அகார் முஹம்மத் அவர்கள் வழங்கினார்கள். அவர் தனதுரையில் இந்நாட்டு முஸ்லிம்கள் பல  உரிமைகளையும் சலுகைகளையும் பெற்று வாழ்ந்து வருகிறார்கள்.இவற்றைப் பெற்றுத்தந்த நமது முன்னோருக்கும் நாட்டுக்கும் நாம் நன்றி சொல்ல வேண்டும்.

முஸ்லிம் தனியார் சட்ட திருத்தம் தொடர்பான விவகாரம் ஷரீஆ துறை அறிஞர் மட்டத்திலும் துறை சார்ந்தோர் மட்டத்திலும் பேசப்பட்டு தீர்வுகள் பெறப்பட வேண்டிய  ஒன்று இது பற்றி பொது வெளியில் அலச வேண்டிய அவசியம் இல்லை என்பதே எமது நிலைப்பாடாக  இருந்து வந்தது.

சட்டத் திருத்தம் தொடர்பில் மிகப் பெரும்பாலான விடயங்களில் அனைவர் மத்தியிலும் உடன்பாடே காணப்படுகின்றது. காலத்துக்கு தேவையான நடைமுறைக் கேற்ற பல சீர்திருத்தங்களிலும் கருத்தொற்றமை நிலவுகின்றது. சில விடயங்களில் நிலவும் கருத்து வேறுபாடுகளை சம்பந்தப்பட்ட தரப்பினர் அமர்ந்து தீர்த்துக் கொள்ள முடியும் என நாம் நம்புகின்றோம். அந்த வகையில் தொடர்ந்து கலந்துரையாடல்களை நடாத்தி வருகின்றோம்.

 ஷரீஆவை அணுக ஒரு மன்ஹஜ்-வழிமுறை இன்றியமையாததாகும்.இல்லாத போது பெரும் குழப்ப நிலையே உருவாகும்.இந்த வகையில் இலங்கை முஸ்லிம் சமூகத்தின் ஷரீஆ, பிக்ஹு சார்ந்த விவகாரங்களுக்கான மன்ஹஜாக ஷாபிஈ மத்ஹப் அமைவதே  ஏற்புடையதும்  நடைமுறை சாத்தியமானதுமாகும்.முஸ்லிம் பெரும்பான்மை நாடுகளிலும் அங்கீகரிக்கப்பட்ட  ஒரு மத்ஹபின் அடிப்படையிலேயே முஸ்லிம் தனியார் சட்டம் அமைந்திருப்பதை காணமுடியும்.

இறுதி நபித்துவத்திற்கு அச்சுறுத்தலாக இருக்கும் சக்திகள் விடயத்தில் முஸ்லிம் அரசியல் தலைமைகள் கரிசனை கொள்ள வேண்டும்  என்றும் அவர் குறிப்பிட்டார்.

தொடர்ந்தும் முஸ்லிம் விவாக விவாகரத்து சம்பந்தமான தெளிவு ஒன்றை அகில இலங்கை ஜம்இய்யத்துல் உலமாவின் பிரதிச் செயலாளர் அஷ்-ஷைக் முர்ஷித் அவர்கள் வழங்கினார்கள். அவர் தனதுரையில் பின்வரும் நான்கு விடயங்கள் கட்டாயமாக இந்த திருத்தத்தில் உள்ளடக்கப்பட வேண்டும் என குறிப்பிட்டார்.

  • காழி நீதி மன்றங்களினதும் காழி நீதிபதிகளினதும் தரம் அதிகரிக்கப்பட வேண்டும்.
  • காழி நீதி மன்ற மேல் சபைகளில் பெண்களின் பிரதி நிதித்துவம் இடம் பெற வேண்டும்.
  • மதா கொடுப்பனவு சட்டத்தில் உள்வாங்கப்பட வேண்டும்.
  • பெண்களின் திருமண வயது 12 இலிருந்து 16 ஆகவும், ஆண்களின் திருமண வயது 12 இலிருந்து 18 ஆகவும் அதிகரிக்கப்பட வேண்டும்.

அதே போன்று பின்வரும் விடயங்களின் மார்க்க தெளிவுகளையும் முன்வைத்தார்.

  • காழிக்கு முன்னால் தலாக் கூறுவது.
  • பதியப்படாத நிகாஹ்கள் செல்லுபடியற்றவை .
  • திருமண வயதெல்லை.
  • பஸ்கு விவாகரத்திற்கு மதா கொடுப்பனவு கொடுத்தல்.
  • வலியின் அவசியம்.

அதனைத் தொடர்ந்து பாராளுமன்ற உறுப்பினர்களுக்கு தமது கருத்துக்களை  தெரிவிக்க நேரம் வழங்கப்பட்டது. தன் போது பலரும் தமது சந்தேகங்களை கேட்டறிந்து கொண்டதோடு உரிய முறையில் இந்த சட்ட திருத்தம் இடம் பெற வேண்டுமெனவும் குறிப்பிட்டனர்.

இறுதியாக அகில இலங்கை ஜம்இய்யத்துல் உலமாவின் உப தலைவர்களில் ஒருவரான அஷ்-ஷைக் ஹாஷிம் ஷூரி அவர்களின் நன்றியுரையுடன் இந்நிகழ்வு இனிதே நிறைவு பெற்றது.

 

ஊடகப்பிரிவு

அகில இலங்கை ஜம்இய்யத்துல் உலமா 

 

 

05.10.2018 ஆம் திகதி அகில இலங்கை ஜம்இய்யத்துல் உலமாவின் நிந்தவூர் கிளை மற்றும் நிந்தவூர் ஜூம்மா பள்ளிவாயல் ஆகியவற்றின் தலைமையில் இயங்கும் புகைத்தல் மற்றும் போதைப் பொருளுக்கு எதிரான செயலணியினால் அப்பிரதேசத்தின் 07 பள்ளிகளை சேர்ந்த கடை உரிமையாளர்களுடனான விழிப்புணர்வு நிகழ்வொன்று அட்டப்பள்ளம் ஹுதா ஜும்ஆப் பள்ளிவாயலில் அஸர் தொழுகையைத் தொடர்ந்து இடம்பெற்றது.

 

ஊடகப்பிரிவு

அகில இலங்கை ஜம்இய்யத்துல் உலமா

 

 

05.10.2108 ஆம் திகதி  அகில இலங்கை ஜம்இய்யத்துல் உலமாவின் நிந்தவூர் கிளையின் ஏற்பாட்டில் அக்கிளையில்  புதிதாக இணைக்கப்பட்ட உலமாக்களை அறிமுகம் செய்து வைக்கும் நிகழ்வொன்று நிந்தவூர் ஜுமுஆ பள்ளிவாசலில் இடம் பெற்றது. இந்நிகழ்வில் நிந்தவூர் பிரதேச மக்கள் கலந்து சிறப்பித்தனர்.

 

ஊடகப்பிரிவு

அகில இலங்கை ஜம்இய்யத்துல் உலமா

 

 

2018.10.09

 

இன்னாலில்லாஹி வஇன்னா இலைஹி ராஜிஊன்.

தனது வாழ்வை கல்வி மற்றும் சமூகப் பணிகளில் அமைத்துக் கொண்ட முன்னாள் சட்டமா அதிபரும், ஜனாதிபதி சட்டத்தரணியுமான  முஹம்மத் ஷிப்லி அஸீஸ் அவர்கள் 2018.10.08 அன்று காலமானதையிட்டு அகில இலங்கை ஜம்இய்யத்துல் உலமா தனது ஆழ்ந்த அனுதாபத்தை தெரிவித்துக் கொள்கிறது.

முஹம்மத் ஷிப்லி அஸீஸ் அவர்கள் ஜனாதிபதி சட்டத்தரணியாகவும், இலங்கை வழக்கறிஞர்கள் சங்கத்தின் (BASL) முன்னாள் தலைவராகவும், அரசியலமைப்பு குழுவின் உறுப்பினராகவும் செயற்பட்டுள்ளார். இலங்கை நீதித்துறை வரலாற்றில் இரண்டாவது முஸ்லிம்  சட்டமா அதிபர் என்ற கௌரவமும் இவருக்குண்டு.

பல சந்தர்ப்பங்களில் அகில இலங்கை ஜம்இய்யத்துல் உலமாவுடன் இணைந்து செயற்பட்ட இவர் இன்னும் பல சமூக நலச் செயற்பாடுகளில் தன்னை அட்பணித்து செயற்பட்டு வந்துள்ளார். இலங்கை அஹதிய்யா அமைப்பின் தலைவராக பணியாற்றிய இவர் முஸ்ஸிம் விவாவக விவாகரத்து சட்ட திருத்தக் குழுவின் உறுப்பினராக இருந்து இந்நாட்டு முஸ்லிம்களுக்கு பாரிய சேவையாற்றினார்.

அன்னாரின் மறைவால் துயருற்றிருக்கும் அன்னாரின் குடும்பத்தினருக்கும் நண்பர்களுக்கும் ஜம்இய்யா தனது அனுதாபத்தை தெரிவித்துக் கொள்கின்றது. அல்லாஹுத்தஆலா அன்னாரின் பாவங்களை மன்னித்து அன்னாரது நற்கருமங்களைப் பொருந்திக் கொள்வானாக.

 

அஷ்-ஷைக் எம்.எம்.ஏ முபாறக்

பொதுச் செயலாளர்,

அகில இலங்கை ஜம்இய்யத்துல் உலமா

 

 

ACJU/GEN/10-18/001


ஊடக அறிக்கை


அஸ்ஸலாமு அலைக்கும் வரஹ்மதுல்லாஹி வபரகாதுஹு


நாட்டின் பல பாகங்களிலும் இந்நாட்களில் பெய்து வருகின்ற கடும் மழையினால் பல்வேறு பாதிப்புக்கள் ஏற்பட்டுள்ளன. மக்களின் அன்றாட வாழ்க்கைக்கு இதனால் மிகவும் சிரமம் ஏற்பட்டுள்ளது. இம்மழை காரணமாக பல இடங்களிலும் வெள்ள அனர்த்தங்கள் ஏற்பட்டுள்ளதுடன் அனர்த்த எச்சரிக்கையும் விடுக்கப்பட்டுள்ளது.


இந்நிலையில் பாதிக்கப்பட்டவர்களுக்கு முடியுமான உதவிகளைச் செய்யுமாறு அவ்வப் பிரதேச மக்களிடம் அகில இலங்கை ஜம்இய்யத்துல் உலமா வேண்டிக் கொள்கிறது. அதே நேரம் இத்தொடர் மழையின் ஆபத்துக்களிலிருந்தும், அதனால் ஏற்படுகின்ற கஷ்டங்களிலிருந்தும் பாதுகாக்குமாறும், இன்னல்களில் சிக்கியிருக்கின்ற மக்களுக்கு அருள் புரியுமாறும் அல்லாஹ்விடம் பிரார்த்திக்குமாறு நாட்டு மக்களை அகில இலங்கை ஜம்இய்யத்துல் உலமா கேட்டுக் கொள்கிறது.


மேலும் வெள்ளம், மண்சரிவு போன்ற அனர்த்தங்கள் ஏற்படும் சாத்தியமுள்ள இடங்களில் உள்ள மக்கள் அரசாங்கம் விடுக்கும் அறிவுறுத்தல்களைக் கேட்டு நடக்குமாறும், உலமாக்கள் தத்தமது பிரதேச மக்களுக்கு இது போன்ற நிலைகளில் எவ்வாறு செயற்பட வேண்டுமென வழிகாட்டுவதுடன் கீழ் வரும் துஆக்களை அதிகமாக ஒதிவர ஆர்வமூட்டுமாறும்இ மக்களை அல்லாஹ்வின் பக்கம் திருப்பி அவனது உதவிகளை பெற்றுக் கொள்ள வழிகாட்டுமாறும் ஜம்இய்யா கேட்டுக் கொள்கிறது.


மழை தேவையை விட அதிகரித்தால் ஒத வேண்டிய துஆ


اللهم حَوَالَيْنَا، ولا علينا، اللهم على الآكام والظِّرَاب وبطون الأودية، ومنابت الشجر

இறைவா! எங்கள் சுற்றுப் புறங்களில் (இம்மழையைப் பொழியச் செய்வாயாக!) எங்களுக்குப் பாதகமாக இதை நீ ஆக்கிவிடாதே. இறைவா! மணற்குன்றுகள், மலைகள், ஓடைகள், விளைநிலங்கள் ஆகியவற்றின் மீது (இம்மழையைப் பொழியச் செய்வாயாக!)'
(புஹாரி 1013)


காற்று வேகமாக வீசும் போது ஒது வேண்டிய துஆ


اللهُمَّ إِنِّي أَسْأَلُكَ خَيْرَهَا، وَخَيْرَ مَا فِيهَا، وَخَيْرَ مَا أُرْسِلَتْ بِهِ، وَأَعُوذُ بِكَ مِنْ شَرِّهَا، وَشَرِّ مَا فِيهَا، وَشَرِّ مَا أُرْسِلَتْ بِهِ
"இறைவா, இந்தக் காற்றின் நன்மையையும் அதனுள்ளே மறைந்திருக்கும் நன்மையையும் அது எதனுடன் அனுப்பப் பெற்றுள்ளதோ அதன் நன்மையையும் உன்னிடம் வேண்டுகிறேன். இந்தக் காற்றின் தீங்கிலிருந்தும், அதனுள்ளே மறைந்திருக்கும் தீங்கிலிருந்தும், அது எதனுடன் அனுப்பப் பெற்றுள்ளதோ அதன் தீங்கிலிருந்தும் உன்னிடம் பாதுகாப்புக் கோருகிறேன்"
(முஸ்லிம் 899)


அல்லாஹுத்தஆலா சீரான காலநிலையைத் தந்து நம்மனைவரையும் ஆபத்துக்களில் இருந்து பாதுகாப்பானாக.

 

அஷ்-ஷைக் எஸ்.எல். நவ்பர்
செயலாளர், சமூக சேவைக் குழு
அகில இலங்கை ஜம்இய்யத்துல் உலமா


அகில இலங்கை ஜம்இய்யத்துல் உலமா குச்சவெளி கிளையின் அலுவலக திறப்பு விழா அல்லாஹ்வின் உதவியால் 2018.09.29 அன்று மாலை மிகச் சிறப்பாக நடைபெற்றது. குச்சவெளி பிரதேச ஜம்இய்யாவின் தலைவர் அஷ்ஷெய்ஹ் IS அ.அஸீஸ் அவர்களின் தலைமையில் நடைபெற்ற இந்நிகழ்வுக்கு பிரதம அதிதியாக அகில இலங்கை ஜம்இய்யத்துல் உலமாவின் நிறைவேற்றுக்குழு உறுப்பினரும் திருகோணமலை மாவட்ட கிளை ஜம்இய்யாவின் தலைவருமான கலாநிதி அஷ்ஷெய்ஹ் AR நஸார் பலாஹி அவர்களும், கௌரவ அதிதிகளாக பிரதேச சபையின் உப தவிசாளரும் இக்கட்டிடத்தை  வழங்கி உதவி செய்த அல் ஹாஜ் ஜே. அன்சார் JP அவர்களும் சிறப்பு விருந்தினர்களாக உலமாக்களும், மஸ்ஜித் நிருவாகிகளும் கலந்துகொண்டார்கள். சிறப்பான இந் நிகழ்வில் பிரதேச மூத்த உலமாக்களை நன்றியுடன் கௌரவித்து நினைவுச் சின்னங்கள் வழங்கியதும் குறிப்பிடத்தக்க விடயமாகும்.

 

ஊடகப்பிரிவு

அகில இலங்கை ஜம்இய்யத்துல் உலமா

 

 

தலைவர், செயலாளர்

மாவட்ட, பிரதேசக் கிளை

அகில இலங்கை ஜம்இய்யத்துல் உலமா

 

அஸ்ஸலாமு அலைக்கும் வறஹ்மத்துல்லாஹி வபறகாத்துஹு

அகில இலங்கை ஜம்இய்யத்துல் உலமா பத்வா வழங்கும் முறை பற்றிய விளக்கம்

1924 ஆம் ஆண்டு ஆரம்பிக்கப்பட்ட அகில இலங்கை ஜம்இய்யத்துல் உலமா பதினைந்து உப பிரிவுகள் ஊடாக முஸ்லிம் சமூகத்திற்கு பல பணிகளை ஆற்றி வருகின்றது. இவற்றில் பத்வா வழங்கும் பணி மிகவும் மகத்தான ஒன்றாகும்.

அகில இலங்கை ஜம்இய்யத்துல் உலமாவில் பத்வா வழங்குவதற்கென்று ஒரு குழு நியமிக்கப்பட்டுள்ளது. இக்குழுவில் நாடளாவிய ரீதியில் துறை சார்ந்த ஆலிம்கள் அங்கம் வகிக்கின்றனர். ஷாபிஈ மத்ஹபைச் சேர்ந்த ஆலிம்கள்; பலர் இதில்; இருப்பதுடன், ஹனபி மத்ஹபைச் சார்ந்தவர்கள் உட்பட தஃவா அமைப்புகளைச் சேர்ந்த ஆலிம்களுமாக மொத்தம் நாற்பத்து மூன்று பேர் உறுப்பினர்களாக உள்ளனர். பத்வாக் குழு மூன்றாண்டுக்கு ஒரு முறை நிறைவேற்றுக் குழுவால் தெரிவு செய்யப்படுகின்றது. மேலும், பத்வாவின் செயற்பாடுகளைத் துரிதப்படுத்துவதற்காக பத்வாக் குழுவிலிருந்து 13 ஆலிம்கள் உள்ளடங்கிய அவசர பத்வாக் குழுவும் நிறைவேற்றுக் குழுவால் தெரிவு செய்யப்படுகின்றது. 

ஜம்இய்யா ஆரம்பிக்கப்பட்ட நாள் முதல் ஷாபிஈ மத்ஹபின் அடிப்படையிலேயே பத்வாக்கள் வழங்கப்பட்டு வருகின்றன. 2003.09.24 ஆம் திகதி நடைபெற்ற பத்வாக் குழுக் கூட்டத்திலும், 2017.01.12 ஆம் தேதி நடைபெற்ற பத்வாக் குழுக் கூட்டத்திலும் ஷாபிஈ மத்ஹப் அடிப்படையிலேயே பத்வா வழங்க வேண்டும் என்ற விடயம் எழுத்து மூலமாக உறுதிப்படுத்தப்பட்டுள்ளது.

ஆதாரங்களை நோக்கும் விதம் வேறாக இருந்தாலும், நான்கு மத்ஹப்களும் ஆதாரங்களை அடிப்படையாக வைத்தே மார்க்க விடயங்களைச் சட்டமாக்கியுள்ளன. நான்கு மத்ஹப்களிலும் ஷாபிஈ மத்ஹப் ஒரு நடு நிலையான மத்ஹப் மட்டுமல்லாமல், சுன்னாவுக்கு மிகவும் நெருங்கிய ஒரு மத்ஹபாகும் என்பதைக் கற்றறிந்த யாவரும் அறிவர். ஷாபிஈ மத்ஹபில் ஏற்றுக்கொள்ளப்பட்ட (றாஜிஹான) கருத்தை பத்வாவில் கூறுவதுடன், தேவைப்படும் பட்சத்தில் ஏனைய மத்ஹப்களின் கருத்துக்களும் பத்வாவில் குறிப்பிடப்படுகின்றன. இவை அனைத்தும் பத்வாக் குழுவின் ஒப்புதலுடனேயே வெளியிடப்படும்.

இரத்த தானம், IVF  முறையில் கருத்தரித்தல் போன்ற தற்காலத்தில் ஏற்பட்டுள்ள நவீன மார்க்க பிரச்சினைகளுக்குத் தீர்வு காண்பதற்கு, தற்கால பத்வா வழங்கும் அமைப்புக்களின் கருத்துக்களும் பெற்றுக் கொள்ளப்பட்டு, பத்வாக் குழுக் கூட்டத்தில் நன்கு கலந்துரையாடப்பட்டு சமுகமளித்தவர்களின் பூரண ஒப்புதலுடன் பத்வா வழங்கப்படுகின்றது.

மேலும், பத்வாக் குழுக் கூட்டம் மூன்று மாதங்களுக்கு ஒருமுறையும், அவசர பத்வாக் குழுக் கூட்டம், குறைந்த பட்சம் மாதத்திற்கு இரண்டு முறைகளும் நடைபெறுகின்றது. அவசர பத்வாக் குழுக் கூட்டத்தில் முடிவெடுக்கப்படும் பத்வாக்களின் மாதிரி வடிவம் எழுதப்பட்டு, அது பத்வாக் குழு உறுப்பினர்களுக்கு மாத்திரம் உள்ள வட்ஸ்அப் குழுவில் அனுப்பப்படும். உறுப்பினர்கள்    கருத்துக் கூறுவதற்கு மூன்று நாட்கள் அவகாசம் வழங்கப்பட்டு, உறுப்பினர்களிடமிருந்து கருத்துக்கள் ஏதும் வராதவிடத்து அனைவரதும் அங்கீகாரமாகக் கருதப்பட்டு பத்வா வெளியிடப்படும்.

இவ்வடிப்படையில் இதுவரை 345 பத்வாக்கள் வெளியிடப்பட்டுள்ளன. கடந்த வருடம் 300 பத்வாக்களை நூல் வடிவில் வெளியிடும் நோக்கில், அதன் தொகுப்பைத் தற்போதைய பத்வாக் குழுவின் கருத்துக்களைக் கண்டறியும் முகமாக பத்வாக் குழுவின் பல உறுப்பினர்களுக்கு கையளிக்கப்பட்டது. இதுவரை எவ்வித கருத்துக்களும் உறுப்பினர்களிடமிருந்து எழுத்து மூலம் முன்வைக்கப்படவில்லை என்றிருந்தாலும், எதிர்காலத்தில் முன்வைக்கப்படுமிடத்து அவை ஆலேசனைக்கு எடுத்துக்கொள்ளப்படும்.

மேலும், MMDA திருத்தம் விடயத்தில், ஷாபிஈ மத்ஹபைப் பின்பற்றுபவர்கள் தமது விவாக மற்றும் விவாகரத்து விடயங்களை ஷாபிஈ மத்ஹபின் அடிப்படையில் செய்துகொள்வதற்கு ஏதுவாகவே திருத்தங்கள் உள்வாங்கப்படவேண்டும்; எனும் விடயத்தில் மிகவும் உறுதியாக உள்ளது. இதனால், ஜம்இய்யா பல சவால்களைச் சந்தித்துக் கொண்டிருப்பதையும் தாங்கள் அறிவீர்கள்.

பத்வாக் குழுவின் செயற்பாடுகள் அனைத்தும் குழு உறுப்பினர்களுக்கு மத்தியில் வெளிப்படையாகவே நடைபெறுகின்றன. இதுபற்றிய தெளிவுகள் ஏதும் தேவைப்படின் அல்லது கருத்துக்கள் ஏதும் கூற இருப்பின் தலைமையகத்தையோ அல்லது பத்வாக் குழுவின் செயலாளர் M.L.M இல்யாஸ் ஆகிய என்னையோ தொடர்பு கொள்ளலாம்.

 

வஸ்ஸலாம்.

அஷ்-ஷைக் எம்.எல்.எம் இல்யாஸ்

செயலாளர், பத்வாக் குழு                

அகில இலங்கை ஜம்இய்யத்துல் உலமா